Ngatiti muri kubvakacira nyika yamusati mamboenda. Kondhoyo munowana vandhu, zvirovejeso, zvokuha, zve mare yamucikazivi. Zvinozwisisika kuti mungambocamwa.

Mungathuka mazwa kudaro pamunoverenga Bhaibheri pa vhaza yo kutanga. Pamunonga meciriverenga, mungazwa zvo nyika yo kare, zvinovoneka inga zvicikazwirani no zvamunoziva. Mungasongana no vandhu vanozwi vaFiristi, modhivana no zvirovejeso zvakadari inga zvo ‘kumwesa bzokusimira’ kana kuziva zvokuha zvakadari inga manaa zve kuziva mare yo mangwenjere inodaijwa kuti dhrakima. (Exodo 16:31; Joxwa 13:2; 2 Samueli 3:31; Luka 15:9) Zvese izvi zvingamubararisa hwiru. Mukufanana, imwimwi amucaizodakarira kubesehwa ngo ari wese ngo kumusanangurira zviro, inga zvomaizoita kudari muri kubvakacira nyika imweni here?

Kubvira pakatanga kutahwa matahwa akacena mu zana ro makore ro 16 N.V.I.Y. (Nguva ya Vese Isati Yaguma), besero riri kupekejwa vandhu kuti vazwisise matahwa. Inga muezaniso, Mosi mutungamiriri wo kutanga wo jinja ro Iziraeri, “wakaamba kupangijira [kana kusanangura]” zvainga zvakatahwa.—Deuteronòmio 1:5.

No padarika makore anokhwedera kuita gumi ro mazana, vajijisi vaikwanirisa vo Matahwa, vainga vacandowanika. Mu gore ro 455 N.V.I.Y., cikwata cakakura co vaJudha, kubatanija vana vadoko vazinji, vakaungana pamwepo mu ndau jo kuunganira vandhu mu dhorobha ro Jerusarema. Vajijisi vo Bhaibheri vainga kondhoyo ‘veciverenga zvinozijka mu bhuku [rimwero rakacena.] Asi ivona vakaita zvizinji. Ivona vakabesera vandhu, ngokudaro vese vaikona kuzwisisa tsamba’—Neemia 8:1-8, Shanduro yeNyika Itsva.

Padarika mazana mashanu o makore, Jesu wakabatikanavo mu basa rondhoro ro kujijisa. Zvokadi kamare, iyena wakatanga kuzivika ngo vandhu inga mujijisi. (Johani 13:13) Iyena wakajijisa vandhu vakawanda, kubatanija mundhu umwe nga umwe pacake. Pa vhaza imweni, iyena wakavereketa kuno vandhu vazinji, eciita hurukuro inozivikanwa inga Hurukuro yo pa Dundhu zve “vandhu vazinji vakakahamara ngo majijisiro ake.” (Mateu 5:1, 2; 7:28) Mu nguva yo cipepo co gore ro 33 N.V.Y. (Nguva ya Vese Yaguma), Jesu wakavereketa kuno vajiji vake vaviri, “ecivadurujira Matahwa,” apo povaifamba mu gwanja vecienda ku umwe mutundhu wo phedo no Jerusarema.—Luka 24:13-15, 27, 32.

Vajiji va Jesu, vaingavo vajijisi vo Soko ra Mwari. Pa vhaza imweni, umwe wo utongi wo ku Etiopia waiverenga divi rimweni ro Matahwa. Umwe mujiji waizwi Firipi, wakamukhwederera perapo omubvunjisa kudari: “Munobzizwa, kani bzomunojijari?” Mu Etiopia wakadavira kuti: “Ndingabzizwa kudini, ndicingajijiswi?” Perapo, Firipi wakamusanangurira zvozvainanga.—Maitiro o Vapostori 8:27-35.

Kufanana no vajijisi vo Bhaibheri vo mu nguva yo kare, Zvapupu zva Jehovha nyamasi uno, zvakabatikana mu basa ro kujijisa Bhaibheri mu nyika jinokwana kuita 239 pasi pese. (Mateu 28:19, 20) Bviki ngo bviki, izvona zvinobesera vandhu vanodarika mamiriau mapfumbamwe kuti vazwisise Bhaibheri. Vazinji vo vajiji ava, vanonga vacikanamati. Jijo iji ajipagahwi, zve jingaizihwa pa muzi penyu kana pa ndau iri phedo nemwi. Vamweni vanotojija ngo kushandisa foni, komputadhori kana zvimucini zvimweni.

Tapota psakanyi capupu ca Jehovha kuitira kuziva kuti mungabesereswa kudini ngo nasiriro iyi. Mucavona kuti, mukusiana no kuva bhuku ricikazivikanwi, Bhaibheri “rinobesa kujijisa, kupangira, kufujura unyepi no kurebesa mu urungami,” zvoita kuti muve “munasi no kutojanira mabasa ese auxoni.”—2 Timoti 3:16, 17.