‘MUKIINTU.’ Ngoka ogwo omukalo Jesus a li ha longitha omathimbo gamwe uuna ta popi naantu yuukashike kookantu wa yooloka ko kuwe. Pashiholelwa, sho a li a aludha oshilema shoka sha kala sha andalala uule womimvo 18, okwa ti: ‘Mukiintu, wa aluka kuuvu woye!’ (Luk. 13:10-13) Jesus okwa li nokuli a longitha omukalo gwesimaneko ngoka gwa li gwa taambiwa ko pethimbo lyOmbiimbeli sho a li ta popi nayina. (Joh. 19:26; 20:13) Ihe opwa li pu na oshitya shilwe shesimaneko shi vulithe pwaashoka.

Ombiimbeli ohayi longitha unene oshitya shohenda uuna tayi popi aakiintu yontumba. Jesus okwa li e shi longitha sho a popi nomukiintu ngoka a li e na uuvu wetiko lyombinzi oomvula 12. Momukalo moka a li e ya kuJesus kagwa li metsokumwe nompango yaKalunga ndjoka ya popya kutya omuntu e li monkalo ya fa ye, okwa li a talika ko a nyata. Okwa li taku vulu okutiwa kutya okwa li e na okwiikalela omolwonkalo ye. (Lev. 15:19-27) Omukiintu okwa li a halelela ekwatho, molwaashoka ‘okwa mona iihuna noonkondo mokuya koonganga odhindji noku dhi futa ashihe shoka a li e na, ihe ina kala nando nawa, uuvu owa geye owala.’ — Mark. 5:25, 26.

Omukiintu ngoka okwa ziilile konima yaantu ti inyoweke, nokwa gumu koongenge dhonguwo yaJesus; mbalambala etiko lye lyombinzi olya kodha. Okwa li e shi ita monika kutya oye a gumu koongenge dhonguwo yaJesus, ihe Jesus okwa pula a ti: “Olye a gumu ndje?” (Luk. 8:45-47) Omukiintu nguka a li a tila nota kakama, okwa tsu oongolo koshipala shaJesus “nokwe mu lombwele oshili ayihe.” — Mark. 5:33.

Opo Jesus a hekeleke omukiintu nguka, okwa popi naye momukalo gwohenda a ti: ‘Ikolelela, mumwandjekadhona!’ (Mat. 9:22, yelekanitha NW.) Aalongwantu yOmbiimbeli yamwe oya ti kutya iitya yOshiheberi noyOshigreka mbyoka ya tolokwa ‘mumwandjekadhona’ ohayi vulu okulongithwa momukalo gwomufethelamo tayi ulike koshitya ohenda. Jesus okwa li e mu shilipaleke lela sho e mu lombwele a ti: “Eitaalo lyoye lye ku aludha. Inda nombili, ngoye u kale wa aluka kuuvu woye.” — Mark. 5:34.

‘Mumwandjekadhona.’ Omukalo ngoka ogo Boas omulumentu omuyamba, Omwiisraeli, a li i ithana omukiintu Omumoab, Rut. Rut ka li a tegelela i ithanwe ngaaka, molwaashono okwa li ta pupula iilya mepya lyomulumentu kee mu shi. Boas okwa ti kuye: “Ndati, mumwandje,” tsikila okupupula mepya lyandje. Rut okwi isizimike omutse pevi nokwa pula Boas kutya omolwashike e na olukeno naye, nando ye omukwiilongo. Boas okwa li e mu shilipaleke ishewe a ti: ‘Ondu uvu ayihe mbyoka wa ningila nyokomweno, omuselekadhi Naomi. Omuwa ne ku futile shoka we shi ningi.’ — Rut 2:8-12.

Jesus naBoas inaya tulila po tuu aakuluntugongalo oshiholelwa oshiwanawa! Omathimbo gamwe, aakuluntugongalo yaali otashi vulika ya tsakaneke omunkiintu Omukriste ngoka a pumbwa ekwatho pambepo nokutsuwa omukumo. Ngele oya pula ekwatho kuJehova e ya wilike e taya pulakene nawa kwaashoka omumwameme ta popi, otaya ka vula oku mu ladhipika noku mu tsa omukumo okupitila mOohapu dhaKalunga. — Rom. 15:4.