1. Munojizwa kudini ngo pamusoro po cokwadi?

 VANDHU va Jehovha vanoda cokwadi cavanowana mu Soko rake Bhaibheri. Cokwadi ciri mu Bhaibheri ndicona cinovangisa rutendo hwedu. (Varoma 10:17) Itusu tinothemba kuti Jehovha wakatipa ungano yo Cikristu, “inobesera no kujivirira cokwadi.” (1 Timoti 3:15) Tinozwira ngo mwoyo wese ‘vaya vanotungamirira pakati pedu,’ avo vanotisanangurira cokwadi co Bhaibheri no kutipa ndhungamiriro mukuzwirana no kuda ka Mwari.—Vahebheru 13:17.

2. Mukuzwirana na Jakobo 5:19, i ngozi yapi yatinodikana kuhwisana nayo pasure po kujija cokwadi?

² Ngo kudaro, pikija tikatendera cokwadi no basa rinoithwa ngo sangano pa kutipa ndhungamiriro jinothembeka, tingatocengejwa. (Verenganyi Jakobo 5:19.) Sathana waizodakara maningi kudari tikatama kuthemba Bhaibheri no ndhungamiriro jatinopuwa ngo sangano ra Jehovha.—Vaefeso 4:14.

3. Ngenyi tinodikana kubatisisa cokwadi? (Vaefeso 6:13, 14)

³ Verenganyi Vaefeso 6:13, 14. Sathana anozondhandhanisa manyepo kuti acengeje vandhu vazinji kuti vatame kuva ku divi ra Jehovha. (Apokaripsi 16:13, 14) Cimwenizve, tingavetera kuti Sathana, anozovangisira maningi kuti acengeje vandhu va Jehovha. (Apokaripsi 12:9) Ngo kudaro, zvinosisira maningi kuti tizive musiyano wo cokwadi no manyepo kuti tizokwanise kuzwira cokwadi. (Varoma 6:17; 1 Pedhru 1:22) Izvi zvinozofira pa maponero atinozoita pakati po dambujiko guru.

4. Ngozvapi zvatinozovona pa jijo iyi?

⁴ Pa jijo iyi, tinozovona mugariro muviri jinosisira maningi jinozotibesera kuti tizive cokwadi cinovha mu Bhaibheri no kuzwira ndhungamiriro jinovha ku sangano ra Jehovha. Perapo, tinozovona mathangwe matatu anozotibesera kuti tienderere mberi takabatisisa cokwadi.

MUGARIRO JATINODIKANA KUVA NAJO JINOZOTIBESERA KUZIVA COKWADI

5. Kuitisa kudini kuthya Jehovha kunozotibesera kuti tizive cokwadi?

⁵ Kuthya Jehovha. Kuthya Jehovha, zvinoreva kumuda maningi, zvokuti atizogumi pa kuita zviro zvinomunyangajisa. Tino cidaka-daka cokuda kujija musiyano wo zvakashata no zvakanaka, manyepo no cokwadi kuti tikwanise kutendehwa ndi Jehovha. (Mazwi Akangwara 2:3-6; Vahebheru 5:14) Narini atidi kutendera kuti kuthya kwatinoita vandhu, kukure maningi kupinda manera atinoda Jehovha, ngokuti kazinji zvinodakajisa vandhu, zvinonyangajisa Jehovha.

6. Kuitisa kudini kuthya vandhu kwakarembesa gumi ro vafeyi vo Iziraeri?

⁶ Kudari tikathya maningi vandhu kusiyapo Jehovha, tinozoguma pa kuva ndhambo no cokwadi. Tiri kuda kuvona muezaniso wo 12 vo vafeyi vakaendaya kofeya nyika yakagondesa Jehovha kupa Vaiziraeri. Gumi ro vafeyi, vaithya maningi Vakanani kupinda rudo wovainga nawo na Jehovha. Ivona vakavhunja Vaiziraeri kudari: “Atina simba ro kurhwana navo, ngokuti vano simba kupinda itisu.” (Bziverengo 13:27-31) Mu mavonero o vandhu, Vakanani vainga vakavanga maningi kupinda Vaiziraeri, asi izvi zvaingadi izvona. Asi vaya vainanga kuti Vaiziraeri avacaizongwinepi mu nyika yo vavengi vavo no kuhwisana navo, avacairangarirepi simba rina Jehovha. Gumi ro vafeyi ava, vaidikana kubatikana pa zvaida Jehovha kuti Vaiziraeri vaite. Ivona vaidikanazve kurangarijisisa ngo pamusoro po zvavainga vapera kuitihwa ndi Jehovha, ngo kuita izvi, vaizozwisisa kuti Jehovha ano simba rakakura maningi kupinda ro Vakanani. Mukusiyana no vafeyi vaingaya vacina rutendo, Joshuwa na Karebhi, vaida kutendehwa ndi Jehovha. Ngo kudaro, vakavhunja vandhu kuti: “Kudari Tenji Mwari akatibesa, anozotinghwinisa no kutipa nyika ii.”—Bziverengo 14:6-9.

7. Tingavangisa kudini kuthya kwedu Jehovha? (Vonanyi foto.)

⁷ Kuti tivangise kuthya kwedu Jehovha tinodikana kubatikana pa kumudakajisa pa zvivaringo zvese zvatinotema. (Nduyo 16:8) Pa munonga meciverenga zviitiko zvo mu Bhaibheri, zvivhunjisenyi kudari: ‘Kudari nondainga pa mugariro uwu, ngocapi civaringo condaizotema?’ Inga muezaniso, maizoitenyi kudari nomakazwa gumi ro vafeyi vaya vecivhunja Vaiziraeri zviro zvokuti azvicaivangisepi? Kureva kuti imwimwi maizotenda zvakanangwaro ngo vafeyi ava mogumira pa kuthya vandhu, kana rudo hwenyu na Jehovha no kuda kumudakajisa zvaizomubesera kuti mutame kuthya? Vaiziraeri vazinji avazivi kuzwisisa cokwadi cakanangwa ndi Joshuwa na Karebhi. Inga muviyo, vakaruza mukana wo kunghwina mu nyika yakagondeswa.—Bziverengo 14:10, 22, 23.

8. Ngowapi mugariro watinodikana kusakurira, ngenyi?

⁸ Kujidodokesa. Jehovha anovonesa cokwadi ku vaya vanojidodokesa. (Mateu 11:25) No kujidodokesa kwese, tinotendera besero ratinopuwa kuti tizive cokwadi. (Mabasa o Vapostori 8:30, 31) Pikija zvakadaro, tinodikana kungwarira kuti titame kuzvikuja. Kudari tikava vandhu vanozvikuja, tinoguma pakuvona kuti mazano edu anoshanda maningi kupinda ndhungamiriro jo mu Bhaibheri no ndhungamiriro jatinoashira jecivha ku sangano ra Jehovha.

9. Tingaitisa kudini kuti tienderere mberi tiri vandhu vanojidodokesa?

⁹ Kuti tienderere mberi tiri vandhu vanojidodokesa, tinodikana kuceukija kuti Jehovha wakakura maningi kupinda itusu. (Nduyo 8:3, 4) Cimwenizve, tinodikana kuita mukumbiro kuti tikwanise kusakurira mujimu wo kujidodokesa no kutendera kuti Jehovha anozotibesera kuti tireremeje murangariro jake jatinojija kuvha mu Bhaibheri no ku sangano rake. Pamunojija Bhaibheri, psakanyi kuziva mathangwe anoitisa kuti Jehovha adakarire kujidodokesa no kuzonda kuzvikuja. Cimwenizve, endereranyi mberi mecijidodokesa paya pamunoashira basa rinomuita kuti mutungamirire no kuvoniwa ngo vamweni.

TINGAITISA KUDINI KUTI TIENDERERE MBERI TIRI MU COKWADI?

10. Jehovha wakashandisa ani kuti ape ndhungamiriro no kutungamirira vandhu vake?

¹⁰ Endereranyi mberi mecithemba ndhungamiriro jamunopuwa ngo sangano ra Jehovha. Mu nguva yo Vaiziraeri, Jehovha wakashandisa Mosi perapo Joshuwa, kuti vape ndhungamiriro vandhu vake. (Joxwa 1:16, 17) Vaiziraeri vakakomborehwa maningi ngo kuvona vanarume ava inga vaimiriri va Jehovha Mwari. No papera makore mazinji ungano yo Cikristu no ya umbwa ko vhaza yokutanga, 12 o vapostori vakatanga kupa ndhungamiriro. (Mabasa o Vapostori 8:14, 15) Perapo, cikwata ici cakazokura maningi kubatanijavo no vakuru vo ku Jerusarema. Vandhu povaiashira ndhungamiriro jovaipuwa ngo vanarume vakagondeka ava, “ungano jaivangiswa rutendo hwajo, jecikura njiku no njiku.” (Mabasa o Vapostori 16:4, 5) Mu njiku jedu jino, tinokomborehwavo maningi kudari tikazwira ndhungamiriro jatinopuwa ngo sangano ra Jehovha. Munorangarira kuti Jehovha waizojizwa kudini kudari tikatama kuzwira vaya vaakagaja? Tingakwanisa kudavira muvhunjo uu, kudari tikasotesesa zvakaitika no Vaiziraeri povainga vecienda ku nyika yakagondeswa.

11. Zvicinyi zvakaitika na vaya vakamukira Mosi uwo wainga akagajwa ndi Jehovha kuti atungamirire ku Iziraeri yokare? (Vonanyi foto.)

¹¹ Vaiziraeri povainga veciita hwendo kwenda ku nyika yakagondeswa, vanarume vamweni vakan’gun’gutira Mosi no basa raainga akagajwa ndi Jehovha. Ivona vakati: “Gungano rese [kuciripi basi Mosi] no vandhu varo vese vari vakaceneswa; na Tenji Mwari ari pakati pavo.” (Bziverengo 16:1-3) Pikija hazvo kuti mu mavonero a Jehovha ‘gungano rese rainga rakacena’, Jehovha wainga akakheta Mosi kuti atungamirire vandhu vake. (Bziverengo 16:28) Kunasa kunanga, vapanduki ava povain’gun’gutira Mosi, vaito ngu’gutiravo Jehovha, avacaibatikana pa zvaida Jehovha asi vaibatikana pa zviya zvavaida. Jehovha wakauraya vapanduki ava no zviuru zvaivabesera. (Bziverengo 16:30-35, 41, 49) Nyamasi unovo, tingava no cokwadi cokuti Jehovha aatenderi vaya vacikareremeji nasiriro jake ecishandisa sangano.

12. Ngenyi tinodikana kwenderera mberi tecithemba sangano ra Jehovha?

¹² Tinodikana kwenderera mberi tecithemba sangano ra Jehovha. Vaya vanotungamirira, povanovona kuti zwisiso iri yese yo mu Bhaibheri inodikana kuitiiswa nane, vanozviita ngo kukasika. (Mazwi Akangwara 4:18) Ivona vanoita izvi ngokuti vanoda maningi kudakajisa Jehovha. Vanoita ­zvese zvavanokwanisa kuti vateme zvivaringo ­zvakacijikira mu Soko rake Bhaibheri, izvi ndizvona zvinoithwa ngo vashandiri vese va Jehovha.

13. Ngoyapi “ndhungamiriro yo masoko akacena,” tinodikana kuitenyi nayo?

¹³ ‘Rambanyi makabatisisa ndhungamiriro yo masoko aya akacena.’ (2 Timoti 1:13) Magama okuti “ndhungamiriro yo masoko aya akacena,” anoreva jijiso jo Cikristu jinowanika mu Bhaibheri. (Johani 17:17) Jijiso iji jakacijikira pa zviro zvese zvatinotenda. Sangano ra Jehovha rinotijijisa kuti tibatisise ndhungamiriro iji, patinozviita tinozokomborehwa.

14. Ngenyi Makristu amweni akaima kubatisisa “ndhungamiriro yo masoko akacena”?

¹⁴ Ngozvapi zvinozoitika kudari tikasiya “masoko aya akacena?” Ngativone muezaniso uwu. Mu zana rokutanga ro makore, Makristu amweni aindhandhanisa manyepo okuti njiku ya Jehovha yainga yaguma. Zvingaita kuti kwainga no karata yavairangarira kuti yainga yakatahwa ndi mupostori Pauro yainanga ngo pamusoro pazvo. Vacito vanasa kupsakisisa mathangwe akona, Makristu amweni o ku Tesaronika, akatanga kutenda manyepo aya no kutomandhandhanisavo. Ivona avacaizocengejwepi kudari novakaceukija zviro zvovakajijiswa ndi mupostori Pauro paainga na ivona. (2 Vatesaronika 2:1-5) Pauro wakapangira hama jake kuti jitame kutenda masoko ese ojaizwa, kuitira kuzovabesera kumbejiyo. Pa karata yake yocipiri ku Vatesaronika, Pauro wakatara kudari: “Nga uwu mucungamijo wangu inini Pauro, wandatara ngo nyara jangu, unoita citatijo mu karata jangu jese; ndiwona matariro angu.”—2 Vatesaronika 3:17.

15. Tingaitisa kudini kuti tijijivirire ku masoko okunyepa anoita inga kuti ngo o cokwadi? Ipanyi muezaniso. (Vonanyi foto.)

¹⁵ Tinojijenyi ngo masoko a Pauro ku Vatesaronika? Patinozwa masoko acikazwirani no zvatakajija mu Bhaibheri kana marehwa-rehwa aciripi iwona, tinodikana kushandisa uzivi. Ku Uniyau Sovhiyetika yokare, vavengi vedu vakandhandhanisa masoko ainga pa karata aidari inga aivha ku cine ro pasi pese. Karata iyi yaivangisa hama kuti jiumbe sangano raivaparajanisa no raijiimirira roga. Karateyo yaaita inga yainga yokadi, asi hama jainga jakagondeka ajizivi kucengejeka. Ivona vakazwisisa kuti masoko ainga pa karata iyi, acaizwiranepi no zvavainga vakajijiswa. Nyamasi uno, vavengi vedu, kazinji vanoshandisa internet kuti vaticengeje no kutiparajanisa. Kusiyapo ‘kukasika kuruza murangariro wedu wakanaka,’ tinodikana kusotesesa kuti zviro zvatiri kuzwaro no zvatiri kuverenga zvinozwirana no zvatakajija kana kuti haiwa.—2 Vatesaronika 2:2; 1 Johani 4:1.

16. Mukuzwirana no Varoma 16:17, 18, ngozvapi zvatinodikana kuita kudari vamweni vakasiya cokwadi?

¹⁶ Rambanyi makabatana na vaya vakagondeka kuna Jehovha. Jehovha anoda kuti tive takabatana pa kunamata kwedu. Tinodikana kwenderera mberi takabatana patinonga tecibatisisa cokwadi. Ari wese paanosiya cokwadi, anoparajanisa ungano. Ngo iyo ndava, Mwari anotingwaja kuti tigare ndhambo no “vandhu vakadaro.” Mukusiyana, kudari tikatama kungwarira, tinozotanga kuthemba masoko aciripi okadi no kuva vandhu vacizivi kugondeka kuna Jehovha.—Verenganyi Varoma 16:17, 18.

17. Makomborero api atinozova navo ngo kuziva no kubatisisa cokwadi?

¹⁷ Kudari tikanasa kuziva cokwadi no kucibatisisa, tinozogara phedo na Jehovha no kuvangisa rutendo hwedu. (Vaefeso 4:15, 16) Tikaita kudaro, tinozova takangwaririka no kutajwa ndi Jehovha mukati mo dambujiko guru pa jijiso jokunyepa no masoko anondhandhaniswa ndi Sathana. Rambanyi makaima mu cokwadi, “Mwari wo runyararo ngaave nemwi.”—Vafiripi 4:8, 9.