1, 2. (a) Aanona oyendji mboka ya tembukila kiilongo yilwe pamwe naavali yawo oye na uupyakadhi wuni? (b) Omapulo geni tatu ka kundathana moshitopolwa shika?

JOSHUA okwa hokolola a ti: “Okuza kuunona wandje megumbo nomegongalo onda kala handi popi elaka lyaavali yandje mboka ya tembukila koshilongo shilwe. Ihe sho nda tameke osikola onda tameke okukala ndi hole elaka ndyoka hali popiwa moshitopolwa. Muule womimvo dhontumba onda kala owala handi popi elaka ndyoka hali popiwa moshitopolwa. Kanda li handi uvu po sha kokugonga nokanda li ndi wete kutya nangaye ogwomeputuko lyaavali yandje.” Joshua haye awike a ningilwa oshinima sha tya ngaaka.

² Kunena, aantu ye vulithe po 240 000 000 oye li miilongo moka haamo ya valelwa. Ngele owu li omuvali ngoka a tembukila koshilongo shilwe, ongiini to vulu okuninga ngaashi to vulu wu kwathele aamwoye ya hume komeho pambepo noya ‘kale moshili’? (3 Joh. 4) Ongiini yalwe taya vulu oku ya kwathela?

3, 4. (a) Aavali otaya vulu okutulila po ngiini oyana oshiholelwa oshiwanawa? (b) Oshike aavali kaaye na okutegelela oyana ye ya ningile?

³ Aavali, oshiholelwa sheni osha simanenena ngele omwa hala aanona yeni ye ende mondjila ndjoka tayi fala komwenyo gwaaluhe.  Ngele aamwoye oya mono to ‘kongo tango Oshilongo shaKalunga,’ otaye ki ilonga okukala yi inekela Jehova e ya kwathele moompumbwe dhawo dhesiku kehe. (Mat. 6:33, 34) Onkee ano, kaleni mu na onkalamwenyo ya ngungumana. Yambii po iinima yopamaliko, mu mone uuwanawa mwaambyoka yopambepo. Kambadhaleni okukala kaamu na oonguunga. Kongeni “eliko megulu,” opo mu kale mwa pandika kuJehova pehala lyokukonga eliko muuyuni mbuka nenge okukala mwa ‘pandika kaantu.’ —  Lesha Markus 10:21, 22; Joh. 12:43.

⁴ Inamu kala mwi ipyakidhila unene e tamu kala kaamu na ethimbo lyokukala naanona yeni. Ya tseyithileni kutya omu yu uvitile uuntsa sho ya tokola okupititha Jehova komeho pehala lyokwiikongela yo yene nenge ye mu kongele omaliko. Yandeni etaloko kaali shi lyopaKriste kutya aanona yeni oyo ye na oku mu kaleka nonkalamwenyo yuuzeko. Dhimbulukweni kutya ‘aanona hayo haa pungulile aakuluntu yawo omaliko, ihe aakuluntu oyo haa pungulile aanona yawo.’ —  2 Kor. 12:14.

5. Omolwashike aavali ya pumbwa okukala haya popi noyana kombinga yaJehova?

⁵ Ngaashi sha hunganekwa, aantu “yomalaka gomiigwana ayihe” (NW) otaya ka mbombolokela kehangano lyaJehova. (Sak. 8:23) Ihe uupyakadhi wu na ko nasha nelaka otawu vulu oku shi ninga oshidhigu kungoye okulonga aamwoye oshili. Aamwoye oyo aakonakonimbiimbeli ya simanenena mboka to vulu okukala wu na, ‘nokutseya’ kwawo Jehova otaku ke ya petha omwenyo gwaaluhe. (Joh. 17:3) Opo aamwoye yi ilonge omalongo gaJehova, owa pumbwa oku ge ya ‘hokololela’ poompito adhihe ndhoka tadhi opalele. —  Lesha Deuteronomium 6:6, 7.

6. Aanona otaya vulu okumona uuwanawa ngiini mokwiilonga elaka lyeni? (Tala kethano lyopetameko.)

⁶ Aanona yeni otashi vulika taye ki ilonga elaka ndyoka hali popiwa moshitopolwa kosikola nomomudhingoloko, ihe oye na okukala ye shi elaka lyeni nawa, opo ya kale haya vulu oku li popya nawanawa nane. Uuna aanona yeni ye shi elaka lyeni nawa otashi ya kwathele ya kale haya popi nane ya manguluka. Ngele aamwoye ohaya popi omalaka ga konda pulimwe, otashi ka hwepopaleka okudhiladhila kwawo notashi ya kwathele ya kale hayu uvu ko omataloko gayalwe. Otashi vulu wo oku ya kwathela ya tamunune mo uukalele wawo. Carolina ngoka aavali ye ya tembukila koshilongo shilwe okwa ti: “Ohashi kala oshihokithi okukala megongalo moka hamu popiwa elaka lilwe. Ohashi nyanyudha ndje okukwathela mpoka pu na ompumbwe onene yaauvithi.”

7. Oto ka ninga po shike ngele ngoye naanona yoye ihamu popi elaka limwe alike megumbo?

⁷ Sho aanona mboka ya tembukila naavali yawo kiilongo yilwe tayi ilongo eputuko nosho wo elaka lyomoshilongo moka ye li, yamwe yomuyo otashi vulika ya kale inaaya hala we okupopya naavali yawo elaka ndyoka ya yama. Aavali, ngele okanona keni osho ke li ngawo, mbela itamu vulu okwiilonga nando omalaka gamwe gomoshitopolwa? Otamu ka vula okuputudha oyana yeni mu li Aakriste ngele omwa kala mu uvite shoka taya popi, mu shi omainyanyudho ngoka ye hole, mu shi iilonga yawo yosikola nohamu vulu okupopya naalongi yawo kune yene. Odhoshili kutya okwiilonga elaka epe ohashi pula ethimbo, oonkambadhala nosho wo eidhidhimiko. Ihe ngele okanona oka ningi okambolo, mbela itamu ka kambadhala okwiilonga elaka lyokuudhika, opo mu kale hamu popi nako? Okanona hoka haka popi nawa elaka lilwe ndyoka hali popiwa moshitopolwa moka mu li, nane omwa pumbwa okwiilonga elaka ndyoka haka popi, mbela itamu shi zimine? *

8. Ongiini to vulu okukwathela aamwoye ngele iho popi elaka ndyoka haya popi?

⁸ Odhoshili kutya aavali yamwe mboka ya tembukila kiilongo yilwe, otashi vulika itaaya ka vula okupopya nawa elaka epe ndyoka tali  popiwa koyana. Naashika otashi vulika shi kale oshidhigu kuyo oku ya kwathela ya tseye “Omanyolo omayapuki.” (2 Tim. 3:15) Ngele nangoye owa gumwa konkalo ndjono, natango oto vulu okukwathela aamwoye ya tseye Jehova noya kale ye mu hole. Omukuluntugongalo gwedhina Shan okwa ti: “Meme ngoka e tu putudha oye awike okwa li ihu uvu ko nawa elaka ndyoka hatu popi, na ngame nokamwamemekadhona otwa li ihaatu popi nawa elaka ndyoka ha popi. Ihe sho twa mono nkene ha konakona, ha galikana noha ningi ngaashi ta vulu a kwatele komeho elongelokalunga lyuukwanegumbo, oshe tu kwathele tu mone kutya okutseya Jehova oshinima sha simanenena.”

9. Ongiini aavali taya vulu okukwathela aanona mboka ya pumbwa okukonakona momalaka gaali?

⁹ Aanona yamwe otashi vulika ya kale ya pumbwa okwiilonga kombinga yaJehova momalaka gaali, ndyoka haya popi kosikola naandyoka haya popi kegumbo. Molwetompelo ndyoka, aavali yamwe ohaya longitha iileshomwa, uungalo wa kwatwa nosho wo uuvidio momalaka agehe ngoka haya popi. Osha yela kutya aavali mboka ya tembukila kiilongo yilwe oye na okulongitha ethimbo olindji nokuninga oonkambadhala odhindji, opo ya kwathele oyana ya kale ye na ekwatathano lya kola naJehova.

10. (a) Olye e na okutokola kutya okegongalo lyelaka lini uukwanegumbo tawu kala hawu yi? (b) Omutse gwuukwanegumbo ogu na okuninga shike manga inaagu ninga omatokolo?

¹⁰ Uuna “aakwiilongo” ye li kokule nOonzapo ndhoka hadhi popi elaka lyawo, oya pumbwa okukala haye endathana negongalo ndyoka hali popi elaka lyomoshilongo moka ye li. (Eps. 146:9) Ihe ngele opu na egongalo li li popepi ndyoka hali longitha elaka ndyoka wa yama, epulo olyo kutya: Okegongalo lyelaka lini tamu kala hamu yi noyaandjeni? Ngele omutse gwuukwanegumbo gwa dhiladhila nawa pamwe negalikano nokupopya naakuume kopandjokana nosho wo naanona, ogu na okuninga etokolo. (1 Kor. 11:3) Iinima yini omutse gwuukwanegumbo gu na okudhiladhila komeho gethimbo? Omakontampango geni wu na okutula miilonga? Natu taleni gamwe gomugo.

11, 12. (a) Okanona ohaka kala ka taalela eshongo lini ngele kaku uvite ko nawa elaka ndyoka tali popiwa pokugongala? (b) Omolwashike aanona yamwe kaaye hole okwiilonga elaka lyaavali yawo?

¹¹ Aavali oye na okutala kutya aanona yawo oya pumbwa lela shike. Opo aanona ya mone ontseyo yashili yOmbiimbeli, oya pumbwa ethimbo lya gwana lyokwiilonga iinima yopambepo oshiwike kehe pehala owala lyoku yi longwa pokugongala. Dhiladhila kwaashino: Aanona otaya vulu okumona uuwanawa pokugongala hoka taku ningwa melaka ndyoka yu uvite nawa. Otaya vulu okwiilonga oshindji shoka aavali yawo tashi vulika ya kale inaaya tseya kutya otaya vulu okukala ye shi shi. Onkee ano, otashi vulu okukala oshidhigu okwiilonga po sha pokugongala ngele kayu uvite ko nawa elaka. (Lesha 1 Aakorinto 14:9, 11.) Okanona ohaka dhiladhila nenge haka popi tashi zi komutima melaka ndyoka ka yama. Aanona yamwe otaya vulu okwiilonga okugandja omatyokosha, okuninga omauliko nokupopya melaka ndyoka hali popiwa kaavali yawo, ihe itaya popi naanaa tashi zi komutima.

¹² Niishewe omutima gwokanona ihagu nwethwa mo owala kelaka, ihe nokwaashono taku uvu. Shoka osho sha li sha ningilwa Joshua ngoka a popiwa metetekelo. Omumwayinakadhona Esther ota ti: “Aanona ohaya tala ko elaka lyaavali yawo, eputuko neitaalo yi li oshinima shimwe.” Ngele aanona kaye wete kutya nayo oyomeputuko lyaavali yawo, otashi vulika ya kale inaaya hala okwiilonga elaka lyaavali yawo nokukala meitaalo lyawo. Oshike aavali mboka ya tembukila kiilongo yilwe taya vulu okuninga?

13, 14. (a) Omolwashike aaihokani yamwe mboka ya tembukila koshilongo shilwe pamwe noyana ya tembukile kegongalo hoka haku popiwa elaka lyomoshitopolwa? (b) Oshike she ya kwathele ya kale ya kola pambepo?

¹³ Aavali Aakriste oya pititha komeho uupambepo woyana, pehala lyiinima yopaumwene.  (1 Kor. 10:24) Samuel, he yaJoshua naEsther ota ti: “Ngame nanekulu lyandje otwa li twa tala kutya omelaka lini oshili tayi ka guma omitima dhaanona yetu, notwa galikana tu mone uunongo woku shi ninga. Shoka twa li tatu dhiladhila hasho sha li tashi ya opalele. Ihe sho twa mono kutya pokugongala kwomelaka lyetu ihaya mono po uuwanawa, otwa tokola tu tembukile kegongalo hoka haku popiwa elaka lyomoshitopolwa. Otwa kala hatu kala aluhe pamwe nayo pokugongala hoka nokukutha ombinga muukalele. Otwa li wo hatu hiya ookuume yomoshilongo moka ye ye ya lye pamwe natse nokuya pamwe nayo momalweendo. Iinima ayihe mbyoka oya kwathele aanona yetu ya tseye aamwatate nosho wo Jehova, e li He naKuume kawo, ihe ke shi owala Kalunga kawo. Otwa li twa tala ko oompito ndhoka dhi li oshinima sha simana noonkondo dhi vulithe okwiilonga elaka lyetu.”

¹⁴ Samuel okwa gwedha ko a ti: “Opo tu kale twa kola pambepo, ngame nanekulu lyandje otwa kala hatu yi wo kokugongala hoka haku ningwa melaka lyetu. Otwa li hatu kala twi ipyakidhila noonkondo, notwa li hatu kala twa vulwa. Ihe otatu pandula Jehova sho a yambeke oonkambadhala dhetu nomaiyambo ngoka twa ningi. Aanona yetu yatatu ayehe otaya longele Jehova miilonga yethimbo lyu udha.”

15. Omolwashike omumwameme Kristina a li e uvite kutya otashi ke mu endela nawa ngele okwa kala megongalo moka hamu popiwa elaka lyomoshitopolwa?

¹⁵ Aanona mboka aakuluntu otaya vulu okumona kutya otaya vulu okulongela Jehova megongalo moka hamu popiwa elaka ndyoka yu uvite nawa. Ngele osho yu uvite ngawo, aavali yawo kaye na okudhiladhila kutya oyana oye ye ekelahi. Kristina ota ti: “Onda li handi popi owala kashona elaka ndyoka hali popiwa kaavali yandje, ihe ngele tali popiwa kokugongala olya li edhigu noonkondo kungame. Sho nda gwanitha omimvo 12, onda yi koshigongi hoka haku popiwa elaka ndyoka nda longwa kosikola. Osha li oshikando shotango tandi uvu ko kutya shoka tashi popiwa osho oshili. Elunduluko lilwe lya ningwa po, oosho nda tameke okugalikana melaka ndyoka nda longwa okosikola. Onda li tandi vulu okupopya thiluthilu naJehova tashi zi komutima.” (Iil. 2:11, 41) Sho a koko, okwa li e shi kundathana naavali ye nokwa tokola okutembukila kegongalo hoka haku popiwa elaka lyomoshitopolwa. Okwa ti: “Okwiilonga kombinga yaJehova melaka ndyoka nda longwa kosikola okwi inyengitha ndje ndi katuke onkatu.” Konima yokathimbo Kristina okwa ningi omukokolindjila gwondjigilile a nyanyukwa.

16. Omolwashike omumwameme Nadia a nyanyukwa sho a kala megongalo moka hamu popiwa elaka ekwiilongo?

¹⁶ Aagundjuka, mbela ohamu dhiladhila ngaa kutya oshi li nawa okukala megongalo moka hamu popiwa elaka lyomoshitopolwa? Ngele osho, iipuleni kutya mbela okutembukila kegongalo hoka otaku ke mu kwathela ngaa mu hedhe popepi naJehova? (Jak. 4:8) Nenge omwa hala owala okutembuka, molwaashoka mwa hala okukala mwa manguluka ko kaavali yeni nenge molwaashoka inaamu hala okuninga oonkambadhala? Nadia ngoka ngashingeyi ta longo koBetel ota ti: “Sho ngame naamwayina yandje twa li twa gwanitha omimvo omulongo nasha, otwa li twa hala okutembukila kegongalo hoka haku popiwa elaka lyomoshitopolwa.” Ihe aavali yawo oya li ye shi kutya uupambepo woyana itawu ka kala wa kola ngele oya tembuka. Nadia ota ti: “Otwa nyanyukwa sho aavali yetu ye tu longa nuudhiginini elaka lyawo noye tu pitika tu kale megongalo moka hamu popiwa elaka ekwiilongo. Oshe tu kwathela tu kale twa kola pambepo notu tamunune mo uukalele wetu mokukwathela aantu ya tseye Jehova.”

17. (a) Jehova oshinakungwanithwa shokuputudha aanona okwe shi pa oolye? (b) Ongiini aavali taya vulu okumona ekwatho sho taya longo oyana oshili?

¹⁷ Jehova okwa pa aavali oshinakugwanithwa shokuputudhila oyana moshili, ihe ine shi pa ooinakulu nenge aantu yalwe. (Lesha  Omayeletumbulo 1:8; 31:10, 27, 28.) Aavali mboka kaaye shi elaka ndyoka hali popiwa moshitopolwa moka ya kala otaya vulu okukwathelwa ye li ilonge, opo ya vule okwaadha omitima dhoyana. Uuna taya kwathelwa yi ilonge elaka, itashi ti kutya oye na okweetha po iinakugwanithwa yawo yopambepo, ihe shoka otashi ke ya kwathela ya ‘putudhe oyana noku ya kumagidha paukriste.’ (Ef. 6:4) Pashiholelwa, aavali otaya vulu okupula aakuluntugongalo ye ya kwathele sho taya ningi elongelokalunga lyuukwanegumbo noye ya kwathele ya kale ye na ekwatathano ewanawa noyana.

18, 19. (a) Ongiini aamwatate naamwameme mboka ya pyokoka pambepo taya vulu okukwathela aagundjuka? (b) Aavali oye na okutsikila okuninga shike?

¹⁸ Pashiholelwa, omathimbo nomathimbo aavali otaya vulu okuhiya omaukwanegumbo galwe kekonakono lyawo lyuukwanegumbo. Niishewe, aagundjuka oyendji ohayi ilongo sha kAakriste yalwe uuna taya longo nayo muukalele nuuna taya ningi iinima yilwe pamwe nayo. (Omayel. 27:17) Shan ngoka a popiwa metetekelo ota ti: “Otandi dhimbulukwa nawa aamwatate mboka ya li ya sile ndje oshimpwiyu. Onda li handi ilongo oshindji kuyo, sho ya li haya kwathele ndje niipopiwa yandje mbyoka nda li handi gandja pokugongala. Onda li wo handi nyanyukilwa omainyanyudho pamwe nayo.”

¹⁹ Aantu mboka aavali ya pula ya kwathele oyana, oye na okukala aluhe taya ladhipike aagundjuka ya kale haya simaneke aavali yawo, haye ya popile muuwanawa, ihe kaye na okukutha po oshinakugwanithwa shawo. Kakele kaashono, mboka taya kwathele aagundjuka oye na okuyanda eihumbato ndyoka tali vulu okuuviwa ko pambambo megongalo nopondje nosho wo omikalo dha puka. (1 Pet. 2:12) Aavali kaye na okweetha owala yalwe oyo ya putudhe oyana pambepo. Oye na okutala kutya ekwatho lini taya pewa kwaamboka haya kala nayo nokutsikila okulonga oyana yo yene.

20. Ongiini aavali taya vulu okukwathela oyana ya kale aalongeli ya Jehova ye li nawa?

²⁰ Aavali, galikaneni kuJehova e mu kwathele e tamu ningi ngaashi tamu vulu. (Lesha 2 Ondjalulo 15:7.) Kwatheleni aanona yeni ya kale ookuume kaJehova pehala lyokupititha uuwanawa weni komeho. Ningeni ngaashi tamu vulu, mu kale mu shi kutya Oohapu dhaKalunga odha ningina momitima dhoyana yeni. Inamu etha po okukala mu uvite kutya aanona yeni otaya vulu okuninga aalongeli yaJehova ye li nawa. Uuna aanona yeni taya landula Oohapu dhaKalunga niiholelwa yeni iiwanawa, otamu ka kala mu uvite ngaashi omuyapostoli Johannes a li u uvitile oyana yopambepo sho a ti: “Kape na sha shilwe hashi nyanyudha ndje, shi vulithe okuuva kutya aamwandje oya kala moshili.” —  3 Joh. 4.