Khisimuso yakasananguhwa kare inga mabuso o pakutanga o zvitendhwa zvo ciKristu kuitira kurangarija kubahwa ka Jesu. Asi, zvirovejeso zvizinji zvinoshandiswa pa mabuso aya, zvinotipa murangariro wo kuda kuziva kuti, zvakaitisa kudini kuti vagume pa kubatikana ngo kubahwa ka Jesu.

Cimweni cinoitisa kudaro, i ndava yo ngano ja Santa Claus. Mudakaro wo njiku jino, ndebvu jakacena, matama akapsukirika, Santa wakasimira fato yo kupsuka, anozivikanwa ngo kuva ciziviso co Khisimuso cinobudirira cakatangwa mu gore ro 1931, ngo empereza yo zvo kumwira-mwira yo Amerika yo ka njikazi. Mukati mo gore ro 1950, vagari vamweni vo ku Bharaziri vakaeja kufakeya Santa Claus ngo Mundhu ari mu ngano yo nyika yavo—Grandpa Indian. Ngo wapi muviyo wakavepo? Karlos E. Fantinati, wakananga kudari: Santa Claus aazivi basi kunyisa Cekuru wo India, asi “wakatonyisavo mwana Jesu zve wakava muimiriri mukuru wo mabuso o njiku yo 25 yo mweji wa Mbuji.” Asi, ngano kubatanija no Santa Claus, ndizvona basi zvinotiita kuti ticadakarira Khisimuso here? Kuti tiwane mupinguro, ngatimbohwirira ku ciKristu co kutanga.

Encyclopedia Britannika yakati: “Mukati mo kutanga ko mazana maviri o makore o ciKristu, vandhu vakateverehwa maningi kuti vareremeje vaya vakafira zvovaitenda, kubatanija no kufa ka Jesu.” Ngenyi? VaKristu vaivona kureremeja njiku yo kubahwa inga cirovejeso co cihedheni zve inga ciro caidikanwa kuregehwa kamare. Zvokadi kamare, mu Bhaibheri apana panowanika njiku yakabahwa Jesu.

Mu zana ro makore ro cirongomuna N.V.Y., pikija maKristu aacaiva no zvirovejeso zvo kureremeja njiku jo kubahwa, Ciara co Katorika cakaita kuti kuve no Khisimuso. Ciara ici caida kuvangisa muemo, ngo kubvisa cimwe co zvineso zvizinji ngo njira yondhoyo—vandhu vakawanda vo ciara co cihedheni co Roma no kureremeja kwavo zvocihedheni. Gore ngo gore, kubvira mu mweji wa Mbuji 17 mbhera mweji wa Zvita 1, Christmas in America by Penne L. Restad inonanga masoko aya: “vaRoma vazinji vanobusa, vanotamba, vanoreremeja, vanofamba mu ndau jinoungana vandhu, zve vanobatanija no mabuso amweni akadari inga kunamata zvimwari zvavo.” Zve mu Mweji wa Mbuji 25, vaRoma vaireremeja kubahwa ko Zuva Ricikanyiswi. Vecigaja Khisimuso mu njiku yondhoyo, Ciara cakacengeja vaRoma vazinji kuti vareremejevo kubahwa ka Jesu, kusiapo kubahwa ko zuva. Santa Claus, a Biography, by Gerry Bowler inoti: vaRoma “vainga vacandowira mu murau iji jo mabuso anoizwa pakati po cipepo.” Zvokadi kamare, ivona “vakaramba vecigaja njiku imbza ngo kushandisa njira jo kare.”

Zvakajeka kamare kuti, cineso cikuru ngo pamusoro po kureremeja Khisimuso, i ndava yo kunyepa kunoizwa pa matangire ayo akashata. Mu bhuku rake The Battle for Christmas, Stephen Nissenbaum wakananga kuti Khisimuso yakagara inga “pacina zviripo, kunja ko mabuso o cihedheni akafukija uwori wo ciKristu.” Ngo kudaro, Khisimuso aikuji Mwari no Mwana wake Jesu Kristu. Iyi ingava shwiro dokovo hayo here? Bhaibheri rinoti: “Bzingabatana ururami no uxaixi, here? Ruveneko hungabatana no cidima?” (2 VaKorinte 6:14) Inga muti unokura wakabhenda, Khisimuso rakakombamiswa kamare zvokuti ‘arikwanisi kurungamiswa.’—Mucumaeri 1:15.