1-2. Soo as stäit in Atos 8:27 bet 31 un 35 bet 38, woweegen wul dai etíope kërl sich tauwe låte?

 WILST duu dij tauwe låte un Jësus någåe? Feel häwe dit al uutsöcht un häwe dat måkt. Sai häwe dat måkt weegen sai häwe lijb up Jehovaa un sin dankbår up em. Kijk ais wat passijrt is mit air etíope kërl wat arbëre däir for dai rainha fon Etiópia.

² Nåheer as hai dai Hailig Sriwt lërt hät, hät hai sich glijk tauwe låte. (Lees Atos 8:27 bet 31 un 35 bet 38.) Woweegen hät hai sich tauwe låte? Hai däir der Isaías bauk leese as hai rëse däir. Dit däit wijse dat hai God sij Woord feele wërd geewe däir. Un nå dat dai etíope kërl fortelt hät mit Filipe, hät hai groot dankbårkët fornåme up dat wat Jësus for em måkt har. Åwer woweegen har dës etíope kërl nam Jerusalém henrëst? Weegen hai däir al Jehovaa lijbe. Wij waite dat weegen dai Bijbel sägt dat hai nam Jerusalém henrëst wäir taum Jehovaa anbeere. Süüt soo uut dat dës etíope kërl air anerd religion har un hät uutsöcht dai wår God anbeere t’hoop mit dai ainsig folk wat dat måke däir, un weegen dës lijb, hät dës etíope kërl air anerd dail måkt mit groote wërd: sich tauwe låte un Kristus någåe. (Mat 28:19)

3. Wat kan aim forbaire sich tauwe låte? (Sai dai tåfel “ Mit wat fon sort land kan dijn härts t’hooppasst ware?”)

³ Dat lijb up Jehovaa kan måke dat’s duu dij tauwe låte wilst. Åwer dat lijb kan dij uk forbaire dat måke. Wosoo? Denk ais: kan sin dat’s duu dijn fründ un andrer wat ni Tüügen fon Jehovaa sin sër dul lijbe däist un angst forneeme däist dat sai dij besijdlåte daue nå dat’s duu dij tauwe låte däist. (Mat 10:37) Urer kan sin dat’s duu air dail sër dul lijbe däist wat God ni gefale däit un duu krijgst ni anhule dat måke. (Sal 97:10) Urer kan sin dat’s duu andenke däist an woo gaud as dat wäir as duu dai fest fone falsch religion fijre däist, un dat’s duu soo dul dës daile lijbe däist, kan ni licht sin dës fest wat God ni gefale daue besijdlåte. (1 Cor 10:20 un 21) Dårweegen must duu dij fråge: ‘Wat urer wem dau ik mër lijbe?’

4. Wat fon is dat haupt dail dat’s duu dij tauwe låte schast?

⁴ Sin feel gaure daile wat’s duu gërn mage däist un wat’s duu sër dankbår dåroiwer büst. Ain fon dai is dai Bijbel. Kan sin dat airer as duu dai Bijbel studijre däist mit Jehovaas Tüügen, däirst duu al groote wërd geewe an dai Bijbel un duu häst uk lërt Jësus lijbe. Un nuu dat’s duu Jehovaas Tüügen kene däist, gans sicher magst duu gërn mit eer sin. Dës daile lijbe is gaud, åwer sin ni dës daile wat dij helpe daue dijn leewend tau Jehovaa anbaire un sich tauwe låte. Åwer wat dij wirklig helpe däit dij tauwe låte is dijn lijb up Jehovaa God. Wen’s duu Jehovaa lijbe däist mër as irgends air anerd dail, nischt däit dij forstööre dijn leewend tau Jehovaa anbaire. Un lijkerst nå dat’s duu dij tauwe låte häst, dijn lijb up Jehovaa däit dij helpe bijblijwe gåe in Jehovaa sijne weeg.

5. Wat daue wij hüüt lëre?

⁵ Jësus hät sägt wij muite God lijbe mit oose ganse härts, sël, gedanke un kraft. (Mar 12:30) Åwer wat kast duu måke dat’s duu groot lijb up Jehovaa häst un em feele wërd geewe däist? Denk an dat groot lijb wat Jehovaa hät oiwer dij. Dat däit dij mithelpe dat’s duu em lijbe däist soo as hai dij lijbe däit. (1 João 4:19) Ji mër lijb as duu up Jehovaa häst, mër daile däist duu for Jehovaa forneeme, un den däist duu mër daile for em måke. Wiman’s saie wat fon daile dit sin. b

6. Soo as stäit in Romanos 1:20, wosoo kast duu mër oiwer Jehovaa lëre?

⁶ Dau oiwer Jehovaa lëre doir dai daile wat hai måkt. (Lees Romanos 1:20, Apo 4:11.) Dau man’s andenke an dai klaukhët wat Jehovaa hat hät as hai dai plante, fågels un dai tijre måkt hät. Dau man’s air bits lëre woo oos körper bewunrig måkt woore is. (Sal 139:14) Un denk man’s an wofeel kraft hät dai sün, wat bloos ain is for dai feel stërne. c (Isa 40:26) Wen’s duu an dit grüüwle däist, den giwst duu mëre wërd an Jehovaa. Åwer dat is bloos ni naug waite dat Jehovaa klauk is un kraft hät. Dat is bloos dai anfang taum ümgang häwe mit em. Dat dij lijb up Jehovaa gröter wart, duu must mër lëre oiwer em.

7. Dat dij lijb up Jehovaa gröter wart, woo oiwer must duu dij sicher sin?

⁷ Duu must sicherhët häwe dat Jehovaa sich bekümre däit mit dij, ni bloos mit dai lüür oiweral. Däist duu dat slim fijne anglööwe dat dai wat ales måkt hät im himel un upe ër, dij kene däit un bekümert sich oiwer dij? Wen’s duu jå denke däist, dau andenke dat Jehovaa ‘is ni wijdaf fon jërer ainsig for oos’. (Atos 17:26 bet 28) Hai “däit dai ganse härtse uunersuike”. Hai sägt dij wen’s duu em suike däist, duu kast em fijne. (1 Crô 28:9) Jehovaa hät dij nå em ranertrekt, dårweegen duu däist nuu dai Bijbel lëre. (Jer 31:3) Ji mër dat’s duu forståe däist wat Jehovaa for dij mökt, ji gröter wart dij lijb up em.

8. Wosoo kast duu dankbår sin up Jehovaa sij lijb?

⁸ Taum dankbår sin up Jehovaa sij lijb, must duu mit em fortele. Wen’s duu beere däist, fortel God dijn kopbreeken un dau dai gaure daile danke wat hai for dij mökt un dau gaud uppasse soo as hai dijn gebeed antwoore däit. (Sal 116:1) Dit däit måke dat dijn lijb up God gröter wart un däit dij ümgang mit em stärke. Den däist duu nog mër sicherhët häwe dat hai dij forstäit. Åwer taum näiger an God ranerkåme, must duu forståe wosoo hai denke däit un wat hai fon dij luure däit. Duu krijgst dit bloos forståe wen’s duu God sij Woord, dai Bijbel, lëre däist.

9. Wosoo kast duu wijse dat’s duu dai Bijbel wërd giwst?

⁹ Dau wërd geewe tau God sij Woord, dai Bijbel. Bloos dai Bijbel sägt dai wårhët oiwer Jehovaa un oiwer dat wat hai wil tau dai tijd wat nog kümt. Dårweegen dau dai Bijbel jërer dag leese. Dau dijn bauk gaud studijre airer as dijn bijbelstuun. Måk grår soo as duu lërt häst. Soo däist duu wijse dat’s duu God sij Woord wërd geewe däist. (Sal 119:97, 99 un João 17:17) Häst duu dij al ain stuun anmarkt taum dai Bijbel jërer dag leese? Krijgst duu dat måke jërer dag?

10. Wat fijne wij bloos ine Bijbel?

¹⁰ Bloos ine Bijbel ståe geschichte oiwer lüür wat Jësus kent häwe. Dai Bijbel is dai ainsig bauk wat genau uutdüüre däit wat Jësus for dij måkt hät. Lëre dat wat Jësus sägt un måkt hät, däit dij helpe air gaur ümgang mit em häwe.

11. Wat däit dij helpe dat dij lijb up Jehovaa gröter wart?

¹¹ Dau Jësus lijbe un dijn lijb up Jehovaa däit gröter ware Woweegen? Weegen Jësus däit gans genau sij Fåter nåmåke. (João 14:9) Dårweegen ji mër as duu oiwer Jësus lëre däist, beeter däist duu Jehovaa kene un mër däist duu em wërd geewe. Denk an wosoo Jësus dai lüür beduure däir wat dai andrer forstööte däire soo as dai arme, dai kranke un dai wat kair behüüte däir. Denk uk an dai gaur formånen wat Jësus giwt un an wosoo dij leewend beeter wart wen’s duu dat någåe däist. (Mat 5:1 bet 11 un 7:24 bet 27)

12. Nådem dat’s duu mër oiwer Jësus lëre däist, wat wilst duu den måke?

¹² Dau uk denke woo Jësus mit fraiwile sij leewend geewt hät un is doodbleewe dat oos süün forgeewt ware küüne. (Mat 20:28) Dåroiwer grüüwle, mit sicherhët däit måke dat dijn lijb oiwer Jësus gröter wart. Duu warst uk forneeme dat dij lëd däit dijn süün un den wilst duu forlange dat Jehovaa dij forgeewe schal. (Atos 3:19, 20 un 1 João 1:9) Un ji mër dat’s duu Jehovaa un Jësus lijbe däist, mër wilst duu t’hoop sin mit dai wat uk dai selwig lijb oiwer eer forneeme.

13. Wat däit Jehovaa dij geewe?

¹³ Dau Jehovaa sijn familg lijbe. Kan sin dat dijn fründ un andrer woo’s duu airste mit ümgang harst ni forståe woweegen duu wilst Jehovaa dijne. Kan sin dat sai gëgen dij blijwe, åwer Jehovaa däit dij ni alaine låte. Hai däit dij ain familg in gloobe geewe. Wen’s duu ümer t’hoop büst mit dijn bruirers un swesters ine gemaind den däist duu een lijb forneeme un sai daue dij mithelpe wen’s duu bruukst. (Mar 10:29, 30 un, Heb 10:24, 25) Mite tijd, kan sin dat dijn fründe uk mit dij t’hoop Jehovaa dijne wile un leewe soo as dai Bijbel sägt. (1 Ped 2:12)

14. Soo as stäit in 1 João 5:3, wat häst duu ruuterfuune oiwer Jehovaa sijn formånen?

¹⁴ Dau Jehovaa sijn formånen respektijre un någåe. Airer dat’s duu Jehovaa kent häst, filaicht harst duu al dijn aigen gedanke oiwer wat richtig un forkërd is. Åwer nuu büst duu dij sicher dat Jehovaa sijn formånen sin dai beste. (Sal 1:1 bet 3. Lees 1 João 5:3.) Dau denke an dai formånen wat dai Bijbel geewe däit tau dai wat forfrigt sin, papa, mama un kiner. (Efé 5:22 bet 6:4) Däist duu denke dat dës formånen koine dijn familg fröölig låte? Dau uk denke oiwer dai formånen wat Jehovaa dij geewe däit taum uutsuike dai woo duu mit ümgang häst. Däist duu maine dat dës formånen någåe dijn leewend beeter mökt? Fornimst dat’s duu dårweegen air fröölig mësch büst? (Prov 13:20 un 1 Cor 15:33) Is bijnå sicher dat’s duu jå sägt tau dës frågen.

15. Wat kan dij helpe någåe wat dai Bijbel lëre däit?

¹⁵ Kan sin dat öftens, duu ni waite däist gans genau woo’s duu någåe kast dat wat’s duu lëre däist ine Bijbel. Is dårweegen dat Jehovaa oos lëre däit doir dai gemaind. Sai däit oos geewe feel lëren wat fone Bijbel kåme wat oos helpe waite wat richtig un forkërd is. (Heb 5:13 un 14) Lees un dau dës lëren studijre. Duu warst den saie dat’s duu dai bruuke kast un woo dai dij helpe koine. Un nog, dai daue dij helpe dat’s duu wilens büst tauhööre tau Jehovaa sij folk.

16. Woo däit Jehovaa sij folk lenke?

¹⁶ Dau Jehovaa sijn gemaind lijbe un bijståe. Jehovaa lenket sij folk doir dai gemainde. Hai hät uutsöcht sij Kind, Jësus, taum her sin oiwer eer. (Efé 1:22 un 5:23) Hüüt, is ain arbëd wat doir dës gemainde måkt mut ware. Taum dës arbëd lenke, Jësus hät ain klain grup uutsöcht wat haite däit “reäl un forständig eskrav”. Dës grup kërls häwe dai hofnung taum im himel leewe un daue sich sër anstrenge taum dij geewe dat wat’s duu bruukst taum aine starke gloobe häwe. (Mat 24:45 bet 47) Air dail wat dës eskrav mökt taum dij uppasse is ülster uutsuike ine gemaind taum dij lenke un behüüte. (Isa 32:1, 2, Heb 13:17 un 1 Ped 5:2 , 3) Dai ülster häwe lust taum dat best måke tau dij, sin ümer trecht taum dij trööste un helpe dat’s duu ain stark ümgang mit Jehovaa häst. Åwer ain fon dai haupte daile wat sai måke for dij, is dij helpe wosoo andrer inlëre oiwer Jehovaa. (Efé 4:11 bet 13)

17. Soo as stäit in Romanos 10:10,13 un 14, woweegen fortele wij oiwer Jehovaa tau dai andrer?

¹⁷ Dau der andrer inlëre Jehovaa lijbe. Jësus hät sägt dat dai wat em någünge, dat sai uk der andrer inlëre müste oiwer Jehovaa. (Mat 28:19 un 20) Is wår, wij küüne dat måke bloos dårweegen Jësus dat sägt hät. Åwer, wen dij lijb oiwer Jehovaa gröter ware däit, den däist duu uk dij forneeme soo as dai apostels Pedro un João wat sägt häwe: “Wij koine ni anhule ane fortele oiwer dai daile wat wij saie un höört häwe.” (Atos 4:20) Wënig daile koine oos fröölig låte as andrer helpe Jehovaa lijbe. Denk an woo Filipe fröölig woore is as hai der etíope kërl hulpe hät dai wårhët fone Bijbel kene un sich tauwe låte! Wen’s duu Filipe nåmåke däist un preege däist, däist duu wijse dat’s duu air Tüüge fon Jehovaa wilst sin. (Lees Romanos 10:10, 13 un 14.) Den, wen’s duu dit måke däist, kan sin dat’s duu dij fråge däist dat neemlig wat dai etíope kërl frågt hät: “Wat forbairt mij dat ik mij tauwe låt?” (Atos 8:36)

18. Wat daue wij in dai anerd lëren saie?

¹⁸ Sich tauwe låte is dat haupt uutsuiken wat’s duu måke must ine leewend. Wen dit air dail is wat’s duu ni besijd låte kast, duu must gaud denke oiwer ales wat dårmit besägen hät. Wat must duu waite oiwer dat tauwen? Wat must duu måke airer un nå sich tauwe låte? Dai anerd lëren däit dës frågen antwoore.