1. Omagano gamwe geni Jesus e tu pa?

 KAPU na nando omuntu gumwe a ninga oshindji a kwathele yalwe e vule Jesus. Sho a li kombanda yevi, okwa li a longitha oonkondo dhe dhopashikumithalonga a kwathele yalwe. (Luk. 9:12-17) Okwa li a gandja omagano ga dhengambanda kaa kuna we sho a li a gandja omwenyo gwe omolwetu. (Joh. 15:13) Oku za peyumuko lye, Jesus okwa tsikile noku tu kwathela. Ngaashi e shi uvaneka, okwa li a pula Jehova e tu tilile ombepo ye ondjapuki yi tu longe noku tu hekeleka. (Joh. 14:16, 17, enyolo lyopevi; 16:13) Okupitila momakugongala, Jesus ota tsikile oku tu pa shoka twa pumbwa tu ninge aantu aalongwa muuyuni auhe. — Mat. 28:18-20.

2. Oolye ya kwatelwa mo ‘momagano’ ngoka taga popiwa mAaefeso 4:7, 8?

² Natu taleni ishewe komagano gamwe ngoka Jesus a gandja. Omuyapostoli Paulus okwa li a nyola kutya konima sho Jesus a londo a yi megulu “okwa pe aantu omagano.” (Lesha Aaefeso 4:7, 8.) Paulus okwa li a yelitha kutya Jesus okwa li a gandja omagano ngoka nelalakano lyokwaambidhidha egongalo momikalo dhi ili nodhi ili. (Ef. 1:22, 23; 4:11-13) Kunena, ‘omagano’ ngoka oga kwatela mo aayakuligongalo, aakuluntugongalo naatonatelishikandjo. a Odhoshili kutya aalumentu mbono inaya gwanenena, onkene ohaya ningi omapuko. (Jak. 3:2) Ihe Omuwa gwetu Jesus Kristus ohe ya longitha ye tu kwathele noye li omagano kutse.

3. Yelitha nkene atuheni tatu vulu oku ambidhidha iilonga ‘yaalumentu mbaka ye li omagano.’

³ Jesus okwa li a gandja “omagano” ngaka gaalumentu ya tunge egongalo. (Ef. 4:12) Ihe atuheni otatu vulu okuya kwathela ya gwanithe po oshinakugwanithwa shika sha simana. Natu shi  thaneke ngeyi, yamwe yomutse ohatu kutha ombinga mokutunga Oshinyanga shUukwaniilwa. Yamwe ohaya ambidhidha iilonga mokugandja iikulya, olefa nenge iipumbiwa yilwe. Sha faathana, atuheni otatu vulu okuyambidhidha oonkambadhala dhaayakuligongalo dhaakuluntugongalo nodhaatonatelishikandjo, okupitila mwaashoka hatu popi nokuninga. Natu ka taleni nkene hatu mono mo uuwanawa miilonga yawo yuudhiginini nankene tatu vulu okuulika kutya otwe ya pandula nosho wo kutya otwa pandula Jesus ngoka e tu pa ‘aalumentu mbaka ye li omagano.’

AAYAKULIGONGALO OHAYA “YAKULA”

4. Iilonga yimwe yini ‘yokuyakula’ mbyoka aayakuligongalo ya li haya longo methelemumvo lyotango?

⁴ Methelemumvo lyotango, aamwatate yamwe oya li ya langekwa po ye li aayakuligongalo. (1 Tim. 3:8) Osha fa shi li ngeyi kutya oya li haya longo iilonga ‘yokuyakula’ mbyoka Paulus a li a nyola kombinga yayo. (1 Kor. 12:28) Oshi iwetikile kutya aayakuligongalo oya li haya longo iilonga ya simana, opo aakuluntugongalo ya gandje eitulomo kokulonga nokokuninga omatalelopo guusita. Pashiholelwa, otashi vulika aayakuligongalo ya li haya kwathele mokuninga ookopi dhOmanyolo, nenge tashi vulika ya li haya kwathele moku ka landa iinima mbyoka ya pumbiwa opo ku ningwe ookopi ndhoka.

5. Iilonga yimwe yini yokuyakula aayakuligongalo haya longo kunena?

⁵ Natu taleni kiinima yimwe ya simana mbyoka aayakuligongalo haya longo momagongalo getu. (1 Pet. 4:10) Otashi vulika ya pulwe ya ungaunge nomayalulo gegongalo, nenge niitopolwa yokuuvitha yegongalo, ya mbestele iileshomwa yegongalo, okulongitha iikwamawi, nenge iikwavidio, okulonga ye li aayakuli, nenge mokukwathela okukaleka Oshinyanga shUukwaniilwa monkalo ombwanawa. Iilonga ayihe mbyoka oya simana kegongalo opo iinima yi ende nawa. (1 Kor. 14:40) Shimwe ishewe, aayakuligongalo yamwe ohaya gandja iipopiwa moshitopolwa Onkalamwenyo yopaKriste niilonga yokuuvitha nokugandja iipopiwa yomontaneho. Omuyakuligongalo otashi vulika a langekwe po a kwathele omutonateli gwongundu. Poompito dhimwe, aayakuligongalo yamwe ohaya wayimine aakuluntugongalo momatalelopo guusita.

6. Omolwomatompelo geni hatu pandula aayakuligongalo mboka haya longo nuudhiginini?

⁶ Iilonga yaayakuligongalo ohayi etele ngiini egongalo uuwanawa? Beberly, omumwameme gwokoBolivia, okwa ti: “Onda pandula aayakuligongalo molwaashoka ohandi tyapula okugongala. b Omolwiilonga yawo, ohandi imbi, handi gandja omatyokosha, handi pulakene kiipopiwa nohandi ilongo sha muuvidio nomomathano. Ohaya kwathele mokushilipaleka kutya mboka ye li pomakugongala oya gamenwa nohaya kwathele wo mboka itaya vulu okuya kokugongala oshipala noshipala ya tale opolohalama okuza momagumbo gawo. Konima yokugongala ohaya kwathele noku opaleka, okukwathela nomayalulo noku shilipaleka kutya otu na iileshomwa mbyoka twa pumbwa. Onda pandula aayakuligongalo.” Leslie, ngoka ha zi ko Kolombia, ngoka omusamane gwe e li omukuluntugongalo, okwa ti: “Omusamane gwandje okwa pumbwa ekwatho lyaayakuligongalo, opo a gwanithe po iinakugwanithwa yi ili noyi ili. Andola kaya li po, ando oha kala a ipyakidhila unene, onkene onde ya pandula noonkondo naasho ye na ehalo lyokukwathela.” Kapu na omalimbililo kutya atuheni otwa pandula noonkondo aayakuligongalo, omolwiilonga mbyoka haya longo. — 1 Tim. 3:13.

7. Ongiini tatu vulu okuulika kutya otwa pandula aayakuligongalo? (Tala wo ethano.)

⁷ Nonando otashi vulika twa pandula aayakuligongalo, Ombiimbeli otayi tu ladhipike ‘tu kale tu na olupandu.’ (Kol. 3:15, NW) Krzysztof, omukuluntugongalo gwokoSuomi, okwa popi kombinga ya nkene a li a ulike olupandu sho a ti: “Ohandi  tumu okakalata, nenge ndi nyole etumwalaka nda kwatela mo enyolo nokutumbula kondandalunde nkene omuyakuligongalo a tsa ndje omukumo, nenge kutya omolwashike nda pandula iilonga ye.” Pascal naJael, yokoNew Caledonia, olundji ohaya kwatele aayakuligongalo momagalikano gawo. Pascal okwa yelitha a ti: “Omathimbo opo ga zi ko, otwa kala hatu kwatele momagalikano aayakuligongalo, tatu pandula Jehova omolwawo noku mu pula a kale pamwe nayo noku ya kwathela. Jehova oha uvu omagalikano ga tya ngawo noshizemo aantu ayehe megongalo ohaya mono mo uuwanawa.” — 2 Kor. 1:11.

AAKULUNTUGONGALO “TAYA LONGO NUUDHIGININI MOKATI KETU”

8. Omolwashike Paulus a li a nyola kutya aakuluntugongalo yomethelemumvo lyotango oya li haya “longo nuudhiginini”? (1 Aatessalonika 5:12, 13)

⁸ Aakuluntugongalo methelemimvo lyotango oya li haya longo nuudhiginini omolwegongalo. (Lesha 1 Aatessalonika 5:12, 13; 1 Tim. 5:17) Oya li ‘taya longo megongalo,’ taya kwatele komeho omakugongala nokuninga omatokolo ye li olutu lwaakuluntugongalo. Oya li haya ‘kumagidha’ aamwahe noku ya pa kondandalunde omayele gopahole, opo ya gamene egongalo. (1 Tes. 2:11, 12; 2 Tim. 4:2) Odhoshili kutya aalumentu mbaka ohaya longo nuudhiginini opo ya sile oshimpwiyu omaukwanegumbo gawo nokwiisila wo oshimpwiyu pambepo. — 1 Tim. 3:2, 4; Tit. 1:6-9.

9. Iinakugwanithwa yimwe yini aakuluntugongalo ye na kunena?

⁹ Kunena, aakuluntugongalo oya ipyakidhila noonkondo. Oye li aauvithi yevaangeli. (2 Tim. 4:5) Ohaya kwatele komeho nuulaadhi iilonga yokuuvitha, haya unganeke iilonga yokuuvitha miitopolwa moka ye li, nohaye tu dheula tu uvithe nokulonga aantu nawa. Aanamutimahenda noka ye na ontondo. Uuna Omukriste a yono eyono lya kwata miiti, aakuluntugongalo ohaya kambadhala oku mu kwathela a kale ishewe e na ekwatathano ewanawa naJehova. Pompito opo tuu mpoka, ohaya kambadhala okukaleka egongalo lya yogoka. (1 Kor. 5:12, 13; Gal. 6:1) Aakuluntugongalo oye shiwike ye li aasita. (1 Pet. 5:1-3) Ohaya gandja iipopiwa ya longekidhwa nawa ya kankamena komanyolo nohaya longo nuudhiginini ya tseye kehe gumwe megongalo nokuninga omatalelopo guusita. Kakele kiinakugwanithwa yilwe mbyoka aakuluntugongalo ye na, aakuluntugongalo yamwe ohaya kwathele wo mokutunga nomokukaleka po Iinyanga yUukwaniilwa, okuunganeka iigongi niilonga yOkomitiye yOkukwatathana nIipangelo nosho wo Oongundu dhokutalela po aavu. Aakuluntugongalo ohaya longo nuudhiginini omolwetu.

10. Omolwomatompelo gamwe geni hatu pandula aakuluntugongalo mboka haya longo nuudhiginini?

¹⁰ Jehova okwa uvaneka kutya aasita otaye ku tu sila oshimpwiyu ‘noitatu ka kala we twa tila nenge tu haluke.’ (Jer. 23:4) Omumwameme Johanna, gwokoSuomi, okwa li a mono uushili woohapu ndhoka sho yina a li a taalela omukithi gwa kwata miiti. Okwa ti: “Omukuluntugongalo ngoka kaa nda li ndi shi nawa okwa li a idhidhimikile ndje, a galikana pamwe nangame nokushilipaleka ndje kutya Jehova oku hole ndje. Itandi dhimbulukwa naanaa shoka a li a popi, ihe otandi dhimbulukwa kutya onda li ndi uvite nda gamenwa. Onda itaala kutya Jehova oye a li e mu tumu, a kwathele ndje pethimbo naanaa lya opala.” Ongiini aakuluntugongalo yomegongalo lyeni ye ku kwathela?

11. Ongiini tatu vulu okuulika kutya otwa pandula aakuluntugongalo? (Tala wo ethano.)

¹¹ Jehova okwa hala tu ulike kutya otwa pandula aakuluntugongalo tashi zi komutima “omolwa iilonga yawo.” (1 Tes. 5:12, 13) Henrietta, ngoka wo ha zi moSuomi, okwa ti: “Aakuluntugongalo ohaya kwathele yalwe nehalo ewanawa, ihe shono itashi ti kutya oye na ethimbo lya gwedhwa po noonkondo, nenge kaye na omashongo moonkalamwenyo dhawo. Omathimbo gamwe ohandi ti kuyo, ‘Mbela owu shi shi ngaa? Owu li lela omukuluntugongalo  omwaanawa. Onda li owala nda hala wu shi tseye.’” Omumwameme gwedhina Sera, ngoka e li moTürkiye c, okwa ti: “Aakuluntugongalo oya pumbwa etsomukumo opo ya tsikile nokulonga iilonga yawo. Onkene otatu vulu oku ya nyolela okakalata, oku ya hiya ye ye ya lye pamwe natse nokulonga pamwe nayo miilonga yokuuvitha.” Mbela owu shi omukuluntugongalo, ngoka ho pandula iilonga ye? Konga omikalo wu ulike kutya owe mu pandula. — 1 Kor. 16:18.

AATONATELISHIKANDJO OHAYE TU TUNGU

12. Elongekidho li ni lyomethelemumvo lyotango lya li lya kwathele okutunga egongalo? (1 Aatessalonika 2:7, 8)

¹² Jesus Kristus okwa li wo a pe aalumentu yamwe “omagano” ya kwathele egongalo momukalo gwi ili. Kohi yewiliko lyaJesus, aakuluntugongalo yomuJerusalem oya li ya tumu Paulus Barnabas nayalwe onga aatonatelishikandjo. (Iil. 11:22) Omolwashike mbela? Etompelo olya faathana naandyoka sho aayakuligongalo naakuluntugongalo ya langekwa po, opo ya tunge egongalo. (Iil. 15:40, 41) Aalumentu mbaka oya li ya ningi omaiyambo opo ya longe iilonga mbika, oya li wo ya hupula oomwenyo dhawo ya longe nokutsa yamwe omukumo. — Lesha 1 Aatessalonika 2:7, 8.

13. Iinakugwanithwa yimwe yi ni aatonatelishikandjo ye na?

¹³ Aatonatelishikandjo ohaya endaenda aluhe. Yamwe ohaya ende iinano iile, opo ya talele po omagongalo. Oshiwike kehe, omutonatelishikandjo oha gandja iipopiwa ya yoolokathana, ha ningi omatalelopo po guusita, ha kwatele komeho okugongala kwaakokolindjila nokwaakuluntugongalo nosho wo elongekidho lyiilonga yokuuvitha. Ohaya ilongekidhile iipopiwa nokuunganeka iigongi yopashikandjo niigongi yoshitopolwa. Oha longo osikola yaakokolindjila, ha unganeke okugongala kwa ikalekelwa kwaakokolindjila  moshikandjo, oha ungaunga wo niinakugwanithwa yimwe ya simana, nomathimbo gamwe iinakugwanithwa ya endelela mbyoka a pewa koshitayimbelewa.

14. Omolwomatompelo geni hatu pandula aatonatelishikandjo yetu mboka haya longo nuudhiginini?

¹⁴ Ongiini omagongalo haga mono mo uuwanawa miilonga ya simana yaatonatelishikandjo? Omumwatate gumwe gwokoTürkiye, okwa popi kombinga yomatalelopo ngoka haga ningwa kaatonatelishikandjo a ti: “Etalelopo kehe haya ningi ohali inyengitha ndje ndi longithe ethimbo olindji, ndi kwathele aamwatate naamwameme. Onda tsakanena naatonatelishikandjo oyendji, ihe kapu na nando ogumwe gwomuyo a ningitha ndje ndi kale ndi uvite kutya okwa ipyakidhila unene nenge ina hala okupopya nangame.” Johanna, ngoka a popiwa metetekelo, okwa li a longo nomutonatelishikandjo miilonga yokuuvitha, ihe momagumbo inaya adha mo omuntu. Ihe nonando ongawo, okwa ti: “Otandi kala aluhe nokudhimbulukwa esiku ndyoka. Aamwayinakadhona yandje ayehe oya li ya tembukile komahala gokokule, nonda li nde ya yuulukwa noonkondo. Omutonatelishikandjo okwa li a tsu ndje omukumo nokukwathela ndje ndi mone kutya ngashingeyi otashi vulika tu kale ihaatu zi pamwe noyaandjetu nosho wo nookuume ketu ihe muuyuni uupe, otatu ka kala tu na oompito odhindji dhokukala pamwe .” Oyendji yomutse ohatu dhimbulukwa oompito oombwanawa ndhoka twa kala pamwe naatonatelishikandjo nosho wo omukalo moka ye tu kwathela. — Iilonga 20:37–21:1.

15. (a) Sha ikolelela kuJohannes omutitatu ovelise 5-8, ongiini tatu vulu okuulika kutya otwa pandula aatonatelishikandjo? (Tala wo ethano.) (b) Omolwashike tu na okuulika kutya otu na ko nasha naakulukadhi yaalumentu mboka ya langekwa po? (Tala oshimpungu “ Dhimbulukweni aakulukadhi yawo.”)

¹⁵ Omuyapostoli Johannes okwa li a ladhipike Gaius a yakule aamwatate mboka ya li ye ya okunkondopaleka egongalo nokwe mu pula “e ya kwathe molweendo lwayo ngaashi sha opalela  Kalunga.” (Lesha 3 Johannes 5-8.) Omukalo gumwe moka tatu vulu oku shi ninga, omokuhiya omutonatelishikandjo e ye a lye pamwe natse. Omukalo omukwawo, omoku yambidhidha elongekidho lyiilonga yomomapya pethimbo omutonatelishikandjo ta talele po. Leslie, ngoka a popiwa metetekelo, okwa ulike olupandu lwe momikalo dhimwe wo. Okwa ti: “Ohandi galikana kuJehova opo a sile oshimpwiyu oompumbwe dhawo. “Ngame nomusamane gwandje ohatu ya nyolele wo oontumwafo, tatu ya lombwele nkene omatalelopo gawo ge tu kwathela.” Dhimbulukwa kutya aatonatelishikandjo nayo oye na omaupyakadhi nohaya loloka wo ngaashi tse. Omathimbo gamwe ohaya ehama, haya kala ye na iimpwiyu nohaya kala ya teka omukumo. Onkee iitya yoye yombili nenge omagano gontumba otayi vulu okukala eyamukulo lyegalikano lyomutonatelishikandjo ngoka ta pula ekwatho. — Omayel. 12:25.

OTWA PUMBWA ‘AALUMENTU MBOKA YE LI OMAGANO’

16. Metsokumwe nOmayeletumbulo 3:27, omapulo geni tatu vulu okwiipula?

¹⁶ Otwa pumbwa aamwatate ya longe ye li ‘aalumentu mboka ye li omagano.’ Ngele owu li omumwatate a ninginithwa, mbela oto vulu okukwathela momukalo gwa tya ngaaka? (Lesha Omayeletumbulo 3:27.) Mbela owu na ehalo lyokukala omuyakuligongalo? Mbela ito vulu okuninga oshindji wu sile oshimpwiyu oompumbwe dhaamwatate wu li omukuluntugongalo? d Mbela oto vulu okuudhithila Kosikola yAauvithi yUukwaniilwa? Osikola ndjoka otayi ke ku dheula wu longithwe pakuudha kuJesus. Ngele owu uvite kutya oto vulu okuninga iinima mbyoka, galikana kuJehova. Pula ekwatho lyombepo ye ondjapuki opo wu vule okulonga nomupondo kehe oshinakugwanithwa to pewa. — Luk. 11:13; Iil. 20:28.

17. Mbela ‘aalumentu mboka ye li omagano’ otaya ulike shike kombinga yOmukwaniilwa gwetu, Jesus Kristus?

¹⁷ Aamwatate mboka Jesus a langeka po ye li ‘omagano’ oye li euliko kutya okwa kala noku tu wilika momukokomoko gwomasiku ngaka gahugunina. (Mat. 28:20) Mbela ino pandula sho tu na omukwaniilwa ngoka omunahole, ha gandja nehalo ewanawa, ha gandja eitulomo nohe tu pe aamwatate ya pyokoka ya sile oshimpwiyu oompumbwe dhetu? Onkee konga oompito wu ulike olupandu omolwa aalumentu mbaka haya longo nuudhiginini. Ino dhimbwa wo okupandula Jehova, molwaashoka oye ha gandja “oshipewa kehe oshiwanawa nomagano kehe ga gwana ga pwa.” — Jak. 1:17.