Opwa tameke okukala pu na ompumbwe yiileshomwa sho iilonga yokuuvitha ya tamunuka mo. Aamwatate koBetel yaBrooklyn oya li haya nyanyangidha iifo, ihe natango oya li haya longitha ofabilika yilwe ya nyanyangidhe omambo gawo. Konima sho pwa kala pu na ompumbwe yomambo uule woomwedhi, shono sha li sha yi iilonga yokuuvitha moshipala, omumwatate Rutherford okwa pula Robert Martin ngono a li ta tonatele ofabilika ndjono, ngele otashi wapa aamwatate ya kale haya nyanyangidha omambo gawo kuyo yene.

Omumwatate Martin okwa ti: “Olya li edhiladhilo tali nyanyudha lela, molwaashoka otwa li tatu ka kala tu na ofabilika yetu yokunyanyangidha iileshomwa.” Aamwatate oya li ya mono ehala lyokuhiila mepandaanda 18 Concord, moBrooklyn noya li ya mono iilongitho mbyoka ya pumbwa.

Haantu ayehe ya li ya nyanyukilwa elunduluko ndyoka epe. Omupresidende gwehangano ndyoka lya kala tali nyanyangidha omambo getu, okwe ya a talele po ofabilika yetu ompe. Okwa ti: “Omu na lela iilongitho ya dhenga mbanda yokunyanyangidha omambo, ihe kapu na nando ogumwe gwomune e shi oku yi longitha. Muule owala woomwedhi gahamano iilongitho yeni ayihe mbyono otayi ka kala ya teka.”

Omumwatate Martin okwa ti: “Shono osha li tashi monika sha fa shoshili, ihe otwa li tu shi kutya Jehova ote ke tu kwathela nosho a li a ningi.” Omumwatate Martin okwa li e li mondjila. Nziya ofabilika ndjoka oya tameke okunyanyangidha omambo 2 000 mesiku.

Kakele kokupilinta omambo gawo yene, oshigwana shaJehova osha li sha tameke okulongitha omukalo gumwe omupe, shi taandeleke onkundana ombwanawa, ano tashi longitha oradio. MOsoondaha 26 Febuluali 1922, omumwatate Rutherford okwa li a popi koradio oshikando shotango. Okwa li a gandja oshipopiwa shi na oshipalanyolo “Aantu omamiliyona mboka ye na omwenyo ngashingeyi itaya ka sa we,”  kositaasi yoradio KOG, moLos Angeles, California, moAmerika.

Otaku tengenekwa aantu 25 000 ya li ya pulakene kopolohalama ndjoka. Yamwe yomuyo oya li ya nyola oontumwafo taya pandula omumwatate Rutherford omolwoshipopiwa shoka a gandja. Gumwe gomwaamboka ya li ya nyola ontumwafo oWillard Ashford, omukalimo gwomoSanta Ana, California. Okwa li a pandula omumwatate Rutherford sho a gandja oshipopiwa she momukalo “omwaanawa nomuhokithi.” Okwa gwedha ko a ti: “Maandjetu omu na aantu yatatu taya ehama, ando opwa li inaapu longithwa omukalo ngono, andola inatu vula okupulakena koshipopiwa shoye kutya nduno owa li popepi natse.”

Opwa li pwa ningwa oopolohalama odhindji miiwike ya ka landula ko. Pehulilo lyomumvo 1922, Oshungolangelo oya li ya tengeneke kutya “konyala aantu 300 000 oya [li] ya uvu onkundana ombwanawa okupitila [moradio].”

Oontumwafo nosho wo omatyokosha oga ladhipike aakonakoni yOmbiimbeli ya tunge ositaasi yoradio mokantuntu Staten, popepi kashona noBetel yaBrooklyn. Momimvo dha ka landula ko, aakonakoni yOmbiimbeli oya li ya longitha ositaasi yedhina WBBR, opo ya taandeleke onkundana yUukwaniilwa kaantu oyendji, momahala ogendji.

Oshifo shOshungolangelo sho 15 Juni 1922, osha li sha popi kutya otaku ka kala oshigongi shoshitopolwa moCedar Point, Ohio okuza mo 5 sigo 13 Septemba 1922. Aakonakoni yOmbiimbeli oya li ya nyanyukwa sho ya thiki poCedar Point.

Omumwatate Rutherford moshipopiwa she shotango, okwa lombwele aapulakeni a ti: “Ondi na uushili kutya Omuwa ota ka . . . yambeka oshigongi shika shoshitopolwa nota ka shilipaleka kutya ota pu ka gandjwa uunzapo uunene mboka inaawu gandjwa nando onale kombanda yevi.” Aapopi poshigongi shoka oya kala nokutsa aamwatate naamwameme omukumo yu uvithe.

MEtitano, 8 Septemba, aantu ye thike po 8 000 oya li ya gongala metungo lyokuningilwa iigongi, noya li ya nyanyukwa oku ka pulakena koshipopiwa shomumwatate Rutherford. Oya li ye na einekelo kutya ota ka yelitha eityo lyoondanda “ADV,” ndhoka dha li dha nyolwa kuufo wehiyo. Sho ya kuutumba, kapu na omalimbililo kutya yamwe oya li ya mono elapi enene lya gonywa li li komutuni. Arthur Claus  ngoka a li e ya koshigongi a za koTulsa, Oklahoma, moAmerika, okwa li a kuutumba kiipundi yokomeho opo a vule okupulakena nawa oshigongi, molwaashoka kapwa li omambako.

Opo ku shilipalekwe kutya kape na omuntu ta piyaganeke oshipopiwa, omunashipundi okwa li a ningi etseyitho kutya mehala moka tamu ningilwa oshigongi itamu pitikilwa mu ye nando omuntu pethimbo omumwatate Rutherford ta gandja oshipopiwa she. Po 9:30 gwongula, omumwatate Rutherford okwa tameke oshipopiwa she nokutotha oohapu dhaJesus ndhoka dhi li muMateus 4:17, a ti: “Uukwaniilwa wegulu owu li popepi.” Sho a popi kombinga yankene aantu taya ka uva kombinga yUukwaniilwa mbono, okwa ti: “Jesus ye mwene okwa li a popi kutya pethimbo lyokukala po kwe ota ka ninga eteyo lyaantu ye, nopethimbo ndyoka ota ka gongela aantu mboka haya longele Kalunga moshili yo aadhiginini.”

Omumwatate Claus, ngoka a li a kuutumba moshinyanga, ota dhimbulukwa nawa a ti: “Otwa li twa pulakena nawa oshitya kehe.” Ihe ombaadhilila, okwa tameke okweehama nokwa li e na okuza mo moshinyanga shoka. Okwa zi mo nonando ka li a hala okuza mo, molwaashoka okwa li e shi kutya ita ka pitikwa a galukile mo.

Konima yominute omishona, okwa kala e uvite e li po hwepo. Okwa ti kutya sho a ende ta shuna koshinyanga, oku uvu aantu taya hakele omake. Oshinima shoka osha li she mu nyanyudha noonkondo! Okwa tokola kutya ngele okwa londo pombanda yetungo, ota ka uva nawa oshipopiwa tashi nywitha omakutsi shoka tashi gandjwa. Omumwatate Claus, ngoka a li e na omimvo 23 pethimbo mpono, naye okwa li a vulu okulonda pombanda yetungo ndyoka. Omakende gomoombuli oga li ga eguluka, naasho a thiki pugo, okwa li u “uvite ko nawa.”

Ihe Arthur ka li oye awike. Yamwe yomookuume ke nayo oya li ya londa pombanda yetungo. Gumwe gwomuyo, Frank Johnson, okwa yi kuye e te mu pula ta ti: “Owu na okambele okashona?”

Arthur okwa yamukula a ti: “Eeno.”

 Frank okwa ti: “Otwa kala tatu galikana tu mone po omuntu e na okambele. Owu wete elapi ndika enene lya gonywa? Endhindhiliko lya mangelwa koomboha ndhika. Pulakena neitulomo kOmupanguli. a Shampa owala a ti, ‘uvitheni, uvitheni,’ teta oongodhi ndhika dhi li ne.”

Arthur okwa li e na okambele meke, pamwe nooyakwawo ya tegelela omumwatate Rutherford a popye oohapu ndhoka. Nziya omumwatate Rutherford okwa adha oshitsa sha simana shoshipopiwa she. Okwa li a nyanyukwa nokwa li e na uulaadhi, notashi vulika a ale i igidhe sho a ti: “Kaleni aadhiginini noonzapo dhashili dhOmuwa. Puleni komeho mekondjo sigo kehe shimwe shoka shi na ekwatathano naBabiloni sha hulithwa po. Indeni mu ka uvithe etumwalaka kokule sigo okooha dhuuyuni. Uuyuni owu na okutseya kutya Jehova oye Kalunga nonokutya Jesus Kristus oye Omukwaniilwa gwaakwaniilwa noye Omuwa gwaawa. Esiku lyonena olya simana li vule omasiku agehe. Tseyeni kutya Omukwaniilwa ota pangele nale! One aakalelipo yoku mu tseyitha. Onkee ano, uvitheni, uvitheni, uvitheni shi na ko nasha nOmukwaniilwa nonUukwaniilwa we!”

Arthur okwa ti kutya ye naamwatate yalwe oya tete oongodhi, nelapi olya tameke okutonyunuka nawa. Elapi olya li lya nyolwa oohapu tadhi ti: “Uvitheni omukwaniilwa nUukwaniilwa we.” Odha li dhi li metsokumwe noondanda ADV, dhoshitya Advertise (Uvitheni).

Oshigongi shoshitopolwa shoka sha li sha ningilwa muCedar Point, osha li sha kwathele aamwatate ya gandje eitulomo kiilonga ya simana yokuuvitha onkundana yUukwaniilwa, naamboka ya li ye na ehalo oya li ya nyanyukwa okukutha ombinga miilonga mbyoka. Omwaandjaganeki gumwe gwiileshomwa (ngashingeyi ha ithanwa omukokolindjila) a za koOklahoma, moAmerika okwa nyola a ti: “Moshitopolwa moka twa li hatu uvithile aantu oyendji oya li haya longo moomina dhomakala, noya li ya hepa noonkondo.” Okwa ti kutya olundji ngele yu uvu etumwalaka ndyoka li li moshifo Golden Age, “oya [li] haya tameke okulila.” Okwa ti: “Otwa nyanyukwa noonkondo molwaashoka otatu vulu oku ya hekeleka.”

Aakonakoni yOmbiimbeli mboka oya li ye wete kutya oohapu dhaJesus ndhoka dhi li muLukas 10:2 odha simana. Otadhi ti: “Iilya oyi li po oyindji, ihe aalongi oyo aashona.” Sho omumvo 1922 gwa hulu, oya li ya tokola toko okuuvitha etumwalaka lyUukwaniilwa shi vulithe nale popepi nokokule.