Mondjugo yethikilo omo mwa li hamu pitilwa, opo wu ye mela lyUuyapukilela wotempeli. Sha ikolelela komatoloko gOmbiimbeli yoNew World Translation of the Holy Scriptures, ngoka ga nyanyangidhwa omimvo dha tetekele 2023, oga ti: “Ondjugo yethikilo oya li yi na omutamo wu thike poondja 20, ngoka gu thike pamwe nuunene gwotempeli, nuule gwayo ogwa li oondja 120.” (2 Ondjal. 3:4) Omatoloko gamwe oga ti wo kutya ondjugo ndjoka oya li yi na “oondja 120” muule wopombanda, sha hala okutya oya li yi thike poshungo yoometa 53.

Shi nasha nondjugo yokuthikila yomotempeli yaSalomo, enyanyangidho lyo-New World Translation lyomo 2023 olya ti: “Uule wayo wopombanda owa li oondja 20,” nenge tu tye oometa 9 lwaampono. a Natu ka taleni kutya omolwashike pwa ningwa elunduluko ndyoka.

Uule wopombanda wondjugo yethikilo ina wu tumbulwa mo 1 Aakwaniilwa 6:3. Movelise ndjoka, Jeremia okwa nyola owala kombinga yomutaandelo nomutamo gwondjugo, ihe ina popya kombinga yuule wayo wopombanda. Opo ihe montopolwa ya landula ko, okwa yelitha oshindji kombinga yiitopolwa yilwe yotempeli iindhindhilikwedhi, mwa kwatelwa ondama yoshikushu, oombaali omulongo noongudhi dhiikushu ndhoka dha li dhi li pondje yondunda yokuthikila. (1 Aak. 7:15-37) Andola ondjugo yokuthikila oya li yi na shili uule wopombanda wa konda poometa 50 noyi vule otempeli ayihe muule, omolwashike Jeremia inaa tumbula uule wayo wopombanda? Nokuli konima sho pwa pita omimvo ethele, aanandjokonona Aajuda oya li ya nyola kutya ondjugo yokuthikila kaya li yi vule otempeli yaSalomo.

Aalongwantu oya li ya limbililwa ngele omakuma gotempeli oga li ngaa taga vulu okuyambidhidha ondjugo yi na uule woometa dhi vulithe po50. Omamanya omaleeleka nomakuma gopethimbo lyonale, ngaashi omiyelo dhOtempeli yomuEgipiti, odha li hadhi kala ominene pevi, dho pombanda tadhi kala dha fa omishona. Ihe otempeli yaSalomo hasho ya li ngaaka. Aalongwantu oya itaala kutya omakuma gondjugo yokuthikila kaga li nando ge na uule wa konda poometa 2.7. Omulafululi gwondjokonona Theodor Busink, okwa thiki pehulithodhiladhilo kutya: “Sha ikolelela kuunene wekuma lyoposheelo shotempeli, ondjugo yokuthikila kaya li tayi vulu okukala yi na oometa 50 nasha.”

Oohapu ndhoka dhi li mo 2 Ondjalulo 3:4 otashi vulika dha tapwa epuko. Nonando omanyolwakaha gonale otaga ti “120” movelise ndjika, oohapu dhimwe dhi shi okwiinekelwa ngaashi embo lyonale lyomethelemumvo etitano Alexandrinus nembo lyomethelemumvo etihamano Ambrosianus oga ti “oondya 20.” Omolwashike omulongimpango tashi vulika a li a nyola papuko “120”? Omolwaashoka iitya yomOshihebeli mbyoka ya tolokwa “ethele” nosho wo “oondya” ohayi nyolwa ya faathana. Onkee omunyolululi otashi vulika a li a nyola oshitya “ethele” pehala lyokunyola “oondya.”

Nonando otatu kambadhala okuuva ko uuyelele mbuka nokuulika nkene otempeli yaSalomo ya li paulelalela, ohatu gandja unene eitulomo kwaashoka otempeli ndjoka ya li tayi thaneke, ano otempeli onene yopambepo. Otwa pandula noonkondo sho Jehova a hiya aapiya ye ayehe ye mu longele motempeli ndjoka. — Heb. 9:11-14; Eh. 3:12; 7:9-17.