1-2. (a) Omolwashike omuyapostoli Paulus a ti kutya ohole oyo uukwatya uunene kwaagehe? (b) Oshike tatu ka kundathana moshitopolwa shika?

 SHO omuyapostoli Paulus a popi kombinga yeitaalo, yetegameno nosho wo ohole okwa hulitha a ti kutya “oshinima oshinene kwaayihe mbika osho ohole.” (1 Kor. 13:13) Omolwashike Paulus a li a vulu okupopya ngawo? Omolwaashoka monakuyiwa itatu ka kala twa pumbwa eitaalo momauvaneko gaKalunga kombinga yuuyuni uupe, nenge yetegameno kutya omauvaneko ngoka otaga ka gwanithwa, oshoka otaga ka adhika ga gwanithwa nale. Ihe otatu ka pumbwa aluhe okukala tu hole Jehova nosho wo aantu ooyakwetu. Uushili owo kutya ohole yetu yokuhola aantu ooyakwetu otayi ka tsikila nokukoka aluhe sigo aluhe.

² Molwaashoka otwa pumbwa okuulika ohole sigo aluhe, otatu ka tala komapulo gatatu. Lyotango, omolwashike tu na okukala tu holathane? Etiyali, ongiini tatu vulu okuulukilathana ohole? Etitatu, ongiini tatu vulu okukaleka ohole yetu yokuhola yalwe ya kola?

3. Omatompelo geni tu na gokukala tu holathane?

³ Omolwashike sha simana tu kale tu holathane? Etompelo limwe olyo kutya ohole ohayi tu ndhindhilikitha mo tu li Aakriste yashili. Jesus okwa li a lombwele aayapostoli ye a ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Joh. 13:35) Shimwe ishewe, okukala tu holathane ohaku tu ningitha tu kale twa hangana. Paulus okwa ti kutya ohole “oyo epaya tali vulu okumangela iinima ayihe kumwe.”  (Kol. 3:14) Ihe opu na natango etompelo lilwe lya simana kutya omolwashike twa pumbwa okukala tu holathane. Omuyapostoli Johannes okwa li a nyolele ooitaali ooyakwawo a ti: “Oongoka e hole Kalunga, oku na wo okukala e hole omuntu mukwawo.” (1 Joh. 4:21) Ngele otu holathane, nena otatu ulike kutya otu hole Kalunga.

4-5. Thaneka nkene ohole yetu yokuhola Kalunga ya pambathana nohole yetu yokuholathana.

⁴ Omomukalo guni ohole yetu yokuhola Kalunga ya pambathana unene nohole ndjoka hatu ulukile aamwatate naamwameme? Oku shi thaneka, natu tale kekwatathano ndyoka hali kala pokati komutima gwetu niitopolwa yilwe yolutu lwetu. Uuna ndohotola e ku kwata poshikesho a tale ngele ombinzi yoye otayi ende nawa molutu nenge hasho, otashi vulika wo a mone uuyelele wulwe kombinga yomutima gwoye. Oshike tatu ilongo moshiholelwa shino?

⁵ Ngaashi owala ndohotola ha vulu okumona uuyelele wontumba kombinga yomutima gwetu shampa e tu kwata poshikesho, natse otatu vulu okumona uuyelele wulwe kutya ohole yetu yokuhola Kalunga oya kola shi thike peni, uuna tatu konakona kutya ohole yetu yokuhola aantu ooyakwetu oyi thike peni. Ngele otwa mono kutya ohole yetu yokuhola ooitaali ooyakwetu oya nkundipala, shono otashi vulu wo okukala euliko kutya ohole yetu yokuhola Kalunga oya nkundipala. Ihe ngele otu hole aluhe ooitaali ooyakwetu, shono oshi li endhindhiliko kutya ohole yetu yokuhola Kalunga oya kola.

6. Ngele ohole yetu yokuhola aamwatate oya nkundipala, omolwashike shi li uupyakadhi uunene? (1 Johannes 4:7-9, 11)

⁶ Ngele ohole yetu yokuhola aamwatate naamwameme otayi nkundipala, otu na okukala tatu ipula noshinima shoka. Omolwashike mbela? Oshoka shono oshi li endhindhiliko kutya uupambepo wetu owu li moshiponga. Omuyapostoli Johannes okwe shi popi sha yela a ti kutya omuntu “ita vulu okukala e hole Kalunga, ngoka kee mu wete, ngele kee hole omuntu mukwawo ngoka e mu wete.” (1 Joh. 4:20) Oshiilongomwa kutse oshini? Jehova oha kala owala e tu hokwa ngele otu‘holathane.’ — Lesha 1 Johannes 4:7-9, 11.

7-8. Omomikalo dhimwe dhini tatu vulu okuulukilathana ohole?

⁷ Ombiimbeli oya endulula iikando niikando oshipango shoka tashi ti kutya “holathaneni.” (Joh. 15:12, 17; Rom. 13:8; 1 Tes. 4:9; 1 Pet. 1:22; 1 Joh. 4:11) Ihe ohole oyi li uukwatya womomutima, nenge uukwatya wetu womeni, nokapu na omuntu ha vulu okumona momutima gwetu. Ongiini nduno tatu vulu okuulika kutya otu hole ooitaali ooyakwetu? Okupitila moohapu nomiilonga yetu.

⁸ Opu na omikalo odhindji moka tatu vulu okuulukila aamwatate naamwameme kutya otu ya hole. Mpaka otapu landula iiholelwa yimwe: “Hokololelathaneni oshili.” (Sak. 8:16) ‘Kaleni mu na ombili mokati keni.’ (Mark. 9:50) ‘Lalakaneneni okusimanekathana.’ (Rom. 12:10) “Taambathaneni ano.” (Rom. 15:7) “Dhiminathanii po oondjo ethimbo kehe.” (Kol. 3:13) “Kwathathaneni mokuhumbata omitenge.” (Gal. 6:2) “Talalekathaneni.” (1 Tes. 4:18) ‘Kwathathaneni.’ (1 Tes. 5:11) ‘Galikanenathaneni.’ — Jak. 5:16.

9. Omolwashike okuhekeleka yalwe ku li euliko lya dhenga mbanda lyokuulika ohole yetu? (Tala wo ethano.)

⁹ Ngashingeyi natu ka konakoneni omautumbulilo ngoka ga tumbulwa mokatendo ka tetekele, nkene tatu vulu okuulika ohole yetu. Natu konakoneni shoka Paulus a popi, a ti: “Talalekathaneni.” Omolwashike okutalalekathana ku li omukalo gwa simana gwokuulukila yalwe kutya otu ya hole? Embo limwe tali popi kombinga yOmbiimbeli olya ti kutya oshitya  “talalekathaneni,” shoka Paulus a longitha otashi ti kutya “okuthikama popepi nomuntu wu mu tse omukumo, uuna ta mono iihuna omolwoonkalo oondhigu.” Onkee ano uuna tatu hekeleke omwiitaali omukwetu ngoka e li muudhigu, otatu mu kwathele a thikame po noku tsikile nolweendo lwe, e li mondjila ndjoka tayi fala komwenyo. Ethimbo kehe tatu hekeleke omumwatate nenge omumwameme, nena otatu mu ulukile kutya otu mu hole. — 2 Kor. 7:6, 7, 13.

10. Ekwatathano lini li li pokati kolukeno nehekeleko?

¹⁰ Okuuvila gumwe uukwawo wanankali nosho wo oku mu hekeleka oya pambathana. Omomukalo guni mbela? Omuntu ngoka ha ulukile yalwe uukwawo wanankali, ohashi mu inyengitha a hekeleke yalwe noku ya ningila sha shoka tashi ya kwathele. Onkee ano tango ohatu uvile yamwe uukwawo wanankali, opo ihe tatu ya hekeleke. Ndhindhilika nkene Paulus a kwatakanitha uukwawo wanankali mboka Jehova he tu ulukile nehekeleko ndyoka he tu pe. Paulus okwa hokolola Jehova a ti kutya “oye Tate omunahenda, Kalunga, ngoka kuye haku zi ekwatho alihe.” (2 Kor. 1:3) Uuyelele wokukonakonwa mOmbiimbeli yOshiingilisa owa yelitha ovelise ndjika kutya Paulus okwa longitha oshitya “omunahenda” a popye nawa eiyuvo lyokuuvila yalwe uukwawo wanankali. Kungawo, “Kalunga ota ithanwa Tate nenge Onzo yohenda, molwaashoka uukwawo wanankali uukwatya wa za muye.” Omolwuukwawo wanankali we ohashi mu inyengitha e tu kwathele “muudhigu wetu auhe.” (2 Kor. 1:4) Ngaashi owala omeya omayelele ngoka taga zi mothithiya haga talaleke mboka ya sa enota, Jehova naye oha talaleke nokuhekeleka mboka ya gwililwa po. Ongiini tatu vulu okuholela uukwatya waJehova wokuuvila yalwe uukwawo wanankali noku ya hekeleka? Omokukokeka momitima dhetu uukwatya mboka wa pambathana nokuhekeleka yakwetu. Gamwe gomomaukwatya ngoka ogeni?

11. Shi ikolelela Aakolossa 3:12 nosho wo kuPetrus gwotango 3:8, omaukwatya galwe geni tu na okukokeka tu kale nohole ndjoka hayi tu inyengitha tu hekeleke yalwe?

¹¹ Oshike tashi ke tu kwathela tu kale tu na ohole ndjoka twa pumbwa, opo tu ‘kaleni hatu talalekathaneni’ esiku nesiku? Otwa pumbwa okukokeka omaukwatya ngaashi olukeno, ohole yuumwayinathana nosho wo ombili. (Lesha Aakolossa 3:12; 1 Petrus 3:8.) Omaukwatya ngono otage ke tu kwathela ngiini? Uuna uukwawo wanankali nosho wo omaukwatya ngoka ge wu pamba tu ga na, nena otatu ka kala tu na ehalo enene lyoku ya hekeleka ngele ye li muudhigu. Jesus okwa ti kutya “okana ohaka popi shoka sha udhilila momutima. Omuntu omwaanawa oha pititha mo iinima iiwanawa mompungulilo ye yiinima iiwanawa.” (Mat. 12:34, 35) Okuhekeleka aamwatate naamwameme oku li omukalo gwa simana moka hatu ya ulukile kutya otu ya hole.

12. (a) Omolwashike twa pumbwa okukala twa kotoka kaatu kanithe ohole yetu yokuholathana? (b) Epulo lini tatu ka konakona ngashingeyi?

¹² Atuheni otwa hala okutsikila okukala “tu holathaneni.” (1 Joh. 4:7) Ihe osha simana tu dhimbulukwe kutya Jesus okwa li a gandja elondodho kutya “ohole yoyendji otayi ka talala.” (Mat. 24:12) Jesus kali a hala okutya aalongwa ye oyendji otaya ka etha po okuulukilathana ohole. Nonando ongawo, otwa pumbwa okukala twa kotoka, opo iikala yaantu muuyuni kaayi tu nwethe mo tu kale hatu ungaunga nayi nayalwe. Omanga tu na oshinima shoka momadhiladhilo, natu taleni epulo ndika lya simana tali ti: Mbela opu na omukalo ngoka tatu vulu okutala ngele ohole yetu yokuhola aamwatate oya kola?

13. Oshike tashi vulu okumakela ohole yetu?

¹³ Omukalo gumwe gwokutala ngele ohole yetu oya kola, okukonakona nkene hatu ungaunga noonkalo dhontumba monkalamwenyo.  (2 Kor. 8:8) Onkalo yimwe oyo ndjoka ya popiwa komuyapostoli Petrus a ti: “Komeho gaayihe holathaneni nomwenyo aguhe, oshoka ohole ohayi siikile omayono ogendji.” (1 Pet. 4:8) Onkee ano omaunkundi gayalwe nosho wo okwaagwanenena kwawo otayi vulu oku tu kwathela tu mone ngele ohole yetu oya kola.

14. Sha ikolelela kuPetrus gwotango 4:8, ohole yini twa pumbwa okukala tu na? Shi thaneka.

¹⁴ Natu konakoneni nawa oohapu dhaPetrus. Ovelise ohetatu petameko oya popi oludhi lwohole ndjoka tu na okukala tu ninathane, ya ti kutya “holathaneni nomwenyo aguhe.” Uutumbulilo “nomwenyo aguhe” mboka Petrus a longitha otawu ti lelalela “okunanunuka.” Oshitopolwa oshitiyali shovelise ndjoka osha popya kutya okukala tu hole yalwe nomwenyo aguhe’ ohaku tu inyengitha tu siikile omayono gaamwatate. Otatu vulu oku shi thaneka ngeyi: Ohole yetu nayi kale ya fa oshilapi shoka hashi vulu okutamunuka mo, twe shi kwata nomake getu agehe, e tatu shi nanununa mo noku shi nanununa mo ishewe sigo sha siikile “omayono ogendji,” ihe hayono owala limwe nenge gaali. Oshitya “siikile” otashi ti owala kutya okudhimina po. Ngaashi owala oshilapi hashi vulu okusiikila mpoka pwa kaka, nohole ohayi vulu okusiikila omaunkundi nokwaagwanenena kwayalwe.

15. Ngele ohole yetu yokuhola aamwatate naamwameme oya kola, oshike tatu ka vula okuninga? (Aakolossa 3:13)

 ¹⁵ Ohole yetu oyi na okukala ya kola lela, opo tu vule okudhima po omapuko gokwaagwanenena gooitaali ooyakwetu kutya nduno omathimbo gamwe otashi pula oonkambadhala dha mana mo. (Lesha Aakolossa 3:13.) Uuna hatu shi pondola mokudhimina po yalwe, kungawo otatu ulike kutya ohole yetu oya kola nosho wo kutya otwa hala okunyanyudha Jehova. Oshike ishewe tashi vulu oku tu kwathela tu idhidhimikile iikala yayalwe mbyoka hayi tu ningile nayi nosho wo omapuko gawo?

16-17. Oshike ishewe tashi ke tu kwathela tu dhime po omayono gayalwe omashona? Shi thaneka. (Tala wo ethano.)

¹⁶ Kala ho gandja eitulomo komaukwatya omawanawa gaamwatate naamwameme, ihe hakomaunkundi gawo. Natu shi yelekanithe ngeyi. Natu tye andola owu li pokatuthi kontumba nongundu yaamwatate naamwameme. Otamu tyapula nawa nopehulilo owe ya ithana mu ithaneke mu li pamwe. Owa thaneke omathano ga konda pugaali wa ningila ngele lyotango inali za mo nawa. Ngashingeyi owu na omathano gatatu, ihe mulimwe owa ndhindhilike kutya omumwatate gumwe ita imemeha. Oto ka ninga po shike nethano ndyono? Oto ke li dhima mo, oshoka owu na omathano gaali moka kehe gumwe ta imemeha, mwa kwatelwa nomumwatate ngoka.

¹⁷ Omathano ngoka hatu pungula otatu vulu oku ga yelekanitha niinima mbyoka hatu dhimbulukwa. Ohatu kala tu na oompito oombwanawa nokudhimbulukiwa, ndhoka twa li  naamwatate naamwameme. Natu tye ihe pompito yimwe, omumwatate nenge omumwameme okwa popi nenge a ningi sha shoka kaashi li nawa. Mbela oto ka ninga po shike? Omolwashike mbela itoo dhimi mo oshinima shoka momadhiladhilo goye, ngaashi owala wa ningi nethano ndyoka wa thanekele? (Omayel. 19:11; Ef. 4:32) Odhoshili kutya otatu vulu okudhima mo momadhiladhilo getu uupuko uushona mboka ooitaali ooyakwetu haya ningi, molwaashoka otu na iinima oyindji iiwanawa mbyoka tatu vulu okudhimbulukwa kombinga yawo. Otwa hala okukala hatu dhimbulukwa iinima iiwanawa mbyoka ya ninga nokukala twe yi lenga.

18. Iitsa yini ya simana yi na ko nasha nohole mbyoka twa kundathana moshitopolwa shika?

¹⁸ Omolwashike twa hala okukaleka ohole yetu yokuhola yalwe ya kola? Ngaashi twa zi noku shi kundathana, ngele otu hole aamwatate naamwameme, otashi ulike kutya otu hole Jehova. Ongiini tatu vulu okuulika ohole yokuhola ooitaali ooyakwetu? Omukalo gumwe tatu vulu oku shi ninga, omoku ya hekeleka. Ombiimbeli otayi ti kutya “onkee ano talalekathaneni,” notatu ka vula owala oku shi ninga ngele otu na olukeno. Ongiini tatu vulu okukaleka ohole yetu yokuhola yalwe ya kola? Omokuninga ngaashi tatu vulu tu ya dhimine po.

19. Omolwashike sha simana noonkondo kunena okuulukilathana ohole?

¹⁹ Omolwashike sha simana noonkondo kunena tu ulukilathane ohole? Petrus okwa gandja etompelo a ti: “Ehulilo lyiinima ayihe oli li popepi. Komeho gaayihe holathaneni nomwenyo aguhe.” (1 Pet. 4:7, 8) Oshike twa tegelela shi ka ningwe sho ehulilo lyuuyuni mbuka wa kolokosha tali hedha popepi? Jesus okwa popi shi na ko nasha naalanduli ye a ti: ‘Otamu ka kala mu tondike kiigwana ayihe omolwedhina lyandje.’ (Mat. 24:9) Ngele otwe shi ningi, oonkambadhala dhaSatana dhoku tu topola otadhi ka ponya, oshoka otwa hanganithwa kohole ndjoka yi li “epaya tali vulu okumangela iinima ayihe kumwe.” — Kol. 3:14; Fil. 2:1, 2.