1. Jehova okwa holola shike moshikunino shaEden kombinga yomutondi gwetu?

ADAM oku na okukala a li e shi kutya omayoka ihaga popi. Otashi vulika a li ta fekele kutya oshishitwa shopambepo, osho sha li sha popi naEva okupitila meyoka. (Gen. 3:1-6) Adam naEva kaya li ye shi sha kombinga yoshishitwa shoka shopambepo. Nonando ongawo, Adam okwa li a ningi etokolo lya puka, sho a pilamene He gwomegulu omunahole, e ta vulika kwaangoka kee shi nando onale. (1 Tim. 2:14) Nziya Jehova okwa tameke okuholola uuyelele kombinga yomutondi ngoka a pukitha Adam naEva, noku uvaneke kutya masiku omutondi ngoka omukolokoshi, ota ka hanagulwa po. Jehova okwa popi wo kutya oshishitwa shopambepo shoka sha popi okupitila meyoka, otashi ka kala shi na oonkondo dhokukondjitha mboka ye hole Kalunga. — Gen. 3:15.

2, 3. Omolwashike Satana inaa popiwa mo naanaa mOmanyolo gOshihebeli, manga Mesiasa inaa holoka?

² Jehova ine tu lombwela nando edhina lyomuyengeli ngoka e li ompinge naye. * Okwa tokola nokuli kaa holole nando osha kombinga yedhina lyomutondi ngoka, sigo pwa piti omimvo 2 500 lwaampono,  konima yuunashipotha moshikunino shaEden. (Job 1:6) Omambo gatatu gOmanyolo gOshihebeli, ngaashi Ondjalulo yotango, Job naSakaria, ogo owala ga tumbula edhina Satana ndyoka tali ti “Omupataneki.” Omolwashike omutondi gwetu inaa popiwa mo naanaa mOmanyolo gOshihebeli pethimbo Mesiasa inaa holoka?

³ Osha fa shi li ngeyi kutya mOmanyolo gOshihebeli, Jehova ina popya oshindji kombinga yaSatana niilonga ye. Elalakano lyaJehova lyokunyolitha iitopolwa yOmanyolo ngoka, okundhindhilikitha mo Mesiasa nokukwathela aapiya ye ye mu landule. (Luk. 24:44; Gal. 3:24) Sho Mesiasa a holoka, Jehova okwe mu longitha pamwe naalongwa ye, ya holole oshindji kombinga yaSatana naayengeli mboka ya gama kombinga ye. * Shoka otashi opalele, molwaashoka Jesus naamboka taya ka pangela pamwe naye, Jehova oyo ta ka longitha ya hanagule po Satana naalanduli ye. — Rom. 16:20; Eh. 17:14; 20:10.

4. Omolwashike kaatu na okukala twa tila Omuhindadhi?

⁴ Omuyapostoli Petrus okwa popi Satana Omuhindadhi “ta ndunduma a fa onime,” na Johannes okwe mu ithana “eyoka” nosho wo “oshikoko.” (1 Pet. 5:8; Eh. 12:9) Ihe inatu pumbwa okukala twa tila unene Omuhindadhi, oshoka oonkondo dhe odha ngambekwa. (Lesha Jakob 4:7.) Ohatu ambidhidhwa kuJehova, kuJesus nokaayengeli aadhiginini. Kekwatho lyawo, otatu vulu okukondjitha omutondi gwetu. Nonando ongawo, otwa pumbwa okutseya omayamukulo gomapulo gatatu ga simana taga landula: Satana okwa nwetha mo uuyuni shi thike peni? Satana oha kambadhala ngiini okunwetha mo aantu? Oshike shono Satana itaa vulu okuninga? Sho tatu kundathana omapulo ngano, otatu ka tala wo shoka tatu vulu okwiilonga mo.   

5, 6. Omolwashike omapangelo gopantu itaaga vulu okweeta omalunduluko ngoka aantu ya pumbwa lela?

⁵ Ongundu onene yaayengeli oya li ya gama kombinga yaSatana. Manga Eyelu inaali ya, Satana okwa li a pukitha aayengeli yamwe ya ye momilalo naakiintu aana yaantu. Ombiimbeli oya holola uushili mboka, sho ya popi pathaneko kutya oshikoko oshinene osha kombo po oshititatu shoonyothi dhokegulu nosha gwile nadho kombanda yevi. (Gen. 6:1-4; Jud. 6; Eh. 12:​3, 4) Sho aayengeli mboka ya thigi po uukwanegumbo waKalunga, oyi itula kohi yepangelo lyaSatana. Aayengeli mboka aanashipotha, kaye li owala ongundu yaalongi yomiyonena. Satana okwa dhika po epangelo lye, nokwi iningi omukwaniilwa ye mwene, a holela Uukwaniilwa waKalunga. Oku unganeka oompwidhuli, okwe dhi pa oonkondo nokwe dhi ninga aapangeli yuuyuni. — Ef. 6:12.

⁶ Satana oha longitha ehangano lye lyopambepo, a pangele omapangelo agehe gopantu. Shoka osha yele mo nawa, sho u ulukile Jesus “omapangelo agehe gomuuyuni,” e ta ti: “Otandi ku ningi omupangeli gwaayihe notandi ku pe omauyamba agehe, oshoka ayihe mbika otandi vulu oku yi pa kehe ngoka nda hala.” (Luk. 4:5, 6) Nonando opu na enwethomo lyaSatana, omapangelo ogendji ohaga ningile aakwashigwana yago iinima iiwanawa. Aapangeli yamwe ohaya kala ye na omadhiladhilo omawanawa. Nonando ongawo, kapu na nando epangelo lyopantu nenge omupangeli gwopantu ta vulu okweeta omalunduluko ngoka aantu ya pumbwa lela. — Eps. 146:3, 4; Eh. 12:12.

7. Kakele komapangelo, Satana oha longitha ngiini omalongelokalunga giifundja noongeshefa dhomuuyuni? (Tala kethano lyopetameko.)

⁷ Satana noompwidhuli dhe, ihaya longitha owala omapangelo, ihe ohaya longitha wo omalongelokalunga giifundja noongeshefa dhomuuyuni, ya pukithe “uuyuni auhe.” (Eh. 12:9) Satana  oha longitha omalongelokalunga giifundja a humithe komeho iifundja kombinga yaJehova. Shimwe ishewe, omuhindadhi okwa tokola toko a ningithe aantu oyendji ngaashi tashi vulika ya dhimbwe edhina lyaKalunga. (Jer. 23:26, 27) Aantu oyendji mboka ye na omitima omiwanawa, ohaya dhiladhila kutya otaya longele Kalunga, ihe paushili wo wene otaya longele oompwidhuli. (1 Kor. 10:20; 2 Kor. 11:13-15) Natango Satana oha humitha komeho iifundja okupitila moongeshefa dhomuuyuni. Pashiholelwa uuyuni mbuka ohawu longo aantu kutya omukalo gwa dhenga mbanda gwokukala wa nyanyukwa, okulalakanena iimaliwa nokwiikongela omaliko ogendji. (Omayel. 18:11) Mboka yi itaala iifundja mbyoka, ohaya kala yi ipyakidhila nokwiikongela ‘emona,’ pehala lyokulongela Kalunga. (Mat. 6:24) Mokweendela ko kwethimbo, ohole yawo yokuhola iinima yopamaliko ohayi kutha po ohole yawo yokuhola Kalunga. — Mat. 13:22; 1 Joh. 2:15, 16.

8, 9. (a) Iitsa iyali yini tatu vulu okwiilonga koshiholelwa shaAdam, Eva noshaayengeli mboka inaaya vulika kuKalunga? (b) Okukala tu shi kutya Satana okwa nwetha mo uuyuni shi thike peni, ohashi tu kwathele ngiini?

⁸ Oshiholelwa shaAdam, Eva noshaayengeli mboka inaaya vulika, otashi tu longo iitsa iyali ya simana. Shotango, otwa pumbwa okutseya kutya opu na owala oombinga mbali, notwa pumbwa okuhogolola po yimwe. Otu na okuhogolola kutya otatu kala aadhiginini kuJehova nenge otatu gama kombinga yaSatana. (Mat. 7:13) Oshitiyali, mboka taya gama kombinga yaSatana, ihaya mono uuwanawa tawu kalelele. Adam naEva oya li ya mono ompito yokutula po omithikampango dhawo yene dhaashoka shi li mondjila naashoka sha puka. Oompwidhuli odha pondola okunwetha mo omapangelo gopantu. (Gen. 3:22) Okugama kombinga yaSatana, aluhe ohaku eta iizemo iiwinayi. — Job 21:7-17; Gal. 6:7, 8.

⁹ Okukala tu shi kutya Satana ota nwetha mo uuyuni, ohashi tu kwathele ngiini? Ohashi tu kwathele tu kale tu na etaloko li li pandjele li na ko nasha nomapangelo, nohashi tu pe oonkondo dhokuuvitha. Otu shi kutya Jehova okwa hala tu simaneke aapangeli. (1 Pet. 2:17) Onkee ano, okwa tegelela tu vulike koompango ndhoka ya tula po, shampa owala itaadhi yi moshipala omithikampango Dhe. (Rom. 13:1-4) Ihe otwa pumbwa okudhimbulukwa kutya otu na okukala aadhiginini, nokatu na okwaambidhidha nando ongundu yimwe yopapolotika nenge aawiliki yopantu. (Joh. 17:15, 16; 18:36) Molwaashoka otu wete kutya Satana ota kambadhala okunyateka edhina lyaJehova, shoka ohashi tu ningitha tu kale twa halelela okulonga yalwe oshili kombinga Ye. Ohatu tseyitha edhina lyaJehova noku li longitha, oshoka otu shi kutya okuninga ngawo, ohaku tu etele lela uuwanawa shi vulithe okukala tu hole iimaliwa nomaliko. — Jes. 43:10; 1 Tim. 6:6-10.

10-12. (a) Satana okwa li a longitha ngiini omwigo a kwate ko aayengeli yamwe? (b) Oshike tatu ilongo kwaashoka sha ningilwa aayengeli oyendji?

¹⁰ Satana oha longitha omikalo tadhi pondola a nwethe mo aantu. Pashiholelwa, oha longitha iinima mbyoka tayi nana aantu, ya ninge iinima pamukalo gwe. Shimwe ishewe, oha kambadhala oku tu ningitha iinima haayo, ta longitha omatilitho.

¹¹ Natu taleni nkene Satana a li a longitha omwigo tagu nana, a kwate ko ongundu onene yaayengeli. Oku na okukala e ya konakona uule wethimbo, manga inee ya heka ya game kombinga ye. Sho aayengeli yamwe ya gwile momwigo ngoka, oya yi momilalo naakiintu aana yaantu, e taya vala nayo aanona yoombinzi mbali, mboka ya ka kala taya hepeke aantu. (Gen. 6:1-4) Kakele koku ya makela ya ye momilalo, Satana otashi vulika wo a li e ya uvanekele kutya otaya ka mona oonkondo dhokupangela aantu ayehe. Satana otashi vulika a li ta kambadhala okuya moshipala okugwanithwa po kweuvaneko ‘lyoluvalo lwomukiintu’. (Gen. 3:15) Ihe Jehova ine etha nando oompangela noonkambadhala dhaSatana naayengeli ye, dhi pondole. Onkee ano, okwe etitha Eyelu pethimbo mpoka.

¹² Oshike tatu vulu okwiilonga moshiningwanima shika? Inatu dhiladhila nando kutya itatu vulu okunwethwa mo kuSatana tu ye moluhondelo nenge tu kale tu na iikala yokwiihola mwene. Aayengeli mboka ya wayimine Satana, oya kala taya longele Kalunga omimvo odhindji. Ihe nonando oya li popepi naKalunga, oyendji oye etha uuhalu uuwinayi wu koke muyo. Momukalo gwa faathana, otashi vulika twa longela Jehova omimvo odhindji mehangano lye lyokombanda yevi. Ihe nonando ongawo, uuhalu uuwinayi otawu vulu okukoka mutse. (1 Kor. 10:12) Osha simana tu kale tatu ikonakona nokweekelahi omadhiladhilo inaaga yogoka nuuntsa. — Gal. 5:26; Lesha Aakolossa 3:5.

13. Omwigo gulwe guni hagu pondola, ngoka Satana ha longitha, notu na oku gu yanda ngiini?

¹³ Omwigo gulwe hagu pondola ngoka Satana ha longitha, okukala wa hala okutseya nawa kombinga yuumpulile. Kunena, Satana oha ningitha aantu ya kale ya hokwa oompwidhuli, okupitila momalongelokalunga giifundja nomomainyanyudho. Oomuvi, omaudhano gopaelektronika nayilwe, ohayi ningitha uumpulile wu kale wa fa tawu hokitha. Ongiini tatu vulu okuyanda kaatu ye momwigo ngono? Katu na okukala twa tegelela ehangano lyaKalunga li tu tulile po elandulathano lyomainyanyudho ngoka ga taambiwa ko naangoka inaaga taambiwa ko. Kehe gumwe gwomutse okwa pumbwa okudheula eiyuvo lye, li kale metsokumwe nomithikampango dhaKalunga. (Heb. 5:14) Ngele otwa tula miilonga omayele gomuyapostoli Paulus ga nwethwa mo, ngoka tage tu lombwele kutya ohole yetu yokuhola Kalunga “nayi kale yashili,” otatu ka ninga  omatokolo gopandunge. (Rom. 12:9) Otatu vulu okwiipula ngeyi: ‘Mbela omainyanyudho ngoka nda hogolola, otaga ka ningitha ndje ndi kale nda fa omufudhime? Uuna aakonakonimbiimbeli yandje nenge mboka handi talele po ya mono omainyanyudho ngoka nda hogolola, mbela otaya ka dhiladhila ngaa kutya ohe tula miilonga shoka handi uvitha?’ Ngele oohapu niilonga yetu otayi tsu kumwe naashoka Kalunga a tegelela tu ninge, itatu ka ya nuupu momwigo gwaSatana. — 1 Joh. 3:18.

14. Ongiini Satana ta vulu oku tu tilitha, opo kaatu kale aadhiginini kuJehova, nongiini tatu vulu okupondola?

¹⁴ Kakele kokulongitha omwigo ngoka, Satana oha kambadhala oku tu tilitha, opo kaatu kale aadhiginini kuJehova. Pashiholelwa, oha ningitha omapangelo gi indike iilonga yetu yokuuvitha. Nenge ota vulu okuhwahwameka aaniilonga pamwe natse nenge aanasikola ooyakwetu, ye tu sheke, sho hatu kala metsokumwe nomithikampango dhOmbiimbeli dhopamikalo. (1 Pet. 4:4) Otashi vulika wo a nwethe mo yamwe yomaakwanezimo yetu, ye tu teye omukumo, twaa kale hatu yi kokugongala. (Mat. 10:36) Ongiini tatu vulu okupondola? Shotango, otu na okukala twa tegelela oonkalo dha tya ngawo, oshoka Satana otse ta kondjitha. (Eh. 2:10; 12:17) Otu na okutseya kutya uupyakadhi uunene owo mbono kutya Satana ota ti kutya tse ohatu longele owala Kalunga, ngele iinima tayi tu endele nawa. Ota ti kutya ngele otwi iyadha muudhigu, otatu ka thiga po Kalunga. (Job 1:9-11; 2:4, 5) Hugunina, otu na okwiinekela muJehova e tu pe oonkondo dhokutaalela uupyakadhi mboka. Natu dhimbulukwe kutya Jehova ke na siku e tu dhimbwe. — Heb. 13:5.

15. Mbela Satana ota vulu oku tu thiminika kaatu ninge shoka twa hala? Shi yelitha.

¹⁵ Satana ita vulu okuthiminika aantu kaaya ninge shoka ya hala. (Jak. 1:14) Ihe aantu oyendji ihaye shi dhimbulula mo kutya oya gama kombinga yaSatana. Ihe ngele oyi ilongo oshili, ohaya ningi etokolo kutya oya hala okulongela lye. (Iil. 3:17; 17:30) Ngele otwa tokola okulonga ehalo lyaKalunga, Satana ke na shoka ta vulu okuninga po a teye po uudhiginini wetu. — Job 2:3; 27:5.

16, 17. (a) Satana noompwidhuli dhe, oye na omangambeko galwe geni? (b) Omolwashike kaatu na okukala twa tila okugalikana kuJehova mokule?

¹⁶ Satana noompwidhuli dhe, oya ngambekwa ishewe miinima yilwe. Pashiholelwa, Omanyolo kage na nando mpoka ga popya kutya otaya vulu okumona shoka tatu dhiladhila nenge shoka shi li momitima dhetu. Jehova naJesus oyo owala haya vulu okumona kutya omuntu ota dhiladhila shike. (1 Sam. 16:7; Mark. 2:8) Ongiini ngele omuntu ota popi nenge ta galikana mokule? Mbela otu na okukala twa tila kutya Satana nenge oompwidhuli, otashi vulika yu uve omagalikano getu, e tayi idhopo mo? Hasho nando. Omolwashike mbela? Ihatu kala twa tila okulonga iilonga iiwanawa mehangano lyaJehova, molwaashoka owala tashi vulika Satana e tu mone. Sha faathana, katu na okukala twa tila okugalikana muule, molwaashoka owala Satana tashi vulika e tu uvite. Onkee ano, Ombiimbeli oyi na iiholelwa oyindji yaapiya yaKalunga mboka ya li ya galikana mokule. Ihe kapu na shoka tashi ulike kutya oya li ya tila kutya pamwe Satana ote ya uvu. (1 Aak. 8:22, 23; Joh. 11:41, 42; Iil. 4:23, 24) Ngele otwa ningi ngaashi tatu vulu tu popye notu katuke metsokumwe nehalo lyaKalunga, otatu vulu okukala nuushili kutya Jehova ite ke etha nando Satana e tu ehameke sigo aluhe. — Lesha Episalomi 34:7.

¹⁷ Otwa pumbwa okutseya omutondi gwetu, ihe inatu pumbwa okutilithwa kuye. Nonando otu li aantu inaatu gwanenena, otatu vulu okusinda Satana, kekwatho lyaJehova. (1 Joh. 2:14) Ngele otwa kondjitha Satana, ote tu yi ontuku. (Jak. 4:7; 1 Pet. 5:9) Aagundjuka oyo unene ya ninga iihakanwa yaSatana. Oshike taya vulu okuninga kondandalunde ya kondjithe Satana? Epulo ndyoka otali ka kundathanwa moshitopolwa tashi landula.