1. Oshike hashi tu etele lela enyanyu?

 JEHOVA okwa hala tu kale twa nyanyukwa. Otu shi shi ngiini? Oshoka enyanyu oli li oshitopolwa shoshiyimati shombepo ye ondjapuki. (Gal. 5:22) Molwaashono okugandja ohaku tu etele enyanyu ku vule okutaamba, ohatu kala lela twa nyanyukwa ngele otwa longo nuudhiginini miilonga yokuuvitha nokukwathela aamwatate momikalo dhi ili nodhi ili. — Iil. 20:35.

2-3. (a) Ngaashi sha popiwa mAagalati 6:4, iinima iyali yini tayi tu kwathele tu kale twa nyanyukwa sho tatu longele Jehova? (b) Oshike tatu ka kundathana moshitopolwa shika?

² Ngaashi sha popiwa mAagalati 6:4, Paulus okwa tumbula iinima iyali mbyoka tayi tu ningitha tu kale twa nyanyukwa. (Lesha.) Shotango, elalakano lyetu nali kale okupa Jehova shoka sha dhenga mbanda. Ngele otwe shi ningi, nena otatu ka kala twa nyanyukwa. (Mat. 22:36-38) Oshitiyali, natu yande okwiiyelekanitha nayalwe. Ngele ohatu shi enditha nawa molwaashoka tu na uukolele nenge molwaashoka twa mona edheulo lya sha nenge tu na uunkulungu wontumba, natu pandule Jehova. Omolwashike? Omolwaashoka iinima ayihe mbyoka oye e yi tu pa. Shimwe ishewe, ngele yalwe ohaye shi enditha nawa miilonga yontumba yaJehova ye tu vule, natu kale twa nyanyukwa sho taya longitha iipewa yawo ye mu tange, pehala lyokwiitadha nenge lyokuhumitha komeho uuwanawa wawo yene. Pehala lyokuninga ethigathano nayo, natu kale hatu ilongo sha kuyo.

³ Moshitopolwa shika, otatu ka tala kwaashoka tashi vulu oku tu kwathela uuna twa teka omukumo molwaashoka itaatu vulu okulonga oshindji miilonga yaJehova. Otatu ka tala wo kunkene tatu vulu okulongitha nawa iipewa yetu mbyoka tashi vulika tu na, nokwaashoka tatu vulu okwiilonga kuyalwe.

4. Oshike tashi vulu oku tu teya omukumo? Gandja oshiholelwa.

⁴ Aapiya yamwe yaJehova ihaya vulu we okulonga oshindji miilonga ye, oshoka ngashingeyi oya kulupa nenge taya ehama, naashoka ohashi ya ningitha ya teke omukumo. Shoka osho sha li sha ningilwa omumwameme Carol. Okwa li e na uuthembahenda wokulonga koshitopolwa hoka ku na ompumbwe onene. Pethimbo e li miilonga mbyoka, okwa li e na aakonakonimbiimbeli 35, nokwa kwathela yamwe ya ninge ehumokomeho e tayi iyapulile Jehova, e taya ninginithwa. Carol okwa li he shi enditha nawa lela muukalele! Ihe okwa tameke okweehama noonkondo, nokwa kala ihaa zi mo we naanaa megumbo. Carol okwa ti: “Ondi shi kutya molwaashoka kandi na we uukolele, ihandi vulu okuninga niinima mbyoka yamwe haya vulu okuninga, ihe ondu uvite kutya nangame omudhiginini ngaashi yo. Ihandi vulu okuninga kehe shimwe shoka nda hala, naashika ohashi teya ndje omukumo.” Osha yela kutya Carol okwa hala okulongela Jehova ngaashi ta vulu, naashoka oshi shi lela okupandulwa! Otu na wo uushili kutya Kalunga ketu omunahenda oha pandula oonkambadhala dhe.

5. (a) Oshike tu na okudhimbulukwa uuna twa teka omukumo molwaashoka ihaatu longele we Jehova oshindji? (b) Ngaashi tu shi wete methano, omumwatate okwa kala ta ningi shike miilonga yaJehova?

⁵ Ngele omathimbo gamwe oho kala wa teka omukumo molwaashoka itoo vulu we okulongela Jehova ngaashi nale, ipula ngeyi: ‘Jehova okwa hala ndi ninge shike?’ Okwa hala wu ninge ngaashi to vulu monkalo moka wu li ngashingeyi. Natu tale koshiholelwa shika: Omumwameme gumwe gwomimvo 80 nasha oha kala a teka omukumo molwaashoka ita vulu we okulonga oshindji miilonga yokuuvitha ngaashi a li ha ningi sho e na omimvo 40 nasha. Oha dhiladhila kutya nonando ota pe Jehova shono sha dhenga mbanda, ihe Shi pandula. Mbela osho ngaa? Dhiladhila kwaashika: Ngele omumwameme ngoka okwa li ha pe Jehova shoka sha dhenga mbanda sho e na omimvo 40 nasha nosho wo kutya ngashingeyi osho ta ningi sho e na omimvo 80 nasha, ina etha po okupa Jehova shoka sha dhenga mbanda. Ngele otwa tameke okukala tu uvite kutya shono hatu ningile Jehova ihashi mu nyanyudha, otwa pumbwa okwiidhimbulukitha kutya oye he tu tulile po omithikampango dhaashono tashi mu nyanyudha. Ngele otwa kala hatu ningi ngaashi tatu vulu, Jehova ota ka tya: ‘Iyaloo!’ — Yelekanitha Mateus 25:20-23.

6. Oshike tatu vulu okwiilonga koshiholelwa shaMaria?

⁶ Ohatu kala twa nyanyukwa ngele ohatu gandja eitulomo kwaashono tatu vulu okuninga, ihe hakwaashoka itaatu vulu okuninga. Natu taleni koshiholelwa shomumwameme Maria, ngoka e na omukithi hagu mu ningitha kaa longe oshindji miilonga yokuuvitha. Petameko okwa li ha kala a polimana noku uvite kee na oshilonga. Ihe okwa dhiladhila kombinga yomumwameme gumwe gwomegongalo lyawo ngoka ha kala owala mombete, e ta tokola e ke mu kwathele. Maria okwa ti: “Onda ningi omalongekidho ndi ka kale handi uvitha nomumwameme ngoka okupitila mongodhi nomokunyola oontumwafo. Oshikando kehe twa longo pamwe, onda li handi ya kegumbo nda nyanyukwa nondi uvite ombili, sho nda yile ndi ka kwathele omumwameme.” Natse otatu vulu okugwedha ko kenyanyu lyetu ngele ohatu gandja eitulomo kwaashono tatu vulu okuninga pehala lyokugandja eitulomo kwaashono itaatu vulu okuninga. Ihe ongiini ngele otatu vulu okuninga oshindji nenge hatu shi enditha nawa miinima yimwe mokulongela kwetu Jehova?

7. Omuyapostoli Petrus okwa pa Aakriste omayele geni tage ya kwathele?

⁷ Montumwafo ye yotango, Petrus okwa li a ladhipike aamwahe ya longithe omagano kehe ngoka ye na nosho wo iipewa yawo ya tse omukumo ooitaali ooyakwawo. Okwa nyola a ti: “Kehe gumwe na longithe omagano ngoka e ga pewa  okukwatha yakwawo, ongaashi sho opalela aatonateli aawanawa yomagano gaKalunga gi ili nogi ili.” (1 Pet. 4:10) Natu kale hatu longitha omagano ngoka tu na. Inatu kala ihaatu shi ningi, molwaashoka twa tila kutya yamwe otaya ka kala ye tu tsila ondumbo nenge ya teke omukumo. Ngele osho twa ningi, itatu ka pa Jehova shoka sha dhenga mbanda.

8. Shi ikolelela kAakorinto yotango 4:6, 7, omolwashike tu na okuyanda okwiinoma kombinga yomagano getu?

⁸ Otwa pumbwa lela okulongitha omagano getu, ihe otu na okukala twa kotoka kaatu kale hatu inomo kombinga yomagano ngoka. (Lesha 1 Aakorinto 4:6, 7.) Pashiholelwa, otashi vulika wu kale wu shi nawa okutameka omakonakonombiimbeli. Onkee ino kala ho ongaonga nando okulongitha omagano goye ngoka! Ihe osha simana tu kale hatu dhimbulukwa kaatu inome kombinga yomagano ngoka. Natu tye andola omasiku opo ga zi ko owa mona oshimoniwa oshiwanawa muukalele sho wa tameke ekonakonombiimbeli. Otashi vulika wu kale wa halelela oku shi lombwela aamwatate naamwameme yomongundu yeni yomomapya. Ihe sho mwe ya mu tsakanene kongundu yeni, omumwameme gumwe okwa tameke ta hokolola kombinga yoshimoniwa she sho a vulu okugandja oshifo. Okwa gandja oshifo, ngoye owa tameke ekonakonombiimbeli. Oto ka ninga po shike? Owu shi kutya ongundu yeni otayi ka tsuwa omukumo koshimoniwa shoye, ihe oto vulu oku ke shi hokolola pompito yilwe tayi opalele, opo kuu yone po ombili yomumwameme ngoka a gandja oshifo. Shoka osho oshinima shopahole to vulu okuninga. Ihe ino etha po nando okutameka omakonakonombiimbeli. Owu na omagano, onkee ga longitha!

9. Omagano getu otu na oku ga longitha ngiini?

⁹ Natu dhimbulukwe kutya omagano kehe ngoka tu na gokuninga iinima yi li noyi ili, otwe ge pewa kuKalunga. Onkee natu kale hatu ga longitha tu tunge egongalo, ihe haku ihumitha tse yene komeho. (Fil. 2:3) Uuna tatu longitha oonkondo dhetu nosho wo iipewa yetu mokulonga ehalo lyaKalunga, otashi ke tu nyanyudha. Itatu ka kala twa nyanyukwa sho tatu longo oshindji tu vule yalwe, ihe omolwaashoka tatu longitha omagano getu tu simanekithe Jehova.

10. Omolwashike kaashi li pandunge okwiiyelekanitha nayalwe?

¹⁰ Ngele ina kotoka, omuntu otashi vulika a tameke okuyelekanitha shoka e shi lela nawa okuninga naashoka gulwe kee shi nawa. Pashiholelwa, omumwatate gumwe otashi vulika e shi okugandja nawa iipopiwa yomontaneho. Shoka osho ha vulu okuninga. Ihe momutima gwe otashi vulika a kale a dhina omumwatate ngoka kee shi oku yi gandja nawa. Ihe omumwatate ngoka otashi vulika e shi nawa okuyakula aayenda maandjawo, okuputudha oyana, nenge ha longo nuulaadhi miilonga yokuuvitha. Inatu pandula tuu sho tu na  aamwatate naamwameme oyendji ye na omagano gi ili nogi ili nohaye ga longitha ya longele Jehova nokukwathela yalwe!

11. Omolwashike tu na okukambadhala okulandula oshiholelwa shaJesus?

¹¹ Nonando otu na okuyanda okwiiyelekanitha nayalwe, otatu vulu okwiilonga ko sha kaapiya yaJehova aadhiginini. Pashiholelwa, natu ka taleni koshiholelwa shaJesus. Nonando okwa li a gwanenena, otatu vulu okwiilonga ko sha kuukwatya we nokiinima iiwanawa mbyoka a li a ningi. (1 Pet. 2:21) Ngele otwa ningi ngaashi tatu vulu tu landule oshiholelwa she, otatu ka kala aapiya yaJehova ye li hwepo notatu ka pondola lela miilonga yokuuvitha.

12-13. Oshike tatu ilongo komukwaniilwa David?

¹² Moohapu dhaKalunga omu na iiholelwa iiwanawa yaalumentu naakiintu oyendji aadhiginini, mboka tatu vulu okuholela nonando kaya li ya gwanenena. (Heb. 6:12) Dhiladhila komukwaniilwa David, ngoka Jehova e mu popi a ti: “Onde mu hokwa” nenge ngaashi Ombiimbeli yilwe tayi ti: “Omuntu ngoka ha nyanyudha ndje noonkondo.” (Iil. 13:22) Ihe nonando ongawo, David ka li a gwanenena. Okwa li nokuli a yono sha kwata miiti. Ihe oku li oshiholelwa oshiwanawa kutse. Omolwashike mbela? Omolwaashoka sho a li a pukululwa, kali a kambadhala okwiipopila. Pehala lyaashono, okwa taamba ko omayele ga kwata miiti ngoka a pewa nokwa li i iyele lela ombedhi omolwomayono ge. Oshizemo, Jehova okwe mu dhimine po. — Eps. 51:3, 4, 10-12.

¹³ Otatu vulu okwiilonga ko sha kuDavid mokwiipula omapulo ngaka: ‘Ohandi inyenge ngiini uuna nda pewa omayele? Mbela ohandi zimine ngaa nziya omapuko gandje, nenge ohandi kambadhala okwiipopila? Mbela ohandi pe yalwe nziya ombedhi? Ohandi ningi ngaa ngaashi tandi vulu kaandi endulule omapuko gandje?’ Oto vulu okwiipula omapulo ga faathana sho to lesha mOmbiimbeli kombinga yaalumentu naakiintu yalwe aadhiginini. Mbela nayo oye li ye na uupyakadhi wa fa woye? Oya li ya ulike omaukwatya omawanawa geni? Mehokololo kehe to lesha, ipula ngeyi: ‘Ongiini tandi vulu okukala nda fa omupiya gwaJehova nguka omudhiginini?’

14. Uuwanawa wuni tatu ka mona ngele ohatu tala kiiholelwa yooitaali ooyakwetu?

¹⁴ Otatu vulu wo okwiilonga ko sha kooitaali ooyakwetu, kutya nduno aagundjuka nenge aakokele. Pashiholelwa, sho to tala olye gwomegongalo lyeni ti idhidhimikile nuudhiginini emakelo lyontumba, tashi vulika ha thiminikwa koomakula, ta patanekwa kaakwanezimo, nenge kee na uukolele? Mbela uukwatya wuni uuwanawa ho mono momuntu ngono mbono nangoye wa hala okukokeka lela? Ngele owa tala koshiholelwa she oshiwanawa, otashi vulika wu ilonge ko kuye iinima  mbyoka tayi ku kwathele wu idhidhimikile omaudhigu goye. Inatu pandula tuu sho tu na iiholelwa iiwanawa yaapiya yaJehova aadhiginini pethimbo lyetu, mbyoka tatu vulu okuholela! Otatu ka kala twa nyanyukwa lela ngele otwe ya holele! — Heb. 13:7; Jak. 1:2, 3.

15. Omuyapostoli Paulus okwa li a gandja omayele geni ngoka taga vulu oku tu kwathela tu tsikile okukala twa nyanyukwa sho tatu longele Jehova?

¹⁵ Opo tu humithe komeho ombili nuukumwe megongalo, kehe gumwe gwomutse okwa pumbwa okuninga ngaashi ta vulu. Natu taleni koshiholelwa shAakriste yomethelemumvo lyotango. Oya li ye na omagano niinakugwanithwa yi ili noyi ili. (1 Kor. 12:4, 7-11) Ihe iinima mbyoka kaya li ye ya ningitha ya ninge ethigathanopo nenge kaaya kale we ye na uukumwe. Pehala lyaashono, Paulus okwa ladhipike kehe gumwe gwomuyo a ninge shoka sha pumbiwa a ‘tunge olutu lwaKristus.’ Paulus okwa li a nyolele Aaefeso a ti: “Oshilyo kehe pehala lyasho ngele tashi longo, ngashika shi na okulonga, nena olutu aluhe otalu koko notalu itungu lwo lwene e talu kala talu pangelwa kohole.” (Ef. 4:1-3, 11, 12, 16) Mbono ya li ya ningi shoka Paulus a ti oya li ya humitha komeho ombili nuukumwe megongalo, oshinima shoka hatu mono kunena momagongalo getu.

16. Oshike tu na okukala twa tokola toko okuninga? (Aahebeli 6:10)

¹⁶ Kala wa tokola toko waa iyelekanithe nayalwe. Pehala lyaashono, ilonga koshiholelwa shaJesus, e to kambadhala okuholela uukwatya we. Ilonga wo kiiholelwa iiwanawa yaapiya yaJehova aadhiginini mboka ya popiwa mOmbiimbeli nosho wo yopethimbo lyetu. Sho to tsikile okuninga ngaashi to vulu, kala wu na omukumo kutya Jehova ‘oku shi kwiinekelwa. Ita dhimbwa iilonga nohole yoye.’ (Lesha Aahebeli 6:10.) Tsikila okukala wa nyanyukwa sho to longele Jehova. Oha kala a nyanyukwa sho e ku wete to ningi ngaashi to vulu wu mu nyanyudhe.