1. Gandja oshiholelwa kutya omolwashike tu na okulandula ewiliko lyaJehova.

 NATU tye andola owa kanena moshiheke. Omwa nika oshiponga, molwaashoka omu na iinamwenyo yomiihwa, uupuka niimeno yi na uuzigo, noto vulu wo okugwila momalambo. Ito ka kala tuu wa pandula ngele owa mono po gumwe ngoka e shi nawa mpoka pwa nika oshiponga noku ku galula po? Uuyuni mbuka owa faathana noshiheke. Owa udha iiponga mbyoka tayi vulu okuyona po uukuume wetu naJehova. Ihe otu na Omuwiliki a gwanenena, Jehova. Ohe tu wilike twaa ye miiponga notu thike hoka tu uka, ano tu ka mone omwenyo gwaaluhe muuyuni uupe.

2. Jehova ohe tu wilike ngiini?

² Jehova ohe tu wilike ngiini? Ohe shi ningi okupitila mOohapu dhe, Ombiimbeli. Ihe oha longitha wo aakalelipo ye yopantu. Pashiholelwa, oha longitha “omupiya omudhiginini nomunandunge,” e tu pe iikulya yopambepo mbyoka tayi tu kwathele tu ninge omatokolo gopandunge. (Mat. 24:45) Jehova oha longitha wo aalumentu ya pyokoka ye tu wilike. Pashiholelwa, aatonatelishikandjo nosho wo aakuluntugongalo ohaya gandja etsomukumo nomayele ngoka taga vulu oku tu kwathela tu idhidhimike momathimbo omadhigu. Inatu pandula tuu sho tu na ewiliko lya dhenga mbanda momasiku ngaka gahugunina! Ohali tu kwathele tu kale ookuume kaJehova notu tsikile okweenda mondjila ndjoka tayi fala komwenyo gwaaluhe.

3. Oshike tatu ka kundathana moshitopolwa shika?

³ Nokuli nonando ongawo, poompito dhimwe otashi vulika tu mone oshidhigu okulandula ewiliko lyaJehova, unene tuu ngele otatu li pewa kaantu inaaya gwanenena. Omolwashike mbela? Omayele ngoka twa pewa otashi vulika haago twa li twa hala nenge inaatu ga hokwa. Nenge tu wete ga fa kaage li pandunge e tatu thiki pehulithodhiladhilo kutya inaga za kuJehova. Pomathimbo  ngoka, opo unene hatu kala twa pumbwa okukala twa inekela kutya Jehova oye ha wilike oshigwana she nonokutya ngele otwa landula ewiliko lye, otashi ke tu etela omayambeko. Opo tu koleke einekelo lyetu, moshitopolwa shika otatu ka konakona (1) nkene Jehova a li a wilike oshigwana she pethimbo lyOmbiimbeli, (2) nkene he tu wilike kunena nonkene (3) tatu vulu okumona uuwanawa ngele otwa tsikile okulandula ewiliko lye.

NKENE JEHOVA A LI A WILIKE OSHIGWANA SHAISRAELI

4-5. Jehova okwa li a ulike ngiini kutya ota longitha Moses a wilike Aaisraeli? (Tala ethano lyokombanda.)

⁴ Jehova okwa li a langeke po Moses a wilike Aaisraeli okuza muEgipiti. Okwa li e ya pe uumbangi wa yela kutya oye a li te ya wilike okupitila muMoses. Pashiholelwa, okwa li e ya longekidhile oshikogo shomuzile omutenya noshomulilo uusiku. (Eks. 13:21) Moses okwa li a landula oshikogo, shoka sha li she mu wilike pamwe nAaisraeli sigo okEfuta Etiligane. Aaisraeli oya li ya tila taya dhiladhila kutya etangakwiita lyAaegipiti otali ya kondekele pEfuta. Oya li taya dhiladhila kutya Moses okwa ninga epuko, sho e ya eta pEfuta Etiligane. Ihe ka li a ninga epuko. Jehova okwa li e shi ningi nelalakano, sho a longitha Moses e ya fale hoka. (Eks. 14:2) Kalunga okwa li e ya hupitha momukalo omukumithi noonkondo. — Eks. 14:26-28.

⁵ Momukokomoko gwomimvo 40, Moses okwa li a tsikile okulandula oshikogo shomuzile, a wilike oshigwana shaKalunga okupita mombuga. a Jehova okwa li ha thikameke oshikogo kombanda yotenda yaMoses uule wethimbo, hoka Aaisraeli ayehe ya li ya vulu oku shi mona. (Eks. 33:7, 9, 10) Jehova okwa li a popi naMoses okuza moshikogo, na Moses okwa li a lombwele oshigwana shoka Jehova e mu lombwele. (Eps. 99:7) Aaisraeli oya li ya vulu okumona uumbangi owundji kutya Jehova okwa li ta longitha Moses e ya wilike.

6. Aaisraeli oya li ya inyenge ngiini kewiliko lyaJehova? (Numeri 14:2, 10, 11)

⁶ Shiyemateka, oyendji yomAaisraeli oya li ya tindi uumbangi wa yela kutya Jehova oye a li ta longitha Moses e li omukalelipo gwe. (Lesha Numeri 14:2, 10, 11.) Oya li ya tindi lwiikando kutya Jehova oye a li ta longitha Moses e ya wilike. Oshizemo, Aaisraeli mboka ye shi tindi kaya li ya pitikwa okuya mEvi lyEuvaneko. — Num. 14:30.

7. Gandja iiholelwa yaamboka ya li ya landula ewiliko lyaJehova. (Numeri 14:24) (Tala wo ethano.)

⁷ Ihe nando ongawo, Aaisraeli yamwe oya li ya landula ewiliko lyaJehova. Pashiholelwa, Jehova okwa ti: ‘Kaleb okwa inekele ndje.’ (Lesha Numeri 14:24.) Kalunga okwa li a laleke nuuyamba Kaleb, nokwa li nokuli e mu pitike a hogolole mpoka ta kala mevi lyaKaanan. (Jos. 14:12-14) Aaisraeli mboka ya li ya pitikwa okuya mEvi lyEuvaneko, oya li wo ya tula po oshiholelwa oshiwanawa sho ya landula ewiliko lyaJehova. Sho Josua, ngoka a landula Moses a ningi omuwiliki gwAaisraeli, Aaisraeli oye “mu simaneke mokukalamwenyo akuhe.” (Jos. 4:14) Oshizemo, Jehova okwe ya yambeke moku ya eta mevi ndyoka e ya uvanekela. — Jos. 21:43, 44.

8. Yelitha nkene Jehova a li a wilike oshigwana she pethimbo lyaakwaniilwa. (Tala wo ethano.)

⁸ Omimvo dha ka pita, Jehova okwa li a langeke po aatokolihapu ya wilike oshigwana she. Konima yaashono, pethimbo lyaakwaniilwa, Jehova okwa li a langeke po aahunganeki ya wilike oshigwana she. Aakwaniilwa aadhiginini oya li ya landula omayele ngoka ya pewa kaahunganeki. Pashiholelwa, omukwaniilwa David okwa li a taamba ko epukululo ndyoka a pewa komuhunganeki Natan.  (2 Sam. 12:7, 13; 1 Ondjal. 17:3, 4) Omukwaniilwa Jehosafat okwa li a landula ewiliko ndyoka a pewa komuhunganeki Jahasiel nokwa tsu omukumo oshigwana shaJuda shi ‘itaale shoka aahunganeki yaKalunga taye shi lombwele.’ (2 Ondjal. 20:14, 15, 20) Sho omukwaniilwa Hiskia a li muudhigu, okwa li a ka pula ekwatho komuhunganeki Jesaja. (Jes. 37:1-6) Ethimbo kehe aakwaniilwa ya landula ewiliko lyaJehova, okwa li he ya laleke nuuyamba, noshigwana she ohe shi gamene. (2 Ondjal. 20:29, 30; 32:22) Kehe gumwe okwa li e shi iwetele kutya Jehova ota longitha aahunganeki ya wilike oshigwana she. Nonando ongawo, oyendji yomaakwaniilwa nosho wo oshigwana, oya li ya tindi okupulakena kaahunganeki yaJehova. — Jer. 35:12-15.

NKENE JEHOVA A LI A WILIKE AAKRISTE YONALE

9. Jehova okwa li a longitha lye, a wilike Aakriste methelemumvo lyotango? (Tala wo ethano.)

⁹ Methelemumvo lyotango E.N., Jehova okwa li a toto po egongalo lyopaKriste. Okwa li a wilike ngiini Aakriste mboka yopetameko? Okwa li a langeke po Jesus e li omutse gwegongalo. (Ef. 5:23) Ihe Jesus ka li a popi nomulongwa kehe, te mu lombwele shoka e na okuninga. Okwa li a longitha aayapostoli nosho wo aakuluntu yomuJerusalem ya kwatele komeho. (Iil. 15:1, 2) Shimwe ishewe, aakuluntugongalo oya li ya langekwa po ya wilike egongalo. — 1 Tes. 5:12; Tit. 1:5.

10. (a) Aakriste oyendji yomethelemumvo lyotango oya li ya inyenge ngiini kewiliko ndyoka ya li ya pewa? (Iilonga 15:30, 31) (b) Omolwashike yamwe pethimbo lyOmbiimbeli ya li ya ndopa okundhindhilika mo aakalelipo yaJehova? (Tala oshimpungu “ Omolwashike yamwe ya li ya tindi uumbangi wa yela.”)

¹⁰ Aakriste yomethelemumvo lyotango oya li ya inyenge ngiini? Oyendji yomuyo oya li ya nyanyukwa okuvulika komalombwelo ngoka ya pewa. Odhoshili kutya oya li ya “nyanyukilwa etalaleko” ndyoka ya li ya pewa. (Lesha Iilonga 15:30, 31.) Ihe nando ongawo, ongiini Jehova a li a wilike oshigwana she momathimbo opo ga zi ko?

NKENE JEHOVA HA WILIKE OSHIGWANA SHE

11. Gandja oshiholelwa shoka tashi ulike nkene Jehova a li a wilike mboka ya li taya kwatele komeho pethimbo lyonale.

¹¹ Jehova ota tsikile okuwilika oshigwana she kunena. Okwa kala noku shi ninga okupitila mOohapu dhe nomOmwana, ngoka e li omutse  gwegongalo. Mbela otu wete ngaa uumbangi kutya Kalunga okwa kala wo nokulongitha aantu mboka ye mu lile po pethimbo lyetu? Eeno. Pashiholelwa, natu taleni komahumokomeho ngoka ga ningwa konima yomumvo 1870. Charles Taze Russell nooyakwawo oya li ya mono kutya omumvo 1914 ogwa li tagu ka kala omumvo omundhindhilikwedhi, ngele tashi ya pokudhikwa po kUukwaniilwa waKalunga. (Dan. 4:25, 26) Oye shi mono mo, molwaashoka oya li ya ningi omapekapeko mOmbiimbeli nokwiinekela kutya omahunganeko ngoka otaye ke ga mona sho taga gwanithwa. Mbela Jehova oye a li te ya wilike, sho taya ningi omapekapeko mOmbiimbeli? Osha yela kutya oye. Mo 1914, iiningwanima yuuyuni oya li ye shi koleke kutya Uukwaniilwa waKalunga owa tameka okupangela. Iita yoTango yUuyuni oya li ya tameke, e tayi landulwa komalega, nenge tu tye omikithi, omakakamo gevi nosho wo oondjala. (Luk. 21:10, 11) Jehova okwa li shili ta longitha aalumentu Aakriste aanamitima omiwanawa ya kwathele oshigwana she.

12-13. Omalongekidho geni ga li ga ningwa pethimbo lyIita Iitiyali yUuyuni, ge na ko nasha nokutamununa mo iilonga yokuuvitha nokulonga aantu?

¹² Natu taleni wo shoka sha li sha ningwa po pIita Iitiyali yUuyuni. Konima sho aamwatate mboka ye na oshinakugwanithwa koombelewa oonene ya konakona Ehololo 17:8, oya li ya mono kutya iita itayi ka kala po sigo opuArmagedon, ihe otayi ka hula e tapu kala ombili yopakathimbo, naashoka otashi ka ningitha iilonga yokuuvitha yi tamunuke mo. Onkee ano ehangano lyaJehova olya li lya toto po osikola hayi ithanwa Watchtower Bible College of Gilead, yi dheule aatumwa nkene ye na okuuvitha nonkene ye na okulonga aantu miilongo ayihe muuyuni, nonando pethimbo mpoka osha li tashi monika sha fa kaashi li pandunge. Aatumwa oya li ya tumwa kiilongo yontumba, nokuli nopethimbo lyiita. Shimwe ishewe, omupiya omudhiginini nomunandunge okwa li a ningi elongekidho pu totwe osikola hayi ithanwa Course in Theocratic Ministry, b yokudheula ayehe momagongalo ya kale ye shi nawa okuuvitha nokulonga aantu. Kungawo, oshigwana shaKalunga osha li sha ilongekidhila iilonga yokuuvitha.

¹³ Kunena, otu shi iwetele kutya Jehova oye a li ta wilike oshigwana she pethimbo ndyoka edhigu. Okuza pIita Iitiyali yUuyuni, oshigwana  shaJehova miilongo oyindji osha li shi na ombili nemanguluko olindji, sho tashi uvitha. Odhoshili kutya iilonga mbyoka oya li ya ende nawa.

14. Omolwashike tatu vulu okukala twa inekela ewiliko ndyoka hatu pewa kehangano lyaJehova nokaalumentu mboka ya langekwa po? (Ehololo 2:1) (Tala wo ethano.)

¹⁴ Kunena, iilyo yOlutuwiliki otayi tsikile okupula ewiliko kuJesus. Oya hala omalombwelo ngoka taya gandja kaamwatate ga kale metsokumwe netaloko lyaJehova nolyaJesus. Opo nduno ohaya longitha aatonatelishikandjo naakuluntugongalo ye ga gandje komagongalo. c Aakuluntugongalo aagwayekwa oye li ‘moshikaha shaKristus shokolulyo.’ (Lesha Ehololo 2:1.) Odhoshili kutya aakuluntugongalo mboka inaya gwanenena nohaya ningi omapuko. Omathimbo gamwe, Moses naJosua nayo oya li haya ningi omapuko, ngaashi owala aayapostoli. (Num. 20:12; Jos. 9:14, 15; Rom. 3:23) Nonando ongaaka, Kristus ota wilike nuukeka omupiya omudhiginini nosho wo aakuluntugongalo mboka ya langekwa po, nota ka tsikila oku shi ninga “aluhe, sigo omasiku gahugunina guuyuni mbuka.” (Mat. 28:20) Onkee ano otu na omatompelo ogendji gokwiinekela ewiliko ndyoka hatu pewa kwaamboka taya kwatele komeho.

OHATU MONO UUWANAWA MOKULANDULA EWILIKO LYAJEHOVA

15-16. Oshike wa ilongo kiimoniwa yaamboka ya landula ewiliko lyaJehova?

¹⁵ Uuna tatu tsikile okulandula ewiliko lyaJehova, otatu ka mona omayambeko, nokuli nongashingeyi. Pashiholelwa, Andy naRobyn oya li ya tula miilonga omayele ngoka ya pewa komupiya omudhiginini ya kaleke onkalamwenyo yawo inaayi kitakana. Oshizemo, oya li ya vulu okwiiyamba ya ka longe koproyeka yokutunga. Robyn okwa ti: “Otwa li hatu kala mokahala okashona, olundji katwa li hatu kala tu na okombitha. Nonando onda li ndi hole okuthaneka, onda li nda landitha po iilongitho yandje. Shoka osha li sha lilitha ndje. Ihe ngaashi omukulukadhi gwaAbraham, Sara, onda li nda tokola toko okwaatala kwaashoka nda etha po, ihe ondi tale komeho.” (Heb. 11:15) Uuwanawa wuni aaihokani mboka ya li ya mono moshimoniwa shawo? Robyn okwa ti: “Otwa nyanyukwa noonkondo, molwaashoka otwa pa Jehova shoka tu na. Uuna tatu gwanitha po iinakugwanithwa mbyoka Jehova e tu pa, ohatu mono kutya onkalamwenyo muuyuni uupe otayi ka kala ya tya ngiini.” Andy okwe shi koleke a ti: “Otwa nyanyukwa sho hatu longitha ethimbo lyetu noonkondo dhetu miilonga yaJehova.”

 ¹⁶ Ngele otwa tsikile okulandula ewiliko lyaJehova, uuwanawa wuni ishewe tatu vulu okumona? Sho Marcia a mana osikola, okwa li a hala okutula miilonga omayele ngoka a li a pewa, ge na ko nasha nokukokola ondjila. (Mat. 6:33; Rom. 12:11) Okwa ti: “Onda li tandi vulu oku ka ilonga oshali kOuniveesiti uule womimvo ne. Ihe onda li nda hala okwiitulila po omalalakano gopambepo. Onkee onda li nda ka hita osikola yopaungomba, ndi ka ilongele sha shoka tashi vulu okukwathela ndje ndi mone iilonga, opo ndi vule okwiikwathela sho tandi kokola ondjila. Ndyoka olya li limwe lyomomatokolo gopandunge ngoka nda ningi monkalamwenyo yandje. Ngashingeyi ondi li omukokolindjila gwondjigilile, niilonga yandje ohayi pitike ndje ndi ka kwathele koBetel nokunyanyukilwa omauthembahenda galwe ga ikalekelwa.”

17. Uuwanawa wuni ishewe tatu ka mona, ngele otwa tsikile nokulandula ewiliko lyaJehova? (Jesaja 48:17, 18)

¹⁷ Omathimbo gamwe, ohatu pewa omayele ngoka tage tu gamene kiinima ngaashi, ohole yomaliko nosho wo iinima mbyoka tayi vulu oku tu ningitha tu yone oompango dhaKalunga. Ngele otwe ga tula miilonga, otashi ke tu etela uuwanawa. Otatu ka kala tu na eiyuvo lya yogoka nokuyanda omaupyakadhi ogendji. (1 Tim. 6:9, 10) Oshizemo, otatu ka vula okulongela Jehova nomutima aguhe, shoka tashi ke tu etela enyanyu nombili oyindji nosho wo egwaneno. — Lesha Jesaja 48:17, 18.

18. Omolwashike wa tokola toko okutsikila okulandula ewiliko lyaJehova?

¹⁸ Kapu na omalimbililo kutya Jehova ota ka tsikila okulongitha aakalelipo ye yopantu e tu wilike puudhigu uunene sigo opethimbo lyElelo lyOomvula Eyuvi. (Eps. 45:16) Mbela otatu ka tsikila ngaa okulandula ewiliko ndyoka, nokuli nuuna tashi tu pula tu shi ninge momukalo ngoka haagwo twa li twa hala oku shi ninga? Oshindji osha ikolelela komukalo moka hatu inyenge kewiliko ndyoka Jehova he tu pe ngashingeyi. Onkee ano natu kaleni aluhe hatu landula ewiliko lyaJehova, ndyoka he tu pe okupitila maalumentu mboka a langeka po ye tu tonatele. (Jes. 32:1, 2; Heb. 13:17) Ngele otwe shi ningi, otatu ka kala twa inekela mOmuwiliki gwetu, Jehova, ngoka he tu gamene kiiponga yopambepo note ke tu gamena sigo okethikilo, muuyuni uupe moka tatu ka mona omwenyo gwaaluhe.