Manera atinovona no kuita njaumba, zvakacijikira pa zviya zvinojijiswa ngo Bhaibheri. Ngo pamusoro po shwiro iyi, Bhaibheri rinoti:

•   Azvizivi kushata kucema kudari tikafihwa ngo mundhu watinoda. Inga muezaniso, vajiji va Jesu vakacema no kusuruvara vandhu vavaida maningi pavaitamika. (Johani 11:33-35; Mabasa o Vapostori 8:2; 9:39) Ngo kudaro, ativoni mukuvo wo njaumba inga mukana wo kudakara. (Mucumaeri 3:1, 4; 7:1-4) Asi tinouvona inga mukana waushoni wo kuvonesa rudo no kunyaraja vafihwaya.—Varoma 12:15.

•   Vakafa apana cavanoziva. Azvinenyi dangani tinovha kwapi kana kuti jinja redu ngorapi, atinghwiniri mu zvirovejeso zvinoitwa pa njaumba zvinovonesa kuti vakafa vanoziva zviri zvese kana vanokwanisa kuita zviri zvese kuti vabesere vandhu varipenye. (Mucumaeri 9:5, 6, 10) Izvo zvinobatanija kuita zviri zvese zvinovonesa kuti tiri kureremeja mundhu wafaya, kuita mupiro kwaari, kubhuya naye, kumukumbira zviri zvese kana kutoita zviri zvese kuna noni yasaraya. Itusu atiiti zvirovejeso izvi ngokuti tinozwirana mutemo unowanika mu Bhaibheri wokuti: “Budanyi pakati pavo, . . . regeranyi kupsasa zviro zvicizivi kucena.”—2 Vakorinte 6:17.

•   Kuno vetero kuitira vakafa. Bhaibheri rinojijisa kuti kunozova no rumuko, nokutizve inozoguma njiku yo kuti apana mundhu anozofa. (Mabasa o Vapostori 24:15; Apokaripsi 21:4) Vetero iyi inotibesera nyamasi inga manera oyakabeseravo Makristu okare, kuti titame kugara takasuruvara maningi nee kuiita zvirovejeso zvinoitwa ngo vamweni zvicikadakajisi Mwari.—1 Vatesaronika 4:13.

•   Bhaibheri rinotivangisa kuti tive vandhu vanojibata. (Mazwi Akangwara 11:2) Itusu ativoni njaumba inga mukana wokuvonesa kuti tino maningi mare. (1 Johani 2:16) Atipejivo mare yakawanda pa kuita njaumba kuti tidakajise vandhu. Nee atitengi kashau jinodhura maningi kana kusimira nguvo jokudhura jinoita kuti vandhu vashamaisike.

•   Itusu atieji kuvangirija vandhu kuti vatendere zvatinotenda ngo pamusoro po njaumba. Zvokadi kamare, itusu tinotevera ndhungamiriro iyi: “Umwe na umwe wedu anozojidavirira ega kuna Mwari.” (Varoma 14:12) Asi tikava no mukana, tinoeja kuvasanangurira zvatinotenda “ngo kupfava kwese no nderemejo huru.”—1 Pedhru 3:15.

 Ndau: Mbhuri inongaro yafihwa inosana yoga kunodikana kuitwa hurukuro yo njaumba. Kungava ku Nyumba yo Umambo, ku nyumba inotihwa zvo njaumba, pa muzi panaro ciriro kana kumakuva.

 Hurukuro yo njaumba: Kuitira kunyaraja shamwari no ukama, panoitwa hurukuro inosanangura zvinonanga Bhaibheri ngo pamusoro po rufu no vetero yo rumuko. (Johani 11:22; Varoma 5:12; 2 Pedhru 3:13) Zvingaita kuti pa hurukuro panonangwa mugariro munganani jo mundhu wakafaya, kangaije ngo kuvonesa zvatingajija ngo muezaniso wake wo rutendo.—2 Samueli 1:17-27.

 Panoimbhwa ndumbo yakacijikira mu Bhaibheri. (Vakorose 3:16) Pakupejisira, panoitwa mukumbiro kuitira kunyaraja vanonga varipo.—Vafiripi 4:6, 7.

 Mare: Atipagarisi vandhu vatinonamata navo patinoita zvokunamata, kubatanijavo pa kuita hurukuro jo njaumba. Nee atifambisivo paratu kuitira muhengo-muhengo patinonga teciita musongano jedu.—Mateu 10:8.

 Ndiyani anotendehwa kwenda? Pikija vandhu vacikaripi Zvapupu zva Jehovha vangaendavo kozwa hurukuro yo njaumba inonga yeciitwa pa Nyumba yo Umambo. Inga zvinoitwa no musongano jedu jese, mundhu ari wese anotendehwa kuzwa hurukuro yo njaumba.

 Capupu ca Jehovha cimwe nga cimwe cinosana coga mukuzwirana no hana yakajijiswa ngo Bhaibheri. (1 Timoti 1:19) Asi itusu atinghwiniri mu zvirovejeso zvinoitwa zvicikazwirani no Bhaibheri.—2 Vakorinte 6:14-17.