1. Episalomi 15:1-5 otali vulu oku tu kwathela ngiini?

 MOSHITOPOLWA sha tetekele, otwa ilongo kutya aapiya yaJehova mboka ye mu iyapulila otaya vulu okukala aayenda metsali lye lyopathaneko, ngele oya kokeke ekwatathano lyopothingo naye. Ihe oshike twa pumbwa okuninga, opo tu vule okukala aayenda ye? Episalomi 15 otali popi oshindji shi na ko nasha naashika. (Lesha Episalomi 15:1-5.) Episalomi ndika otali tu lombwele shoka tu na okuninga, opo tu vule okukala ookuume kaKalunga kopothingo.

2. Omupisalomi David otashi vulika a li ta dhiladhila kombinga yashike sho a tumbula etsali lyaJehova?

² Episalomi 15 olya tameke nomapulo taga ti: ‘Omuwa, olye ta pitikilwa okuya metsali lyoye? Olye ta pitikilwa okugalikanena kondundu yoye ondjapuki?’ (Eps. 15:1) Sho omupisalomi David a tumbula ‘etsali’ lyaJehova otashi vulika a li ta dhiladhila kombinga yetsalihangano, ndyoka lya li muGibeon pethimbo ndyoka. David okwa li wo a tumbula ondundu ondjapuki yaKalunga, tashi vulika a li ta popi ondundu Sion yomuJerusalem. David okwa li a dhike etsali kuumbugantu waGibeon mu kale oshikethahangano sigo ehala moka shi na okukala lya pu okutungwa. — 2 Sam. 6:17.

3. Omolwashike twa pumbwa okuuva ko Episalomi 15? (Tala wo ethano.)

³ Odhoshili kutya Aaisraeli oyendji kaya li nando ya pitikwa ya longe metsalihangano, naashonashona yowala ya li haya yi meni lyetsali moka mwa pungulwa oshikethahangano. Ihe aapiya yaJehova ayehe aadhiginini otaya vulu okukala aayenda metsali lye lyopathaneko mokuninga nomokutsikila okukala ookuume  ke. Shono osho atuheni twa hala okuninga. Episalomi 15, olya tumbula omaukwatya gamwe ngoka twa pumbwa okukokeka nokuulika, opo tu kale ookuume kaJehova.

KALA HO VULIKA KUKALUNGA NOHO LONGO SHOKA SHA UKA

4. Otu shi shi ngiini kutya okuninginithwa hako owala Jehova a tegelela kutse? (Jesaja 48:1)

⁴ MEpisalomi 15:2, kuume kaKalunga okwa popiwa e li “omuntu ngoka ha vulika kuKalunga miinima ayihe noha longo shoka shu uka.” Oshitya “vulika” nosho wo “longo” otayi gandja edhiladhilo lyokuninga oshinima pandjigilile notashi tsikile. Ihe mbela otatu vulu ngaa shili okukala hatu “vulika kuKalunga miinima ayihe”? Eeno. Molwashoka kapu na omuntu a gwanenena, Jehova ote ke tu tala ko hatu “vulika miinima ayihe,” ngele otwa ningi ngaashi tatu vulu tu vulike kuye. Ohatu tameke owala okweenda pamwe naKalunga nenge okuvulika kuye, uuna twe mu iyapulile nokuninginithwa. Ndhindhilika kutya pethimbo lyOmbiimbeli, omuntu ka li ha kala a gwana okukala omuyenda gwaJehova, molwaashoka owala a valwa moshigwana shaIsraeli. Yamwe oya li haye mu ithana, ihe ihaye shi ningi “moshili nomuuyuuki.” (Lesha Jesaja 48:1.) Aaisraeli mboka ya li ya hala okukala shili aayenda yaJehova oya li ye na okwiilonga kombinga yiitegelelwa ye noku yi tula miilonga. Sha faathana, opo tu kale twa hokiwa kuJehova, otwa tegelelwa okuninga oshindji kaashi shi owala okuninginithwa nokukala hatu endathana negongalo lyopaKriste. Otu na okutsikila ‘okulonga shoka shu uka.’ Shono osha kwatela mo shike?

5. Okuvulika kuJehova miinima ayihe okwa kwatela mo shike?

⁵ Pataloko lyaJehova, ‘okuvulika kuye miinima ayihe’ nosho wo ‘okulonga shoka sha uka,’ osha kwatela mo oshindji kaashi shi owala okukala ho ya aluhe pokugongala. (1 Sam. 15:22) Otu na okulalakanena okuvulika kuKalunga mukehe shoka tatu ningi, nokuli nuuna  tu li otse atuke. (Omayel. 3:6; Omuuv. 12:13, 14) Osha simana tu kale hatu kambadhala okuvulika kuJehova, nokuli nomuunima uushona. Uuna tatu shi ningi otatu ulike kutya otu mu hole shili, nohashi mu ningitha a kale e tu hole noonkondo. — Joh. 14:23; 1 Joh. 5:3.

6. Sha ikolelela kAahebeli 6:10-12, oshike unene sha simanenena shi vulithe iilonga yetu yuudhiginini mbyoka twa longa monakuziwa?

⁶ Jehova okwa pandula noonkondo shoka twe mu ningila monakuziwa. Ihe nonando otwa longa iilonga iiwanawa monakuziwa, shono itashi ti kutya otatu ka tsikila okukala aayenda metsali lyaJehova. Shika osha yelithwa nawa mAahebeli 6:10-12. (Lesha.) Jehova iha dhimbwa iilonga yetu iiwanawa yomonakuziwa. Ihe okwa hala tu tsikile oku mu longela nomutima gwetu aguhe “sigo okehulilo.” Ota ka kala kuume ketu sigo aluhe “ngele itatu seni uunye.” — Gal. 6:9.

POPYA OSHILI KU NA OMAKOTO

7. Osha hala okutya shike okupopya oshili kaatu na omakoto?

⁷ Ngoka a hala okukala omuyenda metsali lyaJehova oku na okukala “ha popi oshili ye ke na omakoto.” (Eps. 15:2) Shika osha kwatela mo oshindji kaashi shi owala okufundja. Jehova okwa hala tu kale aanashili mokupopya nomiilonga. (Heb. 13:18) Shoka osha simana, molwaashoka “omugoyoki oye iihuna koshipala shOmuwa, ihe Omuwa okwi inekela aayuuki.” — Omayel. 3:32.

8. Eihumbato lini tu na okuyanda?

⁸ Mboka ‘haya popi oshili nokaye na omakoto,’ ihaya iningitha ya fa aavuliki montaneho, omanga uuna ye li oyo ayeke haya taaguluka oompango dhaKalunga. (Jes. 29:13) Ohaya yanda okukala aagoyoki. Omuntu omugoyoki otashi vulika a dhiladhile kutya omithikampango dhaJehova haaluhe dha dhenga mbanda. (Jak. 1:5-8) Otashi vulika a kale itaa vulika kuJehova, miinima mbyoka kuye ya fa inaayi simana naanaa. Ngele okwa yono e ta kala inaa mona iilanduliko, otashi vulika a tameke okuninga iinima mbyoka iiwinayi noonkondo, naashoka otashi ningitha Kalunga a kale inaa hokwa we omukalo gwe gwoku mu longela. (Omuuv. 8:11) Ihe tseni, otwa hala okukala aanashili miinima ayihe.

9. Oshike tatu ilongo kwaashoka sha ningwa po sho Jesus a tsakanene naNatanael oshikando shotango? (Tala wo ethano.)

 ⁹ Osha simana okukala hatu popi oshili. Otatu vulu oku shi mona okutala kwaashoka sha ningwa po sho Filippus a hiya kuume ke, Natanael a tsakanene naJesus. Nonando Jesus ina tsakanena nale naNatanael, Jesus okwa ti: “Taleni, Omwiisraeli gwashili ngoka kee na nando omakoto gasha!” (Joh. 1:47) Odhoshili kutya Jesus okwa li a tala ko aalongwa ye yalwe aanashili, ihe okwa li a mono kutya Natanael omunashili a shiga ko. Ngaashi tse, Natanael ka li a gwanenena. Ihe nonando ongawo, ka li omufudhime, ihe omunashili miinima ayihe. Jesus okwa li e shi kuminwa, e ta pandula Natanael. Kapu na omalimbililo kutya atuheni otwa hala Jesus a kale e tu uvitile ngaaka!

10. Omolwashike twa pumbwa okuyanda okulongitha nayi omagano getu gokupopya? (Jakob 1:26)

¹⁰ Iitegelelwa oyindji mbyoka ya popiwa mEpisalomi 15, oya pambathana nankene hatu ungaunga nayalwe. Episalomi 15:3 otali ti kutya omuyenda metsali lyaJehova ‘iha lundile mukwawo, oye iha ningile ookuume ke uuwinayi ye iha hokola aashiinda ye.’ Okulongitha nayi elaka lyetu momikalo dha tya ngawo, otaku vulu okuuvitha nayi yalwe noku tu ningitha kaatu kale we aayenda metsali lyaJehova. — Lesha Jakob 1:26.

11. Okulundila oshike, noshike tashi ka ningilwa aalundili mboka inaaya iyela ombedhi?

¹¹ Omupisalomi okwa tumbula kondandalunde kombinga yokulundila yalwe. Okulundila oshike? Paulelalela, okulundila okupopya iifundja mbyoka tayi vulu okunyateka edhina lyagumwe. Aalundili mboka inaaya iyela ombedhi otaya vulu okukondwa mo megongalo lyopaKriste. — Jer. 17:10.

12-13. Omoonkalo dhini tashi vulika tu hokole gumwe mokutaandeleka uuyelele wa puka kombinga ye, inaatu shi nongela? (Tala wo ethano.)

¹² Episalomi 15:3 otali tu dhimbulukitha wo kutya omuyenda metsali lyaJehova iha ningile ookuume ke iinima iiwinayi, ye iha hokola  aashinda ye. Shika otashi vulika sha kwatela mo shike?

¹³ Otashi vulika wu hokole gumwe inoo shi nongela, mokutaandeleka uuyelele wa puka kombinga ye. Pashiholelwa: (1) omumwameme okwa etha po iilonga yethimbo lya udha, (2) aaihokani kaaye li we miilonga yaBetel, nenge (3) omumwatate ke shi we omukuluntugongalo nenge omuyakuligongalo. Mbela osha uka ngaa okutengeneka kutya omalunduluko ngoka oga ningilwa shike noku shi lombwela yalwe? Otashi vulika pu na omatompelo ogendji kaatu ga shi, ngoka ga etitha omalunduluko. Shimwe ishewe, omuyenda metsali lyaJehova “iha ningile ookuume ke uuwinayi ye iha hokola aashiinda ye.”

SIMANEKA MBOKA HAYA TILA JEHOVA

14. Yelitha nkene aayenda yaJehova haya “dhini mboka ye ethiwa kuKalunga.”

¹⁴ Episalomi 15:4 otali ti kutya kuume kaJehova oha “dhini mboka ye ethiwa kuKalunga.” Ongiini tatu vulu oku shi ninga? Tu li aantu inaaya gwanenena, katu na uuthemba wokutokola kutya omuntu okwa ethiwa kuKalunga, nenge hasho. Omolwashike mbela? Molwaashoka inatu gwanenena, otashi vulika tu kale tu hole aantu yamwe, molwomaukwatya gawo nokukala tu tonde yalwe, molwaashoka tu wete haye tu ningile nayi. Onkee ano otu na owala okudhina mboka “ye ethiwa” kuJehova mwene. (1 Kor. 5:11) Shoka osha kwatela mo aantu mboka haya longo uuwinayi nopwaa na okwiiyela ombedhi, inaaya simaneka eitaalo lyetu nenge haya kambadhala okunkundipaleka uupambepo wetu. — Omayel. 13:20.

15. Omomukalo gumwe guni tatu vulu okusimaneka “mboka haya vulika kOmuwa”?

¹⁵ Episalomi 15:4 otali tu lombwele tu “simaneke mboka haa vulika kOmuwa.” Ohatu kongo omikalo tu ulukile ookuume kaJehova olukeno nesimaneko. (Rom. 12:10) Ngiini mbela? Omukalo gumwe ogwa ikolelela kEpisalomi 15:4 kutya omuyenda metsali lyaJehova “oha gwanitha shoka e shi uvaneka nonando oshi mu fale muudhigu.” Ngele otwa kala inaatu gwanitha omauvaneko getu, otatu ka uvitha nayi yalwe. (Mat. 5:37) Pashiholelwa, Jehova okwa tegelela aayenda ye, mboka ya hokana, ya dhiginine egano lyawo lyondjokana. Oha kala a nyanyukwa uuna aavali taya ningi oonkambadhala dha mana mo ya gwanithe po omauvaneko gawo, ngoka ya ningila oyana. Ohole yetu yokuhola Kalunga nosho wo yalwe otayi ke tu inyengitha tu ninge ngaashi tatu vulu tu gwanithe po omauvaneko getu.

16. Omomukalo gulwe guni tatu vulu okusimaneka ookuume kaJehova?

¹⁶ Omukalo gulwe tatu vulu okusimaneka ookuume kaJehova omokukala hatu yakula aayenda nohatu gandja. (Rom. 12:13) Ethimbo ndyoka hatu kala naamwatate naamwameme otali vulu oku tu kwathela tu kokeke ekwatathano lyetu nayo nosho wo naJehova. Onkee ano uuna tatu yakula aayenda, otatu holele Jehova.

INATU KALA TU HOLE IIMALIWA

17. Omolwashike Episalomi 15 lya popya kombinga yiimaliwa?

¹⁷ Ombiimbeli oya ti kutya omuyenda gwaJehova “iimaliwa ye ihe yi pulile ontanitho ye iha taamba oombumbo, opo a pe uusama ngoka inaa yona sha.” (Eps. 15:5) Omolwashike episalomi ndika efupi lya popya kombinga yiimaliwa? Omolwaashoka ngele otwa kala tu na etaloko ewinayi li na ko nasha niimaliwa otashi vulu okuuvitha nayi yalwe nokuyona po ekwatathano lyetu naKalunga. (1 Tim. 6:10) Pethimbo lyOmbiimbeli, yamwe oya li ya ungaunga nayi naamwahe mboka ya hepa moku ya pula  iihohela, uuna taya shunitha oshimaliwa shoka ya li ye ya hehela. Shimwe ishewe, aapanguli oya li haya taamba oombumbo nokupangula mboka inaaya yona sha, kaashi li pauyuki. Jehova oku tonde iikala ya tya ngaaka. — Hes. 22:12.

18. Omapulo geni tage tu kwathele tu talulule etaloko lyetu li na ko nasha niimaliwa? (Aahebeli 13:5)

¹⁸ Osha simanenena okutalulula etaloko lyetu li na ko nasha niimaliwa. Ipula ngeyi: ‘Mbela olundji ohandi kala tandi dhiladhila kombinga yiimaliwa nosho wo shoka tandi vulu okulanda? Uuna nda hehela iimaliwa, mbela ohandi kakadhala oku yi shunitha, nokuthika pehulithodhiladhilo kutya ngoka e yi pe ndje ine yi pumbwa? Mbela okukala ndi na iimaliwa ohaku ningitha ndje ndi kale ndi uvite nda simana nokuningitha ndje omuluya? Mbela ohandi ula aamwatate kutya oye hole omaliko, molwaashoka owala ye na iimaliwa? Mbela ohandi panga owala uukuume naamboka aayamba noihandi gandja eitulomo kwaamboka ya hepa?’ Osha simana tu ipule omapulo ngaka, molwaashoka otwa pewa uuthembahenda uunene wokukala aayenda yaJehova. Ngele otwa kala kaatu hole iimaliwa, otatu ka gamena uuthembahenda mboka. Ngele otwe shi ningi, Jehova ke na esiku e tu ethe po! — Lesha Aahebeli 13:5.

JEHOVA OKU HOLE OOKUUME KE

19. Omolwashike Jehova a hala tu ninge iinima ayihe mbyoka ya popiwa mEpisalomi 15?

¹⁹ Episalomi 15 olya hula noohapu dheuvaneko tadhi ti: “Omuntu ngoka ha ningi ngeyi, ota ka kala aluhe e li nawa.” (Eps. 15:5) Mpano omupisalomi ota yelitha kutya omolwashike Jehova a hala tu ninge iinima ayihe mbyoka ya popiwa mepisalomi ndika. Jehova okwa hala tu kale twa nyanyukwa. Ngele otwa ningi shoka a hala tu ninge, ote ke tu yambeka note ke tu gamena. — Jes. 48:17.

20. Oshike shono aayenda yaJehova ya tegelela nondjuulukwe?

²⁰ Aayenda yaJehova oya tegelela onakuyiwa ombwanawa. Aakriste aagwayekwa aadhiginini otaya ka pewa epitikilo lyokuya ‘momahala gokukala ogendji,’ ngoka Jesus e ya longekidhila megulu. (Joh. 14:2) Mboka ye na etegameno lyoku ka kala nomwenyo kombanda yevi oya tegelela oku ka gwanithilwa ehunganeko ndyoka li li mEhololo 21:3. Onkee ano atuheni otu uvite uuntsa nuunambano, sho Jehova e tu hiya tu kale ookuume ke, notu kale aayenda metsali lye sigo aluhe!