NONANDO okwaavulika kwaavali yetu yotango, Adam naEva, okwe etela aantu ayehe uulunde neso, shoka inashi lundulula elalakano lyaKalunga li na ko nasha naantu. Kalunga okwe shi popya e shi endulula mOohapu dhe, Ombiimbeli, kutya elalakano lye inali lunduluka.

• “Aayuuki otaa ka thigulula evi e taa kala mo sigo aluhe.” — Episalomi 37:29.

• “Omuwa Omupangeliawike ota ka hanagula po eso sigo aluhe. Ota ka theta po omahodhi momeho gaayehe.” — Jesaja 25:8.

• “Omutondi gwahugunina e na okusindwa, oye eso.” — 1 Aakorinto 15:26.

• “Oko noitaku ka kala we eso, oluhodhi, elilo nenge uuwehame.” — Ehololo 21:4.

Ongiini Kalunga ta ka “hanagula po eso” ndyoka li li omutondi, e te li ‘sindi’? Ombiimbeli oye shi popya sha yela kutya “aayuuki otaa ka kala . . . sigo aluhe.” Ihe otayi ti wo kutya “kombanda yevi kaku na omuyuuki ngoka ta longo uuwanawa auke.” (Omuuvithi 7:20) Sho Kalunga ta ka hanagula po eso, mbela ina tegelela we aantu inaaya gwanenena ya gwanithe po omithikampango dhe, opo ya ka mone omwenyo gwaaluhe? Hasho nando! Ina tegelela aantu kaaye dhi gwanithe po, oshoka ‘Kalunga iha fundju.’ (Titus 1:2) Kalunga ota ka ninga po nduno shike, opo a gwanithe po elalakano lye lyopahole li ko nasha naantu?

Jehova Kalunga okwa gandja omagano gopahole gekulilo, opo a hupithe aantu meso. Ekulilo oyo ofuto ndjoka hayi gandjwa yi thike naanaa pwaashoka sha kanithwa nenge opo uuyuuki wu gwanithwe po. Molwaashoka aantu ayehe aalunde noya tokolelwa eso, Ombiimbeli otayi shi popi sha yela tayi ti: “Omuntu ita vulu okwiihupitha; ita vulu okufuta Kalunga, e mu kaleke nomwenyo, oshoka ofuto molwomwenyo gwomuntu onene noonkondo. Shoka te shi futu ando, itashi gwana.” — Episalomi 49:7, 8.

Uuna omuntu inaa gwanenena a si, oha futile po owala oondjo dhe mwene; iha vulu okwiihupitha ye mwene, ye ita vulu wo okufutila po oondjo dhayalwe. (Aaroma 6:7) Otwa li twa pumbwa omuntu ngoka a gwanenena kee na nando ondjo yasha, a gandje omwenyo gwe, hamolwoondjo dhe mwene, ihe omolwoondjo dhetu. — Aahebeli 10:1-4.

Ndyoka olyo elongekidho Kalunga a li e na okuninga. Okwa tumu Omwana, Jesus, okuza megulu e ta valwa e li omuntu a gwanenena kombanda yevi, ngoka kee na nando uulunde washa. (1 Petrus 2:22) Jesus okwa ti kutya okwe ya ‘okugandja omwenyo gwe, a hupithe oyendji.’ (Markus 10:45) Okwa si opo a sinde eso ndyoka li li omutondi, opo tu vule okumona omwenyo gwaaluhe. — Johannes 3:16.

Kunena, omahunganeko gOmbiimbeli sho taga gwanithwa, otu li ‘momathimbo omadhigu okukaliwa mugo,’ shoka tashi ulike kutya otu li ‘momasiku gahugunina’ guuyuni mbuka wa piyagana. (2 Timoteus 3:1, yelekanitha NW) Pehulilo lyomasiku ngaka gahugunina, ‘aakeenakonasha naKalunga otaa ka pangulwa notaa ka yonagulwa po.’ (2 Petrus 3:3, 7) Ihe aantu mboka ye hole Kalunga otaya ka hupa pehanagulo ndyoka, notaya ka mona ‘omwenyo gwaaluhe.’ — Mateus 25:46.

Aantu yalwe omamiliyona otaya ka vula okumona omwenyo gwaaluhe sho taya ka yumudhwa. Jesus okwa li a yumudha omuntu, sho a talele po oshilando Nain. Okwa li u “uvile olukeno” omuselekadhi gwomoshilando shoka ngoka a li a silwa omwanamati  epona, onkee okwe mu yumudha. (Lukas 7:11-15) Omuyapostoli Paulus okwa popi ishewe a ti: “Ondi na . . . etegameno . . . kutya Kalunga ota ka yumudha aantu ayehe kuusi, naawanawa naawinayi.” Kalunga oku ulike kutya oku hole aantu, sho e ya pa etegameno ndika lya dhenga mbanda. — Iilonga 24:15.

Aantu omabiliyona otaya ka kala nomwenyo sigo aluhe. Ombiimbeli otayi ti: “Aayuuki otaa ka thigulula evi e taa kala mo sigo aluhe.” (Episalomi 37:29) Pethimbo ndyoka, otaya ka nyanyukilwa nokuhekelekwa sho taya ka gwanithilwa oohapu ndhoka dha nyolwa komuyapostoli Paulus omimvo 2 000 dha ka pita, tadhi ti: “So ngoye, esindano lyoye oli li peni? So ngoye, oonkondo dhoye dhokweehameka odhi li peni?” (1 Aakorinto 15:55) Eso ndyoka li li omutondi omunene gwaantu, otali ka sindika!