1. David okwa li e uvitile Jehova ngiini, naashoka oshe mu inyengitha a ninge shike?

OMUKWANIILWA DAVID okwa nyola a ti: “Omuwa oye omunene a gwana okusimanekwa.” (Eps. 145:3) Okwa li e hole Jehova, nohole ndjoka oye mu inyengitha e mu tange “megongalo.” (Eps. 22:22; 40:5) Osha yela kutya nangoye owu hole Jehova, nowu uvite ngaashi David ngoka a popi ta ti: “Omuwa, Kalunga katatekulu Jakob, hambelelwa aluhe sigo aluhe.” — 1 Ondjal. 29:10-13.

2. (a) Ongiini tatu vulu okutanga Jehova? (b) Yamwe oye na uupyakadhi wuni, notatu ka kundathana shike?

² Kunena, omukalo gumwe moka hatu tanga Jehova, omokugandja omatyokosha pokugongala. Nonando ongawo, aamwatate naamwameme yamwe, ohaye shi mono oshidhigu lela oku shi ninga. Ohaya kala ya hala okugandja omatyokosha pokugongala, ihe uumbanda ohawu ya imbi. Oshike taya vulu okuninga, opo ye wu sinde? Iinima yini tayi vulu oku tu kwathela atuheni, tu kale hatu gandja omatyokosha taga tsu omukumo pokugongala? Manga inaatu yamukula omapulo ngono, natu kundathaneni tango omatompelo gane ga simana kutya omolwashike tu na okukala hatu gandja omatyokosha pokugongala.

3-5. (a) Ngaashi sha yelithwa mAahebeli 13:15, mbela omolwashike hatu gandja omatyokosha pokugongala? (b) Mbela otu na okugandja omatyokosha ga faathana? Shi yelitha.

³ Atuheni Jehova okwe tu pa uuthembahenda woku mu tanga. (Eps. 119:108) Okugandja omatyokosha pokugongala, oku li oshitopolwa ‘shomayambo gokuhambelela’ Kalunga, nokapu na ngoka ta vulu oku ga gandja pehala lyetu. (Lesha Aahebeli 13:15.) Mbela Jehova ohe tu pula tu gandje omayambo nenge omatyokosha ga faathana? Hasho dha li!

 ⁴ Jehova oku shi kutya ihatu ningi iinima momukalo gwa faathana notu li moonkalo dha yoolokathana. Onkee ano, oha tala ko omayambo ngoka hatu mu pe kutya oge na ongushu. Dhiladhila komayambo ngoka a li a taamba ko okuza kAaisraeli. Aaisraeli yamwe oya li haya vulu oku mu pa onzi nenge oshikombo. Ihe Omuisraeli ngoka a hepa, okwa li ha gandja “oonguti mbali, nenge uungutyona uyali.” Ngele ka li ta vulu okugandja uungutyona uyali, okwa li ha gandja “omakopi gaali guusila womunziya.” (Lev. 5:7, 11) Uusila kawa li wu na ondilo, ihe Jehova okwa li ha kala a pandula eyambo ndyoka, shampa owala “uusila womunziya.”

⁵ Kalunga ketu omunahenda, nokunena osho ha kala e uvite ngaaka. Uuna tatu gandja omatyokosha pokugongala, iha kala a tegelela tu kale omanyakwa mokupopya ngaashi Apollos nenge tu tompe aantu ngaashi Paulus. (Iil. 18:24; 26:28) Shoka Jehova a hala tu ninge, okugandja omatyokosha omawanawa ngaashi tatu vulu. Oto dhimbulukwa omuselekadhi ngoka a li a gandja omayambidhidho guupeni uyali? Okwa li e na ongushu momeho gaJehova, oshoka okwa gandja ashihe shoka a li e na. — Luk. 21:1-4.

6. (a) Shi ikolelela kAahebeli 10:24, 25, omatyokosha ngoka hatu uvu pokugongala, otaga vulu oku tu guma ngiini? (b) Ongiini to vulu okuulukila yalwe olupandu, omolwomatyokosha gawo ngoka hage ku tsu omukumo?

⁶ Ohatu tsaathana omukumo, uuna tatu gandja omatyokosha. (Lesha Aahebeli 10:24, 25.) Atuheni ohatu nyanyukilwa okuuva omatyokosha gi ili nogi ili pokugongala. Omatyokosha ngoka ongaashi ngoka haga gandjwa kaanona, taga zi komutima nomapu. Ohatu tsuwa wo omukumo, uuna gumwe ta gandja etyokosha a nyanyukwa kombinga yoshili ndjoka i ilongo. Ohatu pandula natango mboka haya gandja omatyokosha ‘nomukumo,’ nonando oye na ohoni nenge opo tayi ilongo elaka lyetu. (1 Tes. 2:2) Ongiini tatu vulu oku ya ulukila olupandu, omolwoonkambadhala dhawo? Otatu vulu oku ya pandula konima yokugongala. Omukalo gulwe ishewe tatu vulu oku ya ulukila olupandu lwetu, omokugandja omatyokosha. Kungawo, hatse owala tatu tsuwa omukumo, ihe natse otatu tsu wo yalwe omukumo. — Rom. 1:11, 12.

7. Okugandja etyokosha ohaku tu etele ngiini uuwanawa?

⁷ Ohashi tu etele uuwanawa, uuna tatu gandja omatyokosha. (Jes. 48:17) Ngiini mbela? Oshinima shotango, ngele otwa hala tu ka gandje  etyokosha, otu na okwiilongekidhila nawa okugongala. Okwiilongekidha nawa, ohaku tu kwathele tu uve ko muule Oohapu dhaKalunga. Oku dhi uva ko muule, otaku ke tu kwathela tu tule miilonga shoka tatu ilongo. Oshitiyali, otatu ka nyanyukilwa okugongala shi vulithe nale, molwaashoka natse otatu kutha wo ombinga muko. Oshititatu, molwaashoka okugandja etyokosha ohashi pula oonkambadhala, olundji lwanima ohatu ka dhimbulukwa shoka twa popya.

8-9. (a) Ngaashi sha popiwa muMaleaki 3:16, mbela sho to dhiladhila Jehova oha kala e uvitile ngiini omatyokosha getu? (b) Uupyakadhi wuni tashi vulika yamwe ya kale ye na?

⁸ Ohatu nyanyudha Jehova, uuna tatu popi kombinga yeitaalo lyetu. Otatu vulu okukala nuushili kutya Jehova oha pulakene kutse, nohe tu pandula noonkondo, sho hatu ningi oonkambadhala tu gandje omatyokosha pokugongala. (Lesha Maleaki 3:16.) Ohe tu ulukile olupandu lwe moku tu yambeka, uuna tatu kambadhala twa mana mo tu mu nyanyudhe. — Mal. 3:10.

⁹ Osha yela kutya otu na omatompelo omawanawa gokugandja omatyokosha pokugongala. Nonando ongawo, yamwe otashi vulika haya kala ya tila okuganeka. Ngele osho ho kala wu uvite ngawo, ino shuna omutse miipeta. Natu ka kundathaneni kombinga yomakotampango gamwe gopaMbiimbeli, iiholelwa yimwe nosho wo iinima yimwe mbyoka tayi vulu oku tu kwathela atuheni, tu kambadhaleni okugandja omatyokosha shi vulithe nale.

10. (a) Oyendji yomutse otu na uumbanda washike? (b) Ngele oho kala wa tila okugandja etyokosha, otashi vulika wu na uukwatya wuni uuwanawa?

¹⁰ Mbela oho kala to dhekweta kehe ethimbo wa hala okugandja etyokosha? Ngele osho, hangoye awike. Uushili owo kutya oyendji yomutse ohatu kala twa tila, uuna tatu gandja omatyokosha. Opo wu kondjithe uumbanda mboka, tango owa pumbwa okumona kutya oshike hashi wu etitha. Mbela oho kala wa tila wu dhimbwe shoka wa hala okupopya nenge wu gandje etyokosha lya puka? Mbela oho kala to ipula unene kutya etyokosha lyoye kali shi ewanawa oku li yelekanitha nogayalwe? Odhoshili kutya uumbanda mboka  otawu vulu okukala endhindhiliko ewanawa. Ohawu ulike kutya ngoye omwiifupipiki nowa tala ko yalwe ye ku vule. Uukwatya mboka Jehova oku wu hole. (Eps. 138:6; Fil. 2:3) Ihe Jehova okwa hala wo wu kale to mu tanga nokutsa omukumo aamwatate naamwameme pokugongala. (1 Tes. 5:11) Jehova oku ku hole note ke ku pa omukumo ngoka wa pumbwa.

11. Omanyolo geni taga vulu oku tu kwathela?

¹¹ Natu taleni komanyolo gamwe ngoka taga vulu oku tu kwathela. Ombiimbeli otayi ti kutya atuheni ohatu ningi omapuko mwaashoka tatu popi nomomukalo moka tatu shi popi. (Jak. 3:2) Jehova nosho wo aamwatate naamwameme inaya tegelela tu kale twa gwanenena. (Eps. 103:12-14) Oye li uukwanegumbo wetu noye tu hole. (Mark. 10:29, 30; Joh. 13:35) Oye shi kutya omathimbo gamwe momatyokosha getu ohatu kwatele mo iinima mbyoka kaatwa li twa hala okupopya.

12-13. Oshike tatu ilongo koshiholelwa shaNehemia noshaJona?

¹² Dhiladhila kiiholelwa yimwe yomOmbiimbeli, mbyoka tayi vulu oku ku kwathela wu ungaunge nuumbanda. Natu taleni koshiholelwa shaNehemia. Okwa li ha longo muuwa womukwaniilwa omunankondo. Nehemia okwa li a yemata, molwaashoka okwa li a uvu kutya omadhingililokuma gaJerusalem oga kumunwa po, nomiyelo dhasho odha fikwa po. (Neh. 1:1-4) Dhiladhila kunkene Nehemia a li a tila, sho a pulwa komukwaniilwa e mu lombwele kutya omolwashike oshipala she shi na oshizimbi. Nehemia okwa galikana nziya, opo nduno te mu pe eyamukulo lye. Omukwaniilwa okwa kambadhala okukwathela oshigwana shaKalunga ngaashi ta vulu. (Neh. 2:1-8) Dhiladhila wo kombinga yaJona. Sho Jehova a li e mu pula a ka uvithile aantu yomuNinive, Jona okwa li a tila e ta fadhuka po a uka kehala lilwe. (Jona 1:1-3) Ihe lwanima, Jona okwa yi a ka uvithile Aaninive. Shoka e ya uvithile, oshe ya inyengitha yi itedhulule. (Jona 3:5-10) Oshiholelwa shaNehemia otashi tu longo nkene sha simana okugalikana, manga inaatu yamukula. KuJona otatu ilongo ko kutya Jehova ota vulu oku tu kwathela tu mu longele, nonando otu kale twa kwatwa kuumbanda shi thike peni. Odhoshili kutya okugandja omatyokosha pokugongala kaku shi okudhigu okuyelekanitha naJona ngoka a li e ku uvithila Aaninive.

¹³ Iinima yini tayi vulu oku ku kwathela wu gandje omatyokosha taga tsu omukumo pokugongala? Natu ka kundathaneni yimwe yomuyo.

14. Omolwashike tu na okwiilongekidhila nawa okugongala, nopethimbo lini tatu vulu oku shi ninga?

¹⁴ Ilongekidhila okugongala kehe. Ngele oho ilongekidhile nawa okugongala noho shi ningi komeho yethimbo, ito ka kala wa tila okugandja etyokosha. (Omayel. 21:5) Odhoshili kutya atuheni ihatu ilongekidhile okugongala pethimbo limwe. Pashiholelwa, omuselekadhi gumwe gwedhina Eloise, ngoka e na omimvo 80 nasha, oha tameke okwiilongekidha Oshungolangelo yokukonakonwa kuyele moshiwike. Ota ti: “Ohandi tyapula okugongala lela, uuna ndi ilongekidha komeho yethimbo.” Omumwameme Joy, ngoka ha longo okuza mOmaandaha sigo Etitano,  ohi ilongekidha Oshungolangelo mOlyomakaya. Okwa ti: “Uuna ndi ilongekidha mesiku ndyoka lya landula lyokugongala, ohashi kala oshipu kungame okudhimbulukwa shoka ndi ilongekidha.” Omukuluntugongalo gwedhina Ike, ngoka e li wo omukokolindjila, ota ti: “Ohandi mono oshipu kungame okwiilongekidha momukokomoko gwoshiwike, tandi kutha ko kashona nakashona, pehala lyoku yi ponokela poshikando.”

15. Ongiini to vulu okwiilongekidhila nawa okugongala?

¹⁵ Okwiilongekidhila nawa okugongala okwa kwatela mo shike? Aluhe kala ho galikana tango kuJehova e ku pe ombepo ondjapuki, manga inoo tameka. (Luk. 11:13; 1 Joh. 5:14) Opo ihe, to longitha ominute dhontumba wu ende mo moshikundathanwa. Tala koshipalanyolo, kuupalanyolo uushona, kiiholelwa nosho wo kiimpungu. Sho to konakona okatendo kehe, lesha omanyolo ngoka ge etwa mo ngaashi tashi vulika. Tedhatedha kuuyelele mboka, ngoye to gandja eitulomo kiitsa mbyoka wa hala oku ka yamukula. Ngele owi ilongekidha nawa, oto ka mona mo uuwanawa owundji notashi ka kala oshipu kungoye wu gandje etyokosha. — 2 Kor. 9:6.

16. Iilongitho yini tu na, nohatu yi longitha ngiini?

¹⁶ Ngele otashi wapa, longitha iilongitho yopaelektronika mbyoka twa pewa kehangano, melaka ndyoka wu shi. Jehova okwe tu pa iilongitho yopaelektronika, mbyoka tayi vulu oku tu kwathela tu ilongekidhile okugongala, okupitila mehangano lye. O-JW Library ohayi tu kwathele tu tape ko iileshomwa yokukonakonwa. Opo ihe, tatu vulu oku yi konakona, oku yi lesha nenge oku yi pulakena ethimbo kehe, kashi na nduno mbudhi kutya otu li peni. Yamwe ohaya longitha o-JW Library, ya konakone kiilonga nenge kosikola, uuna ye li pokafudho. Yamwe ohaye shi ningi wo, uuna ye li molweendo. O-Watchtower Library nosho wo ONGULUMAMBO MOINTANETA ohadhi shi ningitha oshipu lela tu konge uuyelele woshikundathanwa shoka twa hala okukonakona nawa.

17. (a) Omolwashike oshiwanawa okwiilongekidha omatyokosha ge vulithe pulimwe? (b) Owi ilonga mo shike mokavidio Ninga kuume kaJehova — Ilongekidha wu ka yamukule?

¹⁷ Ngele otashi wapa, ilongekidha omatyokosha gontumba moshikundathanwa kehe. Omolwashike? Omolwaashono haaluhe tashi vulika wu pewe ompito wu yamukule, uuna wa ganeke. Yalwe otashi vulika ya ganeke oshita, ihe omumwatate ngoka ta kwatele komeho otashi vulika a pe owala gumwe ompito. Opo okugongala ku pwe pethimbo, otashi vulika omumwatate a pe owala aantu yamwe ompito oyo ya yamukule. Onkee ano, shoka inashi ku uvitha nayi nenge shi ku teye omukumo. Ngele owi ilongekidha omatyokosha ge vulithe pulimwe, oto ka mona ompito wu yamukule. Momatyokosha goye, oto vulu okukwatela mo oku ka lesha enyolo. Ngele oto vulu, ilongekidha wo wu ka gandje omatyokosha niitya yoye mwene. *

18. Omolwashike tu na okugandja omayamukulo omafupi?

 ¹⁸ Omayamukulo goye naga kale omafupi. Olundji, omatyokosha ngoka omafupi nomapu okuuviwa ko, ogo unene haga tsu aantu omukumo. Onkene elalakano lyoye nali kale okugandja eyamukulo efupi. Kambadhala oku li gandja muule woosekonde 30 lwaampo. (Omayel. 10:19; 15:23) Ngele owa kala ho gandja omatyokosha uule womimvo odhindji dha ka pita, osha simana wu tule po oshiholelwa oshiwanawa, shoku ga kaleka omafupi. Ngele oho gandja omatyokosha omale noga kitakana, otashi vulika yalwe ya kale ya tila, taya dhiladhila kutya itaya vulu okugandja omatyokosha ga fa goye. Shimwe ishewe, ngele owa gandja etyokosha efupi, oto ka pa wo oyendji ompito ya yamukule. Ngele ongoye wa pewa tango ompito, etyokosha lyoye nali kale lya yela nolya ukilila epulo. Yanda okutotomona iitsa ayihe yi li mokatendo. Konima ngele enenedhiladhilo mokatendo lya kundathanwa, oto vulu okupopya iitsa yilwe mbyoka yi li mo. — Tala oshimpungu “ Oshike tandi vulu okuyamukula?”

19. Omukwatelikomeho ota vulu ngiini oku ku kwathela, ihe oshike wu na okuninga?

¹⁹ Tseyithila omukwatelikomeho kutya owa hala okuyamukula mokatendo keni. Ngele owa hala okuninga ngawo, lombwela omukwatelikomeho, manga okugongala inaaku tameka. Ngele ompito yoye yokuyamukula okatendo hoka oya thiki, ganeka muule nziya, opo omukwatelikomeho e ku mone.

20. Ongiini okugongala kwa fa iikulya mbyoka to li pamwe nookuume?

²⁰ Kala wa tala ko okugongala kwa fa iikulya mbyoka tamu li pamwe nookuume aawanawa. Natu tye nduno owa hiywa wu ka lye pamwe nokuume yamwe yomegongalo, e to pulwa wu longekidhe sha shokulya. Mbela oto ka ninga po shike? Otashi vulika wu kale wa tila kashona, ihe oto ka ninga ngaashi to vulu wu longekidhe sha shoka tashi vulu oku ka liwa kaantu ayehe. Sha faathana, Jehova ngoka he tu hiya kokugongala, ohe tu longekidhile iikulya iiwanawa lela. (Eps. 23:5; Mat. 24:45) Oha kala e tu nyanyukilwa, uuna twe eta omagano omashona, ngele ogo owala tatu vulu okugandja. Onkee ano, kambadhala okukala ho kutha ombinga pokugongala ngaashi to vulu. Kungawo, ito ka lya owala poshililo shaJehova, ihe owe etelela sha wo shoka to vulu okupa aamwatate naamwameme.