1. Ombepo yokwiihola mwene ndjoka yi li muuyuni, otayi vulu ngiini okuguma eifupipiko lyetu?

OMOLWASHIKE shi li eshongo okutula miilonga shoka tatu ilongo mOohapu dhaKalunga? Etompelo limwe olyo kutya ohashi pula eifupipiko, opo tu vule okulonga shoka shu uka, nonando kashi shi oshipu. ‘Momasiku gahugunina’ ngaka tu li mugo, otwa kundukidhwa kaantu mboka ‘yi ihole yo yene, ye hole eliko, aainomi, ye hole uuntsa’ nosho wo “aapwidhi” nenge tu tye mboka kaaye na eipangelo. (2 Tim. 3:1-3) Tu li aapiya yaKalunga, otu shi kutya iikala mbyoka iiwinayi, ihe omathimbo gamwe otashi vulika tu wete mboka ye yi na taya tyapula onkalamwenyo noya nyanyukwa. (Eps. 37:1; 73:3) Otashi vulika tu ipule tatu ti: ‘Mbela otashi kwatha sha ngaa okupititha oompumbwe dhayalwe komeho yoompumbwe dhandje? Ngele onda kala “omudhinwa,” mbela aantu itaya ka simaneka ndje we?’ (Luk. 9:48) Ngele otwe etha ombepo yokwiihola mwene ndjoka yi li muuyuni yi tu nwethe mo, otashi ka yona po ekwatathano lyetu ewanawa ndyoka hatu nyanyukilwa megongalo. Otashi ka kala wo oshidhigu kaantu ye tu dhimbulule mo kutya otu li Aakriste. Ihe ngele otwa konakona iiholelwa iiwanawa mbyoka yi li mOmbiimbeli noku  yi landula, otashi ke tu etela iizemo iiwanawa.

2. Oshike tatu vulu okwiilonga kaapiya yaKalunga aadhiginini yopethimbo lyonale?

² Ngele otwa hala okuholela mboka ya li aadhiginini pethimbo lyonale, otwa pumbwa okutala kutya oshike ya ningi, shoka she tu ningitha tu kale twa hala oku ya holela. Oshe ende ngiini ya pange uukuume naKalunga, ya kale ya hokiwa kuye nokukala ye na oonkondo ya longe ehalo lye? Ngele otwa lesha nokutedhatedha kiiholelwa yawo, otashi ka koleka eitaalo lyetu.

3, 4. (a) Omomikalo dhini Jehova he tu longo? (b) Omolwashike tatu vulu okutya iikulya yopambepo oya kwatela mo oshindji shi vulithe owala pokukala tu na ontseyo?

³ Ohatu pewa omayele omawanawa nosho wo edheulo okupitila mOmbiimbeli, miileshomwa yetu, kepandja lyetu lyokointaneta, mopolohalama yotiivii JW, mokugongala nomiigongi yetu. Ihe shi ikolelela koohapu dhaJesus, ndhoka dhi li muJohannes 4:34, iikulya yopambepo oya kwatela mo oshindji shi vulithe owala pokukala tu na ontseyo. Oshindji shoka sha kwatelwa mo oshini? Jesus okwa ti: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.”

⁴ KuJesus, iikulya yopambepo oya li ya kwatela mo okulonga ehalo lyaKalunga. Omeityo lini okulonga ehalo lyaKalunga kwa fa iikulya? Ngaashi owala omalutu getu haga kala gu uvite nawa noga paluka uuna twa li iikulya iiwanawa, otatu ka kala wo tu na omukumo neitaalo lyetu otali ka kala lya kola, ngele otwa kala tatu longo ehalo lyaKalunga. Otatu ka mona wo omwenyo gwaaluhe. Iikando ingapi wa yile kelongekidho lyiilonga yomomapya wu uvite wa vulwa, ihe sho wa ka za momapya esiku ndyoka owa pepelelwa nowa nyatipala?

5. Uuwanawa wuni tatu ka mona, ngele otwa katuka pandunge?

⁵ Ngele otwa kala tatu longo ehalo lyaKalunga, shoka otashi ti kutya otu na oondunge. (Eps. 107:43) Aantu mboka ye na owino ohaya mono iizemo iiwanawa. Ombiimbeli otayi ti: ‘Omaliko goye agehe guuyamba itaga yelekwa nadho. Oyo omuti gwomwenyo gwaamboka taye yi kwata, naanelago oomboka taye yi dhiginine.’ (Omayel. 3:13-18) Jesus okwa ti: “Ngashingeyi omu shi [uvite] ko. One aanelago, ngele tamu shi ningi.” (Joh. 13:17) Aalongwa yaJesus oya li taya ka kala ya nyanyukwa sigololo, ngele oya tsikile okuninga shoka Jesus e ya lombwela. Kaya li ya taamba ko omalongo ge nokulandula oshiholelwa she pompito owala ndjoka, ihe onkalamwenyo yawo ayihe.

6. Omolwashike tu na okutsikila okutula miilonga shoka tatu ilongo?

⁶ Kunena, natse otwa pumbwa okutsikila okutula miilonga shoka tatu ilongo. Natu shi thaneke ngeyi: Makeninga otashi vulika a kale e na iilongitho nosho wo ontseyo. Ihe opo a mone mo uuwanawa, ongele owala te yi longitha. Ngele okwa kala nokupangela monakuziwa nokwa mona ontseyo yontumba, oku na okutsikila okuninga shoka i ilonga, opo a tsikile okukala e na ontseyo nokukala omupangeli omwaanawa. Sha faathana, natse otashi vulika petameko sho twi ilongo oshili twa kala twa nyanyukwa, molwaashono twa tula miilonga shoka twi ilonga mOmbiimbeli. Ihe opo tu kale twa nyanyukwa sigo aluhe, otu na okutsikila okutula miilonga kehe siku shoka Jehova te tu longo.

7. Opo tu kale tu na owino, oshike tatu vulu okwiilonga kiiholelwa yomOmbiimbeli?

⁷ Ngashingeyi natu ka kundathaneni oonkalo dhimwe, moka eifupipiko lyetu tashi vulika li makelwe. Otatu ka tala wo nkene aapiya yaKalunga aadhiginini yopethimbo lyonale, ya li ya piti mudho. Opo tu kale twa kola pambepo, otwa pumbwa okuninga oshindji shi vulithe owala pokukala tu na ontseyo. Onkee ano, dhiladhila  nkene to vulu okutula miilonga iitsa mbyoka ayihe, to shi ningi nopwaa na okwoongaonga.

8, 9. Okutala kwaashoka sha popiwa mIilonga 14:8-15, oshike tatu ilongo kombinga yeifupipiko lyomuyapostoli Paulus? (Tala kethano lyopetameko.)

⁸ Kalunga okwa hala “aantu ayehe ya hupithwe noya tseye oshili.” (1 Tim. 2:4) Owa tala ko ngiini aantu oyendji mboka natango inayi ilonga oshili? Nonando omuyapostoli Paulus okwa li a uvithile mboka ya adhika ye shi sha kombinga yaKalunga moosinagoga, okwa li wo a uvithile Aajuda mboka ya li haya longele iikalunga. Omukalo moka mboka haya longele iikalunga ya li yi inyenge, ogwa li gwa makele eifupipiko lye.

⁹ Pashiholelwa, molweendo lwe lwotango lwuutumwa, aantu mboka haya popi elaka lyOshilikaonia oya li ya pe Paulus naBarnabas esimano lya pitilila. Oye ya luku omadhina giikalunga yawo nokuli. Paulus oye mu luku Hermes, omanga Barnabas ye mu luku Zeus. Mbela Paulus naBarnabas oya li ye shi panda? Mbela onkalo ndjoka oya li ye yi tala ko yi li epepelelo komamakelo agehe ngoka yi iyadha mugo, miilando iyali yahugunina mbyoka ya talele po? Mbela oya li taya dhiladhila kutya omukalo moka aantu mboka yi inyenge, otagu ka kwathela oyendji ya pulakene konkundana ombwanawa? Hasho dha li! Paulus naBarnabas sho ya uvu shoka aantu ya hala okuninga, oya tuula oonguwo dhawo noya matukile pondje mokati kaantu e taya igidha taya ti: “Omolwashike tamu ningi ngaaka? Otse aantu yowala naanaa ngashika ne.” — Iil. 14:8-15.

10. Omolwashike Paulus naBarnabas kaaya li yu uvite ye vule Aalikaonia?

¹⁰ Sho Paulus naBarnabas ya ti kutya nayo wo aantu yowala, oya li ya hala okutya nayo inaya gwanenena. Kaya li taya ti nando kutya omukalo moka haya longele Kalunga ogwa faathana nogwaapagani mboka. Otu shi shi kutya yo oya li aatumwa, ye na oshinakugwanithwa shi ikalekelwa. (Iil. 13:2) Oya li wo ya gwayekwa nombepo ondjapuki noya li ye na etegameno lyomegulu. Nonando ongawo, oya li ye shi kutya Aalikaonia nayo oya li taya vulu okukala ye na etegameno ndyoka, ngele oya taamba ko onkundana ombwanawa.

11. Ongiini tatu vulu okuholela eifupipiko lyaPaulus, uuna tatu uvitha?

¹¹ Ongiini tatu vulu okuholela eifupipiko lyaPaulus? Shotango, katu na okukala twa tegelela okupewa esimano nenge tu li taambe, molwaashoka twa tompola miilonga yaJehova. Oshi li nawa kehe gumwe gwomutse i ipule ngeyi: ‘Onda tala ko ngiini aantu mboka handi uvithile? Mbela ohandi ungaunga naantu yontumba nokatongo, mboka ya dhinika moshitopolwa shetu?’ Oshi shi okupandulwa, sho Oonzapo dhaJehova muuyuni awuhe hadhi kambadhala okuuvithila miitopolwa moka dhi li, opo dhi mone mboka ya hala okupulakena konkundana ombwanawa. Omathimbo gamwe, shika ohashi dhi pula dhi ilonge omalaka omape nosho wo omikalondjigilile dhaantu mboka ya dhinika unene. Nonando ongawo, ihadhi kala dhi itala ko dhi vule aantu mboka. Pehala lyaashono, ohadhi kambadhala okuuva ko omuntu kehe, noku mu kwathela momukalo ngoka tagu gumu omutima gwe, ye a vule okutaamba ko etumwalaka lyUukwaniilwa.

12. Epafras okwa li a ulike ngiini kutya oku na ko nasha nayalwe?

¹² Omukalo gumwe moka tatu vulu okuulika kutya otatu landula neifupipiko ewiliko lyaKalunga, omokukwatela momagalikano mboka ya “pewa eitaalo ewanawa ngaashi lyetu.” (2 Pet. 1:1) Epafras osho a li a ningi ngawo. MOmbiimbeli okwa tumbulwa mo owala iikando iishona, ihe omoohapu dhaPaulus dha nwethwa mo. Sho Paulus a li mondholongo muRoma, okwa nyolele Aakriste yomuKolossa kombinga  yaEpafras kutya ohe ya “galikanene aluhe nuudhiginini.” (Kol. 4:12) Epafras okwa li e shi nawa aamwahe nokwa li e na ko nasha nayo lela. Nonando okwa li “onkwatwa pamwe” naPaulus, shoka kasha li she mu imbi a kwathele yalwe pambepo. (Filem. 23) Pehala lyaashono, okwa ningi po sha. Mbela shoka itashi ulike kutya ka li i ihole mwene? Okukwatela ooitaali ooyakwetu momagalikano getu, ohaku kwathele noonkondo, unene tuu ngele otwa kala tatu ya tumbula komadhina. — 2 Kor. 1:11; Jak. 5:16.

13. Ongiini to vulu okuholela Epafras, uuna to galikana?

¹³ Dhiladhila kwaamboka to vulu okukwatela megalikano, to ya tumbula komadhina. Ngaashi Epafras, aamwatate naamwameme oyendji ohaya kwatele momagalikano gawo mboka ye li megongalo nosho wo omaukwanegumbo ngoka ge na omaupyakadhi nenge ga taalela omatokolo nenge omashongo ga kwata miiti. Aamwatate naamwameme oyendji ohaya kwatele wo momagalikano gawo mboka omadhina gawo ge li momusholondondo gwomadhina kepandja lyetu lyokointaneta, jw.org, kohi yoshitopolwa: “Jehovah’s Witnesses Imprisoned for Their Faith.” (Tala mpoka pwa nyolwa NEWSROOM > LEGAL DEVELOPMENTS.) Shimwe ishewe, ohatu kwatele wo momagalikano mboka ya silwa aaholike yawo, mboka ya hupa miiponga yopaunshitwe, miita naamboka ye na uuhupilo tawu shongola. Eeno, opu na aamwatate naamwameme oyendji mboka twa pumbwa oku ya kwatela momagalikano notaya vulu okumona mo uuwanawa. Uuna tatu ya kwatele momagalikano, otatu ulike kutya itatu lalakanene owala uuwanawa wetu yene, ihe nowayakwetu wo. (Fil. 2:4) Jehova ohu uvu omagalikano ga tya ngawo.

14. Jehova okwe tu tulila po ngiini oshiholelwa dhingi shokupulakena?

¹⁴ Omukalo gulwe moka tatu vulu okuulika kutya tse aaifupipiki, omokukala twa halelela okupulakena kaantu. Jakob 1:19 otayi ti kutya kehe gumwe na kale “ha pulakene mbala.” Jehova okwe tu tulila po oshiholelwa sha dhenga mbanda moshinima shika. (Gen. 18:32; Jos. 10:14) Natu tale shoka tatu vulu okwiilonga kwaashoka sha nyolwa muEksodus 32:11-14. (Lesha.) Nonando Jehova ka li a pumbwa omaetopo gaMoses, okwa li a pe Moses ompito a holole nkene u uvite. Mbela oto ka pulakena ngaa neidhidhimiko komuntu ngono a li a ninga epuko nokulandula eetopo lye? Dhimbulukwa kutya Jehova okwa li a pulakene neidhidhimiko kaantu mboka ye mu galikana ye na eitaalo.

15. Ongiini tatu vulu okuholela Jehova mokusimaneka yalwe?

¹⁵ Kehe gumwe gwomutse ni ipule ta ti: ‘Ngele Jehova ohi ifupipike e ta pulakene kaantu, ngaashi a li a pulakene kuAbraham, Rakel, Moses, Josua, Manoak, Elia naHiskia, mbela itandi vulu okuninga sha faathana? Mbela itandi vulu okuulika kutya onda simaneka aamwatate naamwameme ayehe, mokupulakena komaetopo gawo omawanawa noku ga landula mpoka tashi vulika? Mbela opu na gumwe megongalo nenge megumbo nda pumbwa okupulakena kuye ngashingeyi? Oshike ndi na okuninga kombinga yaashono? Otandi ka ninga po shike?’ — Gen. 30:6; Aatok. 13:9; 1 Aak. 17:22; 2 Ondjal. 30:20.

16. Omukwaniilwa David okwi inyenge ngiini, sho a li ta ungaungiwa naye nayi kuShimei?

¹⁶ Eifupipiko ohali tu kwathele wo tu ulike eipangelomwene, uuna yalwe taya ungaunga natse nayi. (Ef. 4:2) Oshiholelwa sha dhenga mbanda otashi adhika muSamuel omutiyali 16:5-13. (Lesha.) David naapiya ye oya li yi idhidhimikile omatukano nosho wo okwaanuuyuuki hoka ya li ya ningilwa kuShimei, omukwanezimo gwomukwaniilwa Saul.  David okwa ningi ngawo, nonando okwa li e na oonkondo dhokukandula po onkalo ndjoka. Oshike sha kwathele David a ulike eipangelo? Eyamukulo otatu li mono mokukonakona Episalomi etitatu.

17. Oshike sha kwathele David a kale e na eipangelomwene, nongiini tatu vulu oku mu holela?

¹⁷ Enyolo lyopombanda lyEpisalomi etitatu, otali ulike kutya Episalomi etitatu olya nyolwa sho David “a fadhukile po omwana Absalom.” Ovelise 1 no 2 otadhi opalele iiningwanima mbyoka ya popiwa montopolwa 16 yaSamuel omutiyali. MEpisalomi 3:4 omwa popiwa oohapu dhaDavid tadhi ti: “Ngame ohandi pula Omuwa ekwatho, ye nohu uvu egalikano lyandje kondundu ye ondjapuki.” Natse wo otatu vulu okugalikana, uuna tatu ungaungiwa natse nayi. Jehova ote ke tu pa ombepo ye ondjapuki, ndjoka tayi vulu oku tu kwathela tu idhidhimike. Mbela ito vulu okudhiladhila onkalo moka wa pumbwa okuulika eipangelomwene nenge okudhimina po tashi zi komutima ngoka e ku ninga nayi? Mbela owu na ngaa einekelo kutya Jehova oku wete shoka to ningilwa nonokutya ote ke ku yambeka?

18. Otatu ka mona mo ngiini uuwanawa, ngele otwa tsikile okutula miilonga shoka Jehova te tu lombwele?

¹⁸ Ngele otwa kala tatu ningi shoka tu shi kutya osho shu uka, otatu ka yambekwa. Omayeletumbulo 4:7 otayi ti: “Oshinima shotango osho okulikola owino.” Nonando owino oya kankamena kontseyo, oya kwatela mo omatokolo ngoka tatu ningi, ihe kashi shi owala okuuva ko oshinima. Nokuli nuudhidhi ohawu ulike kutya owu na owino, sho hawu pungula iikulya yawo mothinge. (Omayel. 30:24, 25) Kristus ngoka e li ‘uunongo waKalunga,’ aluhe oha longo shoka sha hokiwa kuHe. (1 Kor. 1:24; Joh. 8:29) Kalunga oku shi eyooloko pokati kokuninga etokolo lyomondjila nokukatuka shi ikolelela kulyo. Oha pe ondjambi mboka ye na iikala yeifupipiko naamboka haya tula miilonga shoka ye shi kutya oshi li mondjila. (Lesha Mateus 7:21-23.) Onkee ano, tsikila okukambadhala okukaleka egongalo ehala moka aantu taya vulu okulongela Jehova neifupipiko. Okutula miilonga shoka tu shi kutya oshi li mondjila, ohashi pula ethimbo neidhidhimiko. Ihe oku shi ninga, otaku ulike eifupipiko ndyoka tali ku etele enyanyu ngashingeyi nosigo aluhe.