PETHIMBO lyaPaulus kakwa li ku na oosikepa hadhi humbata aantu oyo ayeke. Omuntu ngele okwa hala okuya nosikepa, okwa li ha pula ooyakwawo ngele oye shi osikepa yokututa iinima ya uka lwokombinga hoka ta yi, ndjoka tayi vulu okufaalela aantu. (Iil. 21:2, 3) Nonando osikepa ndjoka kaya li ya uka lela hoka omuntu ta yi, petulilosikepa mpoka ya li tayi ka thikama, omuntu okwa li ha vulu okukonga po yimwe ndjoka tayi mu fala popepi naahoka a hala.​— Iil. 27:1-6.

Oosikepa odha li owala hadhi hingwa pomathimbo gamwe momumvo, nokadha li dhi na owili yokondandalunde yokufala iinima. Kakele konkalo yombepo kaayi li nawa, aahingi yoosikepa kaya li haya vulu okuya molweendo omolwiidhila, ngaashi uuna ya uvu ekola tali lili li li koongodhi dhosikepa yawo nenge uuna ya mono osikepa yontumba ya teka. Oya li owala haya yi molweendo, uuna ya mono ayihe yi li nawa. Uuna omuntu a mono osikepa ndjoka tayi vulu oku mu faalela, okwa li ha yi petulilosikepa niinima ye, a tegelele pu ningwe etseyitho kutya osikepa oyi li pokuya.

Omunandjokonona gwedhina Lionel Casson, okwa ti: “MuRoma, osha li oshipu kaantu okumona osikepa ndjoka tayi ya faalele, nokaya li ye na oku yi konga. Etulilosikepa lyoshilando shoka, olya li pehala mpoka omulonga gwaTiber gwa tsakanena nefuta. Mondoolopa Ostia ndjoka ya li popepi naRoma, omwa li mu na ehala enene lya dhingolokwa koombelewa. Odhindji dhomoombelewa ndhoka, odha li dhaamboka ye na oosikepa dhokututa iinima, ngaashi: aahingisikepa yokuNarbonne [ngashingeyi hashi ithanwa Fulaanisa] oya li ye na mo yimwe, aahingisikepa yokuCarthage [ngashingeyi hashi ithanwa Tunisia] nayo oya li ye na mo yimwe, nosho tuu. Kehe ngoka a li a hala okufaalelwa, okwa li e na oku ka pula poombelewa dhoondoolopa ndhoka dhi li mondjila yaahoka a uka, ngele opu na osikepa ya uka ko.”

Oosikepa ndhoka dha li hadhi faalele naantu, odha li hadhi ya thikitha mbala, ihe odha li wo dhi na uupyakadhi. Iikando yontumba, Paulus okwa li i iyadha miiponga yeteko lyosikepa, momalweendo ge guutumwa.​— 2 Kor. 11:25.