Oshili kombinga yonakuyiwa
Mbela owi ipula ngaa nale kutya onakuyiwa otayi ka kala ya tya ngiini? Ombiimbeli otayi tu lombwele kombinga yiinima ya simana mbyoka tayi ka ningwa masiku notayi ka guma aantu ayehe kombanda yevi.
Jesus okwe tu yelithila shoka tashi ka ningwa uuna ‘Oshilongo shaKalunga shi li popepi.’ (Lukas 21:31) Okwa hunganeka kutya iinima mbyoka ongaashi iita, omakakamo gevi omatilithi, oondjala nomalega, niinima mbyoka otu yi wete kunena. — Lukas 21:10-17.
Ombiimbeli otayi tu lombwele wo kutya ‘omasiku gokomeho,’ ano pethimbo lyehulilo lyomapangelo gopantu, aantu otaya ka kala ye na eihumbato ewinayi. Oto vulu okulesha eihumbato ndyoka muTimoteus omutiyali 3:1-5. Ngele owa mono aantu tayi ihumbata ngawo, nangoye oto shi zimine kutya ehunganeko ndika lyomOmbiimbeli otali tsu kumwe niikala neihumbato lyaantu kunena.
Mbela shoka osha hala okutya shike? Ethimbo oli li popepi Uukwaniilwa waKalunga wu ninge omalunduluko omanene ngoka taga ka hwepopaleka onkalamwenyo kombanda yevi. (Lukas 21:36) MOmbiimbeli omu na iinima iiwanawa mbyoka Kalunga u uvanekela aantu mboka taya ka kala kombanda yevi. Yimwe yomuyo oyo mbika.
EPANGELO EWANAWA
“[Jesus] okwa li a pewa epangelo, esimano noonkondo dhuukwaniilwa, opo aantu yomiigwana ayihe, yomomaludhi agehe noyomomalaka agehe ye mu longele. Epangelo lye otali ka kala sigo aluhe, nuukwaniilwa we kau na mpoka tau hulu po sigo aluhe.” — DANIEL 7:14.
Shoka otashi ti: Oto ka nyanyukilwa onkalamwenyo kohi yepangelo ewanawa kaaku na we ndyoka tali ka pangela uuyuni awuhe, na Kalunga okwa langeka po Omwana e li Omukwaniilwa gwalyo.
UUKOLELE
“Kape na nando ogumwe . . . ta ka tya: ‘Otandi ehama.’” — JESAJA 33:24.
Shoka otashi ti: Ito ka ehama we nenge wu ka kale oshilema; oto ka vula okukala nomwenyo sigo aluhe.
OMBILI
“Ota hulitha po omalugodhi kombanda yevi alihe.” — EPISALOMI 46:9.
Shoka otashi ti: Itaku kala we iita nokumona iihuna akuhe hoka hayi eta.
KEVI OTAKU KA KALA OWALA AANTU AAVULIKI
“Aadhudhu otaa ka kana po mbala; . . . Aayifupipiki otaa ka thigulula evi notaa ka mona uulinawa nombili.” — EPISALOMI 37:10, 11.
Shoka otashi ti: Itaku ka kala we aakolokoshi, ihe aantu owala mboka ya halelela okuvulika kuKalunga.
EVI OTALI KA NINGA OPARADISA
“Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene.” — JESAJA 65:21, 22.
Shoka otashi ti: Evi alihe otali ka ningwa ewanawa. Kalunga otaka gwanitha po egalikano ndyoka kutya ehalo lye na li gwanithwe “kombanda yevi.” — Mateus 6:10.
