1-2. (a) Shi ikolelela kAaefeso 6:16, omolwashike twa pumbwa “eitaalo” lya kola? (b) Omapulo geni tatu ka kundathana?

MBELA owu na ngaa “eitaalo”? (Lesha Aaefeso 6:16.) Osha yela kutya owu li na. Ngaashi oshikandekitho hashi gamene oshitopolwa oshinene sholutu, eitaalo lyoye nalyo otali ku gamene kuu nwethwe mo kiinima iiwinayi yomuuyuni mbuka, ngaashi oluhondelo, elongithonkondo nokukehe shimwe oshiwinayi.

² Nonando ongawo, otu li ‘momasiku gahugunina,’ neitaalo lyetu otali ka tsikila okumakelwa. (2 Tim. 3:1) Ongiini to vulu okukonakona eitaalo lyoye, opo wu shilipaleke kutya olya kola? Oshike to vulu okuninga, opo wu kaleke eitaalo lyoye lya kola? Natu ka taleni omayamukulo gomapulo ngoka.

3. Aakwiita iikandekitho yawo oya li haye yi ningi shike, nomolwashike?

³ Pethimbo lyOmbiimbeli, olundji aakwiita oya li haya kala niikandekitho ya hondjelwa oshipa. Oya li haye yi gwayeke omagadhi, opo ya gamene oshipa nokukeelela oshitenda kaashi ninge olusu. Ngele omukwiita okwa mono kutya oshikandekitho she osha yonuka, okwa li ha shilipaleke kutya osha ningwa nawa, opo a kale aluhe i ilongekidhila olugodhi talu landula ko. Oshiholelwa shoka otashi vulu ngiini oku ku kwathela, ngele tashi ya peitaalo lyoye?

4. Omolwashike wu na okukonakona eitaalo lyoye, nongiini wu na oku shi ninga?

⁴ Ngaashi aakwiita yopethimbo lyonale, owu na aluhe okukonakona nokusila oshimpwiyu eitaalo lyoye ndyoka li li oshikandekitho,  opo wu kale aluhe wi ilongekidhila olugodhi. Tu li Aakriste, otatu kondjo olugodhi lwopambepo, naatondi yetu oya kwatela mo oombepo dhuuwinayi. (Ef. 6:10-12) Kapu na gumwe ta vulu okusila oshimpwiyu eitaalo lyoye. Ongiini to vulu okukala nuushili kutya owi ilongekidha okutaalela omamakelo? Shotango, owu na okugalikana Kalunga e ku kwathele. Opo nduno, owa pumbwa okulongitha Oohapu dhaKalunga dhi ku kwathele wu itale ko ngaashi Kalunga e ku tala ko. (Heb. 4:12) Ombiimbeli otayi ti: “Inekela Omuwa nomutima gwoye aguhe noino igameka koondunge dhoye mwene.” (Omayel. 3:5, 6) Wu na shoka momadhiladhilo, omolwashike itoo talulula omatokolo gamwe ngoka opo wa ningi? Pashiholelwa, mbela owa li wu na uupyakadhi wopashimaliwa? Mbela owa li wa dhimbulukwa euvaneko lyaJehova ndyoka lyi li mAahebeli 13:5, ndyoka tali ti: “Itandi ku etha nando; itandi ku thigi po”? Mbela olya li lye ku tsu omukumo kutya Jehova ote ke ku kwathela? Ngele osho, shoka otashi ulike kutya oho kaleke eitaalo lyoye monkalo ombwanawa.

5. Oshike tashi vulika wu mone, uuna wa konakona eitaalo lyoye?

⁵ Otashi vulika wu kale wa kuminwa shoka wa mona, sho wa konakona nuukeka eitaalo lyoye. Otashi vulika wu mone mpoka wa nkundipala, shoka inoo kala we shi nongela. Pashiholelwa, otashi vulika wu mone kutya iimpwiyu inaayi pumbiwa, iifundja netekomukumo oya nkundipaleka eitaalo lyoye. Ngele owi iyadha monkalo ndjoka, ongiini to vulu okugamena eitaalo lyoye kaali nkundipalekwe we?

6. Iimpwiyu yimwe yini iiwanawa?

⁶ Iimpwiyu yimwe iiwanawa. Pashiholelwa, oshi li nawa okwiipula kombinga yokunyanyudha Jehova naJesus. (1 Kor. 7:32) Ngele otwa yono eyono lya kwata miiti, ohatu kala tatu ipula kombinga yokukala ishewe tu na ekwatathano ewanawa naKalunga. (Eps. 38:18) Ohatu ipula wo nokunyanyudha ookuume ketu kopandjokana nonokusila oshimpwiyu onkalonawa yaantu yaandjetu noyooitaali ooyakwetu. — 1 Kor. 7:33; 2 Kor. 11:28.

7. Shi ikolelela kOmayeletumbulo 29:25, omolwashike inaatu pumbwa okutila aantu?

⁷ Mepingathano naashono, iimpwiyu inaayi pumbiwa, otayi vulu okunkundipaleka eitaalo lyetu. Pashiholelwa, otashi vulika tu kale tatu ipula aluhe kombinga yokukala tu na iikulya ya gwana nomizalo. (Mat. 6:31, 32) Ngele ohatu ipula ngawo, otashi vulika tu gandje eitulomo kiinima yopamaliko. Otashi vulika nokuli tu tameke okukala tu hole iimaliwa. Ngele otwi iyethele monkalo ndjoka, eitaalo lyetu muJehova otali ka tameka okunkundipala notashi ka yona po uukuume wetu naye. (Mark. 4:19; 1 Tim. 6:10) Nenge tashi vulika tu ninge iihakanwa yiimpwiyu yilwe inaayi pumbiwa, ngaashi okukala tatu ipula unene kombinga yokukala twa hokiwa kuyalwe. Otashi vulika tu kale twa tila okushekwa nenge okuhepekwa kaantu, pehala lyokukala twa tila okuyemateka Jehova. Opo kaatu kale tu uvite ngawo, otu na okwiindila Jehova e tu pe eitaalo nuulaadhi mboka twa pumbwa, tu vule okwiidhidhimikila omashongo. — Lesha Omayeletumbulo 29:25; Luk. 17:5.

8. Otu na okwiinyenga ngiini, ngele tatu lombwelwa iifundja?

⁸ Satana, ‘he yiifundja,’ oha longitha mboka ye li kohi yepangelo lye, ya taandeleke iifundja kombinga yaJehova nosho wo yaamwatate naamwameme. (Joh. 8:44) Pashiholelwa, aashunimonima ohaya taandeleke iifundja niinima ya goyokithwa kombinga yehangano lyaJehova okupitila kointaneta, kotiivii nomiikundaneki yilwe. Iifundja mbyoka oyi li yimwe ‘yomiikuti yaSatana ya hwama omulilo.’ (Ef. 6:16) Otu na okwiinyenga ngiini, ngele gumwe te tu lombwele iifundja ya tya ngawo? Katu na okupulakena  kuye! Omolwashike? Omolwaashoka otu na eitaalo muJehova notwi inekela aamwatate. Katu na okweendathana naashunimonima. Katu na okweetha gumwe nenge sha, mwa kwatelwa okatalekonawa, yi tu ningithe tu tompathane nayo.

9. Etekomukumo otali vulu oku tu guma ngiini?

⁹ Etekomukumo otali vulu okunkundipaleka eitaalo lyetu. Itatu vulu okwiipwililikila omaupyakadhi getu gopaumwene, oshoka itashi ka kala shi li pandunge. Odhoshili kutya omathimbo gamwe, otashi vulika tu kale twa teka omukumo. Ihe katu na okweetha omaupyakadhi getu, ge tu gwilile po. Ngele otwe shi ningi, otashi vulika tu dhimbwe etegameno ewanawa ndyoka Jehova e tu pa. (Eh. 21:3, 4) Etekomukumo otali vulu oku tu mana oonkondo noku tu tyololokitha. (Omayel. 24:10) Ihe shoka kashi na oku tu ningilwa.

10. Oshike to ilongo montumwafo ndjoka ya nyolwa komumwameme gumwe?

¹⁰ Natu taleni nkene omumwameme gumwe gwomoAmerika a tsikile okukaleka po eitaalo lye, nonando ota sile oshimpwiyu omusamane gwe ngoka ta ehamenene. Montumwafo ndjoka a nyolela koombelewa dhetu oonene, okwa ti: “Omathimbo gamwe, onkalo ohayi kala ye tu gwilila po nohatu kala twa teka omukumo, ihe einekelo lyetu olya kola. Onda nyanyukwa noonkondo komauyelele agehe ngoka twa kala nokupewa, opo tu koleke eitaalo lyetu nokukala tu na omukumo. Otwa pumbwa lela omayele ngoka nosho wo etsomukumo. Iinima mbyoka ohayi tu kwathele tu pule komeho notu idhidhimikile omamakelo ngoka Satana te tu etele.” Mwaashoka sha popiwa komumwameme nguka, otatu ilongo mo kutya otatu vulu okusinda etekomukumo! Ngiini mbela? Kala ho tala ko omaupyakadhi goye ge li emakelo lya za kuSatana. Tseya kutya Jehova oye Onzo yehekeleko. Kala wo ho pandula iikulya yopambepo mbyoka he tu pe.

11. Opo tu tale kutya eitaalo lyetu oli li monkalo ombwanawa, omapulo geni tu na okwiipula?

¹¹ Mbela owu wete kutya owa pumbwa okukoleka eitaalo lyoye shi vulithe nale? Momukokomoko gwoomwedhi oonshona opo dha piti, mbela owa li ngaa wa vulu okuyanda okukala niimpwiyu inaayi pumbiwa? Mbela owa li wa tindi okupulakena nenge okutompathana naashunimonima kombinga yiifundja mbyoka haya taandelitha?  Mbela owa li ngaa wa vulu okwiidhidhimikila etekomukumo? Ngele osho, osha yela kutya eitaalo lyoye oli li monkalo ombwanawa, ano lya kola. Ihe otu na okukala twa kotoka, molwaashono Satana oku na iikondjitho yilwe mbyoka ha kambadhala okulongitha, e tu makele. Ngashingeyi natu ka kundathaneni shimwe shomuyo.

12. Ohole yiinima yopamaliko otayi vulu oku tu ningitha tu ninge shike?

¹² Ohole yiinima yopamaliko otayi vulu okunkundipaleka eitaalo lyetu noku tu ningitha kaatu longele Jehova neitulomo. Omuyapostoli Paulus okwa ti: “Omukwiita ngoka e li molugodhi, ihi ipyakidhile noompumbwe dhilwe, oshoka okwa hala okwoopalela aluhe omuwiliki gwe.” (2 Tim. 2:4) Aakwiita Aaroma kaya li haya pitikwa ya longe iilonga yilwe. Oshike sha li tashi vulu okuningwa po, ngele omukwiita ina landula elombwelo ndyoka?

13. Omolwashike omukwiita kaa li a pumbwa okukala i ipyakidhila nokulanditha?

¹³ Dhiladhila kwaashika. Natu tye nduno ethimbo lyongula ongundu yaakwiita oya kala tayi idheula, opo ya ye molugodhi, ihe omukwiita gumwe ke po. Omukwiita ngoka okwi ipyakidhila nokulanditha iikulya mondoolopa. Kongulohi, aakwiita oya kala nokutala iikondjitho yawo ngele oyi li monkalo ombwanawa nokuupika omagongamwele gawo. Ihe omukwiita ngoka ha landitha, okwa kala i ipyakidhila nokulongekidha iikulya mbyoka ta ka landitha esiku lya landula ko. Ongula sho kwa shi, omutondi okwe ya ponokele inaashi tegelelwa. Omukwiita guni ta adhika i ilongekidhila olugodhi nokukala a hokiwa komuwiliki gwawo? Ando nangoye omo wa li molugodhi ndwoka, mbela oto ka kala wa hala okutegama nomukwiita ngoka i ilongekidhila olugodhi nenge oongoka a kala i ipyakidhila nokulanditha iikulya?

14. Tu li aakwiita yaKristus, oshike twa lenga?

¹⁴ Ngaashi aakwiita mboka yi ilongekidhila olugodhi, inatu hala sha shi tu imbe okugandja eitulomo kelalakano lyetu lya simanenena, ano okukala twa hokiwa kAawiliki yetu, Jehova naKristus. Shoka otwe shi tala ko shi na ongushu lela, shi vule kehe shoka tatu vulu okumona muuyuni mbuka waSatana. Ohatu shilipaleke kutya otu na ethimbo noonkondo ndhoka twa  pumbwa, tu longele Jehova nokukaleka eitaalo lyetu nosho wo iikondjitho yetu yilwe yopambepo monkalo ombwanawa.

15. Elondodho lini Paulus e tu pa, nomolwashike?

¹⁵ Natu kale aluhe twa tonata! Omolwashike? Omuyapostoli Paulus okwa londodha kutya “mboka ya hala okuninga aayamba,” otaya ka “puka mo mondjila yeitaalo.” (1 Tim. 6:9, 10) Uutumbulilo “puka mo” otawu ulike kutya otatu vulu okupiyaganekwa, ngele otwa kambadhala okwiikongela iinima mbyoka inaayi simana. Shoka otashi vulu nduno oku tu ningitha tu kokeke momitima dhetu ‘uuhalu uuwinayi wuugoya.’ Pehala lyokweetha uuhalu mboka wu koke momitima dhetu, otu na oku wu tala ko kutya owu li iikondjitho mbyoka tayi vulu oku tu etela oshiponga.

16. Ehokololo ndyoka li li muMarkus 10:17-22, oli na oku tu inyengitha tu dhiladhile komapulo geni?

¹⁶ Natu tye nduno otu na iimaliwa ya gwana okulanda iinima yopamaliko oyindji. Mbela osha puka okulanda iinima mbyoka twa hala, ihe inatu yi pumbwa naanaa? Aawe. Ihe dhiladhila komapulo ngaka: Nonando otatu vulu okulanda oshinima shontumba, mbela otu na ngaa shili ethimbo noonkondo dhoku shi longitha noku shi kaleka po? Mbela otashi vulika tu tameke okukala tu hole unene iinima yetu yopamaliko? Mbela ohole yokuhola iinima yopamaliko otayi vulu oku tu ningitha tu inyenge ngaashi omulumentu  omugundjuka, ngoka inaa pulakena kehiyo lyaJesus lyokulonga oshindji miilonga yaKalunga? (Lesha Markus 10:17-22.) Oshi li nawa kaatu indumbile iinima, e tatu longitha ethimbo noonkondo dhetu mokulonga ehalo lyaKalunga.

17. Oshike tu na okukala aluhe tu shi?

¹⁷ Natu kale aluhe tu shi kutya otu li molugodhi, nokukala twi ilongekidha okukondja esiku kehe. (Eh. 12:17) Odhoshili kutya aamwatate naamwameme itaya vulu oku tu humbatela ko koshikandekitho shetu sheitaalo. Otse yene tu na oku shi ninga.

18. Omolwashike aakwiita yopethimbo lyonale ya li haya shilipaleke kutya oya dhiginina iikandekitho yawo?

¹⁸ Pethimbo lyonale, omukwiita okwa li ha simanekwa, omolwuulaadhi we molugodhi. Ihe oha kala a sa ohoni, ngele okwa galukile kegumbo kee na oshikandekitho she. Omunandjokonona Omuroma Tacitus okwa nyola a ti: “Ngele omukwiita okwa thigi ko oshikandekitho she, osha li ohoni onene.” Ndyoka olyo etompelo limwe kutya omolwashike aakwiita ya li haya shilipaleke kutya oya dhiginina iikandekitho yawo.

19. Ongiini tatu vulu okukala twa dhiginina oshikandekitho shetu sheitaalo?

¹⁹ Ohatu koleke eitaalo lyetu, mokuya kokugongala kwopaKriste pandjigilile nomokulombwela yalwe kombinga yedhina lyaJehova nUukwaniilwa we. (Heb. 10:23-25) Shimwe ishewe, ohatu galikana nokulesha Oohapu dhaKalunga esiku kehe, e tatu tula miilonga shoka tadhi tu lombwele. (2 Tim. 3:16, 17) Onkee ano, kapu na oshikondjitho shoka Satana ha longitha tashi ke tu etela oshiponga tashi kalelele. (Jes. 54:17) ‘Oshikandekitho shetu sheitaalo’ otashi ke tu gamena. Otatu ka kala twa kola meitaalo, nokulonga twa hangana naamwatate naamwameme. Otatu ka sindana molugodhi lwetu lwesiku kehe. Ihe shoka sha simanenena, otatu ka kala tu na uuthembahenda wokukala kombinga yaJesus, sho ta ka sindana molugodhi lwawo naSatana pamwe naalanduli ye. — Eh. 17:14; 20:10.