Onda valelwa muMulhouse, muumbangalantuzilo waFulaanisa. Moshitopolwa moka aantu kaya li ye na onkalamwenyo yuuzeko nosha li sha tseyika nawa omolwiikolokosha yamo. Aantu oya li haya kala taya dhengathana momagumbo gawo sho nda li okanona. Maandjetu, aakiintu oya li ya dhinika nokaya li haya pulwa sha kaalumentu. Onda li nda longwa kutya iilonga yawo oyo pelugo nokusila oshimpwiyu aalumentu naanona.

Kasha li oshipu sho tandi putuka. Sho ndi na omimvo omulongo, tate okwa si komalovu. Konima yoomvula ntano, omumwamememati gumwe gwomukuluntu, okwi idhipaga. Momumvo omo tuu moka, onda li nda mono gumwe gwaandjetu a dhipagwa sho ya li taya nyenyeta, naashoka osha li sha halutha ndje noonkondo. Yaandjetu oya li ya longo ndje okulongitha oombele noondjembo nokukondja mpoka sha pumbiwa. Sho nda li omugundjuka, onda li nda piyagana, onkee olutu lwandje olwa thanekwa iinima nonda tameke okunwa omalovu.

Sho ndi na omimvo 16, onda li handi nu omikonyo 10 sigo 15 mesiku, noinapu pita ethimbo, onda tameke okulongitha iingangamithi. Opo ndi vule okulanda iinima mbyoka, onda tameke okulanditha iitenda ya longa nale nokuyaka. Sho ndi na omimvo 17, mondholongo onde enda mo nale. Onda yi mo iikando ayihe kumwe 18 omolwuufuthi nuukolokoshi.

Sho ndi na omimvo 20 nasha, onkalo yandje oya nayipala. Onda li handi hili omapangwe 20 mesiku nonda li wo handi longitha oshingangamithi oshinankondo (heroin) nayilwe ya nika oshiponga. Iikando oyindji, onda zile koshakapalwa, omolwoku yi longitha nayi. Onda tameke okulanditha iingangamithi nonda li handi kala nda homata aluhe oombele noondjembo. Oshikando shimwe, okonyala ndi dhipage omulumentu gumwe, ihe lago enene oholo oyi idhenge owala mompate yepaya! Sho ndi na omimvo 24, meme okwa si, nondjahi yandje oya pimbile. Aantu mboka taye ende mopate ngele oya mono ndje, oya li haye yi gama handiyaka, molwaashoka ya tila ndje. Omolwomalugodhi, olundji momahuliloshiwike onda li handi kala kositaasi yopolosi nenge moshipangelo, opo iilalo yandje yi ka hondjwe.

Sho ndi na omimvo 28, onda hokana. Kanda li nda ungaunga nomukulukadhi gwandje nesimaneko. Onda li handi mu tukagula noku mu dhenga. Katwa li hatu ningi nando iinima pamwe tu li aaihokani. Onda li owala ndi wete kutya osha gwana oku mu pa iikwamalyenge ya yakwa. Opwa ningwa oshinima shimwe ombaadhilila. Nekulu lyandje okwa tameke okukonakona Ombiimbeli nOonzapo dhaJehova. Sho opo owala a konakona oshikando  shotango, okwe etha po okuhila omakaya, okwa tindi okutaamba iimaliwa ya yakwa nokwa li a shunithile ndje iikwamalyenge yandje. Onda li nda thita po kondjahi. Onda li handi mu pataneke sho ta konakona Ombiimbeli nonda li handi mu fudhile olwithi lwomakaya moshipala. Onda li wo handi mu ula nayi momudhingoloko gwetu.

Ongulohi yimwe, sho nda li nda kolwa, egumbo lyetu onde li tomeke omulilo. Nekulu lyandje okwe tu hupitha momulilo nokamwanakadhona ketu komimvo ntano. Sho nda kolulukwa, onda li shili tandi ipe oombedhi. Onda li shili ndu uvite kutya Kalunga ita dhimine ndje po nando. Otandi dhimbulukwa oshikando shimwe omusita gumwe ta ti kutya aakolokoshi ohaya yi moheli. Nokuli ndohotola gwandje gwuuvu wopamadhiladhilo okwa li a lombwele ndje a ti: “Aayee ngoye opuwo ngaa nee! Ito dhiminwa po nando.”

Konima sho egumbo lyetu lya pi po, otwa tembukile kegumbo lyaavali yanekulu lyandje. Sho Oonzapo dheya dhi talele po omukulukadhi gwandje, onde dhi pula nda ti: “Kalunga ota vulu ngaa okudhima po omayono gandje agehe?” Odhu ulikile ndje mOmbiimbeli mAakolinto yotango 6: 9–11. Oovelise ndhoka otadhi popi iinima mbyoka Kalunga e tonde, ihe ovelise yimwe oya gwedha ko tayi ti: “Yamwe yomune osho mwa li mwa tya ngaaka.” Oohapu ndhoka odha shilipaleke ndje kutya nangame otandi vulu okulunduluka. Oonzapo odha shilipaleke ndje wo kutya Kalunga oku hole ndje sho dhu ulukile ndje Johannes gwotango 4:8. Molwaashoka shika osha li sha tsu ndje omukumo, onde dhi pula dhi konakone Ombiimbeli nangame lwaali moshiwike. Onda li nda tameke okukala pokugongala kwadho kwegongalo lyopaKriste. Onda li aluhe handi galikana kuJehova.

Muule owala womwedhi, onde etha po okulongitha iingangamithi nomalovu. Olutu lwandje olwa tameke talu kondjithathana. Onda li handi ningi omahaluhalu omawinayi, handi ehama omutse, handi kwatwa komaathipa nokiinima yilwe. Ihe onda li wo ndu uvite kutya Jehova ota ambidhidha ndje nota nkondopaleke ndje. Onda li ndu uvite ngaashi Paulus. Okwa nyola kombinga yekwatho ndyoka Kalunga a li e mu pe a ti: “Ngame otandi vulu shaa shoka, oshoka Kristus ota koleke ndje.” (Aafilippi 4:13) Momukokomoko gwethimbo, onde etha po okuhila omakaya. — 2 Aakorinto 7:1.

Nonando Ombiimbeli oya kwathela ndje ndi kale ndi shi okuungaunga nonkalamwenyo yandje, oya hwepopaleka wo onkalo yuukwanegumbo wetu. Omukalo moka handi ungaunga nomukulukadhi gwandje ogwa lunduluka. Onda tameke okukala nde mu simaneka lela nohandi ti kutya “kwathela ndje” nosho wo “tangi.” Onda tameke wo okukala tate e li nawa gwokamwanakadhona ketu. Sho nda konakona Ombiimbeli uule womvula, ondi iyapulile Jehova e tandi ninginithwa, nda landula oshiholelwa shanekulu lyandje.

Ondi shi shi kutya omakotampango gOmbiimbeli oga hupitha onkalamwenyo yandje. Nokuli aakwanezimo mboka kaaye shi Oonzapo ohaya ti kutya ando ngaandyoka onda sa nale kiingangamithi nenge nda dhipagwa molugodhi.

Uukwanegumbo wandje owa kwathelwa lela kOmbiimbeli ndjoka tayi popi kombinga yoshinakugwanithwa shandje ndi li omusamane omuvali. (Aaefeso 5:25; 6:4) Otwa tameke okuninga iinima pamwe tu li uukwanegumbo. Ngashingeyi okukala owala nde ethela nekulu lyandje pelugo, onda nyanyukwa oku mu kwathela miilonga ye e li omuuvithi gwethimbo alihe. Nokwa nyanyukwa wo okukwathela ndje moshinakugwanithwa shandje ndi li omukuluntugongalo.

Ohole nosho wo ohenda yaJehova Kalunga oya guma shili onkalamwenyo yandje. Onda halelela okulombwela mboka ye wete kutya kaye na etegameno lyasha, molwaashoka aantu oyendji osho ya li ya tala ndje ko ngaaka. Ondi shi shi kutya Ombiimbeli oyi na oonkondo dhokukwathela kehe gumwe a kale e na onkalamwenyo ya yogoka noyi na elalakano. Ombiimbeli inayi kwathela ndje owala ndi kale ndi hole nonda simaneka aantu yalwe, aalumentu naakiintu, ihe oya kwathela ndje wo ndi kale ndi isimaneka mwene.