1-3. Ngozvapi zviro zvimweni zvinoita kuti vandhu va Jehovha vagume pa kucema?

 NDIRINI pomakapejisira kucema? Nguva jimweni itusu tinocema ngo kudakara. Asi kazinji, tinocema ngokuti tinonga takasuruvara. Inga muezaniso, itusu tingacema patinofihwa ngo vadiwa vedu. Hambzaji Rorirei vanogara ku Estadhus Unidhus vakati: “Mwana wangu wokaji paakafa, ndakavona kuti apana ciro caikwanisa kunditondhoja. Pa mukuvo uu, ndairangarira kuti andicaizokwanisa kucungirira.” *

² Itusu kangaije tingacemavo ngo mathangwe amweni. Hambzaji Hiromi vanogara ku Jhapau, vanoshanda inga piyona vakati: “Nguva jimweni ndinosuruvara ngokuti vandhu vandinocumaera avadakariri kuzwa ngo pamusoro po Bhaibheri. Nguva jimweni no musoji pa dama, ndinokumbira kuti Jehovha andibesere kuwana mundhu anoda kuzwa cokwadi.”

³ Munojizwavo inga hambzaji iji nguva jimweni here? Vazinji vedu vanojizwa kudaro. (1 Pedhru 5:9) Itusu tinoda ‘kushandira Tenji Mwari ngo kudakara.’ Asi nguva jimweni tinocema patinonga tafihwa ngo mundhu watinoda, ngokuti tinonga takasuruvara kana tinonga tecisongana no cineso cinotiita kuti tinesehwe kuramba takagondeka kuna Jehovha. (Nduyo 6:7; 100:2) Zvicinyi zvatingaita patinonga tino mazwiro akadari?

4. Ngozvapi zvaticazovona pa musoro uu?

⁴ Itusu tingajija ngo muezaniso wa Jesu. Nguva jimweni, iyena wakasonganavo no mugariro jimweni jakaita kuti iyena ‘atange kucema.’ (Johani 11:35; Ruka 19:41; 22:44; Vahebheru 5:7) Ngatende tivone mugariro jondhojo. Patinonga tecizvivona, tinozovona kuti ngozvapi zvatingajija. Tinozovonazve zviro zvingatibesera kuti tihwisane no mugariro jingatiita kuti ticeme.

5. Ngozvapi zvatinojija ngo pamusoro pa Jesu tikavona zvakatahwa pana Johani 11:32-36?

⁵ Mu cipepo co gore ra 32 Kristu Aviya, shamwari yo phedo ya Jesu Razaro, yakahwaja yogumira pakufa. (Johani 11:3, 14) Razaro wainga no hambzaji mbiri, Mariya na Marita, Jesu waida maningi mbhuri iyi. Hambzaji mbiri iji, jainga jakasuruvara maningi ngokuti hama yavo yainga yafa. Pasure po kufa ka Razaro, Jesu wakaenda Bhetaniya, kwaigara Mariya na Marita. Marita paakazwa kuti Jesu wainga eciviya, ngo kukasika iyena wakaenda kosongana naye. Rangariranyi kusuruvara kwaainga akaita paakananga kuti: “Mambo, kudari nomainga pano hama yangu aicaizofepi.” (Johani 11:21) Jesu paakavona Mariya no vandhu vamweni vecicema, iyena ‘wakatangavo kucema.’—Verenganyi Johani 11:32-36.

6. Ngenyi Jesu wakacema pa ciitiko ici?

⁶ Ngenyi Jesu wakacema pa ciitiko ici? Bhuku rinozwi Estudo Perspicaz rakadavira kudari: “Kufa ko shamwari yake Razaro no kusuruvara ko hambzaji jake kwakaita kuti Jesu aceme.” * Kangaije Jesu wakarangarira ngo pamusoro po kuhwajihwa ko shamwari yake Razaro paainga ecihwaja, no kurangarira mazwiro aakava nawo paakazwisisa kuti iyena wainga ecifa. Pacina kukana-kana, Jesu wakacemazve ngo kuvona manera ainga akasuruvara Mariya na Marita ngo kutamikihwa ngo hama yavo. Kudari makambofihwa ngo shamwari kana vopaukama, pacina kukana-kana makavavo no mazwiro akadari. Ngatende tivone zviro zvitatu zvatingajija kuvha ku ciitiko ici.

7. Ngozvapi zvatinojija ngo pamusoro pa Jehovha ngo kucema kwakaita Jesu ngo ndava yo shamwari jake?

⁷ Jehovha anozwisisa mazwiro enyu. Jesu “ndiyena muezaniso . . . kamare” wa Baba wake. (Vahebheru 1:3) Paakacema, wakatatija kuti Jehovha anozwa kudini patinofihwa ngo mundhu watinoda. (Johani 14:9)  Mundhu wamunoda paanotamika, mungava no cokwadi cokuti Jehovha aavoni basi kusuruvara kwenyu asi iyena anosuruvaravo na imwimwi. Iyena anoda kutondhoja mwoyo wenyu wakasuruvara.—Nduyo 34:19; 147:3.

8. Ngenyi tingathemba kuti Jesu anozomusa vadiwa vedu vakafaya?

⁸ Jesu anoda kumusa vandhu vakafaya. Mukuvo mushoma acito acema, Jesu wakati kuna Marita: “Hama yako inozomuka.” Marita wakatenda zvakanangari Jesu. (Johani 11:23-27) Inga munamati wakagondeka wa Jehovha, Marita aacaikana-kana ngo pamusoro po rumuko hwainga hwakaitwa kare ndi muporofita Eriya na Erizeu. (1 Majimambo 17:17-24; 2 Majimambo 4:32-37) Zvinoita inga kuti iyena wainga akazwazve kuti Jesu wainga wakamusa vandhu vamweni. (Ruka 7:11-15; 8:41, 42, 49-56) Imwimwi mungathembavo kuti munozovonazve vadiwa venyu vakafaya. Waro ngozvapi zvatinojija ngo kuvona kuti Jesu wakacema paainga ecitondhoja shamwari jake jainga jakasuruvara? Tinojija kuti iyena anoda kamare kumusa vakafa.

9. Inga ndi Jesu, tingaitisa kudini kuti tibesere vaya vakasuruvara? Ipanyi muezaniso.

⁹ Mungabesera vanongaya vakasuruvara. Jesu aazivi kucema basi na Marita na Mariya, asi wakavapurukira no kuvatondhoja. Tingaitavo zvondhozvo kuna vaya vakasuruvara. Hama Dhani, mukuru umweni anogara ku Austrariya, vakati: “Pandakafihwa ngo mukaji wangu, ndaida besero. Varovorani vakawanda vakaviya kondibesera usiku no masikati. Ivona vakatendera kuti ndinange manera andaijizwa, cimwenizve avacainyowejeka pandaicema. Ivona vakandibesera kuita mabasa amweni, akadari inga kusuka karu yangu, konditengera zviro no kutondibikira pandaijizwa ndicikakwanisi kuita mabasa aya. Ivona vakatoita mukumbiro na inini pa vhaza jakawanda. Vakatatija kuva shamwari yokadi ‘yakabahwa kuti iite hama pa bonezi.’”—Mazwi Akangwara 17:17.

10. Sananguranyi ciitiko ciri pana Ruka 19:36-40.

¹⁰ Jesu wakaguma ku Jerusarema mu njiku 9 ya Nisani yo gore ro 33 Kristu Aviya. Paakanghwina mu dhorobha, vandhu vakawanda vakawaja nguvo javo pamberi pake vecimutendera inga Mambo wavo. Pacina kukana-kana ici cainga ciitiko cinodakajisa. (Verenganyi Ruka 19:36-40.) Vajiji vake avacaivetera kuti ngozvapi zvaizoitika tevere. Jesu “paaikhwedera phedo, wakavona dhorobha wocema ngo pamusoro paro.” No musoji pa dama, Jesu wakananga zviro zvakashata zvaizoitikira vandhu vo Jerusarema.—Ruka 19:41-44.

11. Ngenyi Jesu wakacema ngo pamusoro po vandhu vo Jerusarema?

¹¹ Jesu wainga ecihwajihwa ngokuti waizviziva kuti pikija wainga akanasa kuashihwa, Vajudha vazinji avacaizotendera masoko o Umambo. Inga muviyo, Jerusarema raizoparajwa, Mujudha wese waizopokonyoka pa kuparajwa uku waizova muranda. (Ruka 21:20-24) Zvinosuruvarisa ngo zvokuti, inga zvakananga Jesu, vandhu vazinji vakamuramba. Kwamunogararo, vandhu vanovona kudini masoko o Umambo amunocumaera? Kudari vandhu vashoma vanodakarira masoko amunocumaera, ngozvapi zvamunojija ngo kucema kwakaita Jesu? Ngatende tivonezve mathangwe matatu.

12. Tinojijenyi ngo pamusoro pa Jehovha ngo kucema kwakaita Jesu ngo ndava yo mavhizinyu ake?

¹² Jehovha anoneseka ngo pamusoro po vandhu. Kucema kwakaita Jesu kunoticeukija kuti Jehovha anoneseka maningi ngo vandhu. Iyena “aadi kuti mundhu afe, asi anoda  kuti vese vakhauye.” (2 Pedhru 3:9) Nyamasi uno, tinokhombija kuti tinoda vandhu vatinocumaera ngo kueja kuita zvese zvatinokwanisa kuti tivabesere kujija cokwadi.—Mateu 22:39.

13-14. Jesu wakakhombijisa kudini pena kuno vandhu, itusu tingasakuririsa kudini mugariro uu?

¹³ Jesu wakashanda ngo simba mu basa ro kucumaera. Iyena wakakhombija kuti anoda vandhu ngo kuenderera mberi ecivajijisa mukuvo wese. (Ruka 19:47, 48) Zvicinyi zvakamundundira kuti aite zvondhozvo? Jesu waivazwira pena. Nguva jimweni vandhu vakawanda vaida kuzwa magama a Jesu, zvoita kuti iyena no vajiji vake “vatame no nguva yo kuha.” (Marko 3:20) Mwanarume umweni paaida kubhuya na Jesu cousiku, iyena wakaita zvese zvaaikwanisa kuti abhuye naye. (Johani 3:1, 2) Vazinji vakapurukiraya Jesu avazivi kuva vajiji vake. Asi vese vaimupurukira vainasa kucumaehwa kamare. Nyamasi uno, itusu tinoda kupa mukana kuti vese vazwe masoko akanaka. (Mabasa o Vapostori 10:42) Kuti tizviite, tinodikana kuita cinjo pa manera atinocumaera.

¹⁴ Ivanyi no cido co kuda kuita cinjo jinodikana. Kudari mukuvo wese tikacumaera pa mukuvo wondhowo, atizokwanisi kuwana vandhu vanoda kuzwa masoko akanaka. Hambzaji iri piyona inodanwa Matirdha yakati: “Inini no mwamunangu tinoeja kucumaera vandhu mu nguva jakasiyana-siyana. Comangwanani tinoenda kocumaera mu mabazari. Comasikati vandhu vakawanda pavanonga vari mu zvitaka, tinoshandisa cikarinya co mabhuku. Cousiku tinoeja kupsaka vandhu mu mamuzi mavo.” Atidikani kubatisisa urongwa hwedu ngokuti unonga wakatinakira, asi tinodikana kuva no cido cokucinja urongwehwo kuti tikwanise kucumaera vandhu vakawanda. Kudari tikaita zvondhozvo, tingava no cokwadi cokuti Jehovha anozodakara.

15. Zvicinyi zvakaitika pa usiku wokupejisira wo upenyu hwa Jesu inga zvakatahwa pana Ruka 22:39-44?

¹⁵ Mu usiku wo njiku 14 ya Nisani yo gore ro 33 Kristu Aviya, Jesu wakaenda mu munda wo Getsemani. Kondhono iyena wakaita  mukumbiro kuna Jehovha. (Verenganyi Ruka 22:39-44.) Pamukuvo uu, Jesu “waikumbira ecideketera no kukhuwa ecibuda musoji.” (Vahebheru 5:7) Zvicinyi zvakakumbira Jesu pa usiku wokupejisira uu acito afa? Iyena wakakumbira simba kuna Jehovha kuti arambe akagondeka no kuita kuda Kwake. Jehovha wakazwa mukumbiro wakaitwari ngo Mwana wake wecivha ngo mu mwoyo, wotumira ngirozi kuti imuvangise.

16. Ngenyi Jesu wainga wakasuruvara paainga eciita mukumbiro mu munda wo Getsemani?

¹⁶ Pacina kukana-kana Jesu wakacema paainga eciita mukumbiro mu munda wo Getsemani ngokuti vandhu vaizomuvona inga mundhu acikareremeji zina ra Mwari. Iyena waizviziva kuti zvaisisira maningi kuramba akagondeka no kucenesa zina ra Baba wake. Kudari muri kusongana no mugariro unoeja kugondeka kwenyu kuna Jehovha, zvicinyi zvamungajija ngo kucema kwakaita Jesu? Ngatende tivonezve zviro zvitatu zvatingajija.

17. Ngozvapi zvatingajija ngo pamusoro pa Jehovha ngo kudavira kwake mukumbiro wa Jesu?

¹⁷ Jehovha anozwa mukumbiro jenyu. Jehovha wakazwa mukumbiro wo mwoyo wese wakaitwa ndi Jesu. Ngenyi? Ngokuti ciro caisisira maningi kuna Jesu, cainga co kuramba akagondeka kuna Baba wake no kucenesa zina ravo. Ciro cinosisira maningi kwatiri, ngo co kuramba takagondeka kuna Jehovha no kucenesa zina rake. Tikadaro iyena anozodavira mukumbiro jedu.—Nduyo 145:18, 19.

18. Mu njira yapi Jesu wakafanana no shamwari inozwisisa?

¹⁸ Jesu anozwisisa mazwiro enyu. Patinonga tecithimwa-thimwa, tinodakara maningi ngo kuva no shamwari inozwisisa mazwiro edu, maningi-ningi kudari shamwariyo yakasongana no zvineso zvondhozvo. Jesu i shamwari yondhoyo. Iyena anoziva kuti zvinorenyi kujizwa wakaremba no kuda besero. Anozwisisa kurembejeka kwedu no kuvona dangani tiri kuashira besero “pa nguva kwayo.” (Vahebheru 4:15, 16) Kudari inga Jesu wakatendera besero raakapuwa ngo ngirozi mu munda wo Getsemani, itusu tinodikanavo kutendera besero ratinopuwa ndi Jehovha. Azvinenyi dangani riri kuvha mu mabhuku,  mavhidhiyo, hurukuro, vangiso yatinopuwa ngo vakuru kana shamwari yakaivha ku divi ro umwari.

19. Mungawanisa kudini simba pamunonga mecisongana no zvineso zvinoeja kugondeka kwenyu kuna Jehovha? Ipanyi muezaniso.

¹⁹ Jehovha anozomupa “runyararo.” Jehovha anozotivangisa kudini? Patinoita mukumbiro tinoashira “runyararo hwa Mwari hunopinda kurangarira kwese.” (Vafiripi 4:6, 7) Runyararo hwatinopuwa ndi Jehovha unoita kuti mwoyo wedu no murangariro zvigajane. Izvi ndizvona kamare zvakasongana na hambzaji Rosa. Ivona vakati: “Ndakahwisana no mazwiro o kujizwa ndiri ndoga. Nguva jimweni, mazwiro aya aindiita kuti ndirangarire kuti Jehovha aandidi. Izvi pozvaiitika, ngokukasika ndaivhunja Jehovha manera andaijizwa. Mukumbiro wakandibesera kuti ndikwanise kunyisa mazwiro aya.” Inga zvakhombijwa pa muezaniso wa hambzaji iyi, tingakwanisa kuwana runyararo ngo kuita mukumbiro.

20. Ngozvapi zvatajija ngo kucema kwakaita Jesu?

²⁰ Kucema kwakaita Jesu kungatitondhoja no kutipa zvijijo zvakawanda. Taceukijwa kuti tinodikana kubesera shamwari jedu jakasuruvara no kuthemba kuti Jehovha na Jesu vanozotibesera patinofihwa ngo vadiwa vedu. Tavangiswa kuti tikhombije pena patinonga tecicumaera no kujijisa ngokuti Jehovha Mwari na Jesu Kristu vanokhombijavo mugariro uu unodakajisa. Tavangiswa ngo kuziva kuti Jehovha no Mwana wake anodiwa vanozwisisa mazwiro edu, kurembejeka kwedu nokutizve, ivona vanoda kutibesera kuti ticungirire. Ngatienderere mberi tecishandisa zvatajijari mbhera njiku yokuti Jehovha anozokwanirisa cigondiso cake cinoshamaisa co ‘kupukuta musoji jese mumeso’ mwedu.—Apokaripsi 21:4.