1, 2. Bhaibheri rakaphorofita kudini ngo pamusoro po kuengejeka o vandhu va Jehovha?

PASI pese, pano sangano rimwe basi rinoumbwa ngo vandhu vanoda Jehovha zve vanoda kumushandira. Vandhu vondhovo ndi Zvapupu zva Jehovha. Pikija ivona vanoposa no kushaisha, Jehovha anovatungamirira ngo mujimu mucena wake. Ngativone njira jimweni jaanovakomborera ndijona.

² Mu gore ro 1914, vandhu vashoma basi ngo vainamata Jehovha. Asi Jehovha wakakomborera basa ro kucumaera. Inga muviyo, zviuru zvo vandhu zvakakwanisa kujijira zvokadi zvo mu Bhaibheri zve vova Zvapupu zvake. Jehovha wakasanangura kuengejeka uku kunoshamaisa paakananga kudari: “Mudoko wavo unozova ciuru; wokurembejeka wavo unozova jinja rakavanga. Inini, [Jehovha], mu mukuvo wabzo, ndinozoita ibzi ngo kukasika.” (Isaia 60:22) Nyamasi uno, tingakwanisa kuvona zvakajeka kuti ciporofita ici ciri kukwanirisika. Vandhu va Jehovha vakadari inga jinja rakakura. Zvokadi  kamare, kuno nyika zinji jino mutengo wo vandhu ucikagumi ku mutengo wo vandhu va Jehovha.

3. Vashandiri va Mwari vakakhombijisa kudini rudo?

³ Mu njiku jino jo kupejisira, Jehovha ari kubesera vandhu vake kuti vavangise rudo hwake umwe kuno umweni. “Mwari, rudo” zve ivona vanomutevejera. (1 Johani 4:8) Jesu wakabvunja vateveri vake kuti ‘vadisane ngocavo.’ Wakavabvunjazve kudari: “Mukaita kudaro vese vanozoziva kuti muri vajiji vangu: Mukadisana ngo cenyu.” (Johani 13:34, 35) Mu nguva japerari, vashandiri va Jehovha vakakhombija kuva no rudo umwe kuno umweni, majinja paainga eciita hondo. Inga muezaniso, mu hondo yo cipiri yo pasi pese, mamiriau anodarika kuita 55 o vandhu vakaurawa. Asi vandhu va Jehovha avazivi kuuraya ari wese pa hondo yondhoyo. (Verenganyi Mikeya 4:1, 3.) Izvi zvakavabesera kuti varambe ‘vakacena pa ngazi yo vandhu vese.’—Maitiro o Vapostori 20:26, Shanduro yeNyika Itsva.

4. Ngenyi kuengejeka ko vandhu va Jehovha kuri pambhene?

⁴ Vandhu va Mwari vari kuenderera mberi veciengejeka pa mutengo, pikija Sathana, muvengi wavo, ano simba maningi. Iyena ndi ‘mwari wo mugariro uno zvo zviro.’ (2 VaKorinto 4:4) Sathana ari kuvonerera zvo matongehwe o nyika ino, kubatinajavo zvinofambisa masoko, iyena anoshandisa izvi wari kuti aeje kujamisa kucumaehwa ko masoko akanaka. Asi, iyena aakwanisi kujamisa basa iri. Pikija zvakadaro, Sathana anoziva kuti nguva yake yasara padoko kamare, ngo kudaro, ari kuenderera mberi ecieja kuti kutiimisa kunamata Jehovha.—Apokalipsi 12:12.

5. Ngenyi nguva jimweni, vamweni vangaita zviro zvinotihwaja? (Vonanyi pikica yo kutanga.)

⁵ Vashandiri va Mwari vakajijira kuti ciro cinosisira maningi i kuda Mwari no vandhu vake. Jesu wakati: “‘Unozodisa [Jehovha] Mwari wako, ngo mwoyo wako wese, ngo mwiha wako wese, ngo hwiru hwako hwese.’ Uu ngo mupango mukuru no wokutungamira. Wocipiri wakatojana na uu: ‘Unozodisa mudoni wako no madisiro o unojiita iwewe.’” (Mateu 22:35-39) Asi, Bhaibheri rinokhombija kuti vandhu vakabahwa vacikazivi kukwana ngo ndava yo cishaishi ca Adhamu. (Verenganyi VaRoma 5:12, 19.) Ngo iyo ndava, nguva jimweni vamweni mu ungano vangananga kana kuita zvimweni zvinotihwaja. Kudari zvikaitika, tinozodini? Kureva kuti rudo hwedu kuna Jehovha hunozoramba hwakavanga here? Takagondeka kwaari no kuno vandhu vake here? Bhaibheri rinotibvunja ngo pamusoro po vashandiri va Mwari vakananga kana kuita zviro zvinohwaja vamweni. Ngativone kuti tingajijenyi kubvira ku zvakavaitikiraro.

6. Eri wakakonehwesa kudini kupangira vana vake?

⁶ Inga muezaniso Eri, wainga mupiri mukuru mu Iziraeri, asi vana vake vaviri avacaizwira mutemo wa Mwari. Bhaibheri rinonanga kudari: “Vana va Eli vainga vakaxata, avacaireremejepi [Jehovha] Mwari.” (1 Samueli 2:12) Eri waiziva kuti vana vake vainga veciita zviro zvakashata maningi. Pikija zvakadaro, iyena aazivi kuvapangira zvakakwana. Zve pa kufamba ko nguva, Jehovha wakapanica Eri no vana vake vaviri. Perepo, Jehovha aazivizve kutendera kuti mubarihwana wa Eri ushandezve inga vapiri vakuru.  (1 Samueli 3:10-14) Kudari makararama mu nguva ya Eri zve moziva kuti iyena no vana vake vari kuita zvakashatisisa, maizokhugunyika here? Kunanga kuti mugariro uwu waizorembesa gonda renyu kuna Jehovha, zvoitisa kuti mujame kushandira Jehovha here?

7. Kushaisha ka Dhavhidhi kwaikura zvakadini, zve Mwari wakaitenyi ngo pamusoro po zvishaishi izvi?

⁷ Dhavhidhi wainga no mugariro jakanaka maningi, ngo iyo ndava Jehovha waimuda maningi. (1 Samueli 13:13, 14; Maitiro o Vapostori 13:22) Asi pikija zvakadaro, Dhavhidhi wakaita ciro cimweni cakashata maningi. Uria paakaenda ku hondo, Dhavhidhi wakasara wovatana no mukaji wake, Bhati-shebha, womumitisa mimba. Dhavhidhi aacaida kuti ari wese azvizive. Ngo kudaro wakadanijisa Uria aviye komuvona zve woeja kumukhohwesa kuti aende ku muzi kwake. Dhavhidhi wairangarira kuti Uria waizovatana na Bhati-shebha, kuitira kuti vandhu vanange kuti mwana waizobahwaro ngo wa Uria. Asi Uria aazivi kuenda ku muzi kwake. Ngo kudaro Dhavhidhi wakamuuraisa pa hondo. Ngo ndava yo zvishaishi zvikuru izvi, Dhavhidhi no mbhuri yake vakatambujika maningi. (2 Samueli 12:9-12) Asi, Jehovha wakamuuita nyasha womuregerera. Iyena wakavona kuti Dhavhidhi waida kuita zvainga zvakarungama. (1 Majimambo 9:4) Kudari makararama mu mukuvo wondhowo, maizozwa kudini ngo zvakaitari Dhavhidhi? Maizoima kushandira Jehovha here?

8. (a) Mupostori Pedhru wakakonehwa kudini kukwanirisa zvaakananga? (b) Ngenyi Jehovha wakaramba ecishandisa Pedhru, pasure po kuposa kwake?

⁸ Muezaniso umweni wo mu Bhaibheri  ngo wo mupostori Pedhru. Jesu wakasana iyena kuti ave mupostori wake. Pikija zvakadaro, Pedhru nguva jimweni wainanga kana kuita zvicikazivi kurungama. Inga muezaniso, Pedhru, wakananga kuti aacaizosiya Jesu pikija ari wese akazomusiya. (Marco 14:27-31, 50) Asi Jesu naasungwa, vapostori vese, kubatanija Pedhru, vakamutiza. Pasure pazvo, Pedhru wakaramba kuti aacaiziva Jesu, pa bvaza ndhatu. (Marco 14:53, 54, 66-72) Asi, Pedhru wakazosuruvara maningi ngo zvaakaitari. Ngo kudaro Jehovha wakamuregerera, woenderera mberi ecimushandisa. Kudari mainga umwe wo vajiji va Jesu mu nguva wondhowo, mozwa zvakaita Pedhru, maizoramba mecithemba Jehovha here?

9. Ngenyi munothemba nguva jese kuti Mwari anoita zvakarungama?

⁹ Kubvira pa muezaniso iji wari, tinovona kuti vashandiri vamweni va Jehovha vakaita zviro zvakashata maningi zve wakashaishira vamweni. Kudari zvikaitikavo nyamasi uno, munozoitenyi? Munozosiya kwenda ku musongano kana kutosiya Jehovha kamare no vandhu vake here? Kana kuti munoceukija kuti Jehovha ano nyasha zve anovetera kuti dangani mundhu uwu anokhauya? Zvingaitika nguva jimweni kuti mundhu wotoshaisha zve wotama kukhauya. Kudari zvikaitika, munozothemba kuti Jehovha wakazvivona zve pa nguva kwayo anozoita ciri cese here? Jehovha angatobvisa mundhu uwu mu ungano zvecidiwaya. Munothemba kuti Jehovha nguva jese anozoita zviro zvakana no zvakarungama here?

10. Jesu wakazwisisenyi ngo pamusoro po zvishaishi zva Juda Iskariote na Pedhru?

¹⁰ Mu Bhaibheri, tinoverenga ngo pamusoro po vandhu vazinji vakaramba vakagondeka kuna Jehovha no vandhu vake pikija vaitendenejwa ngo vandhu vaiita zvishaishi zvikuru. Jesu ndi muezaniso wakanaka pa divi iri. Pasure po kupeja usiku hwese eciita mukumbiro wo kukumbira besero kuna Baba wake, iyena wakasana vapostori 12. Asi, umwe wavo, Judha Iskariote, wakazomutengesa. Zve mupostori, Pedhru wakananga kuti aacaimuziva. (Luka 6:12-16; 22:2-6, 31, 32) Jesu aazivi kupa ndava Jehovha kana vajiji vamweni, vamweni vavo povakamucamwisa. Jesu wakaramba ari phedo na Baba wake zve wakaenderera mberi ecishandira Jehovha wakagondeka. Inga muviyo, Jehovha wakamupfupa ngo kumumusa perepo womuita Mambo wo Umambo mugore.—Mateu 28:7, 18-20.

11. Bhaibheri rakanangenyi ngo pamusoro po vashandiri va Jehovha mu nguva ino?

¹¹ Muezaniso wa Jesu unotijijisa kuti tinodikana kuva vakagondeka kuna Jehovha no ku vandhu vake. Zve itusu tina mathangwe akanaka kuti tizviite. Tiri kuvona kuti Jehovha ari kutungamiriradi vashandiri vake mu nguva jino jo kupejisira. Iyena ari kuvabesera kucumaera pasi pese, zve ndivona basi vari kuita basa iri. Ivona vakabatana zve vakadakara ngo kuti Jehovha ari kuvajijisa.  Jehovha wakasanangura izvi paakananga kudari: “Ngo bzokadi varanda vangu vanozotamba vecidakara mu mwoyo mavo.”—Isaia 65:14.

12. Tinodikana kovona kuti kuposa ko vamweni?

¹² Tino mudakaro kamare ngo kuti Jehovha ari kutitungamirira no kutibesera kuita zviro zvizinji zvakanaka. Mukusiyana, vandhu vo nyika ya Sathana avaripi kudakara zve avana vetero yokadi yo kumbeji. Kwaizova kutama ungwaru kusiya Jehovha no vandhu vake, ngo ndava yokuti ari wese mu ungano waita kana wananga ciri cese cicikazi kunaka basi. Kusiyapo, tinodikana kuramba takagondeka kuna Jehovha no kutevera ndhungamiriro yake. Tinodikanazve kuziva mavonere no madavirire atinoita kuposa ko vamweni.

13, 14. (a) Ngenyi tinodikana kuva vanosengerera umwe kuna umweni? (b) Cigondiso capi catinodikana kuceukija?

¹³ Tinodikana kuitenyi kudari umwe wo hama jedu akananga kana kuita ciri cese cinotihwaja? Bhaibheri rinotipangira kudari: “Ucakasika kunyangajwa, ngokuti unyangaji hunogara mu mwoyo wo benji.” (Mucumaeri 7:9) Tese atizivi kukwana zve tinoposa. Ngo kudaro, atingaveteri kuti hama jedu jinozonanga kana kuita zviro zvakarungama nguva jese. Zve azvicaizova zvakana kuramba tecindorangarira zvavanoposa. Ngo kuti tikadaro, kangaije atidoendereri mberi takadakara potinoshandira Jehovha. Zvakapinda kushata ngo zvokuti, gonda redu kwaari tingazotoremba, totosiya sangano rake. Perepo, taizotama kushandira Jehovha kana kuva no vetero yo kurarama mu nyika imbza.

¹⁴ Waro, zvicinyi zvingamubesera kuramba makadakara pa kushandira Jehovha, pikija vamweni vakaita zviro zvinomuhwaja? Nguva jese ceukijanyi cigondiso ici cinotondhoja, cinoti: “Vonanyi, ndinorura madenga mapsa no nyika ipsa, bzo kare abzizocerecejwibze, abzizodihwibze mu mwoyo.” (Isaia 65:17; 2 Pedru 3:13) Jehovha anozomupa makomborero aya kudari mukaramba makagondeka kwaari.

15. Jesu wakananga ku tinodikana kuitenyi vamweni pavanotiposera?

¹⁵ Zvokadi, atito taa mu nyika imbza. Waro kudari ari wese akaita zviro zvinotihwaja, tinodikana kurangarijisisa zvinoda Jehovha kuti tiite. Inga muezaniso, Jesu wakananga kudari: “Mukakungurira vandhu bzixaixi bzavo, Baba wenyu vo mugore vanozomukunguriravo. Mukatama kukungurira vandhu, na ivonavo Baba wenyu avazomukunguririvo bzixaixi bzenyu.” Zve Pedhru paakamubvunjisa kuti tinodikana kuregerera “Mbhera runomwe” here kana kuti haiwa, Jesu wakamupingura kudari: “Andinangi kuti runomwe, kaveta mbhera makumanomwe o runomwe.” Jesu wakatijijisa kuti tinodikana kuregerera vamweni  nguva jese, ngo mwoyo wese.—Mateu 6:14, 15; 18:21, 22.

16. Muezaniso wapi wakagajwa ndi Jasefa?

¹⁶ Muezaniso wa Jasefa unotijijisa zvatinodikana kuita vamweni povanotishaishira. Jasefa no munukuna wake ndivona vega vainga vana va Jakobe na Rakeri. Jakobe waingazve no vana vamweni vaikwana gumi, asi iyena waidisisa maningi Jasefa kupinda vamweni vese. Izvi zvakaita kuti vave no ushanje na Jasefa. Zvokadi, vaimuzonda maningi zvokuti vakatoguma pakumutengesa inga shoko, wotohwa kwenda ku Ejipita. Nopapera makore akawanda, mambo wo Ejipita wakakhwija Jasefa kuva mundhu wocipiri ana simba maningi mu nyika yondhoyo ngo kuti wakashamaisika maningi ngo basa rakanaka raiita Jasefa. Pa kufamba ko nguva, ngo ndava yo njara hama jake jakaenda ku Ejipita kootenga zvokuha. Paakajivo Jasefa wakajiziva kuti jaibva kwapi, asi ijona ajizivi kumuziva. Pikija jainga jakamushaishira maningi, iyena aazivi kujipanica. Kusiapo izvo, iyena wakaeja kuti azive kuti jainga jacinjadi kana kuti haiwa. Paakavona kuti jainga jacinja, wajizivisa kuti wainga hama yajo. Perepo, wojinyaraja zve wonanga kudari: “Waro mucathya, ndinozomuhisa no vana venyu.”—Genesi 50:21.

17. Munozoitenyi kudari ari wese akamuposera?

¹⁷ Mucakanganwa kuti, zvecivoneka kuti mundhu wese anoposa, imwimwivo mungakhugunyavo vamweni. Kudari mukavona kuti macamwisa ari wese, tevejanyi mbhangiro yo Bhaibheri. Kumbiranyi kuregerehwa, zve ejanyi kuita runyararo naye. (Verenganyi Mateu 5:23, 24.) Tinoda maningi kuregerehwa ngo vamweni. Ngokudaro, tinodikanavo kuvaregerera. VaKolosi 3:13, Shanduro yeNyika Itsva, inotibvunja kudari: ‘Rambanyi mecicijikirana umwe kuno umweni zve meciregererana ngo mwoyo wese, pikija kudari pakava no mundhu ano thangwe ro kun’gun’gutira umweni. Kudari ngo zvaakamuregerera Jehovha ngo mwoyo wese, imwimwivo itanyivo kudaro.’ Kudari tino rudo kamare no hama yedu, atizorambi takaviga bundu ngo pamusoro po ciri cese coyakatiitira kareko. (1 VaKorinto 13:5) Zve tikaregerera vamweni, Jehovha anozotiregereravo. Ngo kudaro, vamweni vakatiposera, ngativakhombijire unyasha inga ndi Baba wedu, Jehovha, vano nyasha na itusu.—Verenganyi Nduyo 103:12-14.