MUSORO WO KUJIJA WO 30
NDUMBO 36 Tinongwarira Mwoyo wedu
Ngozvapi Zvatinojija Kuvha ku Majimambo o Iziraeri?
“Imwimwi munozovonazve kusiyana ko mundhu wakarurama no mundhu wakashata, mundhu anoshandira Mwari no mundhu acikamushandiri.”—MARAKIYA 3:18.
ZVATICAJIJA
Tinozojija manera Jehovha waivona majimambo o Iziraeri no manera aanovona vashandiri vake nyamasi uno.
1-2. Bhaibheri rinonangenyi ngo pamusoro po majimambo amweni o Iziraeri?
BHAIBHERI rinonanga mazina o majimambo anopindirija 40 o Iziraeri. Zviitiko zvo mu Bhaibheri, zvakanasa kujeka pazvinobhuya ngo pamusoro po majimambo aya. a Cimwenizve, rinobhuya zviro zvinosisira maningi ngo pamusoro po amwe o majimambo aya. Inga muezaniso, Jehovha wakananga kudari ngo pamusoro pa Mambo Dhavhidhi: “Muranda wangu Davidi, wakateveja mupangu yangu, wonditevera ngo mwoyo wese, eciita bzakarurama basi pa majiso angu.” (1 Majimambo 14:8) Asi ceukijanyi kuti Dhavhidhi wainga akaita uhure no mukaji wo mundhu no kuitisa kuti mwamuna wo mwanakaji uwu afire pa hondo.—2 Samueli 11:4, 14, 15.
2 Ngo divi rimweni, majimambo amweni acizivi kugondeka, akaita zviro zvaushoni. Vonanyi muezaniso wa Robhowamu. Mu mavonero a Jehovha, iyena “wakaita bzakaxata.” (2 Kronike 12:14) Pikija zvakadaro, Robhowamu wakazwira ndhungamiriro ya Jehovha yo kutama kuhwisana no gumi ro majimambo o Iziraeri, wovasiya kuti vasane mambo umweni. Izvi zvakaita kuti madhorobha mazinji ajiviririke no kubesera vandhu va Mwari kuti vajijivirire ku vavengi vavo.—1 Majimambo 12:21-24; 2 Kronike 11:5-12.
3. Muvhunjo wapi watingava nawo, ngozvapi zvatinozojija pa cijijo ici?
3 Patinoverenga ngo pamusoro po majimambo o Iziraeri, tingatoguma pa kujivhunjisa kudari: ‘Kudari majimambo akaita zvakanaka no zvakashata, Jehovha waiitisa kudini kuti avone dangani ari wese wainga akagondeka kana haiwa pamberi pake?’ Mupinguro wo muvhunjo uu unozotibesera kuvona zvatingaita kuti tidakajise Jehovha. Pa jijo iyi, tinozovona zviro zvitatu zvokuti kangaije Jehovha wakazvisotesesa maningi paaivona Mambo umwe na umwe wo Iziraeri. Iyena waivona mwoyo wavo, kukhauya no kusotesesa dangani vaimunamata mu njira yaanotendera kana kuti haiwa.
KUDA JEHOVHA NGO MWOYO WESE
4. Ngowapi musiyano waingepo wo majimambo akagondeka no acizivi kugondeka?
4 Majimambo akadakajisa Jehovha, akamushandira ngo mwoyo wese. b Mambo Jehoshafati uwo wakava Mambo waushoni, “waipsaka Tenji Mwari ngo mwoyo wese.” (2 Kronike 22:9) Tecibhuya ngo pamusoro pa Josiya, Bhaibheri rinonanga kudari: “Kubvira kare, akuna mambo wakateveja Tenji Mwari inga ndi Josia, ngo mwoyo wake wese.” (2 Majimambo 23:25) Kuveni Soromona uwo wakaita zviro zvakashata kumbhiri ko upenyu hwake, Bhaibheri rinonanga kudari: “Aazivibze kuxandira Tenji Mwari ngo mwoyo wake wese.” (1 Majimambo 11:4) Ngo pamusoro pa Abhiyau, Bhaibheri rinonanga kudari: “Aazivi kutevera ngo mwoyo wese Tenji Mwari wake.”—1 Majimambo 15:3.
5. Zvinorevenyi kushandira Jehovha ngo mwoyo wese?
5 Waro, kushandira Jehovha ngo mwoyo wese zvinorevenyi? Mundhu anoshandira Jehovha ngo mwoyo wese, aavangirijwi kuti azviite. Kusiyapo izvo, mundhu anoshandira Jehovha, ngo ndava yo kumureremeja kwaanomuita no rudo wakakura waanawo kwaari. Iyena anoenderera mberi ano nderemejo no kuda Jehovha mu upenyu hwake hwese.
6. Tingaitenyi kuti tienderere mberi tecinamata Jehovha ngo mwoyo wese? (Mazwi Akangwara 4:23; Mateu 5:29, 30)
6 Tingatevejeresavo kudini majimambo akagondeka o Iziraeri no kushandira Jehovha ngo mwoyo wese? Tinodikana kuita ubhasopa pa kushamwarijana no vandhu vakashata kana ciri cese haco cingaita kuti rudo hwedu kuna Jehovha urembe. Inga muezaniso, tinodikana kubhasopa pa zviro zvatinovona no zvatinoita. Cimwenizve, tinodikana kuita ubhasopa maningi pa shamwari jatinosana no kutama kurangarira kuti kuva no mare no kukhupuka, ndi zviro zvinosisira maningi mu upenyu. Kudari tikazwisisa kuti ciri cese ciri kurembesa rudo watinawo na Jehovha, tinodikana kukasika kucivhisa ciroco.—Verenganyi Mazwi Akangwara 4:23; Mateu 5:29, 30.
7. Ngenyi zvinosisira kujingwarira pa zviro zvakashata?
7 Atidikani kutendera kuti mwoyo wedu uparajane. Kudari tikatama kubhasopa, tingatoguma pa kujicengeja tecirangarira kuti tiri kuita zviro zvizinji zvo umwari, ngo iyo ndava atizocengejwi. Amborangariranyi ngo muezaniso uwu basi. Ngatiti muri ngo kunja ko nyumba yenyu asi kuri kutondhora maningi no kuvhunguza mbhepo, perapo monghwina mumba mobwakija muriro kuti mukote. Kureva kuti zvaizobesera kudari mukasiya musuvo wakashama? Mbhepo iyi, ingatanga kunghwina mumba, mototangazve kutondhorehwa. Tinojijenyi ngo muezaniso uwu? Ku divi ro umwari tinodikanavo kuita zvizinji kusiyapo basi kuha zviro izvi zvo umwari kuti tivangise ushamwari hwedu na Jehovha. Ngo magama amweni, tingati tinodikana kufunga musuvo pa zviro zvingatiita kuti tiite zvakashata. Tikadaro, “mbhepo” yo nyika ino aizokwanisi kunghwina mu mwoyo medu, youpausa.—Vaefeso 2:2.
KUKHAUYA NGO MWOYO WESE PATINOSHAISHA
8-9. Mambo Dhavhidhi na Hezekiya vakaitenyi povakaziva kuti vainga vaita zviro zvicikadakajisi Jehovha? (Vonanyi foto yo pakapa.)
8 Inga zvatavona, Mambo Dhavhidhi wakaita zvishaishi zvikuru. Asi muporofita Natani paakabhuya naye ecimuvhunja kuti Jehovha waijizwa kudini, Dhavhidhi ngo kujidodokesa kwese wakakhauya. (2 Samueli 12:13) Zvaakananga pana Nduyo 51, zvinovonesa kuti iyena wakazwisisa kuti wainga washaisha, wokhauya ngo mwoyo wese. Dhavhidhi aazivi kukhombija kuti wainga akhauya kuti abate kumeso Natani kana kuti atame kupanicwa ngo kushaisha kwake.—Nduyo 51:3, 4, 17.
9 Mambo Hezekiya, wakashaishiravo Jehovha. Bhaibheri rinoti: “Mwoyo wake waijikuja, no uxungu hwa Mwari hwakamubwakira yena, vaJuda no vo Jerusalema.” (2 Kronike 32:25) Ngenyi Mambo Hezekiya wakazvikuja? Kangaije iyena waijivona inga mundhu anosisira maningi ngo ndava yo upfumi waainga nawo, kunyisa kwaakaita Vaasiriya kana ngo ndava yo kuraphwa ngo mushamaiso ko ndhendha yake. Kangaije ngo ndava yo kuzvikuja uku, ndikona kwakamuitisa kuti akhombije Vabhabhironi upfumi hwake hwese. Ngo ndava ya izvi, muporofita Isaya wakamuvhunja kuti Jehovha wainga anyangajwa maningi ngo pamusoro po zvaakaitaro. (2 Majimambo 20:12-18) Asi inga ndi Dhavhidhi, Mambo Hezekiya wakakhauya ngo kujidodokesa kwese. (2 Kronike 32:26) Ngo iyo ndava, mu mavonero a Jehovha, Mambo Hezekiya wakava mundhu wakagondeka, “wakaita bzinodakajisa Tenji Mwari.”—2 Majimambo 18:3.
Mambo Dhavhidhi na Hezekiya, vakakhauya ngo kujidodokesa kwese povakazwa kuti Jehovha wakajizwa kudini ngo zvishaishi zvavo (Vonanyi ndima 8-9)
10. Amaziya wakaitenyi paakapangihwa?
10 Ngo divi rimweni, Mambo Amaziya wo Judha, ‘wakaita bzinodakaja Tenji Mwari, kuciripi ngo mwoyo wese.’ (2 Kronike 25:2) Ngozvapi zvaakashaisha? Pasure po kubesehwa ndi Jehovha kuti ahwise Vaedhomi, Amaziya, wakanamata zvimwari zvokunyepa. c Muporofita wa Jehovha paakabhuya naye ngo pamusoro po zviro zvaainga akaita, Mambo Amaziya aazivi kumupurukira perapo womugogomera.—2 Kronike 25:14-16.
11. Mukuzwirana no 2 Vakorinte 7:9, 11, tinodikana kuitenyi kuti tiregerehwe ndi Jehovha? (Vonanyi foto.)
11 Tingajijenyi ngo muezaniso iji? Tinodikana kukhauya patinoshaisha, toita zvese zvatinokwanisa kuti titame kuzozviitazve. Kudari vakuru vo ungano vakatipa mazano pikija pa zviro zvidoko keni? Atidikani kurangarira kuti Jehovha aacatidi kana kuti vakuru vamweni vari kutizonda. Pikija majimambo ainga akagondeka o Iziraeri, nguva jimweni aitopangihwa mu njira yakavanga. (Vahebheru 12:6) Patinoashira mbhangiro iri yese, (1) tinodikana kuiashira ngo kujidodokesa kwese, (2) kuita cinjo jinodiwa, no (3) kwenderera mberi tecishandira Jehovha ngo mwoyo wese. Patinoshaisha tokhauya, atikani-kani kuti Jehovha anotiregerera.—Verenganyi 2 Vakorinte 7:9, 11.
Patinoashira mbhangiro iri yese, (1) tinodikana kuiashira no kuzvidodokesa kwese, (2) kuita cinjo jinodikana, no (3) kwenderera mberi tecishandira Jehovha ngo mwoyo wese (Vonanyi ndima 11) f
KUNAMATA JEHOVHA MU NJIRA YAANOTENDERA
12. Ngozvapi zvaivonesa kuti majimambo amweni ainga akagondeka amweni ainga acizivi kugondeka?
12 Majimambo aivoniwa ndi Jehovha kuva akagondeka, aibatisisa kunamata kocokwadi. Ivona vaibesera vandhu va Jehovha kuti vaitevo zvakafanana. Icokwadi kuti ivona vaiposa inga zvatavonaya. Asi vainamata Jehovha basi no kushanda ngo simba kuti vapeje manamatiro okunyepa. d
13. Ngenyi Jehovha wakavona Mambo Akhabhi inga acizivi kugondeka?
13 Ngenyi Jehovha wakavona majimambo amweni inga acizivi kugondeka? Azvirevi kuti ivona vakaita zviro zvakashata basi. Pikija Mambo Akhabhi, uwo wakaita zviro zvakashatisisa maningi, wakakhombijavo kujidodokesa no kukhauya Nabhoti paakauraiwa. (1 Majimambo 21:27-29) Iyena wakavakisavo madhorobha amweni no kutobeseravo Vaiziraeri kuti vawine pa hondo jimweni. (1 Majimambo 20:21, 29; 22:39) Asi Mambo Akhabhi wakaita zviro zvakashatisisa maningi. Ngo ndava yo kucengejwa ngo mukaji wake, wakavangisa vandhu kuti vanamate zvimwari zvokunyepa. Aazivi kukhauya ngo kuita izvi.—1 Majimambo 21:25, 26.
14. (a) Ngenyi Jehovha wakavona Mambo Robhowamu inga acizivi kugondeka? (b) Ngojapi mugariro jakaezana jainga no majimambo acizivi kugondeka?
14 Ngatende tivone muezaniso wa Mambo Robhowamu uwo acizivi kugondeka. Inga zvatavona, iyena wakaita zviro zvaushoni pa mukuvo waainga ecitonga. Asi zviro pozvaimufambira ushoni eciva mambo wakavanga, wakaguma pa kusiya Jehovha, wotanga kunamata zvimwari zvokunyepa. (2 Kronike 12:1) Kutangira pondhopo, nguva jimweni wainatama Jehovha, nguva jimweni ecinamata zvithombe. (1 Majimambo 14:21-24) Robhowamu na Akhabhi andivopi basi vakanamata zvimwari zvokunyepa. Kunasa kunanga cineso cikuru cakaitisa kuti majimambo aya atame kuva akagondeka, ngo cokubesera manamatiro okunyepa. Zvakanasa kujeka kuti pamberi pa Jehovha, kubatisisa manamatiro ocokwadi, ndikona kwaivonesa kuti mambo ari wese ndi waushoni kana kuti wakashata.
15. Ngenyi kunamata kokadi i ciro cinosisira maningi kuna Jehovha?
15 Ngenyi shwiro yo kunamata yaisisira maningi kuna Jehovha? Ngokuti majimambo ndiwona ainga no mutoro wo kutungamirira vandhu kuti vanamate Jehovha ngo njira yaanotendera. Kunja kwa izvi, kunamata kokunyepa, kwaiitisa kuti mundhu awire mu zvishaishi zvikuru no kuita zviro zvimweni zvakashata. (Ozeya 4:1, 2) Cimwenizve, majimambo aya ainga akazvipira kuna Jehovha. Ndizvona zvinoitisa kuti Bhaibheri riezanise manamatiro okunyepa no kuhura. (Jeremia 3:8, 9) Kudari ari wese akaita upombo, anova acizivi kugondeka ku mundhu wiya wokuti waidikana kuva akagondeka maningi kwaari, zvingaita ku mukaji kana mwamuna. Kupombora, kunohwaja maningi ku mundhu anongaro acengejwa. Mukufanana, mushandiri wakajipira kuna Jehovha paanonamata zvimwari zvokunyepa, anonga ecishaishira Jehovha kamare no kuhwajisa maningi mwoyo wake. e—Deuteronòmio 4:23, 24.
16. Mu mavonero a Jehovha, ngowapi musiyano wo mundhu wakanaka no mundhu wakashata?
16 Ngozvapi zvatinojija? Zvakanasa kujeka kuti atidikani kuita ciri cese haco cinobatanija manamatiro okunyepa. Asi tinodikanavo kubatikana maningi pa manamatiro okadi no kwenderera mberi tecishandira Jehovha. Muporofita Marakiya wakanasa kujekesa kuti ngowapi musiyano wo mundhu wakashata no wakanaka pamberi pa Jehovha. Iyena wakananga kudari: “Imwimwi munozovonazve kusiyana ko mundhu wakarurama no mundhu wakashata, mundhu anoshandira Mwari no mundhu acikamushandiri.” (Marakiya 3:18) Ngo kudaro, atidikani kutendera kuti kutama kukwana kwedu no zvatinoshaisha, zvitirembese togumira pa kutama kushandira Jehovha. Kuima kushandira Jehovha ndi cishaishi cakakura maningi.
17. Ngozvapi zvamunodikana kungwarira pamunopsaka wo kurovorana naye?
17 Kudari muri kupsaka wokurovorana naye, munokwanisa kuvona kuti magama akanangari Marakiya akabatana papi no mucadho? Mundhu ari wese angava no mugariro jaushoni. Asi kudari aanamati Mwari wokadi, kureva kuti angava mundhu waushoni, wakarungama pa meso pa Jehovha? (2 Vakorinte 6:14) Kudari mukacadha no mundhu wakadaro, kureva kuti anozomubesera kuti muenderere mberi makagondeka kuna Jehovha? Rangariranyi basi: Zvingaita kuti vanakaji vaakarovora Mambo Soromona vacikashandiri Jehovha, vainga no mugariro jaushoni. Asi zvecivoneka kuti vainga vacikashandiri Jehovha, pa kufamba ko nguva, padoko ngo padoko vakazomucengeja kuti anamate zvimwari zvokunyepa.—1 Majimambo 11:1, 4.
18. Vabari vanodikana kujijisenyi vana vavo?
18 Vabari vangashandisa muezaniso jo mu Bhaibheri jo majimambo o Iziraeri kuti vavangise cido co vana vavo co kushandira Jehovha. Beseranyi vana venyu kuti vazive kuti kuna Jehovha, mundhu angava wakashata kana wakanaka pa manera aanobatisisa manamatiro okadi. Vonesanyi ngo magama enyu no zviito zvenyu kuti kujija Bhaibheri, kwenda ku musongano no kucumaera, ndi zviro zvinosisira maningi mu upenyu. (Mateu 6:33) Vana vanodikana kusakurira voga ushamwari hwavo na Jehovha no kumushandira ngo mwoyo wese kusiyapo basi kumushandira ngokuti vabari ndi Zvapupu zva Jehovha. Vakadaro, vanozoenderera mberi vecishandira Jehovha.
19. Mundhu paanoima kushandira Jehovha, zvinoreva kuti aazovizve shamwari ya Jehovha? (Vonanyizve bhokiso rinoti: “ Hwiriranyi Kuna Jehovha.”)
19 Kudari ari wese akaima kushandira Jehovha, kureva kuti aacazovizve shamwari ya Jehovha? Haiwa, iyena angakhauya, wotangazve kushandira Jehovha mu njira yaanotendera. Angaita izvi ngo kutama kuzvikuja no kutendera kuashira mazano aanopuwa ngo vakuru vo ungano. (Jakobo 5:14) Asi zvakajeka kuti kuvangisira kunosisira maningi kuti mundhu avezve shamwari ya Jehovha.
20. Kudari tikatevejera muezaniso wo majimambo akagondeka o Iziraeri, Jehovha anozotivona kudini?
20 Mukugurisira, tajijenyi ngo muezaniso wo majimambo o Iziraeri? Tingava inga majimambo akagondeka o Iziraeri, kudari tikashandira Jehovha ngo mwoyo wese. Tinodikana kujija ngo zvotaposa, tokhauya no kuita cinjo jinodiwa. Nguva jese tinodikana kuceukija kuti zvinosisira maningi kubatisisa manamatiro ocokwadi. Kudari mukashandira Jehovha, munozova mundhu wakarurama pamberi pake.
NDUMBO 45 Kurangarijisisa ko Mwoyo Wangu
a Pa jijo iyi, patinonga tecibhuya ngo pamusoro po “majimambo o Iziraeri,” tinonga tecibhuya ngo pamusoro po majimambo ese akatonga vandhu va Mwari, kubatanija kutonga ko majinja maviri o Judha no kutonga ko gumi ro majinja o Iziraeri kana kuti vese vo gumi na vaviri vo majinja mbhera pa mukuvo wokuti vandhu vainga vacizivi kupaurana.
b MAGAMA AKASANANGUHWA: Bhaibheri kazinji parinoshandisa gama rokuti mwoyo, rinonga recida kureva zviya zvatiri ngo mukati, zvinobatanija zvatinoda, zvatinorangarira, zvatinoita, zvinotiita kuti tiite ciri cese no zvatinoda kuita mu upenyu.
c Mu nguva jokare, zvinovoneka inga kuti cainga cirovejeso majimambo kutanga vanamata zvimwari zvo vandhu vovainga vahwisa.
d Mambo Aza wakaita zvishaishi zvakakura maningi. (2 Kronike 16:7, 10) Pikija zvakadaro, Bhaibheri rinonanga kuti iyena wakaita zviro zvakarurama pamberi pa Mwari. Pikija pakutanga aazivi kutendera kupangihwa, zvingaita kuti pa kupejisira, wakakhauya ngo mwoyo wese. Jehovha wakasotesesa zviro zvaushoni zvaakaita kusiyapo basi zvakashata. Cinosisira maningi ngocokuti Aza wakanamata Jehovha basi, wovangisira maningi kuti apeje manamatiro okunyepa paainga ecitonga.—1 Majimambo 15:11-13; 2 Kronike 14:2-5.
e Zvakanasa kujeka kuti kunamata kunosisira maningi pamberi pa Jehovha, ngokuti mutemo muviri jokutanga jo mutemo wa Mosi, jairambisa kunamata ciri cese haco kuciripi basi Jehovha.—Exodo 20:1-6.
f KUDURUJIHWA KO FOTO: Mambo Dhavhidhi na Hezekiya, vakakhauya no kujidodokesa kwese povakaziva kuti vainga vashaishira Jehovha. Hama iri mujaha iri kuneseka no kubesera hama yakura kuti iitise nane cirovejeso cayo co kumwa maningi doro. Hama iyi ngo kujidodokesa kwese inotendera mbhangiro, inoita cinjo jinodikana no kwenderera mberi yecishandira Jehovha no yakagondeka.
