1. Omomukalo guni Aakriste ye na okukala ya fa omuti? (Tala wo ethano.)

 “OMBEPO ihayi teya omuti ngoka hagu vulu okulemuka.” Shoka otashi ulike kutya omiti odha pumbwa okukala hadhi tifuka nenge hadhi lemuka, uuna ombepo onene tayi pepe, opo dhi kale dha kola. Natse otu na wo okukala hatu tifuka, uuna iinima tayi dhigupala monkalamwenyo yetu, opo tu tsikile okulongela Jehova twa nyanyukwa. Ngiini mbela? Otu na okukala hatu tifuka mokukala hatu taamba ko oonkalo dhetu ngele dha lunduluka nokusimaneka omataloko nomatokolo gayalwe.

2. Omaukwatya geni tage ke tu kwathela tu taambe ko oonkalo ndhoka tadhi lunduluka, noshike tatu ka kundathana moshitopolwa shika?

² Tu li aapiya yaJehova, otwa hala okukala hatu tifuka. Otwa hala wo okukala aaifupipiki naanambili. Moshitopolwa shika, otatu ka tala nkene omaukwatya ngoka ga kwathela Aakriste yamwe ya ungaunge nomalunduluko ngoka ga ningwa monkalamwenyo yawo. Otatu ka tala wo nkene omaukwatya ngoka taga vulu oku tu kwathela. Ihe tango, natu ki ilongeni kuJehova naJesus, mboka ye li iiholelwa ya gwanenena ngele tashi ya pokutifuka.

3. Otu shi shi ngiini kutya Jehova oha tifuka?

³ Jehova ohi ithanwa “emanya,” molwaashoka okwa kolelela noiha tenguka. (Deut. 32:4) Nonando ongawo, oha tifuka wo. Sho iinima tayi lunduluka muuyuni, Kalunga oha tifuka noha shilipaleke kutya kehe shimwe shoka a uvaneka otashi ka gwanithwa. Jehova okwe tu shita oshifetha she, hatu vulu okutifuka uuna oonkalo dhetu dha lunduluka. Okwe tu pa omakotampango ga yela mOmbiimbeli ngoka hage tu kwathele tu ninge omatokolo gopandunge, kutya nduno otwi iyadhe momashongo ga tya ngiini.  Oshiholelwa shaJehova nomakotampango ngoka e tu pa otaga ulike kutya nonando ye “emanya,” oha tifuka wo.

4. Gandja oshiholelwa shoka tashi ulike kutya Jehova oku na ondjele. (Levitikus 5:7, 11)

⁴ Jehova oha ningi iinima momukalo gwa gwanenena nogu li pandjele. Iha ungaunga naantu nonyanya. Pashiholelwa, tala nkene a li a ulukile Aaisraeli ondjele. Ka li a tegelela aantu ya gandje omayambo ga faathana, kutya nduno aayamba nenge oohepele. Poompito dhimwe okwa li a etha omuntu kehe a gandje omayambo shi ikolelela kwaashoka e na. — Lesha Levitikus 5:7, 11.

5. Gandja oshiholelwa tashi ulike kutya Jehova omwiifupipiki nomunalukeno.

⁵ Eifupipiko nolukeno ohalu inyengitha Jehova a tifuke. Pashiholelwa, Jehova okwa li a ulike kutya omwiifupipiki sho a li e li pokuhanagula po aakolokoshi yomuSodom. Jehova okwa li a lombwele omuyuuki Lot okupitila maayengeli ye, a matukile koshitopolwa shokoondundu. Ihe Lot okwa li a tila okuya ko. Onkee okwe mu indile opo ye noyaandjawo ya ye kuZoar, okandoolopa okashona hoka Jehova a li a tokola okuhanagula po. Jehova okwa li ta vulu okulombwela Lot kutya na ninge owala shoka e mu lombwele. Pehala lyaashono, okwa a li a etha Lot a ye ko, noka li a hanagula po okandoolopa hoka. (Gen. 19:18-22) Konima yomathelemimvo, Jehova okwa li a ulukile aakalimo yomuNinive olukeno. Okwa tumu omuhunganeki Jona a ka lombwele aakolokoshi yomoshilando shoka kutya otaya ka hanagulwa po pamwe nasho. Ihe Aaninive sho yi itedhulula, Jehova okwe ya uvile olukeno noina hanagula po we Ninive. — Jona 3:1, 10; 4:10, 11.

6. Tumbula iiholelwa yimwe yankene Jesus a li a holele uukwatya waJehova wondjele.

⁶ Jesus okwa li a holele uukwatya waJehova wondjele. Okwa li a tumwa kombanda yevi a uvithile ‘oonzi ndhoka dha kana dhomAaisraeli.’ Ihe okwa li a ulike kutya oku na ondjele sho ta gwanitha po oshinakugwanithwa she shoka. Oshikando shimwe omukiintu kee shi Omuisraeli okwa li e mu indile a aludhe omwanakadhona ngoka a li ta “hepekwa nayi kompwidhuli.” Jesus omolwolukeno lwe okwa aludha omwanakadhona gwomukiintu ngoka. (Mat. 15:21-28) Tala ishewe oshiholelwa shilwe. Petameko lyuukalele we, Jesus okwa popile a ti: “Ngoka ti idhimbike ndje . . . , nangame wo otandi mu idhimbike.” (Mat. 10:33) Ihe mbela okwa li ngaa i idhimbike Petrus ngoka a li e mu idhimbike lutatu? Aawe. Jesus okwa li e shi kutya Petrus oku uvitile nayi shoka a ningi nonokutya ye omulumentu omudhiginini. Konima sho Jesus a yumudhwa, okwi ihololele Petrus notashi vulika a li e mu shilipaleke lela kutya okwe mu dhimina po noku mu hole. — Luk. 24:33, 34.

7. Shi ikolelela kAafilippi 4:5, otwa hala yalwe ya kale ye tu tala ko ngiini?

⁷ Otwa mona kutya Jehova naJesus oye na ondjele. Ongiini kombinga yetu? Jehova okwa tegelela natse tu kale tu na ondjele. (Lesha Aafilippi 4:5.) Etoloko limwe olya popya kombinga yovelise ndjino tali ti: “Ihumbata momukalo moka yalwe taya vulu okumona kutya ngoye owu na ondjele.” Otatu vulu okwiipula ngeyi: ‘Mbela aantu ohaya tala ndje ko ngaa kutya ondi  na ondjele, ohandi tifuka nohandi idhidhimike? Nenge ohaya tala ndje ko ihaandi levuka, ndi na onyanya nenge ndi na omanganga? Nenge ohandi thiminike yalwe ya ninge iinima ngaashi nda hala yi ningwe? Nenge ohandi pulakene kuyalwe nokulandula omaetopo gawo mpoka sha pumbiwa?’ Ngele otwa kala tu na ondjele otatu holele Jehova naJesus. Natu taleni koonkalo mbali moka sha simana okukala tu na ondjele, uuna oonkalo dhetu dha lunduluka nuuna omataloko nomatokolo gayalwe ga yooloka ko kugetu.

8. Oshike tashi vulu oku tu kwathela tu kale tu na ondjele, uuna oonkalo dha lunduluka? (Tala wo enyolo lyopevi.)

⁸ Otwa pumbwa okukala tu na ondjele, uuna oonkalo dhetu dha lunduluka. Omalunduluko ngoka otashi vulika ge tu etele omaupyakadhi ngoka inaatu dhiladhila kutya onage ke tu adhe. Otashi vulika tu akukilwe kuupyakadhi wuukolele wa kwata miiti. Nenge omalunduluko gombaadhilila ge na ko nasha nuuhupilo nenge ge na ko nasha nepangelo, otaga vulu okuningitha onkalamwenyo yetu ondhigu noonkondo. (Omuuv. 9:11; 1 Kor. 7:31) Otashi vulika nokuli shi kale oshidhigu kutse ngele ehangano olye tu pula tu ka longele Jehova momukalo gumwe gwi ili nenge kehala li ili. Kutya nduno elunduluko olini, otatu vulu okupondola okutaamba ko oonkalo oompe ngele otwa ningi iinima mbika ine: (1) taamba ko onkalo yi li ngaashi yi li, (2) dhiladhila konakuyiwa, (3) dhiladhila kombinga yiinima mbyoka iiwanawa nosho wo (4) ningila yalwe iinima. b Natu ka taleni nkene yamwe yomaamwatate naamwameme ya li ya mono mo uuwanawa mokuninga iinima mbika.

9. Ongiini aatumwa yamwe ya li yi idhidhimikile omashongo ngoka ga holoka po inaaye shi tegelela?

⁹ Taamba ko onkalo yi li ngaashi yi li. Emanuele naFrancesca oya li ya pewa oshinakugwanithwa shokuninga aatumwa moshilongo shi ili. Sho owala opo ya tameke okwiilonga eleka lyomoshilongo shoka nokwiigilila egongalo lyawo epe, omukithi gwekomba gwoko-COVID-19 ogwa tukuka noya li ye na okwiikalela. Opo nduno yina yaFrancesca okwa si ombaadhilila. Omumwameme Francesca okwa li a halelela okukala noyaandjawo pethimbo mpoka, ihe ina vula okuya omolwomukithi ngoka gwekomba. Oshike she mu kwathele a ungaunge nomaupyakadhi agehe ngoka? Shotango, Emanuele naFrancesca ye li aaihokani oya galikana ya pewe uunongo, yi idhidhimike esiku kehe nokukala inaaya gwililwa po kiimpwiyu. Jehova okwa li a yamukula omagalikano gawo pethimbo lyo opala okupitila mehangano lye. Pashiholelwa, oya li ya tsuwa omukumo komumwatate gumwe ngoka a li a popi mokavidio kamwe a ti: “Ngele otwa taamba ko nziya onkalo ndjoka tu li muyo, ohashi tu kwathele tu kaleke po enyanyu lyetu, notashi ke tu kwathela tu longele Jehova notu kwathele wo yalwe.” c Oshitiyali, oya li ya tokola ya hwepopaleke uunkulungu wawo wokuuvitha okupitila mongodhi noya li nokuli ya tameke ekonakonombiimbeli. Oshititatu, oya pitika aamwatate naamwameme ye ya kwathele noya li ya pandula omolwohole ndjoka ye yu ulukile. Omumwameme gumwe omunambili okwa kala he ya tumine esiku kehe okatumwalaka okafupi ke na ovelise yomOmbiimbeli, lumwe momumvo. Ngele natse otwa kala hatu taamba ko oonkalo oompe, otatu ka nyanyukilwa shoka tatu vulu okuninga.

10. Omumwameme gumwe okwa taamba ko ngiini elunduluko enene monkalamwenyo ye?

¹⁰ Tala konakuyiwa nokugandja eitulomo kiinima mbyoka iiwanawa. Omumwameme, Christina, Omuromania, ngoka a kala moJapani  okwa li a yemata sho egongalo lyOshiingilisa hoka ha yi, lya li lya halakanithwa po. Nonando ongawo, ina tsikila okwiipula naashoka sha ningwa po. Pehala lyaashono okwa tokola a ye kegongalo lyOshijapani e ta ningi ngaashi ta vulu, opo a kale tu uvitha melaka lyOshiJapani. Okwa pula omukulukadhi gumwe ngoka a li ha longo naye nale e mu longe Oshijapani. Omukulukadhi okwa zimine a longithe Ombiimbeli nokambo kedhina Kala nonkalamwenyo ombwanawa sigo aluhe, a longe Christina Oshijapani. Onkee ano, Christina ka li owala a ilongo okupopya nawa Oshijapani, ihe omukulukadhi ngono okwa tameke okukala a hala okutseya oshindji kombinga yOmbiimbeli. Ngele otwa kala tatu tala kwaashoka shi li komeho noshiwanawa, omalunduluko gombaadhilila otaga vulu oku tu etela omayambeko ngoka twa li inaatu tegelela.

11. Oshike sha li sha kwathele aaihokani mboka ya li ya kanitha iiyemo yawo yi idhidhimike?

¹¹ Ningila yalwe iinima. Aaihokani yamwe ya kala moshilongo moka iilonga yetu yi indikwa oya kanitha iiyemo yawo sho oshilongo sha mbangolota. Oya li ye shi taamba ko ngiini? Tango, oya kambadhala okukaleka onkalamwenyo yawo yanathangwa. Opo nduno pehala lyokugandja eitulomo komaupyakadhi gawo yene, oya tokola ya gandje eitulomo kokukwathela yalwe, mokukala yi ipyakidhila niilonga yokuuvitha. (Iil. 20:35) Omusamane okwa ti: “Sho twa kala twa ipyakidhila niilonga yokuuvitha, inatu kala we naanaa hatu dhiladhila komaupyakadhi getu, notwa kala tu na ethimbo olindji lyokuninga iinima mbyoka Kalunga a hala tu ninge.” Ngele oonkalo dhetu dha lunduluka otu na okudhimbulukwa kutya osha simana okutsikila okukwathela yalwe, unene tuu okukala tatu uvitha.

12. Ongiini oshiholelwa shomuyapostoli Paulus tashi tu kwathele tu kale hatu tifuka mokuuvitha kwetu?

¹² Otwa pumbwa okukala hatu tifuka uuna tu li muukalele. Ohatu tsakaneke aantu ye na omaitaalo niikala ya yoolokathana, mboka ya za momaputuko gi ili no gi ili. Omuyapostoli Paulus okwa li ha tifuka, notatu vulu okwiilonga ko sha koshiholelwa she. Jesus okwa li a langeke po Paulus e li “omutumwa mokati kaapagani.” (Rom. 11:13) Onkee ano, Paulus okwa li a uvithile Aajuda, Aagreka, aantu mboka ya longwa, aanamukunda, aakwanepangelo naakwaniilwa. Opo a adhe omitima dhaantu ayehe mboka ya yoolokathana, Paulus okwa li a ‘ningi ashihe shoka ta vulu omolwaayehe.’ (1 Kor. 9:19-23) Okwa li ha gandja eitulomo komihoko, komaputuko nokwaashoka aapulakeni ye yi itaala, opo nduno ta popi nayo momukalo ngoka tagu ya ningitha ya kale ye na ohokwe muKalunga. Natse otatu vulu okuhwepopala mokuuvitha ngele otwa kala hatu tifuka, e tatu kambadhala okudhiladhila kutya omomukalo guni dhingi tatu vulu okukwathela omuntu kehe.

13. Oshiponga shini sha popiwa mAakorinto yotango 8:9, tatu vulu okuyanda, ngele ohatu simaneke omataloko gayalwe?

¹³ Okukala nondjele ohaku tu kwathele wo tu simaneke omataloko gayalwe. Pashiholelwa, yamwe yomaamwameme oye hole okwiimumamuma omanga yalwe kaaye shi hole. Aakriste yamwe ohaya nu iikunwa yoalkoholi pandjele, ihe yamwe oya tokola kutya momakana gawo itayi ende mo. Aakriste ayehe oya hala uukolele wu li nawa, ihe ohaya hogolola omikalo dhokupangwa dha yoolokathana. Ngele otwa kala hatu dhiladhila kutya otu li aluhe mondjila, nohatu kambadhala okwiitaalitha aamwatate naamwameme ya ninge shoka hatu ningi, otatu vulu okupundukitha yalwe nokweeta etopoko. Oshinima sha tya ngawo itatu ka kala nando twa hala oku shi ninga! (Lesha 1 Aakorinto 8:9; 10:23, 24) Natu taleni kiiholelwa iyali mbyoka tayi tu ulukile nkene tu na okutula miilonga omakotampango gopamanyolo ngoka taga vulu oku tu kwathela tu kale nondjele notu kaleke po ombili.

14. Omakotampango gomOmbiimbeli geni tu na okukaleka momadhiladhilo ngele tashi ya pokuzala nokwiiyopaleka momutse?

 ¹⁴ Okuzala nokwiiyopaleka. Jehova ine tu lombwela shoka tu na okuzala, ihe okwe tu pa omakotampango ngoka tu na okulandula. Otwa pumbwa okuzala momukalo tagu simanekitha Kalunga, mokukala nondjele, eifupipiko nosho wo okuzala oonguwo “dhi shi okutalwa.” (1 Tim. 2:9, 10; 1 Pet. 3:3) Onkee ano, katu na okugandja eitulomo lya pitilila kutse, mokuningitha yalwe ya kale owala otse taya tala. Omakotampango gOmbiimbeli ohaga kwathele aakuluntugongalo kaaya tule po omithikampango dhawo yene dhi na ko nasha nokuzala nokwiiyopaleka momutse. Pashiholelwa, aakuluntugongalo megongalo limwe oya li ya hala okukwathela aamwatate aagundjuka mboka ya li haya kululwa omafufu omafupi go inaga kamulwa ngaashi aagundjuka yopuyo. Aakuluntugongalo oya li ye ya kwathele ngiini nopwaahe na okutula po omithikampango dhayo yene? Omutonatelishikandjo okwa pe aakuluntugongalo mboka ya lombwele aamwatate mboka kutya: “Ngele owu li komutuni, ihe aapulakeni otaya gandja unene eitulomo kunkene to monika, ihe hakwaashoka to popi, osha yela kutya opu na epuko mokuzala nomokwiiyopaleka kwoye.” Elombwelo ndyoka olya li lya kwathele aagundjuka mboka naakuluntugongalo ya li ya tula po omithikampango dhawo yene. d

15. Oompango nomakotampango geni gomOmbiimbeli hage tu kwathele, uuna tatu ningi omatokolo ge na ko nasha nuukolele wetu? (Aaroma 14:5)

¹⁵ Okusila oshimpwiyu uukolele wetu. Omukriste kehe oku na okutokola nkene e na okusila oshimpwiyu uukolele we. (Gal. 6:5) Ngele Aakriste otaya hogolola epango lyopaunamiti, oye na okuvulika kekotampango li na ko nasha nokuyanda okutulwa ombinzi nosho wo uumpulile. (Iil. 15:20; Gal. 5:19, 20) Miinima yilwe  oye na okutokola kutya epango lini taya ka taamba ko. Yamwe ohaya ka konga owala epango lyopaunamiti koondohotola, omanga yalwe haya longitha omapango galwe. Kutya nduno otu uvitile ngiini epango lyopaunamiti lyontumba, otu na okusimaneka uuthemba waamwatate naamwameme wokuninga omatokolo gawo yene ngele tashi ya puukolele wawo. Onkee otu na okudhimbulukwa iitsa mbika ine: (1) Uukwaniilwa waKalunga owo owala tawu ka eta eyaludho lyothiluthilu notali kalele. (Jes. 33:24) (2) Omukriste kehe oku na okukala “a kola” nenge a tompwa kutya oshike tashi mu opalele. (Lesha Aaroma 14:5.) (3) Ihatu pangula yalwe nenge tu ninge oshinima shoka tashi ya pundukitha. (Rom. 14:13) (4) Aakriste ohaya ulike ohole noihaya pititha emanguluko lyawo lyokuninga omatokolo gopaumwene komeho yuukumwe wegongalo. (Rom. 14:15, 19, 20) Ngele otwa kaleke iitsa mbika momadhiladhilo, otatu ka kaleka po ekwatathano lyetu lya kola naamwatate naamwameme notatu ka humitha komeho ombili megongalo.

16. Ongiini omukuluntugongalo ta vulu okuulika kutya oku na ondjele mokuungaunga naakuluntugongalo ooyakwawo? (Tala wo omathano.)

¹⁶ Aakuluntugongalo oye na okutula po oshiholelwa oshiwanawa mokukala ye na ondjele. (1 Tim. 3:2, 3) Pashiholelwa, omukuluntugongalo ke na okutegelela omaetopo ge ogo ga kale haga landulwa aluhe, molwaashoka owala oye omukuluntu e vule aakuluntugongalo ooyakwawo. Oku shi kutya ombepo yaJehova otayi vulu okwiinyengitha oshilyo kehe sholutu lwaakuluntugongalo shi popye sha, shoka tashi ke ya kwathela ya ninge omatokolo ge li pandunge. Ngele aakuluntugongalo oyendji otaya tsu kumwe netokolo ndyoka kaali li ompinge nomakotampango gOmbiimbeli, aakuluntugongalo mboka ye na ondjele otaya ka ambidhidha etokolo ndyoka, nokuli nando oye wete etokolo lilwe olyo li li nawa.

17. Uuwanawa wuni hatu mono ngele otu na ondjele?

¹⁷ Ngele otu na ondjele ohatu mono uuwanwa momikalo odhindji. Ohatu kala tu na ekwatathano ewanawa naamwatate naamwameme, negongalo ohali kala li na ombili. Ohatu nyanyukilwa omaukwatya nomaputuko ga yoolokathana ngoka ge li mokati koshigwana shaJehova sha hangana. Shoka sha simanenena, otwa nyanyukwa sho tu shi kutya otatu holele Jehova, Kalunga ketu ngoka e na ondjele.