OSHITOPOLWA SHOKUKONAKONWA 46
EIMBILO 49 Nyanyudha omutima gwaJehova
Aamwatate, omwa itulila po ngaa elalakano lyokuninga aayakuligongalo?
“Okugandja oku na elago ku vule okutaamba.” — IIL. 20:35.
SHOKA TATU KA ILONGA
Otatu ka kwathelwa nkene tatu vulu okukwathela aamwatate mboka ya ninginithwa, ya kale ya gwana okulangekwa po ye li aayakuligongalo.
1. Omuyapostoli Paulus okwa li e uvitile ngiini aayakuligongalo?
AAYAKULIGONGALO ohaya longo iilonga ya simanenena momagongalo. Osha yela kutya omuyapostoli Paulus, okwa li a lenga iilonga mbyoka hayi longwa kaalumentu mboka aadhiginini. Pashiholelwa, sho a nyolele Aakriste yomuFilippi, okwa li a kundile po aayakuligongalo, pamwe naakuluntugongalo. — Fil. 1:1.
2. Omumwatate gwedhina Luis, okwa li e uvitile ngiini oshinakugwanithwa she, e li omuyakuligongalo?
2 Aamwatate oyendji mboka ya ninginithwa kutya nduno aagundjuka nenge aakokele, ohaya kala ya nyanyukwa, uuna taya longo ye li aayakuligongalo. Pashiholelwa, omumwatate Devan, okwa langekwa po e li omuyakuligongalo, sho e na omimvo 18. Omanga omumwatate gwedhina Luis, a langekwa po sho e na omimvo 50 nasha. Okwa popile ko aayakuligongalo oyendji nkene haya kala ye uvite sho a ti: “Ondi uvite nda pewa uuthembahenda sho tandi longo ndi li omuyakuligongalo, unene sho tandi dhiladhila kohole onene ndjoka egongalo lya ulukila ndje.”
3. Omapulo geni tatu ka kundathana moshitopolwa shika?
3 Ngele owu li omumwatate a ninginithwa, ihe ku shi natango omuyakuligongalo, mbela ito vulu okwiitulila po elalakano wu langekwe po? Oshike tashi vulu oku ku inyengitha wu kale wa hala okulangekwa po? Iitegelelwa yopamanyolo yini wa pumbwa okugwanitha po? Otatu ka kundathana omayamukulo gomapulo ngoka moshitopolwa shika. Ihe tango, natu kundathaneni kutya oshinakugwanithwa shomuyakuligongalo osha kwatela mo shike.
IINAKUGWANITHWA YAAYAKULIGONGALO OYINI?
4. Iinakugwanithwa yaayakuligongalo oyini? (Tala wo ethano.)
4 Omuyakuligongalo omumwatate ngoka a ninginithwa, a langekwa po kombepo ondjapuki, a kwathele aakuluntugongalo ya longe iinima oyindji ya simana megongalo. Aayakuligongalo yamwe oye na iinakugwanithwa yokushilipaleka kutya aauvithi megongalo oye na iitopolwa ya gwana moka haya uvithile nosho wo iileshomwa mbyoka haya longitha, sho taya uvitha. Yalwe ohaya kwathele mokwoopaleka Oshinyanga shUukwaniilwa noku shi kaleka monkalo ombwanawa. Ohaya longo wo ye li aayakuli pokugongala nosho wo piikwamambako nopiikwaniipangitho yokudhana uuvidio pethimbo lyokugongala. Iilonga oyindji mbyoka hayi longwa kaayakuligongalo, ohayi ya dheula ya kale ya pyokoka. Ihe shoka shi na okukala pondondo yotango kaayakuligongalo uupambepo uuwanawa, okukala ye hole Jehova nosho wo okukala metsokumwe nomithikampango dhe dhuuyuuki. Oye hole wo aamwatate naamwameme nomutima aguhe. (Mat. 22:37-39) Omumwatate a ninginithwa ota vulu ngiini okwiitulila po elalakano a langekwe po e li omuyakuligongalo?
Aayakuligongalo ohaya landula oshiholelwa shaJesus, moku igandja ya kwathele yalwe ( Tala okatendo 4)
5. Omumwatate ota vulu ngiini okwiitulila po elalakano lyokulangekwa po e li omuyakuligongalo?
5 Ombiimbeli oya popya omusholondondo gwiitegelelwa, mbyoka omumwatate e na okugwanitha po, a kale a gwana okulangekwa po e li omuyakuligongalo. (1 Tim. 3:8-10, 12, 13) Oto vulu oku yi adha mokukonakona Omanyolo ngaka nomokulonga nuudhiginini wu yi gwanithe po. Ihe shoka wu na okuninga tango, okudhiladhila muule kutya omolwashike wa hala okulangekwa po wu li omuyakuligongalo.
OSHIKE SHE KU INYENGITHA WU KALE WA HALA OKULANGEKWA PO?
6. Oshike shi na oku ku inyengitha wu kale wa hala okulonga oshilonga kehe, wu kwathele aamwatate naamwameme? (Mateus 20:28; tala wo ethano lyokombanda.)
6 Jesus Kristus, ngoka e tu tulila po oshiholelwa sha dhenga mbanda, okwa li a inyengithwa kohole, ano ohole yokuhola He nosho wo aantu. Ohole ndjoka oya li ye mu inyengitha a longe nuudhiginini nokulonga iilonga mbyoka ya dhinika. (Lesha Mateus 20:28; Joh. 13:5, 14, 15) Ngele oto inyengithwa kohole wu kale wa hala okulangekwa po wu li omuyakuligongalo, Jehova ote ke ku laleka nuuyamba note ke ku kwathela wu adhe elalakano lyoye. — 1 Kor. 16:14; 1 Pet. 5:5.
Jesus okwa li a longo aayapostoli ye, okupitila moshiholelwa she, ya kale taya yakula yalwe neifupipiko, pehala lyokulalakanena ondondo ya simana. (Tala okatendo 6)
7. Omolwashike omumwatate e na okuyanda iikala yokulalakanena esimano?
7 Muuyuni, olundji mboka haya humitha komeho iikala yokwiiyulika, ohaya tangwa kuyalwe. Ihe hasho shi na okukala ngawo mehangano lyaJehova. Omumwatate ngoka ta inyengithwa kohole, ngaashi Jesus, iha kala ta lalakanene oonkondopangelo, ondondo nenge okulonda aantu komapepe. Uuna omuntu ngoka e na iikala yokwiiyulika a langekwa po megongalo, ota ka tinda okulonga iilonga mbyoka ya dhinika kaantu, ihe oya pumbiwa, opo oonzi dhaJehova dhi na ondilo dhi silwe oshimpwiyu. Otashi vulika a ka kale e iwete a simana nokulonga iilonga mbyoka. (Joh. 10:12) Jehova ita ka laleka nuuyamba oonkambadhala dhomuntu ngoka ta inyengithwa kuuntsa, nenge kiikala yokulalakanena esimano. — 1 Kor. 10:24, 33; 13:4, 5.
8. Omayele geni Jesus a li a pe aayapostoli ye?
8 Omathimbo gamwe, nokuli nookuume kaJesus kopothingo oya li ya lalakanene iinakugwanithwa omolwomainyengotompelo ga puka. Natu ka taleni koshiningwanima shoka sha li sha kwatela mo aayapostoli yaali yaJesus, Jakob naJohannes. Oya li ya pula Jesus e ya pe oondondo dha ikalekelwa mUukwaniilwa we. Jesus ka li nando a popile iikala yawo mbyoka yokukala ya hala esimano. Pehala lyaashono, okwa lombwele aayapostoli ye ayehe 12, a ti: “Kehe ngoka a hala a kale omunene mokati keni, na kale omuyakuli gweni, nakehe ngoka a hala okukala omutango mokati keni, na kale omupiya gweni amuhe.” (Mark. 10:35-37, 43, 44) Aamwatate mboka ya hala okulangekwa po, taye shi ningi nomainyengotompelo omawanawa, ano okuyakula yalwe, otaya ka kala lela elaleko nuuyamba kegongalo. — 1 Tes. 2:8.
OSHIKE TASHI VULU OKUKOLEKA ELALAKANO LYOYE LYOKUKALA WA GWANA OKULANGEKWA PO?
9. Ongiini to vulu okukoleka elalakano lyoye lyokukala wa gwana okulangekwa po?
9 Osha yela kutya owu hole Jehova nowa hala okuyakula yalwe. Ihe nonando ongawo, otashi vulika mungoye kaamu na ohokwe yokulonga iilonga ya gwedhwa po, mbyoka omuyakuligongalo a tegelelwa a longe. Ongiini to vulu okukoleka ehalo lyoye lyokuyakula yalwe? Omolwashike ito dhiladhila kenyanyu ndyoka hali vulu okuza mokuyakula aamwatate naamwameme? Jesus okwa ti: “Okugandja oku na elago ku vule okutaamba.” (Iil. 20:35) Jesus okwa li a tula miilonga ekotampango ndika. Okwa li a mono enyanyu ndyoka hali zi mokuyakula yalwe, oshinima shoka nangoye to vulu okuningilwa.
10. Jesus okwa li a mono ngiini enyanyu ndyoka hali zi mokukwathela yalwe? (Mark. 6:31-34)
10 Tala koshiholelwa shoka tashi ulike kutya Jesus okwa li a nyanyukwa, sho ta kwathele yalwe. (Lesha Markus 6:31-34.) Oshikando shimwe, Jesus naayapostoli ye oya li ya vulwa. Pompito ndjono, oya li molweendo ya uka kehala lyi ikalekelwa, ya ka vululukwe po. Ihe manga inaaya thika kehala hono, ongundu yaantu oyo ya thiki ko tango, netegameno lyokulongwa kuJesus. Okwa li ta vulu okutinda oku ya longa. Shimwe ishewe, ye nookuume ke kaya “li ya mono ethimbo lyokuthuwa po, nokuli nolyokulya.” Jesus okwa li wo natango ta vulu okulombwela aantu ya ye konima sho e ya longo kombinga yoshili yimwe nenge mbali. Ihe molwaashoka okwa li ta inyengithwa kohole, okwa “tameke oku ya longa iinima oyindji.” Okwa tsikile noku ya longa nokuli sigo “kwa toko.” (Mark. 6:35) Ine shi ninga kethiminiko, ihe omolwaashoka a “li e ya uvitile ohenda.” Okwa li a hala oku ya longa, oshoka oku ya hole. Jesus okwa li a mono enyanyu ndyoka hali zi mokuyakula yalwe.
11. Jesus okwa li a yakula yalwe momukalo tagu longo guni? (Tala wo ethano.)
11 Jesus ka li owala a longo ongundu yaantu, ihe okwe ya ningile oshindji. Okwa li wo e ya pe iipalutha yopalutu. Okwa indjipaleke iikulya pashikumithalonga, opo ihe okwe yi pe aalongwa ye yi topolele aantu. (Mark. 6:41) Mokuninga ngawo, okwa longo aalongwa ye oshiilongomwa nkene ye na okuyakula yalwe. Okwe ya ulukile wo kutya iilonga yokoonyala, ngaashi mbyoka tashi vulika hayi longwa kaayakuligongalo, oya simana. Dhiladhila owala kenyanyu ndyoka aayapostoli ya li ye na, sho ya kutha ombinga moshikumithalonga shoka sha longwa kuJesus, sho ya topolele aantu iikulya sigo oosho ‘ayehe ya li noya kuta.’ (Mark. 6:42) Shino hasho owala oshikando shotango, shoka Jesus a li a pititha komeho uuwanawa wa yalwe komeho waamboka we. Onkalamwenyo ye ayihe sho a kala kombanda yevi, okwa kala nokuyakula aantu. (Mat. 4:23; 8:16) Okulonga yalwe noku ya sila oshimpwiyu, osha li sha etele Jesus enyanyu nokukala a gwanenwa. Onkee ano nangoye oto ka mona enyanyu enene, sho to ningi ngaashi to vulu wu kale wa gwana okulangekwa po wu li omuyakuligongalo.
Ohole yokuhola Jehova nosho wo ehalo lyokuyakula yalwe otayi ke tu inyengitha tu kwathele kehe pamwe megongalo (Tala okatendo 11) a
12. Omolwashike kaapu na nando ogumwe gwomutse, e na okukala e uvite kutya ke na sho ta vulu okukwathela megongalo?
12 Ngele owu uvite kutya ku na uukwatya wa dhenga mbanda, ino teka omukumo. Odhoshili kutya owu na omaukwatya ngoka taga vulu oku ku ningitha wu kale wu na oshilonga megongalo. Ngele owa lesha pamwe negalikano oohapu dhaPaulus ndhoka tadhi adhika mAakorinto yotango 12:12-30, otashi vulika wu ka mone mo uuwanawa. Oohapu ndhoka odha popya sha yela kutya ngoye, oto dhana onkandangala ya simana nowa pumbiwa megongalo, ngaashi owala aapiya yalwe yaJehova. Ngele ngashingeyi ino gwanitha po iitegelelwa yokulangekwa po wu li omuyakuligongalo, ino teka omukumo. Ihe pehala lyaashono, ninga ngaashi to vulu wu kale to longithwa kuJehova nokukwathela aamwatate. Kala wu na uushili kutya aakuluntugongalo otaya ka tala kokuvula kwoye, opo ye ku pe nawa iinakugwanithwa yasha. — Rom. 12:4-8.
13. Mbela konyala aalumentu ayehe mboka ya langekwa po, oye na okugwanitha po shike?
13 Ngashingeyi natu ka taleni ketompelo limwe lya gwedhwa po, kutya omolwashike wu na okukala to lalakanene okukala wa gwana okulangekwa po wu li omuyakuligongalo. Konyala iitegelelwa mbyoka oya pumbwa okugwanithwa po kAakriste ayehe. Odhoshili kutya Aakriste ayehe oye na okuhedha popepi naJehova, nokumona enyanyu ndyoka hali zi mokugandja nosho wo mokutula po oshiholelwa oshiwanawa monkalamwenyo yopaKriste. Oshike shono omumwatate e na okuninga kondandalunde, opo a kale a gwana okulangekwa po?
NKENE TO VULU OKUKALA WA GWANA OKULANGEKWA PO
14. Uutumbulilo okukala wu na omikalo omiwanawa owa hala okutya ngiini? (1 Timoteus 3:8-10, 12)
14 Natu taleni ishewe kiitegelelwa yimwe mbyoka ya popiwa muTimoteus gwotango 3:8-10, 12. (Lesha.) Omuyakuligongalo oku na okukala e na “omikalo omiwanawa.” Uutumbulilo mboka otawu vulu wo okutolokwa “okupewa esimaneko,” “okutumbalekwa” nenge “omusimanekwa.” Shika inashi hala okutya ku na siku nando wu ka yole nenge wu ninge omashendjo. (Omuuv. 3:1, 4) Ngele owa tseyika megongalo wu li omwiinekelwa noho gwanitha po iilonga yoye, nena aantu otaya ka kala ye ku simaneka.
15. Uutumbulilo ‘noyaa na iifundja’ nosho wo ‘aanalwiho mokulikola’ owa hala okutya ngiini?
15 Uutumbulilo ‘noyaa na iifundja’ owa hala okutya, ngoye ku shi omufudhime, owu li omunashili nomwiinekelwa. Oho kala metsokumwe noohapu dhoye, ngoye iho kengelele yalwe. (Omayel. 3:32) Uutumbulilo ‘aanalwiho mokulikola’ otawu ti kutya, okukala omunashili miinima yopangeshefa nosho wo uuna to ungaunga niimaliwa. Ekwatathano ewanawa ndyoka wu na nAakriste ooyakweni ito ke li longitha nayi wu likole iimaliwa.
16. (a) Uutumbulilo “kaye shi oonkolwi” owa hala okutya shike? (b) Uutumbulilo okukala “neiyuvo lya yela” owa hala okutya shike?
16 Uutumbulilo “kaye shi oonkolwi” otawu ti kutya, iho nu omalovu sha pitilila nenge ino tseyikila ho kwata iitenga. Uutumbulilo okukala “neiyuvo lya yela” otawu ti kutya, oho kala metsokumwe nomithikampango dhaJehova. Nonando ino gwanenena, owu na enyanyu ndyoka hali etwa kombili yokukala nekwatathano ewanawa naKalunga.
17. Omumwatate ota vulu ngiini okuulika kutya omwiinekelwa, omanga ‘ta konakonwa tango’? (1 Timoteus 3:10; tala wo ethano.)
17 Uutumbulilo “oye na okukonakonwa tango” owa hala okutya, owu na okukala wa ulika nale kutya oto vulu okwiinekelelwa oshinakugwanithwa. Onkee ano ngele aakuluntugongalo oye ku pe oshinakugwanithwa, landula omalombwelo gawo ngoka taye ku pe nosho wo uuyelele mboka wa za kehangano. Shilipaleka kutya owu uvite ko shoka oshinakugwanithwa shoye sha kwatela mo, nuunake shi na okupwa. Sho to gwanitha po iilonga yoye nawa, yalwe megongalo otaye ke shi ndhindhilika notaya ka pandula ehumokomeho ndyoka to ningi. Aakuluntugongalo shilipalekeni kutya otamu dheula aamwatate mboka ya ninginithwa. (Lesha 1 Timoteus 3:10.) Mbela megongalo lyeni omu na aamwatate aagundjuka mboka ya ninginithwa, ye na omimvo omulongo nasha nenge okuuka pevi? Mbela oya tula po oshiholelwa oshiwanawa ngele tashi ya pokukonakona paumwene? Mbela ohaya gandja omatyokosha aluhe pokugongala nohaya kutha ombinga miilonga yokuuvitha pandjigilile? Ngele osho, ya peni iinakugwanithwa mbyoka ya eleka omimvo dhawo nosho wo oonkalo dhawo. Uuna tamu shi ningi, nena otamu ‘konakona tango’ aamwatate mboka aagundjuka. Kungawo, sho ye li pokugwanitha omimvo 20, otaya ka kala ya gwana okulangekwa po ye li aayakuligongalo.
Aakuluntugongalo otaya vulu okutala aamwatate ya ninginithwa, “ngele otaa vulu tuu okuya moshilonga,” moku ya pa iinakugwanithwa (Tala okatendo 17)
18. Uutumbulilo “ngele otaa vulu tuu okuya moshilonga” owa hala okutya shike?
18 Uutumbulilo “ngele otaa vulu tuu okuya moshilonga” owa hala okutya, ino longa uuwinayi washa mboka tawu ningitha yalwe ye ku popile muuwinayi. Odhoshili kutya Aakriste ohaya vulu okulundilwa. Jesus naye okwa li a lundilwa nokwa hunganeka kutya aalanduli ye nayo otaya ka lundilwa. (Joh. 15:20) Ihe nonando ongawo, ngele owa kala wu na eihumbato ewanawa lya fa lyaJesus, oto ka kala wu na edhina ewanawa megongalo. — Mat. 11:19.
19. Uutumbulilo oku na okukala “e na omukiintu gumwe” owa kwatela mo shike?
19 Uutumbulilo “e na omukiintu gumwe,” owa hala okutya, ngele omuyakuligongalo okwa hokana, oku na owala okukala nomukulukadhi gumwe, ngaashi sha li elalakano lyaKalunga lyopetameko. (Mat. 19:3-9) Omulumentu Omukriste ke na nando okuya momilalo dha nyata. (Heb. 13:4) Ihe uutumbulilo “e na omukiintu gumwe,” owa kwatela mo oshindji. Owa kwatela mo okukala omudhiginini komukulukadhi gwoye, noiho gandja nando eitulomo lya pitilila kaakiintu yalwe. — Job 31:1.
20. Omulumentu oha ulike ngiini kutya oku shi “okulela nawa” aanegumbo lye?
20 Uutumbulilo “noku shi okulela nawa oyana naanegumbo lye,” owa hala okutya, ngele omumwatate omutse gwegumbo, oku na okutala ko oshinakugwanithwa shoka sha simana. Kala ho kwatele komeho Elongelokalunga lyUukwanegumbo pandjigilile. Kala ho uvitha pamwe nakehe gumwe gwaandjeni olundji ngaashi to vulu. Kwathela aamwoye ya kale ye na ekwatathano naJehova paumwene. (Ef. 6:4) Ngele omulumentu oku shi okusila oshimpwiyu aanegumbo lye, nena ota vulu wo okutonatela egongalo. — Yelekanitha 1 Timoteus 3:5.
21. Oshike to vulu okuninga po, ngele ino langekwa po natango wu li omuyakuligongalo?
21 Ngele owu li omumwatate, ihe ino langekwa po natango wu li omuyakuligongalo, oto indilwa nesimaneko enene wu tule miilonga uuyelele mbuka wu li moshitopolwa shika, to shi ningi pamwe negalikano. Konakona iitegelelwa yokukala wa gwana okulangekwa po wu li omuyakuligongalo, nokulonga nuudhiginini wu yi gwanithe po. Tala kutya owu hole Jehova shi thike peni nosho wo aamwatate naamwameme. Kala wa halelela oku ya kwathela. (1 Pet. 4:8, 10) Mona enyanyu ndyoka hali zi mokuyakula aamwatate naamwameme. Onkee ano Jehova ne ku laleke nuuyamba sho to ningi oonkambadhala wu kale wa gwana okulangekwa po wu li omuyakuligongalo. — Fil. 2:13.
EIMBILO 17 “Onda hala”
a SHOKA TASHI ULIKWA METHAN: Kolumoho, Jesus ta yakula aalongwa ye neifupipiko; kolulyo, omuyakuligongalo ta kwathele omumwatate omukokele megongalo.
