1-2. Omolwashike nongiini Jehova e shi ningi tashi wapa tu kale oshitopolwa shuukwanegumbo we?

JEHOVA okwe tu hiya tu ninge oshitopolwa shuukwanegumbo we mboka tawu mu longele. Ehiyo ndika inali dhenga tuu mbanda! Uukwanegumbo wetu owa thikama po maantu mboka yi iyapulila Kalunga noye na eitaalo mekuliloyambo lyOmwana. Otu li uukwanegumbo wa nyanyukwa. Otu na onkalamwenyo tayi ti sha ngashingeyi notwa nyanyukwa, molwaashoka otu na etegameno lyoku ka kala nomwenyo sigo aluhe, kashi na nduno mbudhi kutya omegulu nenge omOparadisa kombanda yevi.

² Jehova okwe shi ningi tashi wapa tu kale oshitopolwa shuukwanegumbo we, molwaashoka oku tu hole noonkondo. Shoka okwe shi ningi, sho a gandja eyambo li na ondilo onenenene. (Joh. 3:16) Otwa kulilwa “niikulila yi na ondilo.” (1 Kor. 6:20) Jehova okwe shi ninga tashi wapa kutse, tu kale tu na ekwatathano lyopothingo naye, okupitila mekuliloyambo. Otu na uuthembahenda wokwiithana Omuntu omunenenene meshito alihe, Tate. Ngaashi twa zi noku shi kundathana moshitopolwa sha zi ko, Jehova oku li Tate a dhenga mbanda.

3. Omapulo geni tashi vulika tu pule? (Tala wo oshimpungu “ Mbela Jehova oku wete ndje?”)

³ Ngaashi omunyoli gwOmbiimbeli gumwe, natse otashi vulika tu pule tatu ti: “Omuwa otandi mu futu shike moluuwanawa we auhe e u ningile ndje?” (Eps. 116:12) Eyamukulo olyo kutya itatu vulu nando okufuta sha Tate yetu gwomegulu. Nonando ongawo, ohole ye otayi vulu oku tu inyengitha tu kale tu mu hole wo. Omuyapostoli Johannes okwa nyola a ti: “Otse otu hole, oshoka Kalunga  okwa kala e tu hole tango.” (1 Joh. 4:19) Omomikalo dhini tatu vulu okuulukila Tate yetu gwomegulu kutya otu mu hole?

4. Shi ikolelela kuJakob 4:8, omolwashike tu na okuninga oonkambadhala tu hedhe popepi naJehova?

⁴ Jehova okwa hala tu hedhe popepi naye notu kale hatu popi naye. (Lesha Jakob 4:8.) Okwe tu ladhipika tu ‘dhiginine okugalikana,’ noha kala aluhe i ilongekidha okupulakena kutse. (Rom. 12:12) Iha kala i ipyakidhila unene, kaa vule ando oku tu pulakena. Iha vulwa wo oku tu pulakena. Ohatu pulakene kuye, mokulesha Oohapu dhe, Ombiimbeli, pamwe niileshomwa mbyoka tayi tu kwathele tu yi uve ko. Ohatu pulakene wo kuye, mokugandja eitulomo pomakugongala gopaKriste. Ngaashi owala aanona haya hedha popepi naavali yawo, uuna taya popi nayo pandjigilile, natse otatu ka kala nokuhedha popepi naJehova, ngele otwa kala hatu popi naye pandjigilile.

5. Ongiini tatu vulu okuhwepopaleka ongushu yomagalikano getu?

⁵ Dhiladhila kongushu yomagalikano goye kuKalunga. Jehova okwa hala tu mu mbumbulile omitima dhetu okupitila megalikano. (Eps. 62:8) Otu na okwiipula tatu ti: ‘Mbela omagalikano gandje ohaga kala ga fa omatumwalaka ngoka ga tapwa nenge oongoka ga nyolwa tashi zi komutima?’ Kapu na omalimbililo kutya owu hole Jehova noonkondo nowa hala okukaleka ekwatathano lyoye naye lya kola. Opo wu shi ninge, owu na okukala ho popi naye pandjigilile. Mu lombwela nkene wu uvite. Mu tseyithila shoka hashi ku nyanyudha naashoka hashi ku yemateke. Kala wu na einekelo kutya oto vulu oku mu pula ekwatho.

6. Oshike tu na okuninga, opo tu kale popepi naTate yetu gwomegulu?

⁶ Opo tu kale popepi naTate yetu gwomegulu, natu kale aluhe tu na iikala yokupandula. Otatu tsu kumwe nomupisalomi ngoka a nyola a ti: “Owe tu ningile iinima oyindji, Omuwa, Kalunga ketu; kaku na gumwe e ku fa! Owe tu dhiladhilile uuwanawa owindji. Ine vula oku u tumbula auhe —  owindji unene!” (Eps. 40:5) Kakele kokukala tu uvite tu na olupandu, ohatu ulukile wo Jehova moohapu nomiilonga kutya otwe mu pandula. Shika ohashi tu kaleke twa yooloka ko kaantu oyendji kunena. Otu li muuyuni moka mu na aantu ihaaya pandula ashihe shoka Jehova e ya ningila. Odhoshili kutya oshinima shimwe shoka tashi ulike kutya otu li ‘momasiku gahugunina,’ osho okwaaha pandula kwaantu. (2 Tim. 3:1, 2) Inatu hala nando okukala tu na iikala ya tya ngawo!

7. Jehova okwa hala tu ninge shike, nomolwashike?

⁷ Aavali ihaya kala ya hala oyana ya kale taya patathana, ihe oya kale ye na ombili. Sha faathana, Jehova naye okwa hala oyana ayehe ya kale taya longele kumwe. Odhoshili kutya ohole yokuholathana, ohayi tu ndhindhilikitha mo tu li Aakriste yashili. (Joh. 13:35) Otatu tsu kumwe nomupisalomi ngoka a nyola a ti: “Osho opala sho opalelela aantu ayehe ngele taa kala ye holathane ngaashi aamwayinathana.” (Eps. 133:1) Uuna tu hole aamwatate naamwameme, otatu ulukile Jehova kutya otu mu hole. (1 Joh. 4:20) Kashi shi tuu uuthembahenda okukala oshitopolwa shaamwatate naamwameme mboka ye na “uukuume nolukeno”! — Ef. 4:32.

8. Shi ikolelela kuJohannes gwotango 5:3, etompelo lya simanenena lyokuvulika kuJehova olini?

⁸ Jehova okwa tegelela aanona ya vulike kaavali yawo, nokwa tegelela wo tu vulike kuye. (Ef. 6:1) Oye twa gwana okuvulika kuye, molwaashoka oye Omushiti gwetu, Omukalekipo gwomwenyo gwetu nomunandunge a shiga ko e vule aavali ayehe. Nonando ongawo, etompelo lya simanenena lyokuvulika kuye, olyo kutya otu mu hole. (Lesha 1 Johannes 5:3.) Nonando opu na omatompelo ogendji gokuvulika kuJehova,  ihe tu thiminike tu shi ninge. Okwe tu pa emanguluko lyokuninga omatokolo. Onkee oha kala a nyanyukwa, uuna tatu hogolola tu vulike kuye, omolwohole yoku mu hola.

9-10. Omolwashike sha simana okutseya omithikampango dhaKalunga nokuvulika kudho?

⁹ Aavali oya hala oyana ya kale ya gamenwa. Shoka osho, nomolwaashoka ya tula po omithikampango dhopamikalo, ndhoka tadhi kwathele oyana. Uuna aanona taya vulika komithikampango ndhoka, ohaya ulike kutya oyi inekela aavali yawo noye ya simaneka. Onkene osha simana noonkondo, tu kale tu shi omithikampango dhaTate yetu gwomegulu nokuvulika kudho. Uuna tatu shi ningi, otatu ulukile Jehova kutya otu mu hole notwe mu simaneka, notashi tu etele wo uuwanawa. (Jes. 48:17, 18) Mepingathano naashono, mboka kaaye na ko nasha naJehova nonomithikampango dhe, ohashi ya etele owala eyeme. — Gal. 6:7, 8.

¹⁰ Uuna tu li metsokumwe naashoka Jehova a hokwa, otatu igamene kiinima mbyoka tayi vulu oku tu etela oshiponga palutu, pamaiyuvo nopambepo. Jehova oku shi shoka she tu opalela. Omumwameme Aurora, gwokoAmerika, ota ti: “Ondi shi kutya okuvulika kuJehova, ohaku ningitha aluhe onkalamwenyo yomuntu yi kale ombwanawa lela.” Natse otatu tsu kumwe naye. Uuwanawa wuni wa mona, mokuvulika kewiliko lyaJehova lyopahole?

11. Egalikano ohali tu kwathele ngiini?

¹¹ Egalikano ohali tu kwathele tu vulike, nokuli nuuna oshidhigu oku shi ninga. Omathimbo gamwe, ohashi kala oshidhigu okuvulika kuJehova, ihe otu na okukondjitha aluhe twa mana  mo egamo lyokwaavulika. Omupisalomi okwa li a galikana Kalunga a ti: ‘Ninga ndje omuvuliki.’ (Eps. 51:12) Omumwameme Denise, ngoka e li omukokolindjila gwondjigilile, ota ti: “Uuna ndi wete oshidhigu okuvulika kushimwe shomiipango yaJehova, ohandi galikana a pe ndje oonkondo ndi longe shoka sha uka.” Otatu vulu okukala nuushili kutya Jehova oha yamukula aluhe omaindilo ga tya ngawo. — Luk. 11:9-13.

12. Shi ikolelela kAaefeso 5:1, oshike tu na okuninga?

¹² Lesha Aaefeso 5:1. Tu li “oyana aaholike” yaJehova, ohatu ningi ngaashi tatu vulu, tu mu holele. Ohatu holele omaukwatya ge, mokukala aanahole, aanambili nohatu dhimine po yalwe. Uuna mboka kaaye shi Kalunga ye wete omikalo dhetu omiwanawa, otashi vulika shi ya inyengithe yi ilonge oshindji kombinga ye. (1 Pet. 2:12) Aavali Aakriste, oye na etompelo ewanawa lyokuholela Jehova momukalo moka haya ungaunga noyana. Uuna taye shi ningi, oyana nayo otashi vulika ya kale ya hala okukala ookuume kaTate yetu omunahole.

13. Otwa pumbwa okugandja eitulomo kushike?

¹³ Okanona ohaka kala ke uvitile he uuntsa nohaka kala ka nyanyukwa okupopya kombinga ye. Sha faathana, natse otu uvitile uuntsa Tate yetu gwomegulu, Jehova, notwa hala yalwe ye mu tseye. Momitima dhetu ohatu kala tu uvite ngaashi omukwaniilwa David, ngoka a nyola a ti: “Otandi mu hambelelele iilonga ye.” (Eps. 34:2) Ihe ongiini ngele otu na oohoni? Ongiini tatu vulu okukala aalaadhi? Otatu vulu okukala  aalaadhi, ngele otwa kala hatu gandja eitulomo kunkene tatu vulu okunyanyudha Jehova nokuuwanawa mboka yalwe taya ka mona, mokwiilonga kombinga ye. Jehova ote ke tu pa uulaadhi mboka twa pumbwa. Okwa li a kwathele aamwatate mboka ya li ko omimvo 2 000 nasha dha ka pita ya kale aalaadhi, onkee natse ota vulu oku tu kwathela. — 1 Tes. 2:2.

14. Ohatu kutha ombinga miilonga yokuninga aantu aalongwa, omolwomatompelo gamwe geni ga simanenena?

¹⁴ Jehova ke na okatongo, noha kala a nyanyukwa, uuna e tu tala tatu ulukile yalwe ohole kutya nduno oyomeputuko lini. (Iil. 10:34, 35) Gumwe gwomomikalo dhingi moka tatu vulu okuulukila yalwe ohole, omokukundathana nayo kombinga yonkundana ombwanawa. (Mat. 28:19, 20) Iilonga mbika otayi vulu okukwathela aantu ya ninge shike? Mboka taya pulakene kutse otaya vulu okuhwepopaleka onkalamwenyo yawo nokukala ye na etegameno lyokukala nomwenyo sigo aluhe monakuyiwa. — 1 Tim. 4:16.

15-16. Omatompelo geni tu na gokukala twa nyanyukwa?

¹⁵ Jehova omuvali omunahole, onkene okwa hala uukwanegumbo we wu kale wa nyanyukwa. (Jes. 65:14) Otu na omatompelo ogendji gokukala twa nyanyukwa ngashingeyi, nokuli nando otashi vulika tu kale twa taalela omaupyakadhi. Pashiholelwa, otu na uushili kutya Tate yetu gwomegulu oku tu hole noonkondo. Otu na ontseyo yashili yOohapu dhaKalunga, Ombiimbeli. (Jer. 15:16) Otu li oshitopolwa shuukwanegumbo wi ikalekelwa, wa thikama po maantu mboka ye hole Jehova, ye hole omithikampango dhe dhopamikalo dha dhenga mbanda noye holathane. — Eps. 106:4, 5.

¹⁶ Otatu vulu okukala twa nyanyukwa, molwaashoka otu na etegameno lyashili kutya onkalamwenyo otayi ka kala ombwanawa monakuyiwa. Otu shi kutya masiku Jehova ota ka kutha po uukolokoshi awuhe, nonokutya kohi yewiliko lyUukwaniilwa we, evi otali ka ninga Oparadisa. Otu na wo etegameno ekumithi kutya mboka ya sa otaya ka yumudhwa, e taya hangana ishewe natse. (Joh. 5:28, 29) Shika itashi ka kala tuu shinyanyudha! Shoka sha simanenena, osho kutya otu na uushili kutya kehe gumwe megulu nokombanda yevi ota ka simaneka, ota ka tanga nota ka longela Tate yetu omunahole, iinima mbyoka i ilongela.