हाम्रा सृष्टिकर्ता हामीभन्दा बुद्धिमान्‌ हुनुहुन्छ। उहाँ हाम्रो मायालु बुबा हुनुभएकोले हाम्रो ख्याल राख्नुहुन्छ। साथै, यहोवाले हामीलाई उहाँको डोऱ्‍याइविना आफूमा मात्र भर पर्न सक्ने गरी बनाउनुभएको थिएन। (यर्मिया १०:२३) जसरी एउटा सानो बालकलाई आमाबुबाको डोऱ्‍याइ चाहिन्छ, त्यसरी नै हामी सबैलाई परमेश्‍वरको डोऱ्‍याइ चाहिन्छ। (यसैया ४८:१७, १८) हामीलाई डोऱ्‍याइ दिने बाइबलका नियमहरू परमेश्‍वरबाट आएको उपहार हो।—२ तिमोथि ३:१६ पढ्‌नुहोस्‌।

 यहोवाका नियमहरूले अहिले कसरी उत्तम जीवन बिताउन सकिन्छ र भविष्यमा कसरी चिरकालीन इनाम हासिल गर्न सकिन्छ भनेर सिकाउँछ। परमेश्‍वरले हामीलाई सृष्टि गर्नुभएकोले हामीले उहाँको डोऱ्‍याइ कृतज्ञ भई स्विकार्नु उचित छ।—भजन १९:७, ११; प्रकाश ४:११ पढ्‌नुहोस्‌।

 बाइबलका आधारभूत सत्यले यहोवा हामीले विभिन्‍न परिस्थितिमा कस्तो कदम चालेको चाहनुहुन्छ भनेर बुझ्न मदत गर्छ। बाइबलका अन्य नियमहरू कुनै खास परिस्थितिमा मात्र लागू हुन सक्छ। (व्यवस्था २२:८) कुनै अवस्थामा कस्तो कदम चाल्ने भनेर बाइबलमा आधारित भएर निर्णय गर्न हामीले सोच्ने क्षमता चलाउनुपर्छ। (हितोपदेश २:१०-१२) उदाहरणको लागि, जीवन परमेश्‍वरले दिनुभएको वरदान हो भनेर बाइबल सिकाउँछ। यो आधारभूत सत्यले हामीलाई जीवनको हर क्षेत्रमा डोऱ्‍याउँछ; यसले हामीलाई आफ्नो र अरूको सुरक्षामा ध्यान दिन मदत गर्छ।—प्रेषित १७:२८ पढ्‌नुहोस्‌।

 येसुले दुई वटा महत्त्वपूर्ण आज्ञाबारे बताउनुभयो। पहिलो आज्ञामा मानिसको जीवनको वास्तविक उद्देश्‍यलाई प्रस्ट पारिएको छ। त्यो हो: परमेश्‍वरलाई चिन्‍नु, उहाँलाई प्रेम गर्नु र वफादार भई उहाँको सेवा गर्नु। जीवनमा हरेक निर्णय गर्दा  हामीले यो पहिलो आज्ञा मनमा राख्नै पर्छ। (हितोपदेश ३:६) यस आज्ञाअनुसार जीवन बिताउनेहरूले परमेश्‍वरसित मित्रता गाँस्न सक्छन्‌ अनि अनन्त जीवन र साँचो आनन्द पनि प्राप्त गर्न सक्छन्‌।—मत्ति २२:३६-३८ पढ्‌नुहोस्‌।

 दोस्रो आज्ञाले हामीलाई अरूसँग शान्तिमय सम्बन्ध राख्न मदत दिन्छ। (१ कोरिन्थी १३:४-७) मानिसहरूसित व्यवहार गर्दा परमेश्‍वरको निर्देशन पालन गर्नु पनि यो आज्ञामा समावेश छ।—मत्ति ७:१२; २२:३९, ४० पढ्‌नुहोस्‌।

 बाइबलका नियमहरूले परिवारका सदस्यहरूले आपसमा प्रेम गर्नुपर्छ भनेर सिकाउँछ। (कलस्सी ३:१२-१४) वैवाहिक सम्बन्ध स्थायी हुनै पर्छ भनेर परमेश्‍वरको वचन सिकाउँछ। यो आधारभूत सत्य परिवारको लागि सुरक्षा हो।—उत्पत्ति २:२४ पढ्‌नुहोस्‌।

 बाइबलको शिक्षाअनुसार चल्दा हामी भौतिक र भावनात्मक तवरमा सुरक्षा पाउँछौँ। उदाहरणको लागि, मालिकहरू त्यस्ता कामदारहरूलाई काम दिन रुचाउँछन्‌, जो इमानदार र लगनशील हुनुपर्छ भनेर बाइबलले सिकाएअनुसार चल्छन्‌। (हितोपदेश १०:४, २६; हिब्रू १३:१८) परमेश्‍वरको वचनले हामीलाई आफ्ना आवश्‍यकताहरू पूरा भएका छन्‌ भने त्यसमै सन्तुष्ट हुन र भौतिक कुरालाई भन्दा परमेश्‍वरसितको मित्रतालाई महत्त्व दिन पनि सिकाउँछ।—मत्ति ६:२४, २५, ३३; १ तिमोथि ६:८-१० पढ्‌नुहोस्‌।

 परमेश्‍वरका नियमहरू पालन गर्दा हाम्रो स्वास्थ्यमा पनि लाभ पुग्छ। (हितोपदेश १४:३०; २२:२४, २५) उदाहरणको लागि, धेरै रक्सी नपिउनू भन्‍ने बाइबलको नियम पालन गर्दा ज्यानै लिने रोग र दुर्घटनाबाट हामी जोगिन्छौँ। (हितोपदेश २३:२०) यहोवाले हामीलाई ठिक्क मात्रामा रक्सी पिउने अनुमति दिनुभएको छ। (भजन १०४:१५; १ कोरिन्थी ६:१०) परमेश्‍वरका नियमहरूले हाम्रा कामहरूलाई मात्र होइन, हाम्रो विचारलाई पनि नियन्त्रणमा राख्न सिकाउँछ। (भजन ११९:९७-१००) तर साँचो ख्रिष्टियनहरूले आफ्नो फाइदा हुने भएकोले मात्र परमेश्‍वरको स्तर पालन गरेका होइनन्‌। यहोवा परमेश्‍वरको आदर गर्न तिनीहरू उहाँको स्तर पालन गर्छन्‌।—मत्ति ५:१४-१६ पढ्‌नुहोस्‌।