GAIUS nAakriste yalwe yomethelemimvo lyotango oya li ya taalelwa komashongo. Aantu mboka ya li taya taandelitha omalongo giifundja oya kambadhala okunkundipaleka nokutopola omagongalo. (1 Joh. 2:18, 19; 2 Joh. 7) Omulumentu gumwe gwedhina Diotrefes ngoka a li a “lundile” omuyapostoli Johannes nayalwe, okwa li a tindi okuyakula ooitaali ooyakwawo oondjendi nokwa li ta kambadhala okuhongolola yalwe ya landule oshiholelwa she. (3 Joh. 9, 10) Onkalo osho ya li ngawo sho Johannes a nyolele Gaius. Ontumwafo yomuyapostoli Johannes ndjoka ya nyolwa mo 98 E.N. lwaampono, tayi adhika mOmanyolo gopaKriste gOshigreka, ohayi ithanwa “Johannes omutitatu.”

Nonando Gaius okwa li a taalelwa komashongo, okwa li a tsikile okulongela Jehova nuudhiginini. Mbela okwa li u ulike ngiini uudhiginini we? Omolwashike twa hala okuholela oshiholelwa she kunena? Ongiini ontumwafo yaJohannes tayi vulu oku tu kwathela tu shi ninge?

Omunyoli gwaJohannes omutitatu okwi iyithana mwene ‘Omukuluntu.’ Omwana gwopambepo omuholike, Gaius okwa li a yelelwa kutya Johannes omuyapostoli. Johannes okwa li a popi nohole Gaius kutya oku li ‘omuholike ngoka e mu hole nomwenyo aguhe.’ Opo ihe Johannes okwa popi nomukumo kutya uukolele waGaius wopalutu uuwanawa wa fa uukolele we wopambepo. Johannes ka li tuu a popile Gaius muuwanawa! —  3 Joh. 1, 2, 4.

Gaius otashi vulika a li omukuluntungongalo e li nawa, ihe ontumwafo inayi shi popya naanaa. Johannes okwa li a pandula Gaius omolwokuyakula aamwahe nokuli naamboka kee ya shi. Johannes okwa li a tala ko Gaius e li omudhiginini, molwaashoka okuyakula aayenda okwa li haku ulike aluhe kutya ngoka te shi ningi oku li omupiya gwaKalunga. —  Gen. 18:1-8; 1 Tim. 3:23; Joh. 5.

Oohapu dhaJohannes tadhi pandula Gaius sho a yakula aamwahe otadhi ulike kutya Aakriste oya li haye endaenda aluhe moshitopolwa shomuyapostoli Johannes noshegongalo, nosha yela kutya oya li ya lombwele Johannes nkene ya yakulwa. Otashi vulika Johannes a li a kundana kombinga yegongalo momukalo ngoka.

Aakriste aaendi ohaya kala ya hala lela okukala pooitaali ooyakwawo. Momahala mono hamu kala aayendi omu na eihumbato ewinayi, eyakulo kaali li nawa nomikalo dha nyata. Onkee ano, mpoka tashi wapa, aaendi aanandunge oya li haya kala pookuume; pAakriste ooyakwawo mboka haye ya yakula nawa.

Johannes okwa li a ladhipike Gaius a tsikile okuyakula aayenda, sho e mu pula ‘a kwathele aaendi molweendo lwawo, ngaashi sho opalela Kalunga.’ Okukwathela aayenda otashi ti oku ya yakula ya vule okutsikila nolweendo lwawo noku ya pa shoka ya pumbwa sigo ya thiki hoka taya yi. Osha yela kutya Gaius shoka okwa li e shi ningila nale aayenda mboka a yakulile, molwaashoka oya li ya lombwele Johannes nkene ya yakulwa pahole nokombinga yeitaalo lyaamboka ye ya yakula. —  3 Joh. 3, 6.

Aayenda otashi vulika ya li aatumwa, aakalelipo yaJohannes, nenge aatonateli aayendi. Kutya nduno oyenipo, oya li taye ende omolwonkundana ombwanawa. Johannes okwa ti: “Omolwedhina lye oya yi mondjila.” (3 Joh. 7, OB-1954) Johannes okwa li ta popi kombinga yaKalunga (tala ovelise 6), onkene uutumbulilo “omolwedhina lye” otawu ulike kedhina lyaJehova. Ano aamwatate oya li yomegongalo lyopaKriste noya li ya gwana okuyakulwa nawa. Johannes okwa nyola a ti: “Otu na okukwatha aantu ya tya ngaaka, opo tu longe pamwe nayo mokutaandelitha elaka lyoshili.” —  3 Joh. 8.

Johannes ina nyolela owala Gaius netompelo lyoku mu pandula. Ihe okwa li a hala oku mu kwathela u ungaunge nuupyakadhi wa kwata miiti. Etompelo lilwe, omolwaashoka oshilyo shimwe shegongalo lyopaKriste shedhina Diotrefes kasha li sha hala okuyakula Aakriste aayendi. Okwa li nokuli ha kambadhala okwiindika yalwe kaaya yakule aayenda. —  3 Joh. 9, 10.

Kapu na omalimbililo kutya Aakriste aadhiginini kaya li ya hala okukala puDiotrefes, nokuli naampoka sha li tashi wapa. Molwaashoka okwa li e hole okukala komeho megongalo, ka li ha simaneke Johannes nokwa li a lundile aayapostoli nosho wo yalwe. Nonando Johannes ina tya kutya Diotrefes omulongi omufundja, ka li ha vulika kuJohannes. Molwaashoka Diotrefes okwa li e hole okutumbalekwa nokwa li e na iikala kaayi shi yopaKriste, aantu oya kala ya limbililwa uudhiginini we. Uupyakadhi waDiotrefes otawu ulike iikala iiwinayi yuuntsa noyokugeya mbyoka tayi vulu okukwata yalwe megongola. Onkee ano, Johannes okwa li a lombwele Gaius shoka sha kwatela mo kehe gumwe gwomutse a ti: “Ino holela shoka oshiwinayi.” —  3 Joh. 11.

Omukriste gwedhina Demetrius ka li a fa Diotrefes, okwa li a popiwa kuJohannes kutya oku li oshiholelwa oshiwanawa. Johannes okwa nyola a ti: ‘Demetrius okwa popilwa muuwanawa, natse wo otatu gwedha ko ehokololo lyetu, nou shi shi kutya shoka tatu popi, oshoshili.’ (3 Joh. 12) Otashi vulika Demetrius a li a pumbwa ekwatho lyaGaius, notashi vulika ontumwafo ontintatu yaJohannes oyo ya li efalomo lye nomayele ngoka a gandja. Otashi vulika Demetrius oye mwene a li a fala ko ontumwafo ndjoka kuGaius. Molwaashoka Demetrius okwa li omukalelipo gwaJohannes nenge pamwe a li omweendi omutalelipo, otashi vulika a li a tsuwa omukumo kwaashoka sha nyolwa kuJohannes.

Mbela omolwashike Johannes a li a ladhipike Gaius a tsikile okuyakula aayenda, nonando okwa li he shi ningi nale? Mbela okwa li a mono kutya Gaius okwa pumbwa okutsuwa omukumo? Mbela omuyapostoli okwa li ta dhiladhila kutya Gaius otashi vulika a kakadhale oku shi ninga, molwaashoka Diotrefes a li ha kambadhala okutidha mo Aakriste mboka ya li haya yakula aayenda megongalo? Kutya nduno uupyakadhi owa li peni, Johannes okwa li a lombwele natango Gaius a ti: “Ngoka ha longo uuwanawa, oye ogwaKalunga.” (3 Joh. 11) Ndyoka etompelo ewanawa okulonga shoka shu uka nokutsikila okuninga ngawo.

Mbela ontumwafo yaJohannes oya li ya ladhipike Gaius a tsikile okukala ha yakula aayenda? Johannes omutitatu okwa li a shilipaleke kutya omakotampango gOmbiimbeli ngoka oga li taga ka ladhipika yalwe ya ‘longe uuwanawa’ ngaashi naanaa sha popiwa.

Inapu tseyika oshindji kombinga yomumwatate gwetu omuholike gwopethimbo lyonale Gaius. Onkee ano, uuyelele mbuka wu li paufupi kombinga yonkalamwenyo ye, otawu vulu oku tu longa oshindji.

Shotango, oyendji yomutse otu na ongunga, sho twa tseya oshili omolwaamwatate aadhiginini mboka ya kala hayi iyamba nehalo ewanawa ye ye ye tu longe oshili. Odhoshili kutya haantu ayehe yomegongalo lyopaKriste kunena taya vulu okweenda iinano iileeleeka molwonkundana ombwanawa. Onkee ano, ngaashi Gaius, natse otatu vulu okuyambidhidha nokutsa omukumo aaendi, ngaashi aatonatelishikandjo naakulukadhi yawo. Nenge otashi vulika tatu vulu okukwathela aamwatate naamwameme mboka ya tembukila komahala galwe moshilongo shawo nenge kondje yiilongo hoka ku na ompumbwe onene yaauvithi. Onkee ano, natu ‘yakule oondjendi momagumbo getu.’ —  Rom. 12:13; 1 Tim. 5:9, 10.

Oshitiyali, inatu kumwa ngele poompito dhimwe, momagongalo gokunena omwa holoka aantu mboka inaaya simaneka mboka taya kwatele komeho. Aantu kaya li ya simaneka Johannes ngoka a li ta kwatele komeho nokaya li ya simaneka omuyapostoli Paulus. (2 Kor. 10:7-12; 12:11-13) Otatu ki inyenga nduno ngiini ngele otwa mono oshinima sha tya ngawo tashi ningwa kuyamwe megongalo? Paulus okwa ladhipike Timoteus a ti: “Omumati gwOmuwa ita pumbwa okutamanana. Oye oku na okukala omulongi omwaanawa, omwiidhidhimiki, e na olukeno naayehe noha pukulula aatamaneki ye nombili.” Ngele otwa kala tu na ombepo yombili nonando otatu ningwa nayi, oohandimwe mboka ye na iikala iiwinayi otashi vulika ya lundulule iikala yawo. Oshikwawo, “Kalunga ota vulu oku ya pa ompito yokwiitedhulula e taa tseya oshili.” —  2 Tim. 2:24, 25.

Oshititatu, Aakriste ooyakwetu mboka haya longele Jehova nuudhiginini, nonando otaya hepekwa, oya pumbwa okupandulwa nomutima aguhe omolwuudhiginini wawo. Odhoshili kutya omuyapostoli Paulus okwa li a ladhipike Gaius nokwe mu shilipaleke kutya okwa longa shoka shi li mondjila. Sha faathana, aakuluntugongalo kunena oye na okulandula oshiholelwa shaJohannes shokuladhipika aamwahe ‘kaaya vulwe.’— Jes. 40:31; 1 Tes. 5:11.

Ontumwafo yOmanyolo gOshigreka ndjoka omuyapostoli Johannes a nyolele Gaius, oyo yimwe ofupi mOmbiimbeli yi na owala iitya 219. Onkee ano, otayi ti sha lela kAakriste kunena.