AMBORANGARIRANI KUDARI: maenda kovhakacira nyumba ino zviro zvokare. Zviro zvakawanda zviri mukatimo zvapera kusakara. Zvimweni zvakona zviri kucota mativi akakura. Asi movona bhuku rimwe riri ushoni kamare. Movhunjisa ari kumutatijaro kuti, “Bhuku iri ngo ra wari?” Ari kumutatijaro onanga kuti “Haiwa”, onangazve kuti “Irona ngo ro kare kupinda amweni nee arimbozivi kunasirihwa.” Perapo movhunjisa kuti “Rakambovigwa pa ndau imweni?” Ari kumutatijaro oti “Haiwa.” Onangazve kuti “Rakanihwa maningi ngo nvura rotakwazve ngo mbhepo. I vandhu vakawanda vakaeja kuriparaja.” Imwimwi mecikahamara motanga kujivhunjisa kuti, “Rakasiyana papi no mabhuku amweni?”

Bhaibheri rakafananavo no zviro zvo kare. Rakatahwa kare i raano makore akawanda kupinda mabhuku amweni. Asi kutojanavo no zviro zvimweni zvokare, mabhuku akawanda o kare aazivi kugumavo pa mukuvo uno. Zvinonangwa ngo masientista ngo pamusoro po siensiya azviezani no zviri kuzivika ngo vandhu nyamasi uno. Zvimweni zvavanonanga ngo pamusoro po marapihwe zvinotikhuvaza.

Zvakaitika no Bhaibheri zvakasiyana no zvakaitika no mabhuku amweni. Rakatanga kutahwa mu makore anodarika 3.500 apinda, asi zvese zvicirimo. Ko makore akawanda vandhu vakaeja kuriparaja, kuripisa, kurirerusa no kurambisa vandhu kuti vacarishandisa, asi avazivi kubudirira. Zvarinonanga azvizivi kucinja. Rino zviro zvizinji zvarinonanga zvinokhombija kuti ricindori kushanda mbera na nyamasi. Vonanyi bokhiso rinoti “Kureva Kuti Bhaibheri Ricashanda Mbera Wari?”

Nguva jimweni mungajivhunjisa kudari, ‘kunanga kuti zvinojijiswa ngo Bhaibheri zvicashanda mbhera na nyamasi?’ Amborangariranyi basi ngo muvhujo iji: ‘Matambujiko api ari kunesa maningi nyamasi uno? Ngo api ari kuthisa maningi?’ Kangaije imwimwi mungarangarira ngo hondo, kusvipiswa ko nyika, ushati no kutama kugondeka ko vandhu. Wari ngativone zvinonangwa ngo Bhaibheri. Pamunonga meciverenga jivhunjisenyi kudari, ‘Nokwainga kuti vandhu vese vaishandisa mazano aya taizova no upenyu hwakadini?’

KUVA NO RUNYARARO

“Vanodakara vanopsaka kuita runyararo, ngokuti vanozodanijwa kuti vana va Mwari.” (Mateu 5:9) “Kudari zvecikwanisika, ivanyi no runyararo no vandhu vese.”—Varoma 12:18.

KUVA NO USIZI NO KUREGERERANA

“Vanodakara vano usizi, ngokuti vanozoitihwavo usizi.” (Mateu 5:7) “Endereranyi mberi mecicungirirana ngocenyu no kuregererana ngo mwoyo wese pikija aripo wamukhugunya ngo ciro ciri cese. Inga zvamakaregerehwa ngo mwoyo wese ndi Jehovha a, imwimwi munodikana kuitavo zvondhozvo.”—Vakorose 3:13.

KUTAMA KUVA NO MUKHETO

“Wakaita majinja ese ngo mundhu umwe basi, kuti vagare pasi pese. (Mabasa o Vapostori 17:26) “Mwari aakheti, asi iyena anoashira vandhu vanomuthya no vanoita zvakanaka vo majinja ese.”—Mabasa o Vapostori 10:34, 35.

KUREREMEJA ZVAKASIKWA

“Tenji Mwari wakatora mundhu, womudira mu munda wo Edeni kuti aurime no kuungwarira.” (Genesi 2:15) Mwari anozoparaja “vaya vanophwanya-phwanya nyika”—Apokaripsi 11:18.

NYENYANYI KUEMURA NO ZVOUHURE

“Ngwariranyi mushovo wese wo kuemura, ngokuti pikija mundhu akava no zviro zvakawanda, zviro zvaanazvo waro, azvimupi upenyu.” (Ruka 12:15) “Uhure no zviro zvese zvicizivi kucena pamwepo no kudisisa zviro zvakawanda, azvidikani kunangwa pakati penyu, ngokuti izvi azvisisiri pakati po vandhu va Mwari.”—Vaefeso 5:3.

IVANYI WAKAGONDEKA NO KUSHANDA NGO SIMBA

“Itusu tinoda kuva takagondeka pa zviro zvese.” (Vahebheru 13:18) “Wiya waiba, ngaaregere kuba; ngaabate basa ngo nyara jake.”—Vaefeso 4:28.

BESERANYI VAMWENI

“Nyarajanyi vandhu vakavora mwoyo, beseranyi vandhu vakaremba, ivanyi vanosengerera ku vandhu vese.” (1 Vatesaronika 5:14) ‘korondhanyi ndherera no noni jiri pa matambujiko ajo.’—Jakobo 1:27.

Bhaibheri rinoita zvizinji kuciripi basi kutivhunja zvatinodikana kuitisa nane mu upenyu hwedu. Irona rinotijijisa kuti tinodikana kureremeja mbhangiro iji no kujishandisa mu upenyu hwedu. Nokwainga kuti vandhu vese vaiteveja zvinonangwa ngo Bhaibheri, amuvonivo kuti zvineso zvedu zvaizopunguka? Hina, ngokuti mbhangiro jaro jiciri kushanda mbhera wari uno. Asi Bhaibheri ringatibeseresa kudini wari uno?

Jesu Kristu wakati: “Ungwaru hunovoneswa kuti hwakarurama ngo mabasa ahwo.” (Mateu 11:19) Kuti tikwanise kuvona kuti mbhangiro jo Bhaibheri jinoshanda tinodikana kujishandisa. Kangaije imwimwi mungarangarira kudari: ‘Kudari mbhangiro jo Bhaibheri jinoshanda kamare, ijona jinodikana kundibesera kuitisa nane upenyu hwangu. Asi irona ringandibeseresa kudini ngo zvineso zvandiri kusonganari nazvo?’ Vonanyi muezaniso umwe.

Kraudhiya b wainga no upenyu unodakajisa. Asi ngo civhumbo zvese zvakacinja. Mwana wake wokaji wakafa. Mucadho wake wakapera. Wakasara no magava akawanda maningi. Iyena wakati: “Ndakaperehwa ngo mazano, ngokuti ndakaruza mwana wangu, mwamuna wangu no nyumba. Ndakasara ndakacamwa basi. Nozvapera kuitika izvi, ndairangarira kuti zviri nane kufa.”

Kraudhiya wakavona pacake kuti masoko ari pana Nduyo ngo okadi. Iwona anoti: “Kurarama kwedu kwakaita inga ko makumanomwe o makore, tikavanga, ko makumasere; divi rakakura rao: kuremba no bza biresi; anokasikira kupinda, tinomburuka.”—Nduyo 90:10.

Kraudhiya wakapsaka besero mu Bhaibheri. Iyena wakabesehwa mu njira inoshamaisa maningi. Inga zvinozonangwa mu musoro jinotevera, vandhu vazinji vakavonavo kuti mbhangiro jo Bhaibheri jiciiri kushanda mbhera wari. Ivona vakavona kuti Bhaibheri rakadari inga zviro zviri mu nyumba iya yanangwaya pakutanga ko musoro uu. Irona rakasiyana no mabhuku amweni okuti pakufamba ko nguva aacashandizve. Waro ngenyi Bhaibheri i bhuku rakasiyana no amweni? Ngokuti irona i Soko ra Mwari.—1 Vatesaronika 2:13.

Kangaije imwimwi munonasa kuziva kuti upenyu hwakafupika i wakazara ngo matambujiko. Kudari mukavona kuti zvineso zvaakuda kumunyisa, ngokwapi kwamaizopsa besero kana kunyarajwa?

Ngativone manera matatu okuti Bhaibheri ringatibesera mu upenyu hwedu. Irona ringatibesera

1. Kujivirira zvineso mukuvo wese.

2. Kutonga zvineso ngo kukasika.

3. Kuhwisana no mugariro wo kuti itusu atikwanisi kuucinja.

Pamusoro jinotevera tinozobhuya ngo manera matatu aya