1. Ngenyi Jehovha aatiezanisi no vamweni?

JEHOVHA anoda maningi kusiyana-siyana kwatakaita. Izvi tinozvivona ngo kuti wakaita mukhaindi jakasiyana-siyana jo mamiti, zvinyama no vandhu vakasiyana-siyanavo. Umwe nga umwe wedu wakasiyana no vamweni. Ngo kudaro, atidikani kujiezanisa no vamweni. Iyena anopopora mwoyo wenyu kana kuti undhu hwenyu hwo mukati. (1 Samueli 16:7) Iyenazve anorangarira simba renyu, marembo enyu no kwamakakurira. Iyena aamukumbiri kuita zviro zvamucikakwanisi. Itusu tinodikana kutevejera Jehovha ngo kujivona inga manera aanotivona. Perapo tinozova no “murangariro wakanaka” ticikarangariri maningi kana padoko ngo pamusoro pedu.—Varoma 12:3.

2. Ngenyi asipi zvaushoni kujiezanisa no vamweni?

² Kunasa kunanga itusu tinobesereka ngo kuvona muezaniso wo hama no hambzaji jakagondeka jinobudirira mu basa ro kucumaera. (Vahebheru 13:7) Itusu tingajija ndijona, tovona kuti tingabudiririsa kudini mu basa redu ro kucumaera. (Vafiripi 3:17) Asi pano musiyano kutevejera muezaniso wo mundhu no kujiezanisa na iyena. Kujiezanisa uku, kungatiita kuti tive no cishatihwa, tirembejeke no kujivona kuti atisisiri. Inga zvotakajija pa musoro wakapera, kujiezanisa no hama jimweni mu ungano kungatikhuvaza ku divi ro umwari. Ngokudaro, Jehovha anotingwanja ngo rudo hwese kuti: “Asi umwe na umwe ngaasotesese zviito zvake, akadaro anozodakara ndizvona, acikajiezanisi no vamweni.”—Vagaratiya 6:4.

3. Ngokwapi kubudirira ku divi ro umwari kwamakadakarira maningi?

³ Jehovha anoda kuti mudakare maningi ngo kubudirira kwamunoita ku divi ro umwari. Inga muezaniso, kudari makabhabhatijwa, makadakara maningi ngo kukwanirisa  kwenyu cido ici! Makatema civaringo ici ngo kuda kwenyu. Makacijikira pa kuda kwenyu Mwari. Rangariranyi ngo pamusoro po kukura komakaita kuvhira njiku yo makabhabhatijwa. Inga muezaniso, imwimwi munodakarira maningi kuverenga Bhaibheri no kunasa kurijija? Mukumbiro jenyu jiri kuvha mu mwoyo, jina cinangwa here? (Nduyo 141:2) Munokwanisa ushoni kutanga mabhuyo pamunocumaera no kukwanisa kushandisa ushoni mabhuku atinoshandisa? Kudari muna mbhuri, Jehovha wakamubesera kuti muve mwamuna waushoni, mukaji kana mubari wakanaka? Imwimwi mungadakara maningi ngo kubudirira kwamakaitira pa mativi ese aya.

4. Tinozovonenyi pa musoro uwu?

⁴ Itusu tingabesera vamweni kuti vabudirire ku divi ro umwari. Tingavabeserazve kuti ivona vatame kujiezanisa no vamweni. Pa musoro uwu, tinozovona kuti vabari vangabesera kudini vana vavo, vakacadha vangabeserana kudini ngocavo. Vakuru no vamweni vangabesera kudini hama no hambzaji. Pakupejisira tinozovona ndhungamiriro jo Bhaibheri jingatibesera kuti tigaje zviro zvatinoda kuita mukuzwirana no zvatinokwanisa kuita no mugariro wedu.

5. Mukuzwirana no Vaefeso 6:4, vabari avadikani kuitenyi?

⁵ Vabari vanodikana kungwarira kuti vatame kuezanisa mwana umwe no umweni kana kutomukumbira kuti aite zviro zvaacikakwanisi. Kudari vabari vakaita izvi, vangarembesa mwana wavo. (Verenganyi Vaefeso 6:4.) Hambzaji imweni inodanwa Sakiko * yakati: “Vajijisi vangu vaivetera kuti inini ndiite zvaushoni maningi kupinda vamweni. Mukuengejera mai wangu vaida kuti ndibudirire ushoni kushikora kuti zviite ucapupu hwakanaka kuno mujijisi wangu no ka babangu vacikaripi capupu. Zvokadi, ivona vaida kuti porovha jangu jese jibude ushoni kamare, zvandaivona kuti azvikwanisiki. Pikija ndakasiya kujija pa makore manganani akapera, nguva jimweni ndinojivhunjisa dangani ndiri kuita mbhera panoperera simba rangu kuna Jehovha kana kuti haiwa.”

6. Vabari vanojijenyi ngo magama anowanika pana Nduyo 131:1, 2?

⁶ Vabari vanojija zviro zvinosisira maningi pana Nduyo 131:1, 2. (Verenganyi.) Mambo Dhavhidhi wakananga kuti “anditeveri bziro bzikuru” kana zviro zvaacikakwanisi.  Kujidodokesa kwake ‘kwakamunyaraja no kumuzoroja.’ Vabari vangajijenyi ngo zvakanangari Dhavhidhi? Vabari avadikani kujidodokesa basi pa zviro zvavanovetera kuti vanokwanisa kuzviita. Asi vanodikanavo kujidodokesa pa zviro zvavanovetera ku mwana wavo. Vabari vangabesera mwana wavo ngo kuziva simba rake, paakarembera no pavanomubesera kuti agaje zviro zvaanozoda kuita. Hambzaji imweni inodanwa Marina icaceuja kuti: “Mai wangu avazivi kundiezanisa no hama jangu ndhatu kana no vana vamweni. Ivona vakandijijisa kuti umwe na umwe ano zvipo zvakasiyana no umweni. Cimwenizve, ivona vakananga kuti umwe na umwe anosisira maningi kuna Jehovha. Ngo ndava yo zvandakajijiswari ndi mai wangu, inini andijiezanisi no umweni.”

7-8. Mwamuna angakujisa kudini mukaji wake?

⁷ Mwamuna wo Cikristu anodikana kukuja mukaji wake. (1 Pedhru 3:7) Kukuja kunobatanija kutaja ushoni no kureremeja vamweni. Inga muezaniso, mwamuna anokuja mukaji wake ngo kumurereja. Iyena aamukumbiri kuita zvaacikakwanisi. Cimwenizve, aamuezanisi no vanakaji vamweni. Kudari mwamuna akaezanisa mukaji wake no vanakaji vamweni, mukaji wake waizojizwa kudini? Mwamuna wa hambzaji Rosa vacikaripi Capupu kazinji vanoanja kuvaezanisa no vanakaji vamweni. Magama akashata ovanobhuya akaita kuti hambzaji Rosa vapsake kuziva dangani aripo anovada kana kuti haiwa. Ivona vakati: “Ndaida maningi kuthembeswa kuti Jehovha anondireremeja.” Mukusiyana, mwamuna wo Cikristu anokuja mukaji wake. Iyena anoziva kuti akaita kudaro, zvinopsasa ushamwari hwake no mukaji wake pomwe no ushamwari hwake na Jehovha. *

⁸ Mwamuna anoda mukaji wake, ano musimba, anovhunja kuti anomuda no kumubonga. (Mazwi Akangwara 31:28) Izvi ndizvona zvakaita mwamuna wa hambzaji Katarina vanangwaya pa musoro wakapera, zvakavabesera kuti vanyise mazwiro okuti ivona avasisiri. Povainga mwana mudoko, ivona vaishohwa maningi ndi mai wavo, zvokuti kazinji vaivaezanisa no vasikane vamweni kubatanijavo no shamwari javo. Inga muviyo, hambzaji Katarina vakatanga kupima kusisira kwavo ngo kujiezanisa no vamweni, pikija pavapera kujija cokwadi. Asi mwamuna wavo wakavabesera kuti vahwisane no cirovejeso ici no kuvaita kuti vajivone mu njira yakaezanana. Ivona vakati: “Mwamuna wangu anodida maningi, anondibonga ngo zviro zvaushoni zandinoita no kuita mukumbiro na inini. Iyena anondiceujazve mugariro jakanaka jina Jehovha no kundibesera kuti ndinyise murangariro wangu wakashata.”

9-10. Vakuru vakabeseresa kudini hambzaji yainga no cirovejeso cakashata co kujiezanisa no vamweni?

⁹ Vakuru vangabeseresa kudini vaya vano cirovejeso co kujiezanisa no vamweni? Vonanyi basi zvakaitikira hambzaji imweni inodanwa Hanuni. Iyona aicaisimbwa maningi poyainga mwana mudoko. Iyona yakati: “Ndainga maningi no nyowa i ndaivona kuti vana vamweni, vaushoni maningi kupinda inini. Ndakatanga kujiezanisa no vamweni no kujivona kuti andisisiri.” Hambzaji Hanuni povakajija cokwadi vaindojiezanisa no vamweni. Inga muviyo, ivona vaijizwa kuti avasisiri mu ungano. Asi ivona wari vari kushanda vakadakara inga piyona. Zvicinyi zvakabesera hambzaji iyi kuti icinje mavonero ayo?

¹⁰ Hambzaji Hanuni vakananga kuti ivona vakabesehwa maningi ngo vakuru. Ivona vakavonesa  kuti vaithemba hambzaji iyi ngo kuvabonga ngo muezaniso wavo wo kugondeka. Ivona vakatara kudari: “Pa mukuvo mushomani waperari, vakuru vakandikumbira kuti ndiende kovangisa hambzaji jimweni jaida kubeswa. Basa rovakandipari rakaita kuti ndivone kuti inini ndinodiwavo. Ndinoceuja kuti vakuru vakandibonga ngo kuvangisa ko ndakaita hambzaji jiciri vasikane. Perapo ivona vakandiverengera 1 Vatesaronika 1:2, 3. Izvo zvakandiita kuti ndidakare maningi. Wari ndiri kureremeja ndau yangu mu sangano ra Jehovha ngo ndava yo vahavisi vaushoni ava.”

11. Inga zvinonangwa pana Isaia 57:15, tingabeseresa kudini “mundhu acina simba no muthivi”?

¹¹ Verenganyi Isaia 57:15. Jehovha anotaja maningi “mundhu acina simba no muthivi” kana anojidodokesa. Itusu tese, kuciripi vakuru basi, tingabesera pa kuvangisa hama no hambzaji iji. Njira imwe yo kuvavangisa ndiyona ngo yo kutatija kuti tinovareremeja. Jehovha anoda kuti titatije rudo hwaanahwo ku mavhuta ake aya. (Mazwi Akangwara 19:17) Tingabesera hama no hambzaji ngo kuva vanojidodokesa. Patinoda kuti tivoneke maningi kupinda vamweni zvinotiita kuti tive no cishatihwa. Itusu tingashandisa zvatinokwanisa no uzivi hwedu kuti tivangisane ngocedu.—1 Pedhru 4:10, 11.

12. Ngenyi vandhu vacaireremejwa vaikwevejehwa kuti vaende kuna Jesu? (Vonanyi foto yo pa kapa.)

¹² Tingajija zvizinji ngo matajiro otingaita vamweni ngo kuvona matajire aiita Jesu vateveri vake. Iyena wainga mundhu mukuru maningi wakararama pasi pano. Iyena wainga “mundhu wakapfava no kuthiva mwoyo.” (Mateu 11:28-30) Iyena aazivi kuvonesa kukura ko ungwaru hwake no uzivi hwainga nahwo. Wakajijisa ecishandisa mavereketero akareruka no muezaniso jicikanesi kuswisisika kuti abaye mwoyo jo vandhu vacaireremejwa. (Ruka 10:21) Mukusiyana no vatungamiriri vo zviyara vaijikuja, Jesu aazivi kuita kuti vandhu ava vajizwe kuti avasisiri kuna Mwari. (Johani 6:37) Kusiyapo izvo, iyena waireremeja vandhu vaiderejwa.

13. Jesu waitatijisa kudini unyasha no rudo pa matajiro aaita vajiji vake?

¹³ Unyasha hwa Jesu no rudo, hwaivoneka pa matajiro aaita vajiji vake. Iyena waizviziva kuti vaikwanisa kuita zviro zvakasiyana-siyana i mugariro javo jaisiyanavo. Ngokudaro, asipi vese vaizokwanisa kuita zviro zvondhozvo. Kubudirirazve kovaizoita mu basa ro kucumaera akucaizoezana. Asi iyena waidakara maningi ngo zvaikwanisa kuitwa ngo umwe na umwe wavo. Jesu wakavonesa mazwiro ake pa muezaniso wo matarenta. Pa muezaniso uwu, patarawe wakapekeja umwe nga umwe basa “ mukuzwirana no zvavaikwanisa kuita.” Umwe pa varanda vaviri, wakawana mare yakawanda kupinda umweni. Asi patarawe ava vakabonga vese vovaviri ngo magama ondhoo: “Waita ushoni, muranda wakanaka no wakagondeka.”—Mateu 25:14-23.

14. Tingatevejeresa kudini matajiro aaita Jesu vamweni?

¹⁴ Jesu nguva jese anokhombija kunaka mwoyo no rudo paanotitaja. Iyena anoziva kuti zvatinokwanisa no mugariro jedu zvakasiyana. Iyena anodakara patinoita mbhera panoperera simba redu. Itusu tinodikana kutevejera muezaniso wa Jesu. Atidikani kuita kuti vanamati doni vedu, vajivone kuti avasisiri kana kutopseruka ngo kuti avakwanisi kuita zvakawanda kupinda vamweni. Mukusiyana ngatipsake mukana wo kubonga hama no hambzaji jedu, ngo kuita zvese zvavanokwanisa pa kushandira Jehovha.

15-16. Hambzaji imweni yakabesereka kudini ngo kugaja zvido zvakaezanana?

¹⁵ Kuva no zvido zvo umwari, kunoita kuti upenyu hwedu huve mu gwanja raushoni no kuva no cinangwa. Asi shavhi yakona ngo yo kugaja zvido mukuzwirana no zvatinokwanisa no mugariro wedu, kuciripi kujiezanisa no zvinokwanisa kuitwa ngo vamweni. Itusu atidi kugaja zvido zvinozoticamwisa kana kutirembesa. (Ruka 14:28) Vonanyi muezaniso wo hambzaji iri piyona inodanwa Midhori.

¹⁶ Baba wa hambzaji Midhori vaciripi Capupu, vaivarerusa ngo kuvaezanisa no hama javo pomwe no vadoni vavo vo kucikora. Ivona vakati: “Ndaijivona kuti andisisiri.” Asi hambzaji Midhori povakakura vakatanga kujithemba. Ivona vakati: “Ndaiverenga Bhaibheri njiku jese kuti ndive no runyararo mu mwoyo mwangu no kuvona kuti Jehovha anondida.” Mukuengejera, hambzaji iyi yakagaja zvido zvakaezanana, yoita mukumbiro kuti ikwanirise zvido zvoyakagajaya. Inga muviyo, hambzaji Midhori vakadakara ngo kwenderera kwavo mberi ku divi ro umwari.

17. ‘Tingaendereresa [kudini] mberi teciita vapsa mu murangariro [mwedu],’ ngowapi unozova muviyo wakona?

¹⁷ Mazwiro akashata no murangariro jakashata zvinotora mukuvo kuti zvipere. Ngokudaro, Jehovha anotingwaja kudari: “Endereranyi mberi meciita vapsa mu murangariro yenyu.” (Vaefeso 4:23, 24) Zvokadi kuti tiite izvi, tinodikana kuita mukumbiro, kujija Soko ra Mwari no kurangarijisisa. Ngokudaro, endereranyi mberi meciita zviro izvi no kukumbira simba rinovha ka Jehovha. Mujimu mucena wake unozomubesera kuti munyise cirovejeso co kujiezanisa no vamweni. Jehovha anozomubeserazve kuti muzive no kuvhita ngo kukasika cishatihwa no kujikuja, kudari  mu mwoyo mwenyu mukava no mazwiro akashata.

18. Tingatondhojeswa kudini ngo masoko anowanika pana 2 Kronike 6:29, 30?

¹⁸ Verenganyi 2 Kronike 6:29, 30. Jehovha anoziva mwoyo wedu. Iyena anozivazve kuhwisana kwatiri kuita no mujimu wo nyika no kutama kukwana kwedu. Jehovha paanovona kunesehwa kwatiri kuita kuti tiite zviro izvi, rudo hwake kotiri hunoengejeka.

19. Jehovha anoezanisira kudini mazwiro aanawo ngo pamusoro pedu?

¹⁹ Kuti Jehovha aezanisire manera aanotida, anoshandisa rudo uno mai no mwana wavo. (Isaia 49:15) Vonanyi muezaniso wa mai vamweni vanodanwa Rakeri. Ivona vakati: “Mwana wangu Estefaniye wakabahwa mukuvo ucito wakwana. Pondakatanga kumuvona, ndakavona kuti wainga wakatetepa no acina simba. Asi varapi vo kucipitari vakanditendera kuti ndimubate njiku jese paainga mu cipitari pa mweji wo kutanga wo upenyu hwake. Pa mukuvo uwu inini no mwana wangu takava no ushamwari wo phedo maningi. Iyena wari waano makore matandhatu, asi i mudoko maningi kupinda vana vamweni vo mupira wake. Asi inini ndinomuda maningi ngokuti ari kuvangisira maningi kuti apone. Iyena anondidakajisa maningi mu upenyu hwangu.” Kuziva kuti Jehovha anotida maningi paanotivona tecivangisira kuti timushandire ngo mwoyo wese, zvinotitondhoja maningi.

20. Inga mushandiri wakajipira wa Jehovha, ngorapi thangwe ramunaro kuti mudakare?

²⁰ Zvecivoneka kuti muri mushandiri wa Jehovha, imwimwi muri umwe wo mundhu wo mbhuri yake anosisira maningi. Apana wakaezana na imwimwi. Jehovha aazivi kumukhwevejera ngo kuti imwimwi makanaka maningi kupinda vamweni. Iyena wakamukhwevejera ngokuti wakamusota wovona mwoyo wakapfava no unojijisika, waanozoumba. (Nduyo 25:9) Ivanyi no cokwadi co kuti iyena anodakara maningi paanomuvona mecimushandira mbhera panoperera simba renyu. Kucungirira kwenyu no kugondeka kwenyu i cikhombijo co kuti muno “mwoyo wakanakisisa.” (Ruka 8:15) Ngokudaro, itanyi zvese zvamunokwanisa kuti mushandire Jehovha mbhera panoperera simba renyu. Perapo munozova no thangwe raushoni kuti “mudakare ngo zvamunoita.”