1. Inga zvakatahwa pana Mateu 11:28-30, Jesu wakaita cigondiso capi?

Jesu wakaita cigondiso cinoshamaisa kuno vandhu vazinji vaipurukira zvaainanga. Iyena wakati: “Izanyi kondiri, . . . Inini ndinozomuzoroja.” (Verenganyi Mateu 11:28-30.) Jesu acaindobhuya ngo kundobhuya hake. Inga muezaniso, rangariranyi basi ngo zvaakaita kuno mwanakaji wainga ano ndhendha inosuruvarisa.

2. Jesu wakaitenyi no mwanakaji waihwaja?

² Mwanakaji wiya waida maningi kubeswa. Iyena wainga arapwa ngo varapi vakawanda. Wakaita gumi na maviri o makore ecitambujika basi. Mukuzwirana no Mutemo wa Mosi, mwanakaji uwo wainga acizivi kucena. (VaLevi 15:25) Asi iyena wakazwa kuti Jesu waikwanisa kurapa vaihwaja. Ngokudaro, wakamupsaka. Paakamuwana, iyena wakapsasa ciuruji co nguvo ya Jesu, iyena wakarapika ngo kukasika. Jesu wakaita zvizinji kupinda kumurapa basi, iyena wakamutaja ngo nderemejo yese. Inga muezaniso, paibhuya no mwanakaji uwu, iyena wakashandisa gama rokuti “mwana”. Gama iri raikhombija nderemejo no rudo. Zvokadi kamare, mwanakji uwu wakazwa kuvangiswa no kuzorojwa.—Luka 8:43-48.

3. Tinozodavira muvhunjo japi pa jijo iyi?

³ Makwanisa kuzvivona here? Mwanakaji uwu, ndiyena wakaenda koopsaka Jesu. Ndizvona zvinoitikavo nyamasi uno, tinodikana kuita simba kuti tiende kuna Jesu. Jesu aaripi kurapa ngo mushamaiso nyamasi uno, vanohwaja vanoenda kwaari. Asi aciri kukoka vandhu mbhera wari, eciti: “Izanyi kondiri, . . . Inini ndinozomuzoroja.” Pa jijio iyi tinozodavira muvhunjo mushanu: Tinodikana kuitenyi kuti tiende kuna Jesu? Jesu waida kunangenyi, paakati: “Thwaranyi kanga yangu”? Tingajijenyi ngo muezanisio wa Jesu? Ngenyi kuita basa ratakapuwa ndi Jesu kunotizoroja? Zve tingaenderera kudini mberi tecizorojwa ngo kuthwara kanga ya Jesu?

4-5. Tingaitisa kudini kuti tiende kuna Jesu?

⁴ Amwe manera o kwenda kuna Jesu ngo o kujija ngo pamusoro po zviro zvaakananga no kuita. (Luka 1:1-4) Akuna angatiitira izvi. Basa ro kujija ngo pamusoro po upenyu hwa Jesu ngo redu. Cimwenizve, tingaenda kuna Jesu, ngo kubhabhatijwa no kuva vajiji vake.

⁵ Njira imweni yo kwenda kuna Jesu, ngo yo kupsaka besero ro vakuru pazvinodikana weya. Jesu anoshandisa ‘zvipo [izvi] zvo vanarume’ kuti akorondhe mavhuta ake. (VaEfeso 4:7, 8, 11, Shanduro yeNyika Itsva; Johani 21:16; 1 Pedru 5:1-3) Itusu tinodikana kupsaka besero ravo. Atidikani kuimira kuti ivona vafembere zvatiri kurangarira no zvatinoda. Vonanyi basi zvakaitika no hama inodanwa Juriano. Iyona yakati: “Inini ndaida kusiya kushandira ku Bheteri ngo ndava yo kuhwaja. Shamwari yangu yakandivhunja kuti ndaidikana kukumbira besero ro vakuru. Pakutanga, ndakavona kuti apacainga no dikano yo kuzviita. Asi, sure kwazvo ndakakumbira besero. Ndingatonanga kuti besero riya rakava cipo condicikakanganwi.” Vakuru vakagondeka inga vakabeserari hama Juriano, vangatibesera kuziva “murangariro wa Kristu” kana kuti kuzwisisa no kutevejera marangaririre aaita. (1 VaKorinto 2:16; 1 Pedru 2:21) Zvokadi kamare, ici i cipo cotaidikana kuashira.

6. Magama a Jesu o kuti, “thwaranyi kanga yangu,” anoda kunangenyi?

⁶ Magama a Jesu okuti, “thwaranyi kanga yangu,” kangaije anganangirazve ‘tendanyi kutungamirihwa ndini.’ Asi, zvingaitazve kuti, iyena wainga ecida kunanga kudari: “Vianyi pasi po kanga yangu pamwepo na inini, tishandire Jehovha pamwepo.” Azvinenyi hazvo, kuthwara kanga ya Jesu, zvinoreva kubata basa.

7. Mukuzwirana na Mateu 28:18-20, ngorapi basa rotakapuwa zve tinodikana kuva no cokwadi cenyi?

⁷ Itusu tinothwara kanga ya Jesu ngo kupira upenyu hwedu kuna Jehovha no kubhabhatijwa. Vese vanokwanisa kuita izvi, Jesu aazorambi mundhu ari wese anoda kushandira Mwari. (Johani 6:37, 38) Kusiyapo izvo, muteveri wese wa Jesu, wakaashira muthwaro wo kushanda pamwepo naye, pa basa raakapuwa ndi Jehovha. Tingava no cokwadi co kuti Jesu anozova nesu pa basa iri zve anozotibesera.—Verenganyi Mateu 28:18-20.

8-9. Ngenyi vandhu vanojidodokesa vaidakarira kugara phedo na Jesu zve tingajivhunjisenyi?

⁸ Vandhu vaijidodokesa vaida kugara phedo na Jesu. (Mateu 19:13, 14; Luka 7:37, 38) Ngenyi? Ngokuti Jesu wainga wakasiyana no Vafarisi. Vatungamiriri avo vo zviyara vaishaisha kutaja vandhu zve vaijikuja. (Mateu 12:9-14) Jesu wainga mundhu anoda vandhu no kujidodokesa. Kuveni, Vafarisi vaida kuzivika ngo vandhu zve vaijikuja ngo kujivona inga vandhu vanosisira. Cimwenizve, Jesu waijijisa vandhu kuti vatame kujivona inga vanosisira kupinda vamweni. Asi vavashandire. (Mateu 23:2, 6-11) Vafarisi vaida kuti vandhu vavazwire ngo kuvathya. (Johani 9:13, 22) Jesu waizoroja vandhu ngo magama akanaka ecizviita ngo rudo.

⁹ Izvi zvijijo zvakanaka zvatingajija ndi Jesu. Jivhunjisenyi kudari: ‘Vandhu vanondivona inga mundhu wakapfava no anojidodokesa here? Ndinodakarira kuita basa rinovoneka inga ricikasiriri, ndecishandira vamweni here? Ndinokhombija kunaka mwoyo here?’

12-14. Ngenyi tingananga kuti basa rotakapuwa ndi Jesu, rinozoroja?

¹² Ngenyi tingananga kuti basa rotakapuwa ndi Jesu, rinozoroja? Kuno mathangwe akawanda, asi tinoda kuvona manganani.

¹³ Tino vatungamiriri vakanaka. Jehovha ndiyena Mutungamiriri wedu Mukuru, iyena aazivi kushata zve anobongesera. Cimwenizve, anoreremeja maningi basa ratinoita. (Vaheberi 6:10) Iyena anotipa simba ratinoda kuti tikwanise kuita basa raakatipa. (2 VaKorinto 4:7; VaGalàsia 6:5) Jesu, Mambo wedu wakatigajira muezaniso waushoni wo kutaja vamweni. (Johani 13:15) Vakuru vanotitungamirira, vanoeja kutevejera Jesu “muhavisi mukuru.” (Vaheberi 13:20; 1 Pedru 5:2) Kuti vatijijise no kutingwarira, ivona vanovangisira kuti vave vandhu vakanaka mwoyo, vanodakajisa no kucunga.

¹⁴ Tino Shamwari jakanaka. Akuna vandhu vano basa rinodakajisa inga redu no shamwari jinotida. Rangariranyi basi: Itusu tino cidakajiso co kushanda pamwepo no vandhu vanotevejera ndhungamiriro jakakhwirira asi avajivoni inga vakuru kupinda vamweni. Ivona vanokwanisa kuita zviro zvakawanda maningi, asi avajikuji ndizvona. Cimwenizve, ivona vanovona vamweni inga vakuru. Avativoni havo inga vadoni vo ku basa asi inga shamwari. Rubatano uwu hwakavanga zvokuti vangatopira upenyu hwavo kuitira vamweni.

15. Tinozwa kudini ngo basa rotakaashira kuita?

¹⁵ Tino basa rakanaka maningi. Itusu tinojijisa vandhu ngo pamusoro pa Jehovha no kubudisa pambhene manyepo a Sathana. (Johani 8:44) Sathana anopa vandhu muthwaro wo vacikakwanisi kuthwara. Inga muezaniso, iyena anoda kuti itusu titende kuti Jehovha aaregereri zvishaishi zvedu zve atifaneri rudo hwake. Aya i manyepo akashatisisa zve acikakwanisiki kuthwara. Patinoenda kuna Jesu, zvishaishi zvedu zvinoregerehwa. Cokwadi ngo co kuti, Jehovha anotida maningi. (VaRoma 8:32, 38, 39) Amuvonivo kuti i cidakajiso kubesera vandhu kuti vathembe Jehovha no kuva no upenyu uri nani here?

16. Ngowapi musiyano uripo no muthwaro watinopuwa ndi Jesu no muthwaro jatinodikana kuthwara njiku no njiku?

¹⁶ Muthwaro watiri kukumbihwari ndi Jesu kuti tithware, wakasiyana no muthwaro watinothwarari njiku no njiku. Inga muezaniso, zvinoitika maningi mundhu kuvha ku basa wakaremba zve acina mudakaro. Mukusiyana, patinoshandira Jehovha na Jesu, tinojizwa takadakara. Nguva jimweni, patinopera kuita basa redu, zvingatoita kujizwa takaremba zve todikana kwenda ku musongano pa usiku wondhowo. Asi patinovha ku musongano tinozwa kuti tavangiswa zve taano mudakaro. Ndizvona zvinoitikavo patinovangisira kuti tiende koocumaera no kuita jijo yo mundhu ega. Makomborero atinova nawo akawanda maningi, kupinda simba ratinopeja teciita izvi.

17. Tinodikana kuzivenyi zve tinodikana kungwarirenyi?

¹⁷ Tinodikana kuziva kuti umwe nga umwe wedu ano paanogumira. Ngo iyo ndava, tinodikana kungwarira kuti mushovonyi wo muthwaro watinodikana kuthwara. Inga muezaniso, nguva jimweni tingatopeja simba redu teciunganija zviro zvo kunyama. Pa vhaza imweni umwe mujaha wakakhupuka wakavhujisa Jesu kudari: “Ndoitenyi kuti ndizove no kurarama kucingaperi?” Mujaha uwu waita zvese zvaikumbihwa ngo Mutemo. Zvingatoitazve kuti iyena wainga mundhu waushoni, ngokuti Vhangeri ra Marko rinonanga kuti Jesu ‘wakamuda.’ Ngokudaro, Jesu wakakoka mujaha uwu, ngo magama aya: “Endai, tengesai bzako bzese, . . . sure kwabzo viai konditevera.” Iyena waida kutevera Jesu, asi wainesehwa kuzviita ngo ndava yo “upfumi huzinji” hwainga nahwo. (Marco 10:17-22) Muviyo wakona wakava wo kuti iyena aazivi kutenda kanga yaakapuwa ndi Jesu, ngo kudaro wakaenderera mberi ecishanda inga muranda wo “upfumi.” (Mateu 6:24) Waro, imwimwi maizokhetenyi?

18. Tinodikana kuitenyi nguva jese zve ngenyi?

¹⁸ Nguva jese, zvakanaka kuzvipopora kuti ngozvapi zvatiri kudira pakutanga mu upenyu hwedu. Ngenyi? Ngokuti zvinotibesera kuziva dangani tiri kushandisa ushoni simba redu. Vonanyi zvakaitika no imwe hama inodanwa Marko, iyona yakati: “Pakaita makore mazinji ndecivona kuti andicainga no zvakawanda mu upenyu. Ndainga piyona, asi nguva jese ndairangarira kuva no mare yakawanda no kuva no upenyu wakareruka. Ndaijivhunjisa kuti ngenyi upenyu wangu uri kunesa. Ngokudaro, ndakazwisisa kuti ndairangarira maningi kugutisa zvido zvangu, ndecipa Jehovha padoko simba no nguva yangu.” Hama Marko vakacinja manera avo okurangarira, voita cinjo mu upenyu kuti vawane nguva yakawanda yo kushandira Jehovha. Vakatizve: “Nguva jimweni ndinothimwa-thimwa. Asi ngo besero ra Jehovha pamwepo na Jesu, ndiri kunyisa zvineso zvangu.”

19. Ngenyi tinodikana kuva no mavonero akanaka?

¹⁹ Tikada kuti tienderere mberi tecizorojwa ngo kanga ya Jesu, tinodikana kuita zviro zvitatu. Cokutanga, ivanyi no mavonero akanaka. Zvecivoneka kuti tiri kushandira Jehovha, tinodikana kuita basa ngo manera a Jehovha. Itusu tiri vashandi, Jehovha mune wo basa. (Luka 17:10) Kueja kuita basa ra Jehovha ngo njira yedu, zvafanana no kuhwisana no kanga. Rangariranyi ngo buru rinoramba kugara pasi po kanga ya tenji waro, reciramba kuenda kwaanoda, asi recienda kwarinoda. Pikija rino simba, irona ringagumira pa kuremba, kangaije kutozvikuvaza. Ngo divi rimweni, tikaita zviro ngo njira ya Jehovha, tinova no muviyo jinoshamaisa. Ceujanyi kuti: Jehovha akada kuti zviro zvake zviitike, apana angamuphinga.—VaRoma 8:31; 1 Johani 4:4.

20. Zvicinyi zvinodikana kutindundira kuti tithware kanga ya Jesu?

²⁰ Cocipiri, shandanyi no cido cokadi. Kuda kukuja Baba wedu vano rudo, Jehovha ngo zvinotindundira kuti timushandire. Vandhu vaishanda ngo makaro pa kuda kugutisa zvido zvavo mu nguva ya Jesu, vakaguma pa kuruza mudakaro, vosiya kanga ya Jesu. (Johani 6:25-27, 51, 60, 66; VaFilipi 3:18, 19) Ngo divi rimweni, vaya vaishanda vecindundihwa ngo rudo hwokadi kuna Mwari no vadoni vavo, vakathwara kanga ya Jesu no mudakaro mu upenyu hwavo pasi pano zve vakawana vetero yo kushanda na Kristu kumatenga. Tikathwara kanga ya Jesu no cido caushoni, atizoruzi mudakaro wedu.

21. Mukuzwirana na Mateu 6:31-33, Jehovha anozoitenyi kwatiri?

²¹ Cocitatu, ivanyi no vetero yokadi. Tikatendera kanga ya Jesu, tinonga tasana kutora upenyu wokujiramba no basa rakavanga. Jesu wakananga kuti taizoteverehwa. Asi tino gwinyiso kuti Jehovha anotipa simba kuti ticungirire, azvinenyi kuti tino zvineso zvapi. Patinocungirira, tinova vakavanga. (Jakobo 1:2-4) Tingavetera kuti Jehovha anotipa zvatinoda. Jesu ngaatitungamirire, hama no hambzaji jedu ngajitivangise. (Verenganyi Mateu 6:31-33; Johani 10:14; 1 VaTesalònika 5:11) Pacina kukana-kana, tino zvese zvatinoda kuti ticungirire.

22. Ngenyi tinodikana kudakara?

²² Mwanakaji wiya waingaya ecibuda ngazi, wakajizwa kuvangiswa mu njiku yondhoyo yaakarapiwaro ndi Jesu. Asi kuti aenderere mberi ecivangiswa, iyena waidikana kuva mujiji wakagondeka wa Kristu. Munorangarira kuti iyena wakatema civaringo capi? Kudari wakadavira kanga ya Kristu, rangariranyi makomborero aakaashira: Kushanda na Jesu kumatenga! Zviri zvese zvaakaita kuti atevere Kristu azvipindi makomborero aakazoashira! Azvinenyi kuti ngoyapi vetero yedu, dangani ngo yo kurarama kumatenga kana pasi pano, itusu tinodikana kudakara maningi ngo kutendera kwedu mukoka wa Jesu wokuti: “Izanyi kondiri.”