1. Ondumbo oya li ya gumu ngiini yaandjawo yaJosef?

JAKOB okwa li e hole oyanamati ayehe, ihe okwa li e hole unene Josef, ngoka a li e na omimvo 17. Aamwahe yaJosef oya li ye shi uvitile ngiini? Oya tameke okukala ye mu tsila ondumbo, e taye mu tondo. Josef ka li a ninga sha shoka tashi vulu ando okuningitha aamwahe ya kale ye mu tonde. Nonando ongawo, oya li ye mu landitha po e li omupika, e taya fundju he kutya omwana ngoka e hole, okwa lika po koshilikama. Ondumbo oye ya ningitha ya yone po ombili maandjawo, noya li wo ya yemateke he noonkondo. — Gen. 37:3, 4, 27-34.

2. Shi ikolelela kAagalati 5:19-21, omolwashike ondumbo ya nika oshiponga?

² MOmbiimbeli, ondumbo * oya popiwa yi li yimwe ‘yomiilonga yuuhalu wopantu,’ mbyoka tayi vulu nokuli okweetitha eso, notayi vulu wo okuningitha omuntu kaa kale we a gwana oku ka thigulula Uukwaniilwa waKalunga. (Lesha Aagalati 5:19-21.) Olundji, ondumbo oyo hayi etitha iikala iiwinayi ngaashi okutondathana, okutamanana nokugeelathana.

3. Oshike tatu ka kundathana moshitopolwa shika?

³ Oshiholelwa shaamwahe yaJosef, otashi ulike nkene ondumbo tayi vulu okuyona po ekwatathano pokati kaantu nokuyona po ombili muukwanegumbo. Nonando kapu na esiku tu ka ninge shoka aamwahe yaJosef ya ningile, inatu dhimbwa kutya atuheni otu na omitima inaadhi gwanenena nodhi na omakoto. (Jer. 17:9) Omolwetompelo ndyoka, omathimbo gamwe otashi vulika  tu kale twa tsila yalwe ondumbo. Natu ka taleni kiiholelwa yimwe mOmbiimbeli tayi londodha, mbyoka tayi tu kwathele tu mone nkene ondumbo tayi vulu okumena omidhi momitima dhetu. Opo nduno, otatu ka kundathana omikalo dhimwe tadhi longo, ndhoka tadhi vulu oku tu kwathela tu kondjithe ondumbo notu humithe komeho ombili.

4. Omolwashike Aafilisti ya li ya tsila Isak ondumbo?

⁴ Uuna gumwe omuyamba. Isak okwa li omulumentu omuyamba, nAafilisti oya li ye mu tsila ondumbo. (Gen. 26:12-14). Oya li nokuli ya file omithima moka Isak a li ha nwetha iimuna ye. (Gen. 26:15, 16, 27) Ngaashi Aafilisti, aantu yamwe kunena nayo ohaya kala ya tsila ondumbo mboka ye na iiniwe oyindji, ye ya vule. Ihaya kala owala ya hala shoka aantu yalwe ye na, ihe ohaya kala wo inaaye yi ya halela.

5. Omolwashike aawiliki yelongelokalunga ya li ya tsila ondumbo Jesus?

⁵ Uuna gumwe e holike. Aawiliki yelongelokalunga lyOshijuda, oya li haya kala ya tsila Jesus ondumbo, molwaashoka okwa li lela e holike kaantu. (Mat. 7:28, 29) Jesus okwa li omukalelipo gwaKalunga, nokwa li ta longo aantu oshili. Nonando ongawo, aawiliki yelongelokalunga mboka, oya li ya taandelitha iifundja, opo ya nyateke edhina ewanawa lyaJesus. (Mark. 15:10; Joh. 11:47, 48; 12:12, 13, 19) Oshiilongomwa shini tashi londodha, tatu ilongo mehokololo ndika? Otu na okulonga nuudhiginini tu kondjithe egamo lyokutsila ondumbo mboka ye holike megongalo, omolwomaukwatya gawo omawanawa. Pehala lyoku ya tsila ondumbo, otu na okukambadhala okuholela omaukwatya gawo omawanawa. — 1 Kor. 11:1; 3 Joh. 11.

6. Diotrefes okwa li a ulike ngiini iikala yondumbo?

⁶ Uuna gumwe e na iinakugwanithwa megongalo. Diotrefes ngoka a li ko omimvo 2 000 nasha dha ka pita, okwa li a tsile ondumbo mboka ya li haya kwatele komeho megongalo lyopaKriste. Okwa li a hala “okukala gwokomeho” megongalo, onkene okwa taandelitha iifundja kombinga yomuyapostoli Johannes noyaamwatate yalwe yoshinakugwanithwa, nelalakano lyokunyateka omadhina gawo. (3 Joh. 9, 10) Nonando itatu ka ya ponkatu ndjoka Diotrefes a li a ya, natse otashi vulika tu tameke okukala twa tsila ondumbo Omukriste omukwetu, ngoka a pewa oshinakugwanithwa shoka twa li twa tegelela otse tu shi pewe, unene tuu ngele otu wete kutya natse otwa gwana oku shi pewa.

7. Ondumbo otayi vulu oku tu guma ngiini?

⁷ Ondumbo oya fa iigwanga ya nika oshiponga. Uuna ondumbo ya mene omidhi momitima dhetu, ohashi ka kala oshidhigu oku yi vudha mo. Ondumbo ohayi ningitha omuntu a kale e na omaiyuvo galwe omawinayi, ngaashi efupa, uuntsa nokwiihola mwene. Ondumbo ohayi vulu oku tu keelela kaatu kokeke omaukwatya omawanawa ngaashi ohole, ondjaalela nolukeno. Ngele otwa mono kutya mutse otamu iyakele ondumbo, otwa pumbwa oku yi vudha mo nziya. Ongiini tatu vulu okukondjitha ondumbo?

8. Omaukwatya geni taga vulu oku tu kwathela tu kondjithe ondumbo?

⁸ Otatu vulu okukondjitha ondumbo, mokukala tu na eifupipiko notwa gwanenwa. Uuna tu na omaukwatya ngaka omawanawa, itatu ka kala tu na ondumbo. Eifupipiko otali ke tu kwathela kaatu idhiladhilile pombanda. Omuntu omwiifupipiki iha kala e uvite kutya okwa gwana okuningilwa oshindji shi vulithe puyalwe. (Gal. 6:3, 4) Omuntu ngoka a gwanenwa, oha kala a mbilipalelwa kwaashoka e na, noihi iyelekanitha nayalwe. (1 Tim. 6:7, 8) Uuna omuntu ngoka omwiifupipiki nokwa gwanenwa a mono gumwe a pewa sha oshiwanawa, oha kala e mu nyanyukilwa.

9. Shi ikolelela kAagalati 5:16 nokAafilippi 2:3, 4, ombepo ondjapuki otayi ke tu kwathela tu ninge shike?

 ⁹ Otwa pumbwa ekwatho lyombepo ondjapuki, opo tu yande ondumbo ndjoka yi li okahalu kopantu, notu vule okukokeka eifupipiko nokukala twa gwanenwa kwaashoka tu na. (Lesha Aagalati 5:16; Aafilippi 2:3, 4.) Ombepo ondjapuki yaJehova, otayi vulu oku tu kwathela tu konakone omadhiladhilo getu gomuule nomainyengotompelo getu. Kekwatho lyaJehova, otatu vulu okupingena po omadhiladhilo nomaiyuvo ngoka ga nika oshiponga, naangoka taga tungu. (Eps. 26:2; 51:10) Natu taleni koshiholelwa shaMoses naPaulus, aalumentu mboka ya li ya sindana mokukondjitha egamo lyokukala ye na ondumbo.

10. Onkalo yini ya li tayi vulu okumakela Moses? (Tala ethano lyokombanda.)

¹⁰ Moses okwa li e na oonkondopangelo odhindji, sho a li ta kwatele komeho oshigwana shaKalunga, ihe ka li e na iikala yokukala inaa halela yalwe oshinakugwanithwa shoka. Pashiholelwa, pompito yimwe Jehova okwa li a kutha Moses ombepo ondjapuki yimwe, e te yi pe ongundu yaawiliki Aaisraeli mboka ya li ya thikama popepi netsalihangano. Nziya konima yaashono, Moses okwa uvu kutya aawiliki yaali mboka ya li inaaya ya ketsalihangano, nayo oya lambelwa kombepo ondjapuki noya tameke okuhunganeka. Moses okwi inyenge ngiini, sho a lombwelwa kuJosua a keelele aawiliki mboka? Ka li e ya tsila ondumbo, omolwuuthembahenda mboka ya li ya pewa kuJehova. Pehala lyaashono, okwi ifupipike nokwa li e ya nyanyukilwa. (Num. 11:24-29) Oshike tatu vulu okwiilonga kuMoses?

11. Aakuluntugongalo otaya vulu ngiini okuholela Moses?

¹¹ Ngele ngoye omukuluntugongalo, mbela owa pulilwe nale wu dheulile gulwe megongalo oshinakugwanithwa shoye shoka wu hole? Pashiholelwa, otashi vulika wu hole okukwatela komeho ekonakono lyOshungolangelo oshiwike kehe. Ihe ngele ngoye omwiifupipiki ngaashi Moses, ito ka kala wu uvite kuu na we oshilonga, ngele owa pulwa wu dheule omumwatate gulwe, opo mokweendela ko kwethimbo a vule wo oku shi ninga. Pehala lyaashono, oto ka kala wa nyanyukwa oku mu kwathela.

12. Aakriste oyendji kunena, oya ulika ngiini kutya oya gwanenwa noyi ifupipika?

¹² Natu taleni konkalo yilwe ndjoka ya taalelwa kaamwatate oyendji aakokele. Uule womimvo odhindji, oya kala ye li aaunganeki yolutu lwaakuluntugongalo. Ihe sho ya gwanitha omimvo 80, oya gandja po oshinakugwanithwa shawo nehalo ewanawa. Aatonatelishikandjo mboka ya adha omimvo 70, oya gandja po neifupipiko oshinakugwanithwa shoka, e taya taamba ko shilwe shoka ya pewa. Momimvo opo dha zi ko, Aabetel oyendji muuyuni awuhe, oya pewa iinakugwanithwa iipe yomomapya. Aamwatate naamwameme mbaka aadhiginini, inaya kwatela onkone mboka ngashingeyi tashi vulika ye na iinakugwanithwa mbyoka ya li ye na.

13. Omolwashike Paulus a li ta vulu okumakelwa a tsile ondumbo aayapostoli 12?

¹³ Omuyapostoli Paulus oku li gumwe ngoka e li oshiholelwa oshiwanawa, shokukala a gwanenwa nomwiifupipiki. Ka li a etha a kale e na ondumbo. Okwa li ha longo nuudhiginini muukalele, ihe okwa li a popi neifupipiko a ti: “Ngame ondi vulike kaayapostoli ayehe noinandi gwana, ndi ithanwe omuyapostoli.” (1 Kor. 15:9, 10) Aayapostoli 12 oya li ya landula Jesus pethimbo lyuukalele we kombanda yevi, ihe Paulus ka li natango a ninga Omukriste sigo okonima yeso neyumuko lyaJesus. Nonando hugunina okwa ka langekwa po a kale “omutumwa mokati kaapagani,” ka li a gwana okupewa oshinakugwanithwa shi ikalekelwa shokukala gumwe gwomaayapostoli 12. (Rom. 11:13; Iil. 1:21-26) Pehala lyokutsila ondumbo aalumentu mboka 12 nosho wo ekwatathano lyopothingo ndyoka ya li ye na naJesus, Paulus okwa kala a gwanenwa naashoka e na.

14. Oshike tatu ka ninga, ngele otwa kala twa gwanenwa notwi ifupipika?

 ¹⁴ Ngele otwa gwanenwa notu li aaifupipiki, otatu ka kala twa fa Paulus notatu ka simaneka mboka ya pewa oonkondopangelo kuJehova. (Iil. 21:20-26) Jehova okwa langeka po aalumentu ya kwatele komeho megongalo lyopaKriste. Nonando inaya gwanenena, okwe ya tala ko ye li “omagano.” (Ef. 4:8, 11) Uuna twa simaneka aalumentu mboka ya langekwa po nohatu vulika neifupipiko kewiliko lyawo, otatu ka kala popepi naJehova notatu ka kala nombili nAakriste ooyakwetu.

15. Oshike twa pumbwa okuninga?

¹⁵ Itatu kala tu na ombili nayalwe, ngele otu ninathane ondumbo. Otwa pumbwa okuvudha mo ondumbo momitima dhetu, e tatu yanda shoka tashi ningitha yalwe ya kale ye yi na. Otu na okukatuka oonkatu ndhika dha simana, ngele otwa hala okuvulika kelombwelo ndyoka tali ti kutya otu na “okulalakanena aluhe mbyoka tayi tu kaleke tu na ombili nooyakwetu, naambyoka tayi tungu okukalathana kwetu.” (Rom. 14:19) Oshike tatu vulu okuninga kondandalunde, opo tu kwathele yalwe ya kondjithe ondumbo, nongiini tatu vulu okuhumitha komeho ombili?

16. Ongiini tatu vulu okukwathela yalwe ya yande okukala ye na ondumbo?

¹⁶ Iikala yetu noonkatu dhetu, otayi vulu okunwetha mo yalwe noonkondo. Uuyuni owa hala tu “itangele” iinima mbyoka tu na. (1 Joh. 2:16) Ihe iikala mbyoka ohayi humitha komeho ondumbo. Otatu vulu okuyanda okuningitha yalwe ya kale ye na ondumbo, ngele otwa kala ihaatu popi  aluhe kombinga yiinima mbyoka tu na nenge twa hala okulanda. Omukalo gulwe tatu vulu okuyanda okuhumitha komeho ondumbo, omokutala ko pandjele iinakugwanithwa mbyoka tu na megongalo. Otashi vulu okukala oshipu kutse tu kale tu na ondumbo, ngele otwa kala hatu gandja eitulomo komauthembahenda ngoka tu na. Mepingathano naashoka, ngele otwa kala tatu ulike lela ohokwe muyalwe nokundhindhilika uuwanawa mboka taya longo, kungawo otatu ya kwathele ya kale ye uvite ya gwanenwa notatu humitha komeho uukumwe nombili megongalo.

17. Aamwahe yaJosef oya li ya vulu okuninga shike, nomolwashike?

¹⁷ Otatu vulu okusindana mokukondjitha ondumbo. Natu taleni ishewe koshiholelwa shaamwahe yaJosef. Konima yomimvo, sho ya li ya ungaunga naye nayi, oya ka tsakanena naye muEgipiti. Manga Josef inee yi ihololela kutya oye naanaa lye, okwe ya tala po, opo a tale ngele oya lundulula. Okwa ningi elongekidho a lye pamwe nayo, mpoka a li a pe omumwahe gwonkelo, Benjamin, iikulya oyindji yi vule yawo. (Gen. 43:33, 34) Nonando ongawo, kapu na shoka tashi ulike kutya aamwahe oya li ya tsila ondumbo Benjamin. Pehala lyaashono, oya li ye na ko nasha lela nomumwahe nosho wo nahe, Jakob. (Gen. 44:30-34) Molwaashoka aamwahe yaJosef kaya li we ye na ondumbo, maandjawo omwa ka kala ishewe mu na ombili. (Gen. 45:4, 15) Sha faathana, ngele otwa vudha mo iikala kehe yondumbo mutse, otatu ka kwathela okukaleka po ombili momaukwanegumbo getu nomegongalo.

18. Shi ikolelela kuJakob 3:17, 18, oshike tashi ka ningwa po, ngele otwa kala tatu humitha komeho ombili?

¹⁸ Jehova okwa hala tu kondjithe ondumbo notu lalakanene ombili. Otu na okulonga nuudhiginini tu ninge iinima mbyoka iyali. Ngaashi twe shi kundathana moshitopolwa shika, otu na egamo lyokukala nondumbo. (Jak. 4:5) Shimwe ishewe, otu li muuyuni mboka tawu humitha komeho ondumbo. Ihe ngele otwa kala twi ifupipika, twa gwanenwa kwaashoka tu na notu na olupandu, itatu ka kala tu na ondumbo. Pehala lyaashono, otatu ka humitha komeho ombili, ndjoka tayi ke tu kwathela tu kale tu na omaukwatya omawanawa. — Lesha Jakob 3:17, 18.