OSHITOPOLWA SHOKUKONAKONWA 43
EIMBILO 90 Tu tsaathaneni omukumo
Nkene tatu vulu okusinda omalimbililo
“Dhiginineni shoka oshiwanawa.” — 1 TES. 5:21.
SHOKA TATU KA ILONGA
Oshike to vulu okuninga po, ngele owa limbililwa kutya Jehova oku na ko nasha nangoye.
1-2. (a) Omalimbililo geni aapiya yaJehova tashi vulika ya kale ye na? (b) Oshike tatu ka kundathana moshitopolwa shika?
ATUHENI kutya nduno aagundjuka nenge aakokele, ohatu kala tu na omalimbililo a omathimbo gamwe. Pashiholelwa, dhiladhila andola komuuvithi omugundjuka ngoka ta ipula ngele Jehova oku na ngaa naye shili. Otashi vulika a kale e na omalimbililo ngele na ninginithwe ngaa. Nenge dhiladhila owala komumwatate goomvula dhopokati ngoka pethimbo lyuugundjuka we, a hogolola a pitithe komeho uukwaniilwa pehala lyeithano lyomuuyuni mbuka. Ngashingeyi sho okamaliwa taka nyangwanyangwa a isile oshimpwiyu nosho wo uukwanegumbo we, otashi vulika a kale e na omaipulo kombinga yetokolo ndyoka. Nenge otashi vulika pu na omumwameme gumwe ngoka kee na we oonkondo. Otashi vulika a kale a teka omukumo molwaashoka ita vulu we okulonga shoka a li ha longo nale. Mbela owa ipulile nale omapulo ngaashi: Mbela Jehova oha kala ngaa e wete ndje shi li? Mbela omaiyambo ngoka nda ninga omolwa Jehova ota ga ti sha ngaa? Mbela ondi na ngaa natango oshilonga kuJehova?
2 Ngele itatu kambadhala tu konge omayamukulo komapulo ngoka, otashi vulika shi tu ningithe tu kanithe eitaalo lyetu muJehova noku etha po nokuli oku mu longela. Moshitopolwa shika, otatu ka kundathana nkene okugandja eitulomo komakotampango gOmbiimbeli taku vulu oku tu kwathela ngele otu na omalimbililo (1) kutya Jehova oku na ko nasha natse (2) omatokolo ngoka twa ninga monakuziwa otaga ti sha (3) kutya natango otu na oshilonga kuJehova.
NKENE TO VULU OKUKANDULA PO OMALIMBILILO GOYE
3. Omomukalo guni ta tu vulu okusinda omalimbililo getu?
3 Omukalo gumwe ngoka ta tu vulu okukandula po omalimbililo getu, omokukonga omayamukulo komapulo getu mOohapu dhaKalunga. Ngele otwe shi ningi, otashi ketu nkondopaleka, otatu ka kala twa koka pambepo notatu ka vula okukala ‘twa kola meitaalo.’ — 1 Kor. 16:13.
4. Ohatu ‘dhiginine ngiini shoka oshiwanawa’? (1 Aatessalonika 5:21)
4 Lesha 1 Aatessalonika 5:21. Ndhindhilika kutya Ombiimbeli otayi tu ladhipike tu “dhiginineni shoka oshiwanawa.” Ongiini tatu vulu oku shi ninga? Otatu vulu okushilipaleka kutya shoka twa itaala osho shi li, mo ku shi yelekanitha naashoka Ombiimbeli tayi ti. Pashiholelwa, dhiladhila komugundjuka ngoka ta ipula ngele oku na ngaa ongushu momeho gaKalunga. Mbela oku na oku shi taamba ko kutya omaipulo ngono ogo shi li? Aawe, oku na ‘okudhiginina shoka oshiwanawa’ mokukonakona Ombiimbeli a ilonge kutya Jehova okwe mu tala ko ngiini.
5. Ongiini tatu vulu “okumona” nkene Jehova ta yamukula omapulo getu?
5 Sho tatu lesha Oohapu dhaKalunga, Jehova oha kala a fa ta “popi” natse. Ihe opo tu mone omadhiladhilo ge mepulo lyontumba lyokondandalunde, otwa pumbwa okuninga oonkambadhala. Sho tatu lesha Ombiimbeli, otwa pumbwa okugandja eitulomo koshinima shontumba shoka tatu ipula nasho. Otatu vulu okuninga omapekapeko koshipalanyolo shoka, tatu longitha iilongitho mbyoka ehangano lyaJehova ha li tu pe. (Omayel. 2:3-6) Otatu vulu okugalikana Jehova e tu wilike sho tatu ningi omapekapeko noku tu kwathele tu mone omadhiladhilo ge kombinga yepulo lyetu. Opo nduno otatu vulu okukonga omakotampango gOmbiimbeli nuuyelele tawu longo mboka tawu opalele onkalo yetu. Oshiwanawa wo okulesha omahokololo gOmbiimbeli gaapiya aadhiginini mboka ya li ye na omaipulo noya li ye uvite ngaashi tse.
6. Ongiini okukala pokugongala haku tu kwathele tu sinde omalimbililo getu?
6 Uuna tatu konakona Ombiimbeli pokugongala, Jehova oha kala a fa ta popi natse. Ngele otwa kala hatu yi kokugongala pandjigilile, otashi vulika tu ka uve sha moshipopiwa nenge metyokosha lyagumwe shoka tashi vulika osho naanaa twa li twa pumbwa okuuva, tu sinde omalimbililo getu ngoka tu na. (Omayel. 27:17) Ngashingeyi natu ka kundathaneni nkene tatu vulu okusinda omashongo gamwe gokondandalunde.
UUNA WA LIMBILILWA NGELE JEHOVA OKWE KU HOKWA
7. Epulo lini yamwe tashi vulika ya ipule?
7 Mbela owa ipulile nale ngele Jehova oha kala ngaa e ku wete shili? Ngele owu uvite kutya kuna oshilonga, otashi vulika wu dhiladhile kutya itashi wapa nando wu ninge kuume komushiti gwewangandjo. Omukwaniilwa David naye otashi vulika a li e na omadhiladhilo ga fa ngoka. Okwa li a dhiladhila kutya oshikumithi sho Jehova e na ko nasha naantu. Okwa ti: ‘Omuwa, omuntu omushike, sho ho mu dhimbulukwa? Ke shi sha, nando u na oshimpwiyu naye?’ (Eps. 144:3) Openi to vulu okwaadha eyamukulo kepulo ndyoka?
8. Sha ikolelela kuSamuel gwotango 16:6, 7, 10-12, Jehova oha mono shike maantu?
8 Ombiimbeli otayi tu longo kutya Jehova oha kala e wete mboka ya tali kako kuyalwe kaaye na oshilonga. Pashiholelwa, Jehova okwa li a tumu Samuel kegumbo lyaIsai, a ka gwayeke gumwe gwomoyanamati, ngoka a li ta ka ninga omukwaniilwa gwaIsraeli gomonakuyiwa. Isai okwa li a ithana oyanamati yaheyali ye ye kuSamuel, ihe kali a ithana David, ngoka a li omushona kuyakwawo. b Ihe nonando ongawo, Jehova okwa li a hogolola David. (Lesha 1 Samuel 16:6, 7, 10-12.) Jehova okwa li a mono kutya David omuntu a tya lela ngiini momutima, ano omulumentu ngoka a li a lenga iinima yopambepo.
9. Omolwashike to vulu oku kala nuushili kutya Jehova oku na ohokwe mungoye? (Tala wo ethano.)
9 Dhiladhila nkene Jehova e ku ulukila nale kutya oha kala e ku wete. Ohe ku pe omayele ga dhenga mbanda ngoka taga opalele onkalo yoye. (Eps. 32:8) Shoka otashi ulike kutya Jehova oku ku shi nale nawanawa. (Eps. 139:1) Ngele owa tula omayele gaJehova miilonga nokumona nkene hage ku kwathele, oto ka kala wa tompwa kutya Jehova oku na ohokwe mungoye. (1 Ondjal. 28:9; Iil. 17:26, 27) Jehova oha kala e wete oonkambadhala dhoye. Oha kala wo e wete omaukwatya goye omawanawa ngoka wu na nokwa hala okukala kuume koye. (Jer. 17:10) Ota ka kala a nyanyukwa unene, ngele nangoye owa hala wo okuninga kuume ke. — 1 Joh. 4:19.
‘Ngele to ka kala noku mu konga, ota ka etha wu mu mone.’ — 1 Ondjal. 28:9, OB-1954. (Tala okatendo 9) c
UUNA WA LIMBILILWA NGELE OMATOKOLO NGOKA WA NINGA MONAKUZIWA OGA LI NGAA PANDUNGE
10. Uuna tatu dhiladhila komatokolo ngoka twa ninga monakuziwa, omapulo geni tashi vulika ga holoke po?
10 Omathimbo gamwe, yamwe otashi vulika ya ipule ngele omatokolo ngoka ya ninga monakuziwa oga li ngaa mondjila. Otashi vulika ya etha po iilonga iiwanawa mbyoka hayi futu nawa nenge oongeshefa hadhi pondola, nelalakano lyokulongela Jehova pakuudha. Ihe otashi vulika ya ninga iinima mbyoka omimvo odhindji dha ka pita. Otashi vulika ya mone aantu mboka ye shi, mboka ya lalakanena iilonga yokwiikongela omboloto, nongashingeyi otaya monika ye na uuhupilo wu li nawa. Oshizemo, otashi vulika ya ipule kutya ‘Mbela omaiyambo ngoka nda ninga omolwaJehova, otaga ti sha ngaa nenge oga ningitha ndje ndi pitililwe po koompito odhindji monkalamwenyo?’
11. Omolwashike omunyoli gwEpisalomi 73 a li a teka omukumo?
11 Ngele owa ipulile nale omapulo ga fa ngono, ndhindhilika nkene omunyoli gwEpisalomi 73 a li e uvite. Okwa li a mono aantu mboka ihaaya longele Jehova nkene ye na uundjolowele, aayamba nokaya li taya monika ya fa ye na uudhigu washa. (Eps. 73:3-5, 12) Sho a mono kutya oonkalamwenyo dhawo otadhi ende nawa, osha li she mu ningitha a kale e uvite kutya oonkambadhala dhe dhokulongela Jehova odhowala. Okwa li ta ‘hepekwa esiku alihe’ komadhiladhilo gokukala a teka omukumo. (Eps. 73:13, 14) Ongiini a li a ungaunga nomaiyuvo ngoka omawinayi?
12. Sha ikolelela kEpisalomi 73:16-18, oshike sha li sha kwathele omunyoli a sinde iimpwiyu mbyoka a li a e na?
12 Lesha Episalomi 73:16-18. Omupisalomi okwa li a yi kongulu yaJehova hoka kwa li kwa udhilila ombili. Kehala hoka, a kundukidhwa kaalongeli yaJehova, okwa li a vulu okudhiladhila nawa. Okwa li e shi uvite ko kutya nonando yamwe oya li ta ya monika ye na oonkalamwenyo dhi li nawa, ka ya li ye na etegameno lyasha lyonakuyiwa. Onkene ka li we a teka omukumo nokwa li a mono kutya oku lalakanena iinima yopambepo, olyo etokolo lya dhengambanda. Noshizemo, okwa li a tokola toko okutsikila okulongela Jehova. — Eps. 73:23-28.
13. Ongiini to vulu oku mona ombili yopamadhiladhilo, ngele oho ipe oombedhi omolwa omatokolo ngoka wa ninga monakuziwa? (Tala wo ethano.)
13 Ngaashi owala Omupisalomi, nangoye oto vulu okumona ombili yopamadhiladhilo kekwatho lyOohapu dhaKalunga. Ngiini mbela? Dhiladhila kombinga yiinima iiwanawa mbyoka wu na, mwa kwatelwa omayambeko gaJehova, dhimbulukwa wo kutya mboka ihaaya longele Jehova kaye na ekwatho lye. Ohaya ikolelele mwaashoka ya tompola po monkalamwenyo ndjika, molwaashoka kaye na etegameno lyasha lyonakuyiwa. Ihe ngoye, Jehova okwe ku uvanekela omayambeko ogendji monakuyiwa ngoka inoo dhiladhila nando onale. (Eps. 145:16) Dhiladhila wo kwaashika: Ito vulu naanaa okutseya nkene onkalamwenyo yoye yina okukala yi li kunena, andola owa ningile omatokolo ga yooloka ko kwaangoka wa ninga nale. Ihe oshinima shimwe shoka to vulu okukala wu na uushili musho osho kutya, uuna ho ningi omatokolo omolwa ohole yoye yokuhola Kalunga nosho wo aantu, oto ka kala aluhe wu na iinima monkalamwenyo mbyoka hayi ku nyanyudha.
Gandja eitulomo komayambeko ngoka Jehova e ku uvanekela (Tala okatendo 13) d
UUNA WA LIMBILILWA NGELE OWU NA NGAA OSHILONGA KUJEHOVA
14. Yamwe oye li moonkalo dha tya ngiini notashi vulika ya ipule epulo lini?
14 Yamwe yomaalongeli yaJehova otaya idhidhimikile uukulupe, taya kondjo nuukolele nenge ye na uulema. Onkene iinima mbyono otashi vulika yi ya ningithe ya kale ye uvite kaaye na oshilonga kuJehova. Otashi vulika ya ipule kutya, ‘Mbela natango ondi na ngaa oshilonga kuJehova?’
15. Omunyoli gwEpisalomi 71 okwa li a tompwa kushike?
15 Omunyoli gwEpisalomi 71, okwa li e na oshimpwiyu sha faathana. Okwa li a galikana a ti: “Ino ekelahi ndje, sho ndaa na oonkondo.” (Eps. 71:9, 18) Ihe nonando ongawo, omupisalomi okwa li a tompwa kutya ngele okwa longele Kalunga nuudhiginini, Jehova ote ke mu wilika noku mu yambidhidha. Omupisalomi okwa ilongo kutya, Jehova oha kala a panda mboka haya ningi ngaashi taya vulu ye mu longele nonando oye na omangambeko. — Eps. 37:23-25.
16. Omomikalo dhini aakokele ye na oshilonga kuJehova? (Episalomi 92:12-15)
16 Ngele owu li omukokele, dhiladhila kunkene Jehova e ku tala ko. Ota vulu oku ku kwathela wu mu longele nuudhiginini nonando owu na omangambeko gopalutu. (Lesha Episalomi 92:12-15.) Pehala lyoku gandja eitulomo kwaashoka itoo vulu we okuninga, gandja eitulomo kwaashoka to vulu okuninga. Pashiholelwa, oto vulu okunkondopaleka yalwe noshiholelwa shoye shuudhiginini nokuulika kutya owu na ko nasha nayo. Oto vulu okupopya kombinga yankene Jehova a kala noku ku nkondopaleka uule woomvula nokuya lombwela kombinga yomauvaneko gOmbiimbeli ngoka wa halelela oku ka mona taga gwanithwa. Ino dhimbwa wo kutya omagalikano goye kombinga ya yalwe, otaga vulu okuya kwathela. (1 Pet. 3:12) Kutya nduno otu li moonkalo dhini, atuheni otatu vulu oku ningila sha Jehova nosho wo yalwe.
17. Omolwashike kaatu na okwiiyelekanitha nayalwe?
17 Ngele owu uvite nayi molwaashoka ito vulu we okuninga oshindji miilonga yaJehova, shilipalekwa kutya okwa lenga kehe shoka to vulu okuninga. Otashi vulika wu kambadhale okuyelekanitha shoka ho ningi naashoka yalwe haya vulu okuninga. Yanda okuninga ngawo. Omolwashike mbela? Omolwaashoka Jehova hasho ha ningi ngaaka. (Gal. 6:4) Pashiholelwa, Maria okwa li a pe Jesus omagadhi ge na ondilo. (Joh. 12:3-5) Mepingathano naashono, omuselekadhi ohepele okwa li a gandja omayambidhidho kotempeli, uumaliwa uyali waa na naanaa ongushu. (Luk. 21:1-4) Ihe Jesus okwa li a tala ko omagano agehe ngoka ge li omukalo gokuulika eitaalo. He Jehova, okwa lenga shi li kehe shimwe shoka ho ningi to inyengithwa ketilokalunga nokohole yoye yoku mu hola, nonando kungoye otashi monika sha fa oshishona.
18. Oshike tashi ke tu kwathela tu sinde omalimbililo? (Tala wo oshimpungu “ Oohapu dhaJehova otadhi vulu oku ku kwathela wu sinde omalimbililo.”)
18 Atuheni ohatu kala tu na omalimbililo omathimbo gamwe. Ngaashi twa ilonga, Ombiimbeli otayi vulu oku tu kwathela tu ga sinde. Onkene kambadhala okusinda omalimbililo goye, kala wo wu na omukumo pehala lyokukala to ipula. Jehova oku ku shi pauhandimwe. Oha pandula omaiyambo goye nokwa hala oku ku yambeka. Shilipalekwa kutya Jehova okuhole noku na ko nasha naapiya ye ayehe aadhiginini.
EIMBILO 111 Otu na omatompelo gokukala twa nyanyukwa
a UUTUMBULILO WA YELITHWA: Moshitopolwa shika, otatu kundathana kombinga yomalimbililo ngoka hage tu ningitha tu kale kaatu shi ngele otu na ongushu kuJehova nenge kombinga yomatokolo ngoka twa ninga ngele otaga ti sha ngaa. Ngaka kage shi omalimbililo ngoka ga popiwa mOmbiimbeli, ngoka haga ulike kutya omuntu oku na eitaalo lya nkundipala muJehova nomomauvaneko ge.
b Nonando Ombiimbeli inayi tu lombwela kondandalunde omimvo dhaDavid sho Jehova e mu hogolola, otashi vulika a li natango omugundjuka gwoomvula omulongo nasha. — Tala Oshungolangelo 1 Septemba 2011, ep. 29, okat. 2.
