OSHITOPOLWA SHOKUKONAKONWA 10
Ohole yokuhola Jehova noku mu pandula, otayi ke ku inyengitha wu ninginithwe
“Oshike ando tashi imbi ndje, ndi [ninginithwe, NW]?” — IIL. 8:36.
EIMBILO 37 Okulongela Jehova nomwenyo aguhe
ELALAKANO LYOSHITOPOLWA *
1-2. Ngaashi sha popiwa mIilonga 8:27-31, 35-38, oshike sha li shi inyengitha elenga lyokuEtiopia li ninginithwe?
MBELA owa hala okuninginithwa wu ninge omulongwa gwaKristus? Oyendji oyi inyengithwa kohole yokuhola Jehova nokolupandu, ye shi ninge. Natu taleni koshiholelwa shelenga lyomukwaniilwakiintu gwaEtiopia.
2 Elenga ndyoka, olya li lya tula miilonga nziya shoka li ilongo mOmanyolo. (Lesha Iilonga 8:27-31, 35-38.) Oshike she li inyengitha? Olya li lya lenga Oohapu dhaKalunga, oshoka olya li tali lesha oovelise dhontumba membo lyaJesaja, sho lya londa metemba. Sho Filippus a popi nalyo, olya li lya pandula shoka Jesus e li ningila. Omolwashike elenga lya li lya yi kuJerusalem? Omolwashoka olya adhika li hole Jehova. Otu shi shi ngiini? Oshoka olya adhika opo owala tali zi kuJerusalem, lya ka galikanene Jehova. Otashi vulika elenga ndyoka lya li lya thigi po eitaalo moka lya valelwa, e tali wayimine oshigwana shoka sha li shi iyapulila Kalunga kashili. Ohole yokuhola Jehova oyo ya li ye li inyengitha li katuke onkatu yilwe ya simanenena, ano okuninginithwa nokuninga omulongwa gwaKristus. — Mat. 28:19.
3. Oshike tashi vulu okwiimba omuntu a ninginithwe? (Tala oshimpungu “ Oshike shi li momutima gwoye?”)
3 Ohole yokuhola Jehova, otayi vulu oku ku inyengitha wu ninginithwe. Ihe ohole otayi vulu wo oku ku imba wu shi ninge. Ngiini mbela? Natu tale kiiholelwa yimwepo. Otashi vulika wu kale wu hole aakwanezimo nookuume koye mboka kaaye shi Oonzapo, notashi vulika wu ipule kutya ngele owa ninginithwa, otaye ke ku tonda. (Mat. 10:37) Nenge tashi vulika wu hole iinima mbyoka Kalunga e tonde, notashi vulika shi kale oshidhigu kungoye oku yi etha po. (Eps. 97:10) Nenge tashi vulika wa putuka ho dhana iituthi mbyoka yi na ekwatathano nomalongelokalunga giifundja. Otashi vulika wu kale wu hole oku yi dhimbulukwa. Oshizemo, otashi vulika wu shi mone oshidhigu okweetha po okukutha ombinga miituthi mbyoka Jehova e tonde. (1 Kor. 10:20, 21) Oto vulu okwiipula ngeyi: “Oshike nenge olye ndi hole unene?”
NGOKA TU NA OKUKALA TU HOLE UNENE
4. Oshike sha simanenena tashi ke ku inyengitha wu ninginithwe?
4 Otashi vulika wu na iinima oyindji mbyoka wu hole nowe yi pandula. Pashiholelwa, nokuli manga inoo tameka okukonakona nOonzapo dhaJehova, otashi vulika wa adhika nale wa simaneka noonkondo Ombiimbeli. Otashi vulika wo wa adhika wu hole Jesus. Sho ngashingeyi wa tseya Oonzapo dhaJehova, otashi vulika wu kale wu hole okweendathana nadho. Ihe okukala wu hole iinima mbyoka iiwanawa, hasho lela tashi ku ningitha wu kale wa hala okwiiyapulila Jehova nowu ninginithwe. Oshinima sha simanenena shoka tashi vulu oku ku inyengitha wu ninginithwe, ohole yokuhola Jehova Kalunga. Ngele owa kala wu hole Jehova komeho giinima ayihe, ito ka etha oshinima shontumba nenge omuntu gwontumba, e ku imbe wu mu longele. Ohole yokuhola Jehova, otayi ke ku inyengitha wu ninginithwe notayi ke ku kwathela wo wu tsikile okukala omudhiginini nokuli nokonima ngele wa ninginithwa.
5. Omapulo geni tatu ka kundathana?
5 Jesus okwa ti kutya natu kale tu hole Jehova nomutima gwetu aguhe, nomwenyo gwetu aguhe, nomadhiladhilo getu agehe nonoonkondo dhetu adhihe. (Mark. 12:30) Ongiini to vulu okwiilonga okukala wu hole lela Jehova nowe mu simaneka noonkondo? Okudhiladhila kohole yaJehova yoku tu hola, ohaku tu inyengitha tu kale tu mu hole wo. (1 Joh. 4:19) Omaiyuvo galwe geni to ka kala wu na noonkatu dhini to ka katuka, uuna wa kokeke ohole ndjoka ya simanenena? *
6. Shi ikolelela kAaroma 1:20, omomukalo gumwe guni to vulu okwiilonga kombinga yaJehova?
6 Ilonga kombinga yaJehova okupitila meshito. (Lesha Aaroma 1:20; Eh. 4:11) Tedhatedha kiimeno nokiinamwenyo mbyoka Jehova a shita, nankene tayi ulike uunongo we. Ilonga wo kombinga yomukalo omukumithi moka olutu lwoye lwa shitwa. (Eps. 139:14) Shimwe ishewe, dhiladhila koonkondo ndhoka Jehova a tula metango, ndyoka li li limwe lyomoonyothi omabiliyona. * (Jes. 40:26) Uuna we shi ningi, oto ka simaneka Jehova shi vulithe nale. Nonando ongawo, okutseya kutya Jehova omunandunge noku na oonkondo, oku li owala oshitopolwa shekankameno hoka kwa kankamena ekwatathano lyoye naye. Opo wu kale wu mu hole noonkondo, owa pumbwa okutseya oshindji kombinga ye.
7. Owa pumbwa okutompwa kushike, opo wu kale wu hole Jehova noonkondo?
7 Owa pumbwa okukala wa tompwa lela kutya Jehova oku na ko nasha nangoye pauhandimwe. Mbela oshidhigu kungoye okwiitaala kutya Omushiti gwegulu nogwevi oha kala e ku wete noku na ko nasha nangoye? Ngele osho, dhimbulukwa kutya Jehova “ke li kokule nomuntu nando ogumwe.” (Iil. 17:26-28) Oha ‘konakona omitima dhaantu ayehe’ (OB-1954), nokwe ku uvanekela shoka David a lombwela Salomo kutya “nge to yi kuye, ote ku taamba.” (1 Ondjal. 28:9) Uushili owo kutya, sho to konakona Ombiimbeli ngashingeyi, oosho Jehova ‘oye e ku hilila kuye.’ (Jer. 31:3) Mpoka ngaa pu thike okupandula kwoye ashihe shoka Jehova e ku ningila, opo ngaa tapu ka kala pu thike ohole yoye yoku mu hola.
8. Ongiini to vulu okuulika kutya owa pandula ohole yaJehova?
8 Omukalo gumwe to vulu okuulika kutya owa pandula ohole yaJehova, omokupopya naye megalikano. Ohole yoye yoku mu hola otayi ka koka, sho to mu lombwele kombinga yaashoka to ipula nasho, naasho to mu pandula omolwiinima ayihe mbyoka e ku ningila. Ekwatathano lyoye naye otali ka kola, sho wu wete ta yamukula omagalikano goye. (Eps. 116:1) Oto ka kala wa tompwa kutya oku ku uvite ko. Ihe opo wu hedhe popepi naJehova, owa pumbwa okuuva ko omukalo gwe gwokudhiladhila. Owa pumbwa wo okutseya shoka a hala kungoye. Omukalo owala moka to vulu okutseya iinima mbyoka, omokukonakona Oohapu dhe, Ombiimbeli.
Omukalo dhingi ngoka tagu vulu oku tu kwathela tu hedhe popepi naJehova notu tseye shoka a hala tu ninge, okukonakona Ombiimbeli (Tala okatendo 9) *
9. Ongiini to vulu okuulika kutya owa lenga Ombiimbeli?
9 Ilonga okukala wa lenga Oohapu dhaKalunga, Ombiimbeli. Ombiimbeli oyo owala ya popya oshili kombinga yaJehova nosho wo elalakano ndyoka e ku nine. Oho ulike kutya owa lenga Ombiimbeli, moku yi lesha esiku kehe, moku yi longitha uuna to ilongekidhile ekonakonombiimbeli lyoye nomokutula miilonga shoka to ilongo. (Eps. 119:97, 99; Joh. 17:17) Mbela owu na elandulathano lyokulesha Ombiimbeli paumwene? Mbela oho li landula, noho shilipaleke kutya owe yi lesha esiku kehe?
10. Shimwe shomiinima mbyoka ya ningitha Ombiimbeli yi kale embo lyi ikalekelwa, oshini?
10 Shimwe shomiinima mbyoka ya ningitha Ombiimbeli yi kale embo lyi ikalekelwa, omahokololo kombinga yaJesus ngoka ga popiwa kwaamboka ya li po. Olyo owala embo li li paushili ndyoka lya yelitha shoka Jesus e ku ningila. Sho to ilongo shoka Jesus a popi naashoka a ningi, otashi vulika wu kale wa hala okupanga uukuume naye.
11. Oshike tashi ke ku kwathela wu kale wu hole Jehova?
11 Ilonga okukala wu hole Jesus, opo nduno ohole yoye yokuhola Jehova otayi ka koka. Omolwashike? Omolwaashono Jesus oha ulike omaukwatya gaHe thiluthilu. (Joh. 14:9) Onkee ano, shi thike ngaa pokwiilonga kwoye kombinga yaJesus, opo ngaa tapu ka kala pu thike okutseya kwoye Jehova nokukala we mu lenga. Dhiladhila kolukeno ndwoka Jesus a ulukile mboka ya li ya dhinika kuyalwe, ngaashi oohepele, aavu naankundi. Dhiladhila wo komayele taga longo, ngoka he ku pe nankene onkalamwenyo yoye ya hwepopala, sho we ga tula miilonga. — Mat. 5:1-11; 7:24-27.
12. Sho to ilongo kombinga yaJesus, otashi ke ku inyengitha wu ninge shike?
12 Ohole yoye yokuhola Jesus otashi vulika yi kole, ngele owa kala ho dhiladhila muule kombinga yeyambo ndyoka a ninga, opo oondjo dhetu dhi dhimwe po. (Mat. 20:28) Uuna we shi uvu ko kutya Jesus okwe ku sila nehalo ewanawa, otashi vulika shi ku inyengithe wu iyele ombedhi nowu pule Jehova e ku dhimine po. (Iil. 3:19, 20; 1 Joh. 1:9) Shimwe ishewe, ngele owa kala wu hole Jesus naJehova, otashi ke ku inyengitha wo wu kale wu hole yalwe.
13. Jehova okwe ku pa shike?
13 Ilonga okukala wu hole mboka ye hole Jehova. Aakwanezimo yoye mboka kaaye shi Oonzapo nookuume koye yonale, otashi vulika kaaye shi uve ko kutya omolwashike wa hala okwiiyapulila Jehova. Otashi vulika nokuli ye ku pataneke. Jehova ote ke ku ambidhidha okupitila maamwatate naamwameme, mboka taya ka kala ya fa aakwanezimo yoye. Ngele owa kala wu na ekwatathano nayo, otaye ke ku ulukila ohole noku ku pa ekwatho ndyoka wa pumbwa. (Mark. 10:29, 30; Heb. 10:24, 25) Mokweendela ko kwethimbo, aakwanezimo yoye otashi vulika ye ku wayimine mokulongela Jehova nokukala metsokumwe nomithikampango dhe. — 1 Pet. 2:12.
14. Ngaashi sha popiwa muJohannes gwotango 5:3, oshike wi ilonga kombinga yomithikampango dhaJehova?
14 Ilonga okukala wa lenga omithikampango dhaJehova noku dhi tula miilonga. Manga inoo tseya Jehova, otashi vulika wa li ho landula omithikampango dhoye, ihe ngashingeyi owe shi mona kutya omithikampango dhe, odho dhingi. (Eps. 1:1-3; lesha 1 Johannes 5:3.) Dhiladhila owala komayele gopaMbiimbeli ngoka ga pewa aasamane, aakulukadhi, aavali naanona. (Ef. 5:22–6:4) Mbela sho wa tula miilonga omayele ngono, onkalo megumbo inayi hwepopala? Sho ho vulika komalombwelo gaJehova ge na ko nasha nokuhogolola ookuume pandunge, mbela oshe ku kwathela wu kale omuntu omuhwepo? Mbela ngashingeyi owa nyanyukwa? (Omayel. 13:20; 1 Kor. 15:33) Otashi vulika eyamukulo lyoye komapulo ngoka, oeeno.
15. Oshike to vulu okuninga, ngele owa pumbwa ekwatho wu tule miilonga omakotampango gOmbiimbeli?
15 Omathimbo gamwe, otashi vulika wu shi mone oshidhigu nkene wu na okutula miilonga omakotampango gOmbiimbeli ngoka to ilongo? Omolwetompelo ndyoka, Jehova oha longitha ehangano lye, opo e ku pe iileshomwa yopaMbiimbeli mbyoka tayi vulu oku ku kwathela wu vule okuyoolola shoka shi li mondjila naashoka sha puka. (Heb. 5:13, 14) Uuna to lesha nokukonakona iileshomwa mbyoka, oto ke shi mona nkene tayi ku kwathele nankene ya popya iinima kondandalunde, notashi vulika wu ka kale wa hala okukala mehangano lyaJehova.
16. Jehova okwa unganeka ngiini aapiya ye?
16 Ilonga okukala wu hole ehangano lyaJehova noku li ambidhidha. Jehova okwa unganeka aapiya ye momagongalo, na Jesus, Omwana, oye omutse gwago agehe. (Ef. 1:22; 5:23) Jesus okwa langeka po okangundu kaagwayekwa, ya kwatele komeho mokuunganeka iilonga mbyoka a hala yi longwe kunena. Jesus okwa popya okangundu hoka ke li “omupiya omudhiginini nomunandunge,” noka tala ko oshinakugwanithwa shako shoku ku palutha noku ku gamena pambepo, sha simanenena. (Mat. 24:45-47, NW) Omukalo gumwe moka omupiya omudhiginini he ku sile oshimpwiyu, omokushilipaleka kutya opwa langekwa aakuluntugongalo ye ku tonatele. (Jes. 32:1, 2; Heb. 13:17; 1 Pet. 5:2, 3) Aakuluntugongalo oye na ehalo lyoku ku ambidhidha ngaashi taya vulu, lyoku ku hekeleka nolyoku ku kwathela wu hedhe popepyeelela naJehova. Ihe shimwe shomiinima mbyoka ya simanenena taya vulu oku ku ningila, oku ku kwathela wu longe yalwe kombinga yaJehova. — Ef. 4:11-13.
17. Shi ikolelela kAaroma 10:10, 13, 14, omolwashike hatu popi nayalwe kombinga yaJehova?
17 Kwathela yalwe ya kale ye hole Jehova. Jesus okwa lombwele aalanduli ye, ya longe aantu ooyakwawo kombinga yaJehova. (Mat. 28:19, 20) Otatu vulu okuvulika koshipango shoka, molwaashoka otu shi kutya osho tu na okuninga. Sho ohole yoye yokuhola Jehova tayi koko, oto ka kala wu uvite ngaashi omuyapostoli Petrus naJohannes. Oya ti: “Itatu vulu okumwena, tu kale ando itaatu hokolola shoka tse twe shi mono notwe shi uvu.” (Iil. 4:20) Okukwathela omuntu a kale e hole Jehova, oku li shimwe shomiinima mbyoka hayi nyanyudha noonkondo. Dhiladhila owala kenyanyu ndyoka omuuvithi Filippus a li e uvite, sho a kwathele elenga enene lyokuEtiopia, li ilonge oshili yomOohapu dhaKalunga e tali ninginithwa! Uuna to holele Filippus nokuvulika kelombwelo lyaJesus lyokuuvitha, kungawo oto ulike kutya owa hala okuninga Onzapo yaJehova. (Lesha Aaroma 10:10, 13, 14.) Ngele owa thiki pompito ndjono, otashi vulika wo wu pule epulo ndyoka lya pulilwe kelenga, tali ti: “Oshike ando tashi imbi ndje, ndi [ninginithwe, NW]?” — Iil. 8:36.
18. Oshike tatu ka kundathana moshitopolwa tashi landula?
18 Uuna wa tokola okuninginithwa, ndyoka olyo tali ka kala etokolo lya simanenena monkalamwenyo yoye. Molwaashoka etokolo ndyoka olya kwata miiti, owa pumbwa okudhiladhila muule shoka sha kwatelwa mo. Oshike wa pumbwa okukala wu shi kombinga yokuninginithwa? Oshike wa pumbwa okuninga, manga inoo ninginithwa nosho wo konima ngele wa ninginithwa? Omapulo ngoka otaga ka yamukulwa moshitopolwa tashi landula.
EIMBILO 2 Jehova olyo edhina lyoye
^ okat. 5 Yamwe mboka ye hole Jehova, ohaya kala ya limbililwa ngele oya gwana okuninginithwa ya kale Oonzapo dhe. Ngele osho wu uvithe ngawo, oshitopolwa shika otashi ke ku kwathela wu talulule iinima mbyoka to vulu okuninga, opo wu ninginithwe.
^ okat. 5 Omuntu kehe okwi ili. Onkee ano, yamwe otashi vulika ya tule miilonga omaetopo ngoka ga popiwa moshitopolwa shika, momikalo dha yooloka ko kwaandhoka dhe etwa mo.
^ okat. 6 Opo wu mone iiholelwa oyindji, tala okambo Was Life Created? nosho wo The Origin of Life — Five Questions Worth Asking.
^ okat. 61 ETHANO PEPANDJA 5: Omumwameme ta gandja okafo komukiintu omugundjuka, ngoka e li pokatala ke kiikwamboga.
