Oto vulu okukala wa nyanyukwa ngashingeyi
OTO VULU oku ka kala nonkalamwenyo ombwanawa monakuyiwa moka aantu itaaya ka kala haya ehama, ihaaya kulupa noihaya si. Nonando ongawo, onkalamwenyo kunena oyu udha oonkalo oombwiinayi nomaupyakadhi. Oshike tashi vulu oku ku kwathela ngashingeyi wu kale wa nyanyukwa? Ombiimbeli otayi gandja ewiliko ndyoka tali ku kwathele wu kale wa nyanyukwa nowa gwanenwa. Tala komashongo gamwe ngoka taga vulu oku ku adha monkalamwenyo, nankene Ombiimbeli tayi vulu oku ku kwathela.
OKUKALA WA GWANENWA
Ombiimbeli otayi ti: “Mokukala kweni inamu mangwa kohole yeliko, ihe kaleni mwa gwana naashoka mu na.” — Aahebeli 13:5.
Muuyuni omu na iinima oyindjiyindji mbyoka aantu haya ti otwa pumbwa okukala tu yi na. Ihe Ombiimbeli otayi ti kutya otatu vulu okukala ‘twa gwana naashoka tu na.’ Ngiini mbela?
Henuka ‘ohole yeliko.’ Aantu ohaya vulu okuninga kehe shimwe kutya nduno otashi yono po uukolele wawo, omagumbo gawo, ekwatathano lyawo nayalwe, omikalo dhawo omiwanawa nuudhiginini wawo ‘omolwohole yeliko.’ (1 Timoteus 6:10) Itashi yemateke tuu! Kutya nduno omuntu oku longe shi thike peni, nakuhola iimaliwa “ihe yi kuta.” — Omuuvithi 5:10.
Simaneka aantu, ihe hainima. Iinima yopamaliko, oyi na oshilonga shili. Ihe iinima kayi na ohole noihayi tu pandula; aantu oyo owala haya vulu oku shi ninga. Okukala wu na “kuume” kashili, ohashi ku kwathele wu kale wa gwanenwa monkalamwenyo. — Omayeletumbulo 17:17.
OTATU VULU OKUKALA TWA NYANYUKWA MONKALAMWENYO, NGELE OHATU LANDULA OMAYELE GOMBIIMBELI
UUNA KUU NA UUKOLELE
Ombiimbeli otayi ti: “Omutima gwa nyanyukwa otagu eta uundjangandjele.” — Omayeletumbulo 17:22.
Ngaashi omuntu e na “uundjangandjele,” enyanyu otali vulu oku ku kwathela wi idhidhimike uuna to ehama. Ihe ongiini tatu vulu okukala twa nyanyukwa ngele katu na uukolele?
Kala ho pandula. Ngele otwa kala owala hatu dhiladhila kombinga yuupyakadhi wetu, “omasiku . . . agehe” otaga kala owala omawinayi. (Omayeletumbulo 15:15) Pehala lyaashono, Ombiimbeli otayi ti: “Hambeleleni ihe Kalunga aluhe.” (Aakolossa 3:15) Kala ho pandula nomiinima iishona. Iinima ngaashi okutala etango tali ningine, okapepo ka talala nawa, okwiimemeha kwagumwe, oyo yimwe hayi vulu oku tu etela enyanyu.
Ningila yalwe uuwanawa. Nonando katu na uukolele, “okugandja oku na elago ku vule okutaamba.” (Iilonga 20:35) Uuna yalwe ye tu pandula molwoshinima shoka twe ya ningila, ohatu kala twa nyanyukwa noihatu kala tatu dhiladhila unene kombinga yomaupyakadhi getu. Otatu vulu okukala nonkalamwenyo yi li nawa, ngele ohatu kwathele yalwe ya kale nonkalamwenyo yi li nawa.
OKUKOLEKA ONDJOKANA
Ombiimbeli otayi ti: ‘Yoololeni iinima mbyoka yi na oshilonga unene.’ — Aafilippi 1:10, yelekanitha NW.
Aaihokani mboka ihaaya kala ethimbo pamwe, ohashi vulika shi ningithe ekwatathano lyawo li kale inaali kola. Oshi li pandunge aasamane naakulukadhi ya pitithe komeho ondjokana yawo, ndjoka oyo yimwe yomiinima mbyoka yi na oshilonga unene monkalamwenyo.
Ningeni iinima pamwe. Pehala lyokuninga iinima ongoye awike, omolwashike itaamu ningi omalongekidho mu yi ninge pamwe? Ombiimbeli otayi ti: “Yaali ye vule gumwe.” (Omuuvithi 4:9) Otamu vulu okuteleka, oku ka enda, okuninga omadhewo nenge mu ninge shimwe shoka mu hole pamwe.
Ulika kutya owu hole kuume koye kopandjokana. Ombiimbeli otayi ladhipike omusamane nomukulukadhi ya kale ye holathane nohaya simanekathana. (Aaefeso 5:28, 33) Okwiimemeha, okwiipapatela nohole, nenge okwiipa omagano nenge omashona, otashi vulu okukoleka lela ondjokana yeni. Omu na wo okwiigwanithila po omahalo geni gopamilalo one amuke yaali. — Aahebeli 13:4.
Opu na ishewe uuyelele mbuka
EGUMBO OTALI VULU OKUKALA EHALA LYOMBILI
Pula ekwatho kuKalunga mu kale mu na ombili mondjokana
Omapulo gaali ngoka taga vulu oku ku kwathela wu hwepopaleke ondjokana yeni.
KOMBINGA YETU
Pula ekonakonombiimbeli
Kundathaneneni epulo lyopaMbiimbeli nenge wu ilonge oshindji kombinga yOonzapo dhaJehova.
