1-2. (a) Ngokwapi kuvangisira kunodikana kuitira kusakurira ushamwari hwo phedo no ariwese? (b) Tinozovonenyi mu cijijo cino?

 IMWIMWI muno shamwari yophedo? Ngozvapi zvamakaita kuti muve shamwari yake? Kangaije imwimwi makapeja mukuvo naye, kujijira ngo pamusoro po zvineso zvake, kudakarira zvaanodakarira no kunyenya zvaanonyenya. Imwimwi makavona kuti ano mugariro jaushoni jamaidakarira kutevejera. Imwimwi makaguma pakuda shamwari yenyu.

² Kuti muve no ushamwari hwophedo no ari wese zvinoda nguva no kuvangisira. Ndizvonavo zvondhozvo zvinodikana kuithwa kuti tive no ushamwari hwophedo na Jehovha. Mu cijijo cino, tinozovona kuti tingaitisa kudini kuti tikhwedere phedo na Jehovha no kuvona kuti tingabesereka kudini ngokuita izvi. Pakutanga, ngatende tivone kuti ngenyi ngozvaushoni kukhwedera phedo na Jehovha.

3. Ngenyi tinodikana kurangarijijsisa ngo mabesereke atingaita ngo kukhwedera phedo na Jehovha? Ezanisiranyi.

³ Pacina kukana-kana, imwimwi munotenderana nazvo kuti kukhwedera phedo na Jehovha kwakanaka. Kunasa kurangarijisisa kuti ngozvaushoni, kunotindundira kuti tikhwedere phedo naye. (Nduyo 63:​6-8) Inga muezaniso, tinozviziva kuti kuha padoko, kuita ezersisiyo, kuvata zvakakwana no kumwa maningi kumwa i zviro zvaushoni kwatiri. Pikija zvakadaro, vandhu vazinji avareremeji zvanangwari. Ngokutama kwavo kuzvireremeja, vanonga vacikataji ushoni uhomi hwavo. Mukusiyana, kudari tikarangarira manera atingabesereka ngokutaja ushoni uhomi hwedu, tinozokwanisa kwenderera mberi teciita kudaro. Ngo njira yakaezana, kangaije tinozviziva kuti kukhwedera phedo na Jehovha kwakatinakira. Asi kudari tikarangarijisisa ngo mabesereke atingaita ngokuita izvi, zvinozotindundira kuti tienderere  mberi tecikhwedera phedo naye.—Nduyo 119:​27-30.

4. Mutari wo Nduyo 73:​28, wakanangenyi?

⁴ Verenganyi Nduyo 73:28. Nduyo 73, ndi imwe yo nduyo zinji yakatahwa ndi Azafi kana kuti ngo umwe wo mubarihwana wake. Mutari uwu, wainga Murevhi wainga akagajwa kuti ashandire mu themberi ya Jehovha inga muimbi. Kangaije iyena wakanamata Jehovha akagondeka ko mukuvo wakatikuti. Ngo kudaro, iyena waijizwa ecida kuceukija no kuceukijavo vamweni kuti “kukhwedera phedo na Jehovha kwainga kwakamunakira.” Tinobesereka kudini ngokuita izvi?

“KUKHWEDERA PHEDO NA MWARI” KUNOVIISA MUDAKARO

5. (a) Ngenyi kukhwedera phedo na Jehovha kunotipekeja mudakaro? (b) Uzivi watinopekejwa ndi Jehovha unotibeseresa kudini no kutijivirira? (Mazwi Akangwara 2:​6-16)

⁵ Patinokhwedera phedo na Jehovha tinozova takadakara. (Nduyo 65:4) Pano mathangwe akawanda anotiita kuti tizova vandhu vakadakara. Inga muezaniso, patinoverenga zvaanonanga mu Soko rake, perapo tozvizwira, tinozova no uzivi. Uzivi uhu unozotijivirira ku ushamwari hwakashata no kuita zvishaishi zvikuru. (Verenganyi Mazwi Akangwara 2:​6-16.) Bhaibheri rinonanga kudari: “Anodakara mundhu anowana uzivi, no mundhu ano ungwaru.”—Mazwi Akangwara 3:13.

6. Mutari wo nduyo wakaruzisa kudini mudakaro wake?

⁶ Zvakajeka kuti shamwari ja Jehovha jinosonganavo no zvineso. Mutari wo Nduyo 73, wakaguma pakuruza mudakaro paakava no murangariro jiciripi jaushoni. Iyena wakanyangajwa no kuva no thima ngokuti vandhu vakashata vainga vacikadi Mwari no ndhungamiriro jake, vainga no upenyu hwakanaka. Iyena waivona kuti vandhu vakashata no vaijikuja, vaiwana zvovaida cimwenizve, vainga no uhomi hwaushoni nee avacaitambujika. (Nduyo 73:​3-7, 12) Mutari wo nduyo wakakhugunyika zvokuti pa vhaza imweni wakaguma pakurangarira kuti kushandira kwake Mwari ngo kwa biresi. Paainga akasuruvara maningi wakananga kudari: “Kunasa kunanga, kuvangisira kwese kwandakaita kuti ndive no mwoyo wakanaka kwakava kwa biresi. No kusamba kwandakaita nyara kuti nditame kuva no ndava kwakavazve kwa biresi.”—Nduyo 73:13.

7. Patinojizwa takasuruvara tinodikana kuitenyi? (Vonanyi .)

⁷ Pikija mutari wo nduyo waijizwa akasuruvara, iyena wakaita zviri zvese kuti acinje murangariro wake. Iyena wakanghwina mu “ndau huru yakacena ya Mwari,” ino kwaakabesehwa ndi Jehovha kuti acinje murangariro wake. (Nduyo 73:​17-19) Patinonga takasuruvara, Jehovha uwo ari shamwari yedu, anonga ecizviziva. Patinoita mukumbiro kwaari tecikumbira ndhungamiriro jake no kutendera besero rake raanotipa ecishandisa Bhaibheri no ungano, tinowana simba ratinoda kuti tikwanise kucungirira zvineso. Pikija patinojizwa tecithimwa-thimwa, Jehovha anotitondhoja nokutiita kuti tijizwe takagajana.—Nduyo 94:19. a

“KUKHWEDERA PHEDO NA MWARI” KUNOTIPA VETERO

8. Injira japi jinosisira jinotiita kuti tikhwedere phedo na Mwari?

⁸ Kukhwedera phedo na Jehovha kwakatinakira ngo ndava yo mathangwe maviri anosisira. Rokutanga, tingakwanisa kuva no upenyu hwaushoni kudari tikava no ushamwari hwo phedo na Mwari. Rocipiri, iyena anotipekeja vetero yo kwenda no kwenda. (Jeremiya 29:11) Ngatende tivone ngo phedo makomborero aya.

9. Kuitisa kudini kukhwedera phedo na Jehovha kunotipa cinangwa mu upenyu?

 ⁹ Kudari Jehovha akava shamwari yedu yo phedo, tingakwanisa kuva no upenyu hwaushoni. Vazinji vanoramba kuti Mwari ariyo, vanorangarira kuti upenyu auna cinangwa. Cimwenizve, vanorangarira kuti vandhu avazoviyozve kana kuti avazowaniki. Ngo kudaro, patinonga teciita jijo yedu yo mundhu ega tecishandisa Bhaibheri, tinova no cokwadi cokuti Mwari ariyo nokutizve “iyena anopfupa vanomupsaka ngo mwoyo wese.” (Vahebheru 11:6) Itusu takasikwa no cinangwa cokuti tishandire Baba wedu Jehovha, patinoita zvondhozvo tinova no upenyu unodakajisa.—Dhotoronome 10:​12, 13.

10. Ngozvapi zvinonangwa pa Bhuku ra Nduyo 37:29 ngo pamusoro po kumbeji kwa vaya vanovetera Jehovha?

¹⁰ Vazinji nyamasi uno, upenyu hwavo ngo wo kubata basa, kuva no mbhuri no kuviga mare kuti vazokwanise kuzojisapota. Ivona avazvizivi kuti ngozvapi zvakagondesa Jehovha kuitira kumbeji. Asi tinoziva kuti Jehovha anotaja vashandiri vake. (Nduyo 25:​3-5; 1 Timoti 6:17) Tinothemba Mwari uwo ari shamwari yedu, cimwenizve, tinoziva kuti iyena anozokwanirisa zvaakagondesa. Kumbeji kwedu kunobatanija vetero yokuzomunamata mu Paradhiso kwenda no kwenda.—Verenganyi Nduyo 37:29.

11. Ngozvapi zvinoitika patinova shamwari ja Mwari, izvi zvinoita kuti iyena ajizwe kudini?

¹¹ Kukhwedera phedo na Jehovha kwakatinakira ngo njira jimweni jakawanda. Inga muezaniso, Jehovha anogondesa kuregerera vashaishi vanokhauya voviya kwaari. (Isaya 1:18) Inga muviyo, atizovi no hana yakarema kana kujipekeja ndava ngo ndava yo zvishaishi zvatakaita kare. (Nduyo 32:​1-5) Tino cidakajiso cokuita kuti Jehovha adakare. (Mazwi Akangwara 23:15) No cokwadi cese imwimwi mungakwanisa kurangarira makomborero amunowana ngo kuva no ushamwari hwo phedo na Mwari. Mungaitisa kudini kuti muenderere mberi mecikhwedera phedo na Jehovha?

MUNGAITISA KUDINI KUTI MUENDERERE MBERI ‘MECIKHWEDERA PHEDO NA MWARI’?

12. Ngozvapi zvamakaita kuti mukhwedere phedo na Mwari?

¹² Ticito tabhabhatijwa inga umwe wo Capupu ca Jehovha, takaita mudanyu muzinji kuti tive shamwari jake. Imwimwi makajija zvokadi zvizinji ngo pamusoro pa Jehovha Mwari na Jesu Kristu. Makakhauya ku zvishaishi zvenyu zvamainga makaita kare no kuvangisira kuti mupone mukuzwirana no kuda kwake. Kuti tikhwedere phedo na Mwari tinodikana kwenderera mberi teciita zviro zvondhozvo.—Vakorose 2:6.

13. Ngozvapi zviro zvitatu zvingatibesera kuti tienderere mberi tecikhwedera phedo na Jehovha?

¹³ Zvicinyi zvinozotibesera kuti tienderere mberi tecikhwedera phedo na Jehovha? Cokutanga, tinodikana kwenderera mberi teciverenga no kujija Bhaibheri. Patinonga teciita zvondhozvo, cinangwa cedu acidikani kuva cokujija zviro zvokutanga ngo pamusoro pa Mwari. Kunja kwa izvi, tinodikana kuzwisisa kuti ngokwapi kuda ka Mwari kwatiri no kutungamirihwa ngo ndhungamiriro jake jaakatipa ecishandisa Soko rake Bhaibheri. (Vaefeso 5:​15-17) Cocipiri, tinodikana kuvangisa rutendo hwedu ngokurangarijisisa zviro zvinovonesa rudo hwake kwatiri. Cocitatu, tinodikana kwenderera mberi tecinyenya zviro zvinonyangajisa Jehovha no kutama kuita ushamwari no vandhu vanozviita.—Nduyo 1:1; 101:3.

14. Mukuzwirana no 1 Vakorinte 10:31 ngozvapi zvatinodikana kuita njiku ngo njiku kuti tikwanise kudakajisa Jehovha? (Vonanyi foto.)

¹⁴ Verenganyi 1 Vakorinte 10:31. Zvakajeka kuti tinodikana kuvangisira pakuita zviro zvinodakajisa Jehovha. Izvi zvakawanda  kupinda kwenda kumusongano no mu basa ro kucumaera. Zviito zvaushoni zvinodakajisa Jehovha zvinobatanija zviya zvatinoita njiku no njiku. Inga muezaniso, patinova vandhu vakagondeka pa zviro zvese no kupavo vamweni zvatinazvo, tinosiya Jehovha akadakara. (2 Vakorinte 8:21; 9:7) Iyena anodavo kuti tikhombije kubongesera cipo co upenyu caakatipa. Tinokhwedera phedo no mupi wo upenyu ngokwenderera mberi tinomaitiro akaezanana pa kuha, kumwa no kutaja uhomi hwedu ngo njira yaushoni. Kuvangisira kwese kwatinoita kuti tidakajise Jehovha pikija pa zviro zvinovoneka kuva zvidoko, itusu tinozova vandhu vanodiwa ndiyena.—Ruka 16:10.

15. Jehovha anovetera kuti titajise kudini vamweni?

¹⁵ Jehovha wakanaka mwoyo ku vandhu vakarurama no vandhu vacizivi kururama. (Mateu 5:45) Iyena anoveteravo kuti tikhombije mugariro uwu ku vandhu vamweni. Inga muezaniso, atidikani “kubhuya zvakashata ku mundhu ari wese, . . . no kuita mapope, asi tinodikana kuva vakapfava ku vandhu vese.” (Tito 3:2) Ngo kudaro, pikija vandhu vazinji avatendi Mwari, itusu atidikani kujivona inga tinosisira maningi kupinda ivona. (2 Timoti 2:​23-25) Itusu tinokhwedera phedo na Jehovha mukuvo wese ngokuva vandhu vakanaka mwoyo mukuvo wese no kuva vandhu vanongwarira pa matajire atinoita vamweni.

‘TINOKHWEDERA PHEDO NA JEHOVHA’ PIKIJA PATINOSHAISHA

16. Pasure po mukuvo mushomani mutari wo Nduyo 73 wakatanga kujizwa kudini?

¹⁶ Waro tingati kudini kudari mukatanga kurangarira kuti amufaneri rudo hwa Jehovha? Inga zvatapera kujija, zviro zvakadari zvakaitikavo no mutari wo Nduyo 73. Iyena wakati:  “Ndainga ndaaphedo kuti ndisvejeke; Inini ndainga ndaaphedo kuti ndiwe.” (Nduyo 73:2) Iyena wakananga kuti wainga ‘ecihwajihwa’ cimwenizve, ‘wainga acikanasi kurangarira ushoni’ inga “cinyama cicikarangariri” pamberi pa Jehovha. (Nduyo 73:​21, 22) Asi kureva kuti iyena wairangarira kuti ngo ndava yo zvishaishi zvake Jehovha aacaimuda no kumuregerera?

17. (a) Pikija mutari wo Nduyo paainga akasuruvara, wakaitenyi? (b) Tinojijenyi kuvha ku muezaniso wake? (Vonanyi foto.)

¹⁷ Kudari mutari wo nduyo wakarangarira kuti Jehovha wainga amusiya, zvingaita kuti iyena wakazvirangarira pa mukuvo mushomani. Pikija wainga acikajizwi ushoni, iyena waiziva kuti waidikana kugara phedo na Jehovha. Iyena wakatara kudari: “Asi wari ndina imwimwi mukuvo wese; Makabata mukono wangu wo muho. Imwimwi munonditungamirira ngo mupango jenyu. Pasure pazvo, munozonditungamirira kuti ndikujwe.” (Nduyo 73:​23, 24) Patinovona kuti rutendo hwedu hwatanga kuremba, kana kuti paya patinojizwa takasuruvara ngo ndava yo zvishaishi zvatakaita kare, tinodikana kukumbira Jehovha kuti ativangise. (Nduyo 73:26; 94:18) Pikija patinoita zvishaishi zvikuru, tingakwanisa kuhwirira kuna Jehovha no kuva no cokwadi cokuti iyena ‘wakanasiririka kuti atiregerere.’ (Nduyo 86:5) Patinonga ticikajizwi ushoni zvinosisira maningi kukhwedera phedo na Jehovha.—Nduyo 103:​13, 14.

‘KHWEDERANYI PHEDO NA JEHOVHA’ KWENDA NO KWENDA

18. Ngenyi tinodikana kwenderera mberi tecikhwedera phedo na Jehovha mukuvo wese?

¹⁸ Kuziva Jehovha no kukhwedera phedo naye ngo ko kwenda no kwenda. Bhaibheri rinonanga kuti makwanja no uzivi hwa Jehovha “aanghwiniki.”—Varoma 11:33.

19. Cigondiso Capi catinowana pa magama akafemehwa o Nduyo 73?

¹⁹ Mutari wo Nduyo 73 waivetera kuti aenderere mberi ecikhwedera phedo na Jehovha. Nduyo 79:​13, iyo yakatahwa ndi Azafi kana kuti ngo umwe wo mubarihwana wake, tinoverenga kudari: “Itusu vandhu venyu, mushambi wo mavhuta amunohavisa, tinozomubonga kwenda no kwenda; tinozozivisa rukujo hwenyu ku mubarihwana no mubarihwana.” Imwimwi mungazova no cokwadi cokuti munozoashira makomborero acikaperi kudari mukakhwedera phedo na Mwari. Inga mutari wo nduyo, imwimwi mungabhuyavo kudari: “Mwari anozovangisa mwoyo, ngokuti iyena anozova na inini kwenda no kwenda.”—Nduyo 73:26.