Kalunga okwa pa aantu omagano gi ikalekelwa, ano okuvula okupopya naye nokuholola omaiyuvo gawo okupitila megalikano. Omuhunganeki David okwa galikana a ti: “Eeno, ongoye nguka ho uvu omagalikano. Aantu ayehe otaye ya kungoye omolwoondjo dhawo.” (Episalomi 65:2) Ihe ongiini tatu vulu okugalikana, opo tu uvike nokuyambekwa kuKalunga?

Okugalikana paumwene ohaku ku pe ompito wu aneke omaudhigu goye koshipala shaKalunga, ano wu mu lombwele lela nkene wu uvite. (Episalomi 62:8) Omunankondoawike oku hole okuuva omagalikano taga zi komutima.

Nonando Kalunga oku na omadhinasimaneko ogendji, oku na owala edhina limwe. “Jehova Ofule; edhina lye Jehova.” (Eksodus 15:3, OB-1954) Edhina Jehova olya li lya holoka mo iikando 7 000 lwaampo mOmanyolo gopetameko. Aahunganeki oyendji oya li haya tumbula edhina lyaKalunga. Oshikando shimwe Abraham okwa popi naye a ti: ‘Ombili, Jehova, sho te popi ishewe [nangoye].’ (Genesis 18:30, yelekanitha NW) Natse otu na okukala hatu tumbula edhina lyaKalunga, Jehova, sho tatu galikana.

Kalunga oha uvu omadhiladhilo nomaiyuvo getu, kashi na nduno mbudhi kutya omelaka lini hatu popi. Oohapu dhe otadhi tu shilipaleke tadhi ti: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” — Iilonga 10:34, 35.

Ihe opo tu yambekwe kuKalunga, otu na okuninga oshindji shi vulithe pokugalikana. Miitopolwa tayi landula, otatu ka konakona shoka twa pumbwa okuninga.