1. Omolwashike twa nyanyukwa notwe shi tala ko shi li uuthembahenda okukala Oonzapo dhaJehova?

OTWA nyanyukwa notwe shi tala ko shi li uuthembahenda uunene okukala Oonzapo dhaJehova! Otu li oshigwana shaJehova nohatu shi ulike mokuuvithila yalwe noku ya longa kombinga ye. Ohatu kala twa nyanyukwa uuna twa kwathele gumwe ngoka “a halelela oku ka mona omwenyo gwaaluhe” (NW) a ninge omulongwa. (Iil. 13:48) Ohatu kala tu uvite ngaashi Jesus. Okwa li “u udhithwa enyanyu kombepo ondjapuki” sho aalongwa ye ya li ye shi enditha nawa mokuuvitha. — Luk. 10:1, 17, 21.

2. Ongiini tatu vulu okuulika kutya otwa tala ko iilonga yetu yokuuvitha ya simanenena?

² Otwa tala ko iilonga yetu yokuuvitha ya simanenena. Omuyapostoli Paulus okwa li a ladhipike Timoteus, a ti: “Itonatela ano mwene nosho wo elongo lyoye.” Paulus okwa li wo a gwedha ko a ti: “Oshoka ngele to shi ningi, oto ihupitha nosho wo mboka taye ku pulakene.” (1 Tim. 4:16) Shono otashi ulike kutya iilonga yetu yokuuvitha ohayi hupitha oomwenyo dhaantu. Ohatu itonatele, molwaashoka otu li aalelwa yUukwaniilwa waKalunga. Otwa hala aluhe okwiihumbata momukalo ngoka tagu simanekitha Jehova nogu li metsokumwe netumwalaka ndyoka hatu uvitha. (Fil. 1:27) Ohatu ulike kutya ‘ohatu tonatele elongo lyetu,’ mokukala hatu ilongekidhile nawa uukalele nomokupula ekwatho lyaJehova manga inaatu uvithila aantu.

3. Mbela aantu ayehe ohaya ulike ohokwe metumwalaka lyUukwaniilwa? Gandja oshiholelwa.

³ Nonando otwa ningi ashihe shoka tatu vulu tu uvithile aantu onkundana ombwanawa, aantu oyendji moshitopolwa shetu otashi vulika kaaye yi taambe ko. Natu taleni koshimoniwa shomumwatate Georg Lindal, ngoka a li u uvithile moIceland okuza mo 1929 sigo 1947. Okwa li a gandja iileshomwa omayovi, ihe kapwa li nando ogumwe a taamba ko oshili. Okwa nyola a ti: “Aantu yamwe oya li haya monika ya fa ye li ompinge nOmbiimbeli, omanga yalwe kaaya li haya ulike ohokwe nandonando.” Nokuli nokonima  sho aatumwa mboka ya li kosikola yaGilead ya tuminwa koshilongo shoka, osha pula omimvo omugoyi, opo aantu yamwe yomoshilongo shoka yi iyapulile Jehova noya ninginithwe. *

4. Otashi vulika tu kale tu uvite ngiini uuna aantu itaaya ulike ohokwe monkundana ombwanawa?

⁴ Ihatu kala tu uvite nawa uuna aantu itaaya ulike ohokwe. Otashi vulika tu kale tu uvite ngaashi Paulus, ngoka a li ha kala a sa “oluhodhi olunene nuuwehame” omolwAajuda mboka kaaya li ya hala okuzimina kutya Jesus oye Mesiasa. (Rom. 9:1-3) Ongiini ngele sho wa kala to longo nuudhiginini wu kwathele omukonakoni gwoye nokugalikana kombinga ye, natango ita ningi ehumokomeho nowa pumbwa okweetha po okukonakona naye? Nenge ongiini ngele ino kwathela gumwe natango a thike poshitsa shokuninginithwa? Mbela owa pumbwa okukala wu uvite wu na ondjo, nokudhiladhila kutya Jehova ina hokwa oonkambadhala ndhoka to ningi miilonga ye? Moshitopolwa shika, otatu ka yamukula omapulo gaali taga landula: (1) Oshike hashi ulike kutya otatu pondola muukalele? (2) Etaloko lini li li paushili tu na okukala tu na?

5. Omolwashike omathimbo gamwe tashi vulika kaatu longele Jehova momukalo moka twa hala?

⁵ Ombiimbeli oya popya kombinga yaamboka haya longo ehalo lyaKalunga ya ti: “Ashihe shoka taye shi longo otashi eta eyambeko.” (Eps. 1:3) Ihe haaluhe tatu ka longela Jehova momukalo moka twa hala. Okukalamwenyo kwetu oku “udha uupyakadhi” omolwokwaagwanenena kwetu nosho wo kwayalwe. (Job 14:1) Shimwe ishewe, aapataneki yetu otashi vulika ya pondole pakathimbo oku tu imba tu uvithe momukalo moka twi igilila. (1 Kor. 16:9; 1 Tes. 2:18) Jehova oha tala kushike nduno, opo a mone ngele otatu pondola miilonga yokuuvitha? Natu ka taleni komakotampango gamwe gOmbiimbeli ngoka tage ke tu kwathela tu yamukule epulo ndyono.

6. Jehova oha kala a tala ko ngiini iilonga mbyoka hatu mu longele?

⁶ Jehova oha tala koonkambadhala nokeidhidhimiko lyetu. Jehova oha kala e tu hokwa uuna tatu mu longele nomutima aguhe molwaashoka tu mu hole kutya nduno mboka hatu uvithile ohaya ulike ohokwe nenge hasho. Paulus okwa nyola a ti: “Kalunga oku shi okwiinekelwa. Ita dhimbwa iilonga nohole yeni mokusimanekitha edhina lye, sho hamu yakula Aakriste ooyakweni.” (Heb. 6:10) Jehova iha dhimbwa oonkambadhala ndhoka hatu ningi kutya nduno odha za iizemo iiwanawa nenge hasho. Nomolwaashono Paulus a lombwele Aakriste yomuKorinto, a ti: “Ashihe shoka tamu ningile Omuwa, otashi tompola sha.” — 1 Kor. 15:58.

7. Oshike tatu ilongo kwaashoka omuyapostoli Paulus a popi kombinga yuukalele we?

⁷ Omuyapostoli Paulus okwa li omutumwa he shi enditha nawa, nokwa li a toto omagongalo omape miilando oyindji mbyoka a li ha talele po. Ihe sho yamwe ya li taye mu popi kutya ke shi omulongi omuwanawa kali a popi kutya okwa kwathela aantu oyendji ya ninge Aakriste. Pehala  lyaashono okwa nyola a ti: “Onda longo noonkondo ndi ya vule.” (2 Kor. 11:23) Ngaashi Paulus, inatu dhimbwa kutya Jehova oha kala unene a lenga oonkambadhala nosho wo eidhidhimiko lyetu.

8. Oshike tu na okudhimbulukwa kombinga yuukalele wetu?

⁸ Uukalele wetu ohawu nyanyudha Jehova. Pompito yimwe Jesus okwa li a tumu aalongwa ye 70 ye ku uvithe etumwalaka lyUukwaniilwa, noya li ya “galuka yu udha enyanyu enene.” Mbela omolwashike ya li ya nyanyukwa? Oya ti: “Noompwidhuli wo sho twe dhi ganda medhina lyoye, odha vulika kutse.” Ihe Jesus okwe ya kwathele ya lundulule okudhiladhila kwawo moku ya lombwela ta ti: “Inamu nyanyukilwa, oompwidhuli sho tadhi vulika kune; nyanyukilweni, omadhina geni sho ga nyolelwa membo lyomegulu.” (Luk. 10:17-20) Jesus okwa li e shi kutya aantu itaya ka pulakena aluhe kaalongwa ye uuna taye ya uvithile. Katu shi nokuli kutya aantu yangapi ya ningi ooitaali konima sho yu uvithilwa kaalongwa mboka. Aalongwa mboka kaya li owala ye na okunyanyukilwa okupondola kwawo muukalele, ihe shoka sha simanenena, oya li ye na okunyanyukilwa okutseya kutya Jehova okwe ya lenga omolwoonkambadhala dhawo.

9. Shi ikolelela kAagalati 6:7-9, oshike tashi ke tu ningilwa ngele otwa kala hatu idhidhimike nokupula komeho nuukalele wetu?

⁹ Ngele otwa kala hatu idhidhimike nokupula komeho nuukalele wetu, otatu ka mona omwenyo gwaaluhe. Uuna hatu kutha ombinga nomutima aguhe mokukuna oombuto dhoshili yUukwaniilwa noku dhi tekela, kungawo otatu ‘kunu pambepo,’ mokweetha ombepo ondjapuki yi tu wilike monkalamwenyo yetu. Shampa owala itaatu “vulweni” okuuvitha onkundana ombwanawa, Jehova okwe tu uvanekela kutya ote ke tu pa ondjambi yomwenyo gwaaluhe, kashi na nduno mbudhi kutya otwa kwathela aantu yangapi ye mu iyapulile. — Lesha Aagalati 6:7-9.

10. Omolwashike aantu yamwe haya ulike ohokwe uuna taya uvithilwa, omanga yalwe ihaaya ulike ohokwe?

¹⁰ Aantu ohaya taamba ko nenge ohaya tindi okupulakena ketumwalaka lyUukwaniilwa, shi ikolelela kuukwatya womitima dhawo. Jesus okwa li a yelitha oshili ndjoka meyele ndyoka a gandja kombinga yomukuni ngoka a li a kunu oombuto momavi ga yoolokathana, ihe dhimwe owala dha mene e tadhi vala. (Luk. 8:5-8) Jesus okwa ti kutya omavi ga yoolokathana otaga thaneke omitima dhaantu, ndhoka hadhi inyenge momikalo dha yoolokathana uuna yu uvithilwa “oohapu dhaKalunga.” (Luk. 8:11-15) Ngaashi omukuni ngoka, itatu vulu okuthiminika oombuto ndhoka hatu kunu momitima dhaantu dhi koke, ihe shoka oshi ikolelela komuntu ye mwene. Oshinakugwanithwa shetu okutsikila okukuna oombuto dhetumwalaka lyUukwaniilwa. Ngaashi omuyapostoli Paulus e shi popi, “Kalunga ota ka futa kehe gumwe shi thike piilonga ye,” ihe hakiizemo mbyoka a mona. — 1 Kor. 3:8.

11. Omolwashike Jehova a li a hokwa Noa, nonando aantu kaya li ya pulakene kuye? (Tala ethano lyokombanda.)

¹¹ Pethimbo lyonale, aalongeli yaJehova oyendji oya li yu uvithile aantu, ihe kaya li ya pulakene. Pashiholelwa, Noa okwa li “omuuvithi guuyuuki,” tashi vulika uule womimvo odhindji. (2 Pet. 2:5) Kapu na omalimbililo kutya okwa li e na einekelo kutya aantu otaya ka pulakena kuye, ihe Jehova ina tya kutya otaya ka pulakena. Pehala lyaashono, sho Jehova a pe Noa omalombwelo kombinga yankene onguluwato yi na okutungwa, okwa ti: “Inda monguluwato nomukiintu gwoye, aamwoyemati naakadhi.” (Gen. 6:18) Otashi vulika wo sho Jehova e mu lombwele kutya onguluwato otayi ka kala yi thike peni a ndhindhilike kutya aantu oyendji itaya ka pulakena kuye. (Gen. 6:15) Ngaashi ehokololo ndyoka tu li shi nawa, kapu na nando omuntu gumwe a li a pulakene ketumwalaka lyaNoa. (Gen. 7:7)  Mbela Jehova okwa li e wete Noa a ndopa okugwanitha po oshinakugwanithwa she? Hasho nando! Jehova okwa li a hokwa Noa, molwaashoka okwa gwanitha po shoka e mu lombwele a ninge. — Gen. 6:22.

12. Oshike sha kwathele Jeremia a nyanyukilwe oshinakugwanithwa she shokuuvitha, nonando aantu oya li yu ulike iikala yokwaanakonasha nokwa li ta patanekwa?

¹² Omuhunganeki Jeremia naye okwa li u uvitha uule womimvo odhindji, nonando aantu kaya li ye na ko nasha nokwa li ta patanekwa. Pompito yimwe okwa li a teka omukumo sho aantu ya li taye mu ‘yolo noku mu tuka’ nokwa li a hala okweetha po oshinakugwanithwa she. (Jer. 20:8, 9) Ihe Jeremia ka li e etha po oshinakugwanithwa she. Oshike mbela she mu kwathele a sinde etekomukumo noku nyanyukilwe oshinakugwanithwa she shokuuvitha? Okwa li a gandja eitulomo kiinima iyali ya simana. Shotango, Kalunga okwa li a ti kutya ota ka pa aantu ye “onakuyiwa netegameno.” (Jer. 29:11) Oshitiyali, Jehova oye a li a pe Jeremia oshinakugwanithwa shoka shokuthikitha etumwalaka lye koshigwana she. (Jer. 15:16) Kunena natse ohatu uvithile aantu onkundana ombwanawa ndjoka hayi pe aantu etegameno, notwa humbata edhina lye tu li Oonzapo dhe. Ngele otwa kala hatu gandja eitulomo kiinima iyali mbyoka ya simana, otatu vulu okukala twa nyanyukwa kutya nduno aantu ohaya pulakene ketumwalaka lyetu nenge hasho.

13. Oshike tatu ilongo meyele lyaJesus ndyoka li li muMarkus 4:26-29?

¹³ Ohashi pula ethimbo opo omuntu a ninge ehumokomeho. Jesus okwa li a popi kombinga yoshili ndjono meyele lye lyankene oombuto hadhi koko. (Lesha Markus 4:26-29.) Konima sho omukuni a kunu oombuto dhe, oombuto ndhoka odhe ende tadhi koko kashonanakashona noka li ta vulu oku dhi endelelitha dhi koke. Ngaashi owala omukuni, otashi vulika wu tegelele pu pite ethimbo lyontumba, opo nawa omukonakoni gwoye a tameke okutula miilonga shoka ti ilongo. Ngaashi owala omunepya itaa vulu okuthiminika iikunomwa ye yi koke mbala, itatu vulu okuthiminika omukonakoni a ninge ehumokomeho nziya. Onkee ano, ino teka omukumo ngele owu wete omukonakoni gwoye te ende kashona okuninga ehumokomeho. Ngaashi owala iilonga yuunamapya, okuninga aantu aalongwa ohaku pula eidhidhimiko. — Jak. 5:7, 8.

14. Oshiholelwa shini tashi ulike kutya otashi vulika shi pule ethimbo ele, opo aantu ya tameke okupulakena ketumwalaka lyetu?

¹⁴ Miitopolwa yimwe ohashi pula ethimbo ele, opo omuntu a taambe ko oshili, a ninge ehumokomeho noku ninginithwe. Natu taleni koshimoniwa shomumwameme Gladys nosho wo Ruby Allen, mboka ye li aamwayinathana. Mo 1959 oya li ya tuminwa kondoolopa yi li moshitopolwa shaQuebec, moKanada, ye li aakokolindjila yondjigilile. * Molwaashoka aantu yomoshitopolwa shoka oya li ya tila okupopiwa kaashiinda shawo nosho wo kaasita yawo ngele oya monika taya popi nOonzapo, oya kala taya tindi okupulakena ketumwalaka lyUukwaniilwa. Gladys okwa ti: “Otwa kala hatu longo oowili hetatu egumbo negumbo uule woomvula mbali moshitopolwa shoka, ihe kapwa li nando ogumwe e tu egulula nenge a pulakene ketumwalaka ndyoka tu na. Uuna aanegumbo ye ya posheelo e taya mono kutya otse tatu konkola, ohaya shuna owala e taye ki ipyakidhila niilonga yawo. Ihe shoka inashi tu teya omukumo.” Mokweendela ko kwethimbo aantu oya tameke oku ya taamba ko, nayamwe oya li ya pulakene ketumwalaka ndyoka ye na. Mondoolopa ndjoka ngashingeyi omu na omagongalo gatatu. — Jes. 60:22.

15. 1 Aakorinto 3:6, 7 otaye tu longo shike kombinga yiilonga yokuninga aantu aalongwa?

¹⁵ Okuninga aantu aalongwa ohaku pula elongelokumwe. Ohashi pula oonkambadhala dhaayehe megongalo, opo omukonakoni a thike poshitsa shokuninginithwa. (Lesha 1 Aakorinto  3:6, 7.) Pashiholelwa, omuuvithi gumwe otashi vulika a thigile omuntu ngoka u ulika ohokwe oshileshomwa. Ihe omolwomaimbo gontumba ina vula we okushuna ko kuye, nokwa pula omumwatate gwontumba oye a ye ko. Mokweendela ko kwethimbo omumwatate ngoka okwa tameke okukonakona naye, nokwa kala ha hiya aamwatate naamwameme yontumba ye mu wayimine pekonakono lyawo noya kala haya ladhipike omukonakoni ngoka momikalo dha yoolokathana. Aamwatate naamwameme ayehe mboka otaya ka kwathela mokutekela ombuto ndjoka ya kunwa momutima gwomukonakoni ngoka. Momukalo ngoka, ayehe mboka ya longa nuudhiginini ye mu kwathele otaya ka kala ya nyanyukwa uuna omukonakoni ngoka a ninginithwa. — Joh. 4:35-38.

16. Omolwashike to vulu okunyanyukilwa shoka to vulu okulonga miilonga yaJehova, nonando owa ngambekwa kokwaanuukolele nenge molwaashoka kuu na we oonkondo?

¹⁶ Ongiini ngele iho vulu we okukutha ombinga miilonga yokuuvitha ngaashi nale omolwuukolele nenge molwaashoka kuu na we oonkondo? Oto vulu natango okunyanyukilwa shoka to vulu okulonga miilonga yaJehova. Natu ka taleni kwaashoka David a li a ningi, sho ye naalumentu ye ya mangulula aanegumbo lyawo nokugalula ko omaliko gawo kAayamaleki. Aalumentu yaDavid ye li omathele gaali oya li ya vulwa unene noku ka kondja, onkene oya thigala po ya keelele iinima mbyoka ya thiga po. Konima sho ya sindi Aayamaleki, David okwa gandja elombwelo aalumentu ayehe ya topolelwe iihakanwa shi thike pamwe. (1 Sam. 30:21-25) Osha faathana ngele tashi ya piilonga yetu yokuninga aantu aalongwa. Kehe ngoka ha ningi ngaashi ta vulu a kuthe ombinga miilonga mbyoka, oha kala a nyanyukwa uuna gumwe a taamba ko oshili nokutameka okweenda mondjila ndjoka tayi fala komwenyo gwaaluhe.

17. Oshike tu na okupandulila Jehova?

¹⁷ Otatu pandula Jehova sho ha tala ko pandjele iilonga mbyoka hatu mu longele. Oku shi kutya itatu vulu okuthiminika aantu ya pulakene ketumwalaka lyetu nenge ye mu longele. Nonando ongawo, oha kala e wete oonkambadhala ndhoka hatu ningi note ke tu pa ondjambi omolwiilonga yetu yuudhiginini. Ohe tu longo wo kombinga yankene tatu vulu okunyanyukilwa shoka tatu vulu okulonga miilonga yokuuvitha. (Joh. 14:12) Otatu vulu okukala nuushili kutya Jehova ota kala e tu hokwa ngele otwa kala hatu idhidhimike nokupula komeho niilonga yokuuvitha.