Haykanush, mucumairi wokaji acizivi kubhabhatijwa wo ku Armenia, wakaboja pasaporti phedo no pamuzi pake. Mukati mo pasaporti maenga no makhadhi o kubhanko no mare yakawanda. Iyena wakabvunja mwamuna wake, varivo mucumairi acizivi kubhabhatijwa, ngo pamusoro po zvaaingari aboja.

Varovorani ava vaenga varombo maningi zve vaenga no magava. Asi ivona vakasunga kutora mareyo voenda nayo ku nyumba yainga yecinangwa pa pasaporti iya. Mwanarume wakambhwejaya pasaporti no mbhuri yake vakakahamara maningi. Haykanush no mwamunake vakasanangura kuti vaenga vakagondeka ngo ndava yo zvovaijija mu Bhaibheri. Perepo, vakashandisa mukana uu kuti vabhuye ngo pamusoro po Zvapupu zva Jehovha, perepo vopa mabhuku mbhuri iyana.

Mbhuriyo yakada kupfupa Haykanush ngo mare, asi iyena aacaizoiashirepi. Njiku yakatevera, mukaji wo mwanarume wiyana wakaenda koovona Haykanush no mwamunake kumuzi kwavo, no kutatija kubonga kwake, wovangijira Haykanush kuti aashire mbhete yo dhiamanti.

Mukuezana no mbhuri iyowaro, vazinji vaizokahamara ngo kugondeka kwakakhombijwa ndi Haykanush no mwamuna wake. Asi Jehovha wakakahamara here? Wakavona kudini kugondeka kwavoko? Kugondeka kwavo kwaenga kuvangisira kuna mutengo here?

Mupinguro jo mubvunjo ijo ajinesi. Ngenyi? Ngokuti vashandiri va Mwari vanoziva kuti kutevejera mugariro ja Jehovha kuna mutengo mukuru kwaari kupinda madhiamanti, goridhi, kana zviro zvimweni zvo kunyama. Hina, zvaanovona Jehovha inga zvina mutengo mukuru zvakasiyana kamare no zvinoreremeja vandhu. (Isaia 55:8, 9) Zve vashandiri vake vanozwa kuti kuvangisira kwavo kuti vatevejere mugariro ja Jehovha kuna mutengo mukuru maningi.

Tingazvivona izvi ngo zvinonanga Bhaibheri ngo pamusoro po kuzwisisa no ungwaru. Mazwi Akangwara 3:13-15 inoti: “Anomucena mundhu wakawana uzivi, mundhu wakapuwa hwiru! Kuhuwana kuno mutengo kupinda siriva, upfumi hwahwo hunopindirija mutengo wo ndarama. Hunopindirija usanga, bzounoda bzese, abziezani nahwo.” Zvakajeka kuti Jehovha anoreremeja maningi mugariro jakadari kupinda upfumi huri hwese hwo kunyama.

Waro, tingati ngo pamusoro po kugondeka?

Jehovha pacake wakagondeka. Iyena ‘aanyepi’. (Tito 1:2) Zve wakafemera mupostori Pauro kuti atarire vaKristu vo ciHebheru vo muzana ro kutanga ro makore kudari: ‘Rambanyi mecitikumbiriravo, ngo kuti tinothemba kuti tino hana yakagondeka zvatinoda kuva vakagondeka pa zviro zvese.’—Vaheberi 13:18, Shanduro yeNyika Itsva.

Jesu Kristu wakagaja muezaniso wakanaka wo kugondeka. Inga muezaniso, Mupiri Mukuru Kaifasi paakati: “Ndinokupikisa mu zina ra Mwari anopona, kuti tibvunjei dangani iwewe ndiwe Kristu Mwana wa Mwari,” Jesu wakazvizivisa inga Mesia. Iyena wakabhuya cokwadi pikija waizviziva kuti Vo pa Sinedriyo [yainga banje guru ro ciJudha] vaizomupumbha kuti i mutuki zve zvaizomuuraisa.—Mateu 26:63-67.

Tingativo kudini ngo pamusoro pedu? Kudari tiri pa mugariro wokuti tingabesereka ngo zvo kunyima ngo kutama kusumura zvese kuna ariwese, kana ngo kunyepera kadodoko basi, ticazoramba takagondeka here?

Zvingava cineso kuva takagondeka mu njiku jino nguva yokuti vazinji vari kuva ‘vanojida,  vacidisisa upfumi.’ (2 Timoti 3:2, Baiberi Mazwi Akacena aMwari) Panotamika mare, kana pozvinova zvecinesa kuwana basa, vazinji avanesehwi ngo kuba, kucengejera zvovacikakwanisi, kana kuita zviito zvimweni zvo kutama. Mushovo uu wo murangariro wakawanda zvokuti vazinji vanozwa kuti njira imwe basi kuti uwane zviro zvo kunyama ngo yo kutama kugondeka. Pikija maKristu amweni anotema zvivaringo zvakashata no kuita “xavo jokunyoeja” oruza osiya kuva no zina mu ungano.—1 Timoti 3:8; Tito 1:7.

Asi, maKristu mazinji anotevejera Jesu. Iwona anozwisisa kuti kuva no mugariro jakaezana no ja Mwari zvinosisira maningi kupinda upfumi kana makomborero ari ese. Ngo iyo ndava kuti vocidoko vo ciKristu avanokabhurari kuti vawane nota jaushoni kucikora. (Mazwi Akangwara 20:23) Kugondeka akungaviisi mupfupo nguva jese, inga zvakaitikira Haykanush. Asi pikija zvakadaro, kuva wakagondeka ngo kaanonanga Mwari kuti kwakanaka, zve kotiita kuti tive no hana yakacena, iyo ino mutengo mukuru kamare.

 Muezaniso wa Gagiki unokhombija izvo. Iyena wakati: “Ndicito ndaa muKristu, ndaishanda pa impereza huru, yokuti muno wayo wairamba kuishabira ngo kutarira mare shoma yo rukuru yaiwaniwa ngo impereza. Inga muvonereri mukuru, ndaivetera kuti pave no ‘kuzwirana’ no mushabisi ngo kumudyekera kuti afukijire zviito zvo kutama kugondeka zvaiitwa ngo impereza yedu. Inga muviyo, ndakava no mbirikira yo kutama kugondeka. Pondakajija cokwadi, ndakaramba kuenderera mberi ndiciitazve zvondhozvo, pikija kuti basero raiwanisa mare yakawanda. Kunja kwa izvi, ndakatanga kuita nyagoso yangu. Kubvira pa njiku yokutanga, ndakataririsa zvopamutemo impereza yangu no kushaba nguva jese.”—2 VaKorinto 8:21.

Gagiki wakati: “Ndakambhwera ndosara no metadi yo mare yondaenga nayo, zvondiitira cineso kuti ndihise mbhuri yangu. Asi, wari ndiri kudakara. Ndina hana yakacena pamberi pa Jehovha. Ndiri muezaniso wakanaka ku vana vangu vaviri, zve ndakakwanirisa kuti ndive no mutoro mu ungano. Pakati po vashabisi no vamweni vondinoita navo nyagoso, ndina mbirikira yo kuva mundhu wakagondeka.”

Jehovha anoda vaya vanoviisa rukujo kwaari ngo kutevejera mugariro jake jinokahamarisa, kubatanijavo no kugondeka. (Tito 2:10) Potinoita izvi, Jehovha anogondesa kutibesera. Iyena wakafemera Mambo Dhavhidhi anange kudari: “Kubvira udoko, mbhera uharahwa hwangu andizivi kuvona mururami wakasiiwa, nokuti vana vake vecipembha bzokuha.”—Nduyo 37:25.

Izvo zvinokhombijwa ngo zvakaitikira mugondeki Rute. Ngo kugondeka wakagara na nyezvara kana mazvarira wake, Naomi, kunja ko kumusiya ngokuti waenga waaharahwa. Rute wakathutha kuenda Iziraeri, kwaaizonamata Mwari wo cokwadi. (Rute 1:16, 17) Iyena waigondeka no kuvangisira koobojera zvakasara mu maminda, acivetera nasiriro yo Mutemo kuitira varombo. Mukuezana no zvakazoitikira Dhavhidhi, Jehovha aazivi kusiya Rute na Naomi. (Rute 2:2-18) Iyena wakaita zvinopinda kupa zvinodiwa zvo kunyama zva Rute. Wakamukheta kuti aite divi ro nda-nda-nda yo mbhuri ya Mambo Dhavhidhi no ya Mesia wakapikihwa!—Rute 4:13-17; Mateu 1:5, 16.

Zvinonesa maningi ku vashandiri kuti vawane mare inokwana kusapota zvinodiwa zvavo. Asi, kunja ko kueja kupsaka mawanihwe o mare akareruka no ari okutama kugondeka, vanobata basa guru zve ngo simba rese. Ngo kuita izvi, vanokhombija mugariro jinokahamarisa ja Mwari, kubatanijavo no kugondeka, kuna mutengo mukuru kovari kupinda zviro zviri zvese zvo kunyama.—Mazwi Akangwara 12:24; VaEfeso 4:28.

Mukuezana na Rute, kutenderera pasi pese maKristu ari kugonda simba ra Jehovha kuti rivabesere. Iona anonyinda kamare wiya anopikira kudari: “Andicakuregeri wega nokuti kukusia.” (Vaheberi 13:5) Mukuphinda no kundophinda, Jehovha wakazvitatija kuti anokwanisa zve anoda kubesera vaya vakagondeka pa nguva jese. Iyena mukuvo wese anokwanirisa cipikihwa cake co kupa zvinodiwa zvo vashandiri vake.—Mateu 6:33.

Hina, vandhu vangareremeja madhiamanti no zviro zvimweni zvo kunyama. Asi, itusu tingava no cokwadi kuti Baba wedu vo mudenga vanoreremeja maningi kugondeka kwedu no mugariro jimweni jakanaka, maningi kamare, kupinda upfumi huri hwese hwo mutengo mukuru!