ONDA valelwa moshilando Wichita, shaKansas, moAmerika, momasiku 10 Desemba 1936. Otwa valwa tu li yane nongame osheeli. Aavali yandje oyo William naJean, noya li haya longele Jehova nuudhiginini. Tate okwa li omuunganeki gwolutu lwaakuluntugongalo megongalo. Meme okwa li a longwa oshili kumeme gwe, Emma Wagner. Kuku gwandje Emma, okwa li a longo aantu oyendji oshili, mwa kwatelwa omumwameme Gertrude Steele, ngoka a kala uule womimvo odhindji ta longo e li omutumwa moPuerto Rico. * Onkee onda kala ndi na iiholelwa oyindji iiwanawa mbyoka tandi vulu okuholela.

Olyomakaya yimwe komatango, tse natate otwa li tatu gandja iifo yOshungolangelo no-Consolation (ngashingeyi ohayi ithanwa Awake!) kaantu mboka taye ende mepandaanda. Ethimbo mpoka onda li ndi na omimvo ntano, noshilongo shetu osha li tashi kondjo mIita Iitiyali yUuyuni. Opwe ende ndohotola a kolwa, e ta tameke okuula tate omalaka omawinayi, molwaashoka iha kutha ombinga miita. Oku ula tate kutya ye omukatalume, oshoka ina hala okuya miita. Ndohotola okwa thikama komeho gatate e ta ti: “Omolwashike itoo dhenge ndje, shikatalume showala ngoye!” Onda li nda tila lela. Ihe onda li nda kuminwa tate, oshoka okwa tsikile owala ta gandja iifo kaantu mboka ya li ye tu ngundumanena. Opwe ende omukwiita, na ndohotola okwe mu igidha ta ti: “Dhenga ekatalume ndika!” Omukwiita okwa mono kutya ndohotola okwa kolwa, onkene okwe mu lombwele a ti: “Inda kegumbo wu ka thuwe po, wu kololokwe.” Konima yaashoka, ayehe oya yi. Uuna tandi dhimbulukwa esiku ndyoka ohandi pandula Jehova sho a li a pe tate uulaadhi. Tate okwa li e na omahala gaali gokukululila aantu moshilando Wichita, na ndohotola okwa li gumwe gwomookastoma dhe.

Sho nda li ndi na omimvo hetatu, aavali yandje oya landitha po egumbo lyawo nomahala gawo gokukululila aantu, e tatu kala hatu zi mokakalafana. Otwa tembukile koColorado tu ka longe hoka ku na ompumbwe onene. Otwa kala hatu zi popepi noshilando Grand Junction, moka aavali yandje ya kala taya kokola ondjila. Omathimbo gamwe oya kala haya longo momapya nomoohambo. Omolwokulonga kwawo nuudhiginini nomolwomalaleko nuuyamba  gaJehova, egongalo olya li lya totwa po. Mo 20 Juni 1948, tate okwa li a ninginitha ndje momulonga, pamwe nayalwe mboka ya li ya taamba ko oshili yOmbiimbeli, ngaashi Billie Nichols nomukulukadhi gwe. Konima yethimbo, aaihokani mboka oya ka ya miilonga yuutonatelishikandjo. Omwanamati gwawo nomukulukadhi gwe, nayo oya ka ya wo miilonga mbyoka.

Otwa li tu na ekwatathano lyopothingo noyendji yomwaamboka ya li haya longo lela nuudhiginini miilonga yUukwaniilwa notwa li hatu kala tu na oonkundathana tadhi tungu dhiinima yopambepo. Pashiholelwa, omumwatate Don Steele nomukadhi Earlene noyanamati yawo pamwe naakulukadhi yawo, Dave naJulia nosho wo Si naMartha, oya li ya nwetha mo lela onkalamwenyo yandje. Oya kwathele ndje ndi mone kutya okupititha Uukwaniilwa komeho monkalamwenyo ohaku kwathele omuntu a kale e na onkalamwenyo tayi ti sha nokwa nyanyukwa.

Sho ndi na omimvo 19, kuume ketu, Bud Hasty, okwa pula ndje tu ka kokole ondjila kuumbugantu waAmerika. Omutonatelishikandjo okwe tu pula tu tembukile koshilando Ruston, moLouisiana, moka mwa li Oonzapo odhindji inaadhi ipyakidhila we niinima yopambepo. Otwa lombwelwa tu kale hatu gongala oshiwike kehe kutya nduno aantu yangapi taye ya kokugongala. Otwa mono ehala ewanawa nokugongalela notwe li opaleke nawa. Otwa kala hatu gongala pandjigilile, nonando omathimbo gamwe ohatu iyadha otse a tuke yaali twe ya kokugongala. Otwa li hatu ningi omalufo, sho gumwe ta gandja oshitopolwa pokugongala, ye gumwe ota yamukula omapulo agehe. Uuna oshitopolwa shi na euliko, atuhe ohatu yi komutuni nokapwa li hapu kala ngoka ta pulakene. Konima yethimbo, omumwameme gumwe omukokele okwa tameke he ya kokugongala. Kashona nakashona, aakonakonimbiimbeli yamwe nosho wo aauvithi mboka inaayi ipyakidhila we, oya tameke okukala haye ya kokugongala. Inapu pita ethimbo ele, lyo egongalo olya tameka okukoka.

Esiku limwe sho twa li tatu longo naBud, otwa tsakaneke omusita gwongeleka yedhina Church of Christ, ngoka a li a popi kombinga yomanyolo ngoka kaanda li ndi shi naanaa. Shika osha li sha tilitha ndje kashona nosha ningitha ndje ndi dhiladhile muule kombinga yaashoka ndi itaala. Uule woshiwike, onda kala ihaandi kotha uusiku, tandi kongo omayamukulo gomapulo ngoka twa li twa pulwa. Shoka osha kwathele ndje ndi ninge oshili yandje mwene. Onda kala wo nda halelela okutsakanena nomusita gulwe ishewe.

Konima yethimbo, omutonatelishikandjo okwa pula ndje ndi tembukile koshilando El Dorado, moArkansas, opo ndi ka kwathele egongalo lyaahoka. Manga ndi li hoka, onda li handi shuna lwiikando koColorado ndi ki ipopile komeho yokangundu kaantu mboka haya hogolola aantu mboka ye na oku ka kondja miita. Oshikando shimwe manga tu li molweendo lwokushuna naakokolindjila ooyakwetu, otwa li twa mono oshiponga moTexas nohauto yandje kaya li we tayi vulu okweenda. Otwa dhengele omumwatate gumwe nokwe tu ile po. Okwe tu fala kegumbo  lye nosho wo kokugongala. Aamwatate megongalo oya tseyithilwa kutya otwa mona oshiponga noye tu pe ekwatho lyopashimaliwa. Omumwatate ngoka twa li twa dhengela okwa landitha po ohauto yandje ko N$ 379.15.

Otwa li twa mono olefa yokuya koWichita, hoka ku na kuume ketu, omumwatate McCartney ta kokola ondjila. Oyanamati ye aakwanambwiyu, Frank naFrancis, oya li ookuume kandje kopothingo notu li ookuume sigo onena. Oya li ye na ohauto onkulu ndjoka ye yi landitha po kungame ko N$ 379.15. Ondando ndjoka ya pula ndje oya li naanaa yi thike pamwe naandjoka nda landitha po ohauto yandje ndjoka ya tekauka po thiluthilu. Shika osha li oshikando shandje shotango tandi mono lela nkene Jehova a sile ndje oshimpwiyu, sho nda pititha komeho Uukwaniilwa we. Esiku nda talela po uukwanegumbo womumwatate McCartney, onda li nda tsakanene ko nomumwameme Bethel Crane, ngoka e na uupambepo uuwanawa. Meme gwe Ruth, okwa li omumwameme hu uvitha nuulaadhi moshilando Wellington, moKansas, nokwa kala ta kokola ondjila sigo oosho e na omimvo 90 nasha. Tse naBethel otwa hokana konima yomumvo gumwe, mo 1958, nokwa wayimine ndje miilonga yuukokolindjila moEl Dorado.

Konima sho twa konakona iiholelwa iiwanawa mbyoka twa tulilwa po sho twa li aashona, otwa tokola okwiigandja koshilonga kehe ehangano lyaJehova tali tu pe tu longe. Otwa li twa tumwa tu ka kokole ondjila moshilando Walnut Ridge, moArkansas, tu li aakokolindjila yi ikalekelwa. Mo 1962, otwa li twa tuntukwa sho twa hiywa tu ka hite ongundu onti-37 kOsikola yaGilead. Otwa li twa nyanyukwa okumona omumwatate Don Steele, e li mongundu yetu. Konima sho ootundi dha pu, otwa tuminwa koshilando Nairobi, moKenya. Sho twa tembuka moNew York otwa li twa yemata noonkondo. Ihe sho twa mono aamwatate mboka ye ya oku tu tsakaneka kokapale koondhila moNairobi, eyeme ndyoka olya shituka enyanyu.

Ohole yetu yokuhola oshilongo Kenya nosho wo uukalele mboka twa li hatu nyanyukilwa mo, oye ende tayi koko nziya. Aakonakonimbiimbeli yetu yotango mboka ya li ya ningi ehumokomeho oya li Chris nomukadhi Mary Kanaiya. Otaya tsikile natango okulongela Jehova nuudhiginini miilonga yethimbo lyu udha moKenya. Momumvo gwa ka landula ko otwa li twa pulwa tu ye koshilandopangelo Kampala, moUganda, notse twa li aatumwa yotango moshilongo moka. Osha li ethimbo li nyanyudha noonkondo, oshoka aantu oyendji oya li ye na ehalo lyokwiilonga oshili noya ningi Oonzapo. Konima yokukala moAfrika uule womimvo ndatu netata, omukulukadhi gwandje okwa ningi etegelelo. Onkee ano, otwa shuna koAmerika. Esiku twa tembuka moAfrika, otwa li twa yemata noonkondo shi vulithe esiku twa tembuka moNew York. Otwa li tu hole noonkondo aantu yomuAfrika, notwa li tu na einekelo kutya sikulimwe onatu ka galuke ngaa ishewe.

Otwa tembukile molusilu lu li kuuninginino waColorado, hoka kwa li aavali yandje. Ethimbo efupi konima yaashono, omwanakadhona gwetu gwosheeli, Kimberly, okwa valwa. Konima yoomwedhi 17, otwa mono po ishewe Stephany. Otwa li twa tala ko oshinakugwanithwa shetu oshipe shokukala aavali kutya oshi na oshilonga, notwa kala twa tokola toko okuthindila oshili moyanakadhona yetu mboka. Otwa li twa hala okuholela mboka ye tu tulila po iiholelwa iiwanawa. Nonando okutulila po aanona oshiholelwa oshiwanawa ogwo omukalo dhingi gwoku ya zula, shoka hasho tashi utha kutya otaya ka longela Jehova ngele ya koko. Shoka onde shi mona, sho omumwamememati nomumwamemekadhona ya thigi po oshili. Ondi inekela kutya aamwameme yandje mboka otaya ka holela iiholelwa iiwanawa mbyoka ya tulilwa po.

Otwa li twa nyanyukilwa okuputudha oyanakadhona yetu notwa kambadhala okukala aluhe hatu ningi iinima pamwe. Molwaashoka otwa li hatu zi popepi noshilando Aspen, moColorado, omathimbo nomathimbo otwa li hatu kutha ombinga tu li pamwe muudhano mboka hawu dhanwa molumi. Omainyanyudho ngaka oga li ge tu  pa ethimbo lyokukala hatu kundathana noyanakadhona yetu. Otwa li wo hatu yi komahala hoka tatu vulu okudhika ootenda notwa li hatu kala tu na oonkundathana tadhi nyanyudha, sho tu li pomulilo twa hungila. Nonando oya li aashona, oya li haya pula omapulo ngaashi: “Oshike tandi ka ninga ngele nda koko?” nosho wo “Onda hala okuhokanwa komuntu a tya ngiini?” Otwa kambadhala okuthindila iinima yopambepo momadhiladhilo nomomitima dhawo. Otwe ya kwathele ya lalakanene iilonga yethimbo lyu udha noya mone kutya oshi li pandunge okuhokanwa owala komuntu ngoka e na elalakano lya fa lyawo. Otwa li wo twe ya kwathele ya mone kutya osha simana ya hokanwe, uuna ya koka. Onkee ano, otwa li twe ya lombwele tatu ti: “Inamu etha mu hokanwe sigo mwa gwanitha omimvo 23.”

Ngaashi owala aavali yetu ya li haya ningi, natse otwa longo nuudhiginini tu kale hatu yi kokugongala nomuukalele pandjigilile, tu li uukwanegumbo. Otwa kala hatu hiya kegumbo lyetu mboka ye li miilonga yethimbo lyu udha. Shimwe ishewe, olundji otwa kala hatu popi nenyanyu kombinga yethimbo ndyoka twa kala miilonga yuutumwa. Otwa lombwele aanona yetu kutya otu na etegameno lyoku ka talelela po koAfrika sikulimwe. Oya li ya halelela okuya ko.

Otwa kala hatu ningi ekonakono lyuukwanegumbo pandjigilile, mpoka twa kala hatu dhana iinyandwa kombinga yoonkalo ndhoka tashi vulika ya tsakaneke kosikola. Miinyandwa moka, oyanakadhona yetu oyo ya li haya kala Oonzapo, omanga tse tu li aanasikola ooyakwawo. Oya li nduno haya yamukula omapulo ngoka tatu ya pula. Oya li haya nyanyukilwa okwiilonga iinima momukalo nguka nosha li hashi ya pe omukumo. Sho ye ende taya koko, omathimbo gamwe kaya li lela haya kala ya nyanyukilwa okuninga ekonakono lyuukwanegumbo. Esiku limwe onda li nda yemata noonkondo e tandi ya lombwele ya ye koondunda dhawo nosho wo kutya itatu ka ninga we ekonakonombiimbeli lyuukwanegumbo. Oya li ye shi kuminwa noya tameke okulila taya ti oya hala okukonakona. Shoka oshe tu kwathele tu mone kutya otwa thindila shili ohole yokuhola iinima yopambepo momitima dhawo, nonando aashona. Oya kala ye hole ekonakonombiimbeli lyuukwanegumbo notwa kala hatu ya etha ya holole omaiyuvo gawo ya manguluka. Omathimbo gamwe osha li hashi kala oshidhigu, uuna taya popi kutya itaya tsu kumwe nomalongo gamwe gOmbiimbeli. Nonando ongawo, oshe tu kwathele tu mone shoka shi li momitima dhawo. Konima ngele twe ya yelithile oshinima nawa, ohaya kala ya mbilipalelwa komukalo ngoka Jehova ha dhiladhila kombinga yasho.

Ethimbo ndyoka twa kala tatu putudha oyanakadhona yetu olye endelele. Kekwatho nokewiliko lyehangano lyaJehova, otwa ningi ngaashi tatu vulu tu ya putudhe ya kale ye hole Jehova. Otwa li twa nyanyukwa sho ya tameke okukokola ondjila konima sho ya mana osikola. Oyi ilongo wo nkene taya vulu okwiikwatha yo yene pashimaliwa. Oya tembukile koshilando Cleveland, moTennessee, pamwe naamwameme yaali, opo ya ka longe hoka ku na ompumbwe onene. Otwa kala hatu ya yuulukwa noonkondo, ihe otwa li twa nyanyukwa, sho taya longo miilongo yethimbo lyu udha. Tse nomukulukadhi gwandje, Bethel, otwa tameke ishewe okukokola ondjila, naashoka oshe tu egululile oompito dhokunyanyukilwa omauthembahenda galwe. Onda ningi omukalelipo gwomutonatelishikandjo nonda kala handi kwathele piigongi iinene.

Manga oyanakadhona yetu inaaya tembukila koTennessee, oya li ya ka talela po koshilando London, moEngland noya li ya talele po oshitayimbelelwa. Hoka oko Stephany a tsakanene nomumwatate omugundjuka, Paul Norton, ngoka ha longo moshitayimbelelwa. Pethimbo mpoka Stephany okwa li e na omimvo 19. Metalelo po lya ka landula ko, Kimberly okwa tsakenene ko nomumwatate Brian Llewellyn, ngoka a li ha longo pamwe naye. Paul naStephany oya hokana, ihe okonima sho a gwanitha omimvo 23. Brian naKimberly oya hokana momumvo gwa ka landula ko, sho e na omimvo 25. Onkee ano, oya kala inaaya hokanwa sigo ya gwanitha omimvo 23, ngaashi twa li twe ya lombwele. Kehe gumwe okwe tu etele oshitenya shoka twa hokwa.

Oyanakadhona yetu oye tu lombwela kutya iiholelwa mbyoka tse nosho wo ookuku yawo twe ya tulila po, oye ya kwathela ya vulike kelombwelo lyaJesus, ndyoka tali ti kutya ‘natu konge tango Uukwaniilwa waKalunga.’ Oya vulika kulyo, nopethimbo ya li ye na uupyakadhi wopashimaliwa. (Mat. 6:33) MuApilili 1998, Paul naStephany oya hiywa ya ka hite ongundu onti-105 kOsikola yaGilead, nokonima oya tumwa ya ka longe koMalawi, moAfrika. Pethimbo opo tuu mpoka, Brian naKimberly oyi ithanwa ya ka longe koBetel yaLondon, nokonima yethimbo, oya tuminwa ishewe koBetel yaMalawi. Otwa li shili tu uvite uuntsa nuunambano, oshoka kapu na omukalo dhingi moka aagundjuka taya vulu okulongitha oonkalamwenyo dhawo kaagu shi ngoka.

MuJanuali 2001, onda li nda dhengelwa ongodhi, ngaashi nde shi popi petameko. Omumwatate Marais, omutonateli  gwOshikondo shIilonga yOkutoloka, okwa lombwele ndje mongodhi kutya aamwatate oya ninga po elongekidho, opo aatoloki muuyuni awuhe ya pewe ootundi dhoku ya dheula, yu uve ko Oshiingilisa. Pethimbo mpoka, onda li ndi na omimvo 64, sho ya pula ndje ndi dheulwe ndi ninge gumwe gwomaalongi yootundi ndhoka. Tse naBethel otwa galikana kombinga yoshinima shoka notwa pula omayele koomeme yetu mboka ya li ya kulupa. Ayehe oya li ya hala tu ye, nonando itatu ka vula we oku ya kwathela. Onda dhengele omumwatate Marais nonde mu lombwele kutya otwi ilongekidha okutaamba ko uuthembahenda mboka nenyanyu.

Manga inaatu ya, meme okwa monika uuvu wokankela. Onde mu lombwele kutya itatu yi we. Otatu kala po, opo tu ambidhidhe omumwamemekadhona Linda sho te mu sile oshimpwiyu. Meme okwa yamukula a ti: “Owu na okuya, oshoka otandi ka kala ndu uvite nayi unene, ngele owa kala inoo ya.” Linda naye osho a li u uvite ngaaka. Otwa li twa pandula ombepo yawo yeiyambo nosho wo ekwatho lyaamwatate naamwameme yomomudhingoloko. Sho twa yi koWatchtower Educational Center moPatterson, opwa piti owala esiku limwe, ye Linda ota dhenge te tu lombwele kutya meme okwa mana oondjenda. Otwa longo nuudhiginini moshilonga shetu oshipe, oshoka ando meme okwa li e na omwenyo, ando osho e tu ladhipike tu ninge.

Sho twa tuminwa koshitayimbelewa shaMalawi oko tu ka longe tango, otwa li twa nyanyukwa noonkondo, oshoka oyanakadhona yetu pamwe naaholike yawo oko ya li taya longele. Osha li shi nyanyudha okukala ishewe twa hangana pamwe! Konima otwa ka gandja edheulo moZimbambwe nomoZambia. Konima yomimvo ndatu netata sho twa kala nokulonga ootundi ndhoka, otwa pulwa tu shune koMalawi, opo tu ka nyole iimoniwa yaamwatate mboka ya li ya hepekwa, sho inaaya kutha ombinga miita. *

Mo 2005, otwa li twa yemata ishewe, sho tse naBethel twa shuna kegumbo koBasalt, moColorado, tu ka tsikile niilonga yuukokolindjila. Mo 2006, Brian naKimberly oya tembukile popepi natse, ye li aashinda shetu, opo ya putudhe oyanakadhona yawo yaali, Mackenzie naElizabeth. Paul naStephany oye li natango koMalawi, hoka Paul ta longo e li oshilyo shOkomitiye yOshitayimbelewa. Ngashingeyi ondi na konyala omimvo 80, nohashi nyanyudha ndje unene okutala aalumentu aagundjuka mboka nda longa pamwe nayo uule womimvo, ye na iinakugwanithwa mbyoka nda li ndi na. Ngashingeyi otwa nyanyukwa, omolwiiholelwa iiwanawa mbyoka twa li twa tulilwa po kuyalwe nomolwoonkambadhala ndhoka twa ningi tu yi holele, opo aanona yetu nosho wo aatekulu yetu ya mone mo uuwanawa.