1. Omagano gokupopya otwe ga pewa kulye?

 OKUPOPYA omagano twe ga pewa kuKalunga ketu omunahole. Nziya sho omuntu gwotango, Adam, a shitwa, okwa li ha vulu okupopya naHe gwomegulu ta longitha iitya yi ili noyi ili. Okwa li wo ta vulu okugwedha ko kontseyo ye yelaka mokutota po iitya iipe. Adam okwa li a longitha omagano ge gokupopya a gwanithe po oshinakugwanithwa she shokuluka iinamwenyo ayihe. (Gen. 2:19) Ka li tuu a nyanyukwa sho a popi oshikando she shotango nomuntu gulwe, omukulukadhi gwe omwaanawa, Eva! — Gen. 2:22, 23.

2. Aantu oya li ya longitha nayi ngiini omagano gawo gokupopya monakuziwa, nohaye ga longitha ngiini kunena?

² Omagano gokupopya oga li ga longithwa nayi. Satana omuhindadhi okwa li a fundju Eva, niifundja mbyono oye etele aantu uulunde nokwaagwanenena. (Gen. 3:1-4) Adam okwa li a longitha nayi omagano ge gokupopya. Sho a yono, okwa pe Eva nosho wo Jehova ombedhi. (Gen. 3:12) Kain okwa fundju Jehova konima sho a dhipaga omumwayina Abel. (Gen. 4:9) Konima yethimbo, gumwe gwomoluvalo lwaKain, Lamek, okwa nyola okatewo hono taku ulike kutya aantu pethimbo lye oya li aakolokoshi. (Gen. 4:23, 24) Onkalo oyi li ngiini kunena? Ohatu uvu aawiliki yopapolotika taya tukana ya manguluka mokati kaantu. Ohashi kala wo oshidhigu okumona ofilima kaamu na omatukano. Aanasikola ohaya uvu yamwe taya popi omalaka omawinayi kosikola, naakuluntu ohaya uvu aantu taya popi omalaka ngoka kiilonga. Shiyemateka, sho kehe pamwe aantu haya popi omalaka omawinayi, otashi ulike kutya uuyuni owa yonuka lela.

3. Oshike tu na okukotokela, noshike tatu ka kundathana moshitopolwa shika?

³ Ngele inatu kotoka, otashi vulika natse tu tameke okukala hatu popi oohapu ombwinayi, molwaashono ohatu uvu aantu taye dhi popi. Ihe uushili owo kutya tu li Aakriste, otwa pumbwa okunyanyudha  Jehova, naashono osha kwatela mo okuyanda okupopya oohapu ombwinayi. Otwa hala okulongitha omagano getu ngaka gokupopya momukalo omwaanawa, mokutanga Kalunga ketu. Moshitopolwa shino, otatu ka kundathana nkene tatu vulu oku shi ninga (1) miilonga yokuuvitha, (2) pokugongala kwetu, (3) uuna tatu popi nooyakwetu. Tango, natu ka taleni kutya omolwashike Jehova ha kala e na ko nasha naashono hatu popi.

4. Shi ikolelela kuMaleaki 3:16, omolwashike Jehova ha kala e na ko nasha naashono hatu popi?

⁴ Lesha Maleaki 3:16. Sho to tala, omolwashike Jehova ha nyola membo lye omadhina gaambono haya ulike kutya ohaye mu tila nohaya dhiladhila edhina lye mwaashono taya popi? Shono hatu popi ohashi ulike kutya momitima dhetu omu na shike. Jesus okwa ti: “Shoka shu udhilila momutima, osho shoka okana take shi popi.” (Mat. 12:34) Shoka hatu popi ohashi ulike kutya otu hole Jehova shi thike peni. Jehova okwa hala wo mboka ye mu hole ya ka kale nomwenyo sigo aluhe muuyuni uupe.

5. (a) Okulongela kwetu Jehova okwa kwatathana ngiini naashoka hatu popi? (b) Ngaashi sha ulikwa methano, oshike tu na okukotokela ngele tashi ya pokupopya kwetu?

⁵ Shono hatu popi, otashi vulika shi ningithe Jehova kaa taambe ko oku mu longela kwetu. (Jak. 1:26) Aantu yamwe mbono kaaye hole Kalunga ohaya popi ya geya, taya tukana, nonuuntsa. (2 Tim. 3:1-5) Ihe tse inatu hala nando okukala twe ya fa. Otwa hala okunyanyudha Jehova mwaashono hatu popi. Mbela Jehova ota ka kala ngaa e tu hokwa ngele ohatu popi naantu nohenda nonombili pokugongala kwetu nenge miilonga yokuuvitha, ihe ohatu popi twa geya nomomukalo omwiinayi naantu yaandjetu, uuna kaatu wetike kuyalwe nenge kaaye tu uvite? — 1 Pet. 3:7.

6. Iizemo iiwanawa yini ye etithwa kokupopya okuwanawa kwaKimberly?

⁶ Uuna tatu longitha nawa omagano getu gokupopya, ohatu ulike kutya ohatu longele Jehova. Shimwe ishewe, ohatu kwathele mboka ye li putse ya mone eyooloko ‘pokati komuntu ngoka ta longele Kalunga naangoka itee shi ningi.’ (Mal. 3:18) Shono osho sha li sha ningilwa omumwameme Kimberly. * Okwa li a pewa  a longe pamwe nomunasikola omukwawo moproyeka yimwe kosikola. Konima sho ya longo pamwe, omunasikola ngono okwa mono kutya Kimberly okwa yooloka ko kaanasikola ooyakwawo. Ka li he ya li ondjego, ye aluhe okwa li ha popi momukalo omwaanawa noka li ha longitha elaka lya honga. Omunasikola ngono okwa li a kuminwa Kimberly, nokonima okwa zimine a konakone Ombiimbeli. Jehova oha kala a nyanyukwa uuna hatu popi momukalo ngono tagu nanene aantu koshili.

7. Owa tokola toko okulongitha ngiini omagano gokupopya ngoka Jehova e ku pa?

⁷ Atuheni otwa hala okupopya momukalo ngoka tagu simanekitha Jehova, notagu tu nanene kaamwatate naamwameme. Onkee natu ka taleni komikalo dhimwe mono tatu vulu okutsikila okukala ‘oshiholelwa kuyalwe moohapu dhetu.’

8. Jesus okwe tu tulila po oshiholelwa shini shankene a li ha popi naantu muukalele?

⁸ Kala ho popi nombili nonesimaneko uuna wa geyithwa. Sho Jesus a li kombanda yevi okwa li a lundilwa kutya ye onkolwi, omufukedhi, omukalelipo gwaSatana, iha vulika kompango yEsabati nosho wo kutya oha tuku Kalunga. (Mat. 11:19; 26:65; Luk. 11:15; Joh. 9:16) Ihe nonando ongawo, Jesus kali a yamukula aantu mboka noohapu oombwinayi. Ngaashi Jesus, natse inatu shunithila nando aantu oohapu oombwinayi mboka ya popi natse momukalo omwiinayi. (1 Pet. 2:21-23) Odhoshili kutya okuninga ngawo kashi shi oshipu. (Jak. 3:2) Oshike tashi vulu oku tu kwathela?

9. Oshike tashi tu kwathele tu pangele okupopya kwetu uuna tu li miilonga yokuuvitha?

⁹ Uuna gumwe a popi nangoye momukalo omwinayi sho to uvitha, ino geya. Omumwatate Sam ota ti: “Ohandi kambadhala okugandja eitulomo koompumbwe dhomunegumbo, kutya okwa pumbwa okuuva oshili nosho wo kutya ota vulu okuninga omalunduluko.” Omathimbo gamwe omunegumbo otashi vulika a geye, molwaashono twe ya puye pethimbo lya puka. Ngele otwa popi nomuntu a geya, otatu vulu okuninga ngaashi omumwameme Lucia ha ningi. Otatu vulu okugalikana paufupi, tatu pula Jehova e tu kwathele tu kale twa ngungumana, tse tu popye momukalo gwombili nonesimaneko.

10. Shi ikolelela kuTimoteus gwotango 4:13, otu na okukala tu na elalakano lini?

¹⁰ Ninga omulongi e shi okulonga aantu nawa. Timoteus okwa li Omukriste a pyokoka, ihe naye okwa li a pumbwa okuninga ehumokomeho mokulonga aantu. (Lesha 1 Timoteus 4:13.) Ongiini tatu vulu okuninga aalongi ye shi okulonga aantu nawa miilonga yokuuvitha? Natu kale hatu ilongekidha nawa. Shono shi shi okupandulwa ooshono kutya otu na iilongitho yi ili noyi ili mbyoka tayi vulu oku tu kwathela tu ninge aalongi ye shi okulonga aantu nawa. Mokambo Longitha ethimbo lyoye mokulesha nosho wo mokulonga aantu nosho wo oshitopolwa “Uvitha nuulaadhi  muukalele,” shono shi li mOkafo Onkalamwenyo yopaKriste niilonga yetu yokuuvitha, omu na uuyelele tawu vulu oku ku kwathela. Ihe mbela oho longitha ngaa iilongitho mbyono? Ngele ohatu ilongekidha nawa, itatu ka kala twa tila sho tatu popi naantu, notatu ka popya lela tu na omukumo.

11. Oshike sha kwathele Aakriste yamwe ya ninge aalongi ye li hwepo?

¹¹ Oshike ishewe tashi vulu oku tu kwathela tu ninge aalongi ya pyokoka? Omokutala kiiholelwa yayalwe megongalo nokwiilonga sha kuyo. Omumwatate Sam ngono a popiwa metetekelo, ohi ipula kutya oshike sha kwathela aamwatate naamwameme yamwe ya kale ye shi okulonga aantu nawa. Ohe ya pulakene nawa noku ya holela. Omumwameme Talia, naye oha pulakene nawa kaapopi mboka ye na owino uuna taya gandja iipopiwa yawo yomontaneho. Shoka oshe mu kwathele i ilonge nkene e na okupopya naantu nosho wo okutompathana nayo kombinga yiinima yimwe mbyoka olundji haya pula miilonga yokuuvitha.

12. Yamwe ohaye shi mono oshidhigu okuninga shike?

¹² Atuheni otatu vulu okuningitha okugongala kwetu ku ende nawa, ngele ohatu imbeni atuheni nokugandja omatyokosha twe ga longekidha nawa. (Eps. 22:22) Yamwe ohaye shi mono oshidhigu okwiimba nenge okugandja omatyokosha montaneho. Mbela nangoye osho wu li? Ngele osho, opu na sha shilwe tashi vulu oku ku kwathela wu sinde uumbanda mboka. Ilonga kombinga yaashoka sha kwathela yalwe kaaya kale we ya tila okwiimba nenge okugandja omatyokosha pokugongala.

13. Oshike tashi vulu oku ku kwathela wu imbe nomutima aguhe pokugongala?

¹³ Imba nomutima aguhe. Uuna tatu imbi omaimbilo gUukwaniilwa, elalakano lyetu okutanga Jehova. Omumwameme Sara ke wete e shi okwiimba lela. Ihe nonando ongawo, oha kala a hala okutanga Jehova mokwiimba. Onkee oha mono shi li nawa i ilongekidhile omaimbilo megumbo ngaashi owala ti ilongekidhile iitopolwa yilwe yokugongala. Ohe shi ende ngiini? Ohi iyenditha po pomaimbilo noha kambadhala okutala kutya iitya yago otayi kwatathana ngiini naashono tashi ka kundathanwa pokugongala. Okwa ti: “Shino ohashi kwathele ndje ndi gandje eitulomo kiitya yeimbilo, ihe hakokwiimba kwandje.”

14. Ngele oho kala wa tila okugandja omatyokosha, oshike tashi vulu oku ku kwathela?

¹⁴ Kala aluhe ho gandja omatyokosha. Yamwe ohaye shi mono lela oshidhigu okugandja omatyokosha. Talia ngoka a popiwa metetekelo okwa ti: “Ohandi kala nda tila noonkondo shampa ndi li mokati kaantu, nonando yamwe ihaye shi ndhindhilike, oshoka ewi lyandje paunshitwe olya gundjila. Onkee ohandi mono lela oshidhigu okugandja etyokosha.” Ihe shono ihashi imbi Talia a gandje omatyokosha ge. Uuna ti ilongekidhile okugongala, oha kaleke momadhiladhilo kutya  etyokosha lyotango mwaashono tashi ka kundathanwa oli na okukala efupi, nolya yamukula lela kondandalunde epulo ndyoka tali ka pulwa. Okwa ti: “Shino otashi ulike kutya, INASHI PUKA okugandja etyokosha li li paufupi noli na oshitsa shoka sha pumbiwa, oshoka ngoka ta ka kwatela komeho olyo eyamukulo ta ka kala a tegelela.”

15. Oshike tu na okudhimbulukwa kombinga yomatyokosha getu?

¹⁵ Aakriste yamwe ihaya kala ye na oohoni nenge ya tila, ihe omathimbo gamwe otashi vulika ya kale inaaya gandja omatyokosha. Omolwashike mbela? Omumwameme Juliet okwa ti: “Omathimbo gamwe ohandi kakadhala okugandja etyokosha, molwaashoka ohandi kala nda tila kutya etyokosha lyandje olyanathangwa unene, lyo kali shi ewanawa.” Dhimbulukwa kutya Jehova okwa tegelela tu gandje omatyokosha ga dhenga mbanda ngaashi tatu vulu. * Ohe shi pandula noonkondo ngele ohatu ningi ngaashi tatu vulu tu ga gandje pokugongala, nonando omathimbo gamwe ohatu kala twa tila.

16. Okupopya kuni tu na okuyanda?

¹⁶ Yanda okupopya ‘oohapu dhomatukano.’ (Ef. 4:31) Ngaashi sha popiwa metetekelo, Omukriste ke na nando okupopya oohapu dhomatukano. Ihe opu na oohapu dhimwe ndhoka ihaadhi imonikila naanaa kutya oombwiinayi, tu na okukotokela. Pashiholelwa, katu na okupopila muuwinayi aantu yomuhoko gulwe, yelaka lilwe nenge yuukwashigwana wulwe. Shimwe ishewe, inatu hala tu uvithe yalwe nayi moku ya ula omalaka ga honga. Omumwatate gumwe okwa ti: “Omathimbo gamwe, onda popya oohapu dha honga nodhomasheko, ndhono nda li ndi wete kutya otadhi yolitha owala aantu noitadhi ya ningi sha. Ihe paushili wo wene odha li dha uvitha gumwe nayi. Omukulukadhi gwandje okwa kwathela ndje noonkondo sho a kala ha lombwele ndje paumwene kombinga yaashoka nda popya oshiwinayi noshe mu uvitha nayi nenge yalwe.”

17. Metsokumwe nAaefeso 4:29, ongiini tatu vulu okutunga yalwe?

¹⁷ Kala ho popi oohapu tadhi tungu. Kala ho pandula yalwe nziya, pehala lyoku ya popila muuwinayi noku ya ngungutulila. (Lesha Aaefeso. 4:29.) Aaisraeli oya li ye na okukala ye na olupandu, omolwiinima oyindji mbyoka ya li ya ningilwa kuJehova, ihe olundji oya li haya ngungutula. Okungungutula oku na olutapo. Mbela oto dhimbulukwa kutya omutoto ngoka Aaisraeli ya li ya lombwelwa koondaadhi omulongo ogwa li gwe etitha shike? Ogwa ningitha ‘Aaisraeli ya tamaneke Moses naAaron.’ (Num. 13:31–14:4) Mepingathano naashono, okupandula yalwe ohaku ningitha kehe gumwe a kale a nyanyukwa. Pashiholelwa, otatu vulu okukala nuushili kutya omwanakadhona  gwaJefta oku na okukala a li uvite a tsuwa omukumo kookahewa ye a tsikile noshinakugwanithwa she. (Aatok. 11:40) Sara ngoka a popiwa metetekelo, okwa ti: “Ngele ohatu pandula yalwe, ohatu ya ningitha ya kale ye uvite ye holike kuJehova nosho wo kutya oye na oshilonga mehangano lye.” Onkee ano, kala ho pandula aamwatate naamwameme tashi zi komutima.

18. Shi ikolelela kEpisalomi 15:1, 2, omolwashike tu na okukala hatu popi oshili, nosha kwatela mo shike?

¹⁸ Kala ho popi oshili. Itatu vulu okunyanyudha Jehova ngele ihatu popi oshili. Oku tonde iifundja ayihe. (Omayel. 6:16, 17) Nonando aantu oyendji oya tala ko okufundja ku li oshitopolwa shonkalamwenyo, tse ihatu shi ningi, molwaashono Jehova ota ti okwa puka. (Lesha Episalomi. 15:1, 2.) Odhoshili kutya ohatu yanda okufundja nosho wo okugandja uuyelele inaawu ihwa po, mbono tawu ningitha aantu ya thike pehulithodhiladhilo lya puka.

19. Oshike ishewe tu na okukotokela?

¹⁹ Yanda okuhokola yalwe. (Omayel. 25:23; 2 Tes. 3:11) Juliet, ngono a popiwa metetekelo okwa popi nkene okuhokola haku mu gumu. Okwa ti: “Okupulakena koohapu dholuhoko, ohaku teya omuntu omukumo, nohaku ningitha ndje kaandi kale ndi inekela omuntu ngoka ta hokola yalwe. Shimwe ishewe, ondi shi shi ngiini kutya omuntu ngoka ita ka hokola ndje wo puyalwe?” Ngele owa mono kutya shono tamu popi nayalwe osha uka moluhoko, tameka nziya okupopya kombinga yoshinima shoka oshiwanawa. — Kol. 4:6.

20. Owa tokola toko okuninga shike nomagano goye gokupopya?

²⁰ Molwaashono otu li muuyuni mu na aantu haya popi oohapu oombwinayi, otu na okulonga nuudhiginini tu shilipaleke kutya shoka tatu popi otashi nyanyudha Jehova. Dhimbulukwa kutya okupopya omagano twe ga pewa kuJehova, noha kala e na ko nasha nankene tatu ga longitha. Ota ka yambeka oonkambadhala dhetu ngele otwa kala hatu ningi ngaashi tatu vulu tu popye oohapu oombwanawa miilonga yokuuvitha, pokugongala nosho wo uuna tatu popi nayalwe esiku kehe. Ngele uuyuni mbuno wa kolokosha owa hanagulwa po, otashi ka kala oshipu kutse tu simaneke Jehova nokupopya kwetu. (Jud. 15) Ihe ngashingeyi, kala wa tokola toko okunyanyudha Jehova ‘noohapu dhomokana koye.’ — Eps. 19:14.