Lwanima sho nda kala kaandi na we omalimbililo e tandi tameke okukokola ondjila, onkalamwenyo yandje oya lunduluka momukalo moka nda li inaandi tegelela. (Ef. 3:20) Ihe otashi vulika wu ipule kutya osha ende ngiini? Nandi mu kuthile ko okuza petameko.

Onda valelwa moBerlin, muNdowishi, konima yoomwedhi oonshona sho Iita Iitiyali yUuyuni ya tameke mo 1939. Mo 1945, sho iita yi li pokuhula, oshilando shaBerlin osha ponokelwa koondhila tadhi umbu oomboma. Pethimbo lyoshiponokela shoka, omapandaanda getu oga li ge li kohi yomitopelo dhoomboma. Onkee ano, ngame noyaandjetu otwa li twa ka holama mehala lyontumba. Omolwegameno lyetu, otwa ka ya ontuku kuErfurt, hoka kwa valelwa meme.

Meme okwa li lela a kongo oshili. Okwa kala nokulesha omambo gaafilosofi nokukonakona omalongelokalunga ogendji, ihe ka li a mbilipalelwa. Mo 1948, Oonzapo dhaJehova mbali odhe ya oku tu talela po pegumbo. Meme okwa ti nadhi ye mo, nokwa kala te dhi pula omapulo kepaya taku zi. Konima owala yowili lwaampono, okwe tu lombwele nokamwamemekadhona a ti: “Onda mona oshili!” Nziya konima yaashono, ngame, okamwamemekadhona nameme otwa tameke okuya kokugongala muErfurt.

Mo 1950, otwa shuna koshilando Berlin, hoka twa ka kala megongalo lyaBerlin-Kreuzberg. Otwa tembukile ishewe kehala lilwe moshilongo omo tuu moka, e tatu kala hatu gongala kegongalo lyaBerlin-Tempelhof. Mokweendela ko kwethimbo, meme okwa ninginithwa, ihe ngame onda kala tandi kakadhala. Omolwashike?

Kanda li naanaa tandi ningi ehumokomeho, molwaashono onda li ndi na ohoni. Nonando onda kala tandi yi miilonga yokuuvitha, uule womimvo mbali kanda li nda vulu okuuvithila omuntu. Onkalo osho ya ka lunduluka, sho nda tameke okweendathana naamwatate naamwameme mboka aalaadhi naadhiginini kuJehova. Yamwe oya kala nokwiidhidhimika mookamba dhoonkwatwa dhaNazi nomoondholongo dhaNdowishi  lyokUuzilo. Yamwe oya li ya tula emanguluko lyawo moshiponga, mokufala iileshomwa meholamo kuNdowishi lyokUuzilo. Oshiholelwa shawo osha li sha guma ndje noonkondo. Onkene onda li nda dhiladhila kutya ngele yo oya vula okutula oomwenyo dhawo nemanguluko lyawo moshiponga, molwaJehova naamwatate, nangame otandi vulu okuninga po sha, ndi kale kaandi na we naanaa ohoni.

Onda tameke okukondjitha uunkundi wandje wokukala ndi na ohoni, sho nda kutha ombinga moshikonga shi ikalekelwa shokuuvitha, mo 1955. Montumwafo ndjoka ya li mokafo haka ithanwa Informant, * omumwatate Nathan Knorr okwa li a tseyitha kutya oshikonga shoka, osho shimwe shomiikonga iinene mbyoka inaayi ningwa nando onale mehangano. Okwa li a ti kutya ngele aauvithi ayehe oya kutha ombinga, “otatu ka mona iizemo iiwanawa miilonga yokuuvitha omwedhi ngono, inaashi monika nando onale muuyuni.” Shoka osho lela sha ningwa! Inapu pita ethimbo ele, ondi iyapulile Jehova, e tandi ninginithwa pamwe natate nosho wo nokamwamemekadhona, mo 1956. Nziya konima yaashono, onda li ndi na okuninga etokolo lilwe lya simana.

Uule womimvo, onda kala ndi shi kutya ondi na okukokola ondjila, ihe onda kala tandi kakadhala. Tango, onda tokola okwiilonga okulanda nokulanditha iinima kondje yoshilongo. Konima yaashono, onda li nda hala okumona lela ontseyo nokukala nda pyokoka miilonga mbyoka. Onkene mo 1961, onda mono iilonga moHamburg, oshilando oshinene shaNdowishi shomatulilosikepa. Sho nda kala tandi gandja unene eitulomo kiilonga yandje, osha ningitha ndje owala ndi kale tandi kakadhala okuya miilonga yethimbo lyu udha. Oshike nda li ndi na okuninga po?

Onda pandula shili, sho Jehova a kala ta longitha aamwatate ya kwathele ndje ndi itulile po omalalakano gopambepo. Yamwe yomookuume kandje oya li ya tameke okukokola ondjila noya tulile ndje po oshiholelwa oshiwanawa. Shimwe ishewe, omumwatate Erich Mundt, ngoka a li mokamba yoonkwatwa, okwa li a ladhipike ndje ndi inekele muJehova. Okwa ti kutya aamwatate mboka a li nayo mokamba moka, mboka ya li yi inekela muyo yene, lwanima oya nkundipala pambepo. Ihe mboka ya kala yi inekela muJehova, oya tsikile okukala aadhiginini noya kala oongudhi megongalo.

Natango, omumwatate Martin Poetzinger, ngoka lwanima a ka ninga oshilyo shOlutuwiliki, okwa kala nokutsa omukumo aamwatate, ta ti: “Uulaadhi oshinima shongushu kaaku na we to vulu okukala wu na!” Sho nda tedhatedha koohapu ndhoka, onda etha po iilonga yandje nonda tameke okukokola ondjila muJuni 1963. Ndyoka olya li etokolo lya dhenga mbanda nda ninga! Konima yoomwedhi mbali, nokuli manga inaandi tameka okukonga po iilonga yimwe, onda li nda hiywa ndi ninge omukokolindjila i ikalekelwa. Konima yomimvo dhontumba, Jehova okwa yambeke ndje naashoka nda li inaandi tegelela. Onda li nda hiywa ndi ka hite ongundu onti-44 kOsikola yaGilead.

Oshiilongomwa sha simanenena shoka nda li ndi ilongo, unene tuu komumwatate Nathan Knorr naLyman Swingle, osho kutya: “Ino teka omukumo nziya moshinakugwanithwa shoye.” Oya li ye tu ladhipike tu pondole moshinakugwanithwa shetu. Omumwatate Knorr okwa ti: “Okushike to ka gandja eitulomo? Okoonyata, okoombakiteli nokondjala? Nenge oto ka gandja eitulomo komiti, koongala nokiipala ya nyanyukwa? Ilonga okukala wu hole aantu!” Esiku limwe, sho omumwatate Swingle a li ta yelitha kutya omolwashike aamwatate yamwe haya teka omukumo mbala, okwa li ta hukula lela ehodhi. Oha ningi owala a popi ye a mwena po. Shoka osha li sha gumu ndje lela komutima, nonda li nda tokola kaandi yemateke Kristus naamwahe aadhiginini. — Mat. 25:40.

Sho twa pewa iinakugwanithwa yetu, Aabetel yamwe oya li ya hala okuuva kutya otwa tuminwa peni. Oya li ya popi uuwanawa woshinakugwanithwa kehe, sigo nda ti: “Onda tuminwa koKongo (Kinshasa).” Oya mwena po, e taya ti: “Uh, koKongo! Jehova na kale pamwe nangoye!” Pethimbo ndyoka, moKongo (Kinshasa) omwa li omalugodhi nomadhipago. Ihe onda kala nokudhiladhila kombinga yaashoka ndi ilongo kosikola. MuSeptemba 1967, konima owala sho nda piti Osikola yaGilead,  ngame, omumwatate Heinrich Dehnbostel nomumwatate Claude Lindsay, otwa tuminwa koKinshasa, oshilandopangelo shaKongo.

Konima sho twa thiki moKinshasa, otwi ilongo Oshifulaanisa uule woomwedhi ndatu. Opo nduno otwa yi koLubumbashi, shoka sha li hashi ithanwa nale Elisabethville, popepi noongamba dhaZambia muumbangalantu waKongo. Otwa ka kala hatu zi megumbo lyaatumwa, ndyoka lya li pondingandinga yoshilando.

Molwaashono oshitopolwa oshinene shaLubumbashi kasha li sha uvithilwa, otwa li twa nyanyukwa okuuvithila mo tango. Nziya, otwa mono aakonakonimbiimbeli oyendji, mboka twa ka kala itaatu vulu okukonakona nayo ayehe. Otwa li wo twa uvithile aakwanepangelo naapolisi. Oyendji oya li ya ulike kutya oya simaneka Oohapu dhaKalunga niilonga yetu yokuuvitha. Aantu oyendji oya li haya popi Oshiswahili. Onkene ngame naClaude Lindsay, otwi ilongo wo elaka ndyoka. Nziya konima yaashono, otwa tuminwa kegongalo lyOshiswahili.

Nonando otwa kala tatu nyanyukilwa iimoniwa oyindji iiwanawa, otwa li wo twa taalelwa komashongo. Olundji otwa kala tatu idhidhimikile aakwiita ya kolwa ya homata oondjembo nenge aapolisi aakwanyanya, mboka ya li haye tu tamanekele iinima mbyoka inaatu ninga. Oshikando shimwe ongundu yaapolisi ya homata, oye tu ponokele pegumbo lyaatumwa manga twa li tu li mokugongala, e taye tu fala kositaasi yopolisi. Manga inaaye tu etha tu ye, oye tu kaleke twa kuutumba pevi sigo opomulongo gwuusiku.

Mo 1969, onda tuminwa miilonga yuuyendi. Miilonga mbyoka, omathimbo gamwe onda li handi ende iinano iile momanono nomomwiidhi omule,  iinima mbyoka ya ha muAfrika. Momukunda gumwe, esiku limwe manga nda kotha, kohi yombete yandje okwa li ondjuhwa nuuyuhwena wayo. Itandi shi dhimbwa, sho ya li ya pendula ndje moomposi koongulasha, sho ya kala tayi kokola. Ohashi nyanyudha ndje wo uuna tandi dhiladhila koongulohi ndhoka twa li hatu kala twa hungila naamwatate tu li pomulilo, tatu popi kombinga yoshili yOmbiimbeli.

Limwe lyomomashongo omanene ngoka twa li twa taalela, okuungaunga naamwatate aaniifundja, mboka ya li taya ambidhidha oshihomo shedhina Kitawala. * Yamwe yomuyo oya li ya ninginithwa e taya ningi nokuli aakuluntugongalo. Oyendji ‘yomiifakufaku’ mbyoka, oya li ya anekwa pomutenya kaamwatate naamwameme aadhiginini. (Jud. 12) Pehulilo, Jehova okwa yeleke egongalo lye, aantu oyendji e taye ya moshili.

Mo 1971, onda li nda tuminwa koshitayimbelelwa moKinshasa, hoka nda li handi tonatele iilonga ya yoolokathana ngaashi mOshikondo shOkuungaunga nOmapulo, oombestelinga dhiileshomwa nomOshikondo shIilonga. MoBetel ondi ilonga mo nkene iilonga yetu hayi unganekwa moshilongo oshinene sha nika uushayi. Omathimbo gamwe, iinima mbyoka twa li hatu tumu komagongalo, oya li hayi pula oomwedhi opo yi thike ko. Oya li hayi tumwa nondhila, e tayi ka helulilwa ishewe moowato ndhoka lwanima hadhi ka hakela uule wiiwike miimeno yomomeya. Nonando opwa li omashongo ngoka nagalwe, iilonga oya li hayi gwanithwa po.

Osha li sha kumwitha ndje okumona nkene aamwatate haya unganeke ku ningwe iigongi yoshitopolwa iinene, nonando opwa li owala oshimaliwa oshishona. Oya li haya ningi omituni taya longitha iiyanda, haya longitha omanenge ya dhike ehala ndyoka noku ga ninga iihampi, opo ya kuutumbe ko. Oya li wo haya ningi itaafula taya longitha iiyala ya ningwa momanenge. Oya li natango haya longitha iipeta yomiti pehala lyoomboha. Aluhe onda li handi kala nda kuminwa oonkambadhala dhaamwatate naamwameme mboka. Osha ningitha ndje ndi kale ndi ya hole unene. Onkee ano, konima sho nda pewa oshinakugwanithwa oshipe, onda kala nde ya yuulukwa noonkondo!

Mo 1974, onda li nda tuminwa koshitayimbelewa shaKenya, moshilando Nairobi. Otwa li tu na oshindji okulonga, oshoka oshitayimbelewa shaKenya osha li hashi ambidhidha iilonga yokuuvitha miishiindalongo omulongo, moka muyimwe iilonga yetu ya li yi indikwa. Onda li nda tuminwa lwiikando ndi ka talele po kiilongo mbyoka, unene tuu kuEtiopia, hoka aamwatate ya li taya li taya pi, oshoka oya li taya hepekwa noonkondo. Oyendji yomuyo oya li taya ungaungiwa nayo nayi, ya tulwa moondholongo nayamwe oya li nokuli ya dhipagwa. Nonando ongawo, oya li yi idhidhimike, oshoka oya li ye na ekwatathano ewanawa naJehova nosho wo nooitaali ooyakwawo.

Mo 1980, onkalamwenyo yandje oya lunduluka, sho nda hokana Gail Matheson, ngoka a za koKanada. Otwa li mongundu yimwe naye kOsikola yaGilead. Otwa kala nokukwatathana okupitila moontumwafo. Gail okwa li a tuminwa koBolivia. Konima yomimvo 12, otwa ka tsakanena ishewe moNew York. Nziya konima yaashono, otwa hokana moKenya. Onda pandula noonkondo sho nde mu hokana, oshoka oha tala ko iinima ngaashi Jehova noha kala a gwanenwa kwaashoka e na. Sigo onena oku li omukwathi omwaanawa nakuume omunahole.

Mo 1986, ngame naGail otwa li twa yi miilonga yuutonatelishikandjo, ihe pethimbo opo tuu mpoka, onda li wo oshilyo shOkomitiye yOshitayimbelewa. Onda li handi ka talela po kiilongo mbyoka yi li kohi yoshitayimbelelwa shaKenya, ndi li omutonatelishikandjo.

Otandi dhimbulukwa nawa sho nda li tandi ningi omalongekidho goshigongi shoshitopolwa moAsmara (moEritrea) mo 1992, sho iilonga yetu ya li yi indikwa moshitopolwa shoka. Shiyemateka, ehala ndyoka twa li twa mono kalya li tali monika nawa kombanda, nomeni ihamu popiwa we ngaa ne. Mesiku lyoshigongi, onda li nda kumwa kunkene aamwatate ya ningi nawa ehala ndyoka, opo tu vule okulongela mo Jehova. Aamwatate  naamwameme oyendji, oya li ya etelele iinima yokumonikitha mo nawa mehala moka. Otwa li twa tyapula lela oshigongi shoka, notwa li po 1 279.

Onkalamwenyo yetu oya li ya lunduluka lela sho tu li miilonga yuuyendi, oshoka otwa kala hatu zi momahala gi ili nogi ili. Oshikando shimwe, otwa li twa kala megumbo lyaayenda lyondilo popepi nefuta. Omanga pompito yimwe, otwa li twa kala mokambashu mokamba yaaniilonga, nuundjugo owa li lela popepi, oometa owala 100. Kutya nduno otwa kala tatu longele peni, shoka twa lenga unene osho kutya otwa li hatu kala twi ipyakidhila tatu longo pamwe naauvithi nonaakokolindjila aalaadhi. Sho twa pewa oshinakugwanithwa shimwe, otwa li tu na okuthiga po ookuume yetu oyendji, mboka twa li tatu ke ya yuulukwa noonkondo.

Okuza mo 1987 sigo 1992, iilonga yetu oya li ya pitikwa paveta miilongo yontumba mbyoka yi li kohi yoshitayimbelewa shaKenya. Oshizemo, miilongo mbyoka omwa li mwa tungwa oombelewa dhetu. Mo 1993, otwa li twa tuminwa tu ka longele kombelewa yomoAddis Ababa moEtiopia, moka iilonga yetu ya kala tayi longwa mehalomo omimvo odhindji, ihe ngashingeyi oya li ya pitikwa paveta.

Jehova okwa yambeka iilonga yetu moEtiopia. Aamwatate naamwameme oyendji oya li ya kutha uukokolindjila. Okuza mo 2012, omumvo kehe aauvithi ye vulithe poopelesenda 20, oya kala aakokolindjila yondjigilile. Shimwe ishewe, oosikola dhetu ndhoka dha longekidhwa kehangano, odha kala tadhi gandja edheulo ndjoka lya pumbiwa. Opwa li wo pwa tungwa Iinyanga yUukwaniilwa yi vulithe 120. Mo 2004, uukwanegumbo waBetel owa li wa tembukile kehala epe, ndyoka lya li lya tungilwa kumwe nOshinyanga shIigongi, shoka nasho sha li elalekonuuyamba.

Uule womimvo, ngame naGail otwa panga uukuume wopothingo naamwatate naamwameme oyendji moEtiopia. Otwa li tu ya hole noonkondo, molwaashoka oya li ye na olukeno naanahole. Ngashingeyi uukolele wetu otawu nyangwanyangwa, shoka shetu ningitha tu tuminwe koshitayimbelewa shaEuropa lyOpokati. Huka ohatu silwa nawa oshimpwiyu, ihe nonando ongawo, otwa yuulukwa noonkondo ookuume ketu yokoEtiopia.

Otwa mona nkene Jehova a kala nokukwathela, opo omwaalu gwaauvithi gu indjipale. (1 Kor. 3:6, 9) Pashiholelwa, sho nda uvithile tango Aarwanda mboka haya longo momina yongopolo moKongo, moRwanda kamwa li aauvithi. Ihe ngashingeyi omu na aamwatate naamwameme ye vulithe 30 000. Mo 1967, moKongo (Kinshasa) omwa li aauvithi 6 000 lwaampono. Ngashingeyi omu na aauvithi 230 000 lwaampono, nopEdhimbuluko lyomo 2018 opwa li aantu ye vulithe pomiliyona. Miilongo ayihe mbyoka ya li nale hayi tonatelwa koshitayimbelewa shaKenya, omwaalu gwaauvithi ogwa londa gu vulithe 100 000.

Uule womimvo 50 dha ka pita, Jehova okwa longitha aamwatate ya yoolokathana ya kwathele ndje ndi ye miilonga yethimbo lyu udha. Nonando ohoni opo ngaa yi li natango, ondi ilonga okukala ndi inekela muJehova. Okulongela moAfrika, okwa kwathela ndje ndi kale ndi na eidhidhimiko nokukala nda gwanenwa. Ngame naGail otwa simaneka aamwatate naamwameme mboka haya yakula aayenda, hayi idhidhimikile omaupyakadhi omanene noyi inekela muJehova. Onda pandula Jehova, omolwesilohenda lye. Jehova okwa yambeka ndje lela naashoka kaanda li nda tegelela. — Eps. 37:4.