1. Munojizwa kudini pamunocumaera vamweni? (Vonanyi foto.)

 INGA vandhu va Jehovha, itusu tinocumaera vamweni ngokuti tino rudo na Baba wedu vo kudenga, cimwenizve, tinoda kubesera vandhu kuti vamuzive. Vacumaeri vazinji vanoridakarira basa ro kucumaera. Asi vamweni vanonesehwa kuti vawane mudakaro mu basa ro kucumaera. Ngenyi? Zvingaita kuti vamweni vakanyararisa kana kuti avajithembi pacavo. Vamweni avajizwi ushoni pavanoenda pamuzi po mundhu vacizivi kukokwa. Vamweni vanothya kuti avazoashihwi ushoni. Vamweni vakajijiswa kuti vatame kuita mabhuyo anoita kuti vamweni vatame kujizwa ushoni. Pikija vecida maningi Jehovha, hama no hambzaji iji, vanozvivona zvecinesa kukhwederera vandhu vavacikazivi kuti vavacumaere masoko akanaka o Umambo. Pikija zvakadaro, ivona vanoziva cinangwa cokucumaera masoko akanaka nokutizve mukuvo wese vanoenda mu basa ro kucumaera. Jehovha anodakara maningi ndizvona.

2. Kudari imwimwi muri kunesehwa kuwana mudakaro mu basa ro kucumaera, ngenyi amudikani kusuruvara?

² Mukuvo umweni imwimwi munonesehwa kuva no mudakaro mu basa ro kucumaera? Kudari zvakamuitikira mucadoremba. Kangaije zvinokhombija kuti imwimwi muri mundhu anojidodokesa, acikajikuji nokutizve amudi kuvereketesana no vandhu. Kunja kwa zvondhozvo apana mundhu anodakarira kutama kuashihwa ushoni, maningi-ningi pamunoeja kuita zviro zvaushoni kuno vandhu vamweni. Baba wenyu vo kudenga vari kuvona zvineso zvese zvamuri kuhwisana nazvo nokutizve ivona vanoda kumubesera pa zvese zvamunoda. (Isaia 41:13) Mu cijijo cino, tinoda kuvona mafundo mashanu anozotibesera kuti tingaitisa kudini  kuti tihwisane no mazwiro akadari nokuva no mudakaro mu basa ro kucumaera.

SIYANYI KUTI SOKO RA MWARI RIMUVANGISE

3. Zvicinyi zvakabesera muporofeti Jeremiya kuti acumaere vamweni?

³ Pikija mu nguva yokare Soko ra Mwari rakatovangisavo vashandiri vake paya pavaida kuita basa rinonesa rovainga vakagajwa. Vonanyi muezaniso wo muporofeti Jeremiya. Iyena waithimwa-thimwa Jehovha paakamupekeja basa rokuti aende kocumaera. Muporofeti Jeremiya wakati: “Inini andikoni kuvereketa, ngokuti ndiri mwana mudoko.” (Jeremia 1:6) Cicinyi cakabesera Jeremiya kuti ave no cicunge cokucumaera? Masoko akavha kuna Jehovha ndiwona akamuvangisa. Iyena wakati: “Izvo zvakaita mu mwoyo wangu inga muriro unopisa, wakafungwa mu maphondo angu, ndaida kuujima.” (Jeremia 20:8, 9) Waro Jeremiya, wainga no ndima inonesa, masoko aakapuwa kuti aende kocumaera akamupa cicunge kuti akwanirise basa rake.

4. Zvicinyi zvinoitika patinoverenga Bhaibheri nokurangarijisisa zvatinongaro taverenga? (Vakorose 1:​9, 10)

⁴ Nyamasi unovo Makristu anoashira vangiso yaanoda yecivha mu Bhaibheri. Mupostori Pauro paakatarira karata ku Makristu o ku Korose, iyena wakavhunja hama kuti “jifambe ngo manera anokuja Jehovha” no kwenderera mberi ‘vecibara mucero mu mabasa ese akanaka.’ (Verenganyi Vakorose 1:​9, 10.) Mabasa ese akanaka anobatanijavo basa ro kucumaera. Patinoverenga Bhaibheri no kurangarijisisa zvatinonangaro taverenga, rutendo hwedu kuna Jehovha unozovanga maningi nokuzwisisa kuti ngenyi basa ro kucumaera masoko o Umambo rinosisira ku vamweni.

5. Tingaitisa kudini kuti tijije zviri zvese patinonga teciverenga Bhaibheri nokuita jijo yedu?

⁵ Kuti tijije zviri zvese patinoverenga Soko ra Mwari Bhaibheri, atidikani kuva tinokasikira pa mukuvo wo kuverenga, kujija no kurangarijisisa. Ngwariranyi kuti mutame kukasikira pa nguva yamunonga mecijija. Pamunoverenga masoko movona kuti muna cineso cokuzwisisa, mucadoramwa, ngo kudaro shandisanyi Bhibhirioteka ro mu Interneti no Bhuku ro Kupsakisisa ro Zvapupu zva Jehovha kuti mukwanise kuzwisisa zvamunongaro maverenga. Kudari mukapsaka mukuvo kuti mujije padoko padoko, munozovangisa kuthemba kwenyu kuti zvinonangwa ngo Bhaibheri ngo zvokadi. (1 Vatesaronika 5:21) Pamunozova no cokwadi munozova no mudakaro mukuru wokuda kuvhunja vamweni zvamunonga mecijija.

 NASIRIRANYI USHONI KUITIRA BASA RO KUCUMAERA

6. Ngenyi tinodikana kujinasirira ushoni patinonga tecida kwenda mu basa ro kucumaera?

⁶ Pamunonga manajirira ushoni mucito maenda mu basa ro kucumaera, zvinozova zvakareruka kuti mubhuye no vamweni. Jesu wakanajirira vajiji vake vacito vaenda mu basa rokucumaera. (Ruka 10:​1-11) Ivona vakashandisa zvavakajijiswa ndi Jesu, ndiyo ndava vakadakara maningi ngo zvese zvavakakwanisa kuita.—Ruka 10:17.

7. Tingajinasiririsa kudini kuti tiende mu basa ro kucumaera? (Vonanyi foto.)

⁷ Tingajinasiririsa kudini kuitira basa ro kucumaera? Itusu tinodikana kurangarira zvatinozoda kubhuya nokuzvinasirira ngo cibarihwe ngo magama edu. Cimwenizve, ngo zvaushoni maningi kurangarira ngo manera o vanozodavira vandhu mu ndima yedu perapo tonasirira manera atinozoda kuvadavira. Ngo kudaro, patinozoda kubhuya no mundhuwo zvinozova zvakareruka kuti tive takagajana, teciseka, nokukwanisa kuita ushamwari naye.

8. Kuitisa kudini Makristu akadari inga mujiyo wo dongo zvakanangwaya ndi mupostori Pauro?

⁸ Mupostori Pauro wakananga kudari kuno hama: “Tino upfumi uhu mu mujiyo wo dongo.” (2 Vakorinte 4:7) Upfumi hwapi uri kunangwari? I basa rinoponesa upenyu rinobhuya ngo pamusoro po masoko akanaka o Umambo. (2 Vakorinte 4:1) Icinyi mujiyo wo dongo? Iwona unoimirira vandhu va Mwari vanocumaera masoko akanaka ku vandhu vamweni. Mu njiku ja Pauro, vandhu vaitengesa zviro vaishandisa mujiyo yo dongo kuti vavige zviro zvaireremejwa maningi zvakadari inga, zvokuha, vhinyu no mare. Mu njira yakaezana, itusu tiri mujiyo yo dongo, Jehovha anotishandisa kuti ticumaere masoko akanaka. Ngo besero ra Jehovha, itusu tino simba rese ratinoda kuti ticumaere masoko akanaka takagondeka.

KUMBIRANYI CICUNGE

9. Tinganyisisa kudini kuthya mundhu nokuthya kutama kuzoashihwa mu basa ro kucumaera? (Vonanyi foto.)

⁹ Nguva jimweni itusu tingathya mundhu kana kuthya kuti atizoashihwi mu basa rokucumaera. Tingahwisana kudini no mazwiro aya? Vonanyi mukumbiro wakaithwa ngo vapostori pavakavhunjwa kuti avacaidikanazve kucumaera. Kusiyapo kuthya, ivona vakakumbira besero ra Jehovha kuti “vaenderere mberi vecibhuya soko rake ngo kucunga kwese.” Jehovha wakadavira mukumbiro wavo pamukuvo wondhowo kamare.  (Mabasa o Vapostori 4:​18, 29, 31) Kudari kuthya mundhu kukamuita kuti muthimwe-thimwe mu basa ro kucumaera, munodikana kuita mukumbiro kuna Jehovha mecikumbira besero rake. Kumbiranyi Jehovha kuti rudo hwenyu kuno vandhu uve wakakura maningi kupinda kuthya kwamunoita.

10. Jehovha anotibeseresa kudini kuti tive Zvapupu zvake? (Isaia 43:​10-12)

¹⁰ Jehovha wakatikheta kuti tive Zvapupu zvake, iyena wakatigondesa kuti anozotibesera kuti tive no cicunge. (Verenganyi Isaia 43:​10-12.) Tinoda kuvona njira murongomuna jinotibesera kuvona kuti ngenyi iyena anoita zvondhozvo. Cokutanga, Jesu anonga ana itusu patinonga tecicumaera masoko akanaka. (Mateu 28:​18-20) Cocipiri, Jehovha wakagaja ngirozi kuti jitibesere pa basa iri. (Apokaripsi 14:6) Cocitatu, Jehovha anotipekeja mujimu mucena kuti ticeukije zvese zvatakajija. (Johani 14:​25, 26) Cocirongomuna, itusu tinonga tino besero ro hama no hambzaji jedu patinonga tiri mu basa rokucumaera. Ngo besero ra Jehovha no ro hama no hambzaji jedu, tina zvese zvatinoda kuti tive takacunga nokwenderera mberi tecicumaera.

NASIRIRANYI ZVINODAKARIHWA NGO VANDHU NO KURAMBA MUNO MAVONERO AUSHONI

11. Mungaitisa kudini kuti muwane vandhu vazinji pamunonga muri mu basa ro kucumaera? (Vonanyi foto.)

¹¹ Imwimwi munojizwa makacamwa pamunoguma pamuzi mokhanda vandhu vashoma? Jivhunjisenyi kudari: ‘Vandhu vo mu ndima yangu vari kwapi wari uno?’ (Mabasa o Vapostori 16:13) ‘Kureva kuti ivona vari kubasa kana ku Shopraiti?’ Kudari zvakadaro maizoenda kocumaera vandhu mu makwanja? Hama imweni inodanijwa Joshuwa iyona yakananga kudari: “Ndakawana mukana wokucumaera pandinonga ndecifamba mu mashopraiti no mu ndau jimweni jakazara vandhu.” Ivona no mukaji wavo Bhrijeti, vaiwana vandhu pavaivavhakacira co madeko, no madeko ese o mu Dimingu.—Vaefeso 5:​15, 16.

12. Tingaitisa kudini kuti tizive zvinotendhwa ngo mundhu no kuziva zviri kumunesa?

¹² Pamunovona kuti mundhuwo aaripi kudakarira zvamuri kubhuyaro, psakanyi kuziva zvaanotenda nokuvona kuti zvicinyi zviri kumunesa. Hama Joshuwa no mukaji wavo Brijeti vanoshandisa muvhunjo unowanika ngo kumbeji ko taratadho kuti vatangise mabhuyo.  Inga muezaniso, pavanoshandisa taratadho inoti Munorivona Kudini Bhaibheri? Ivona vanoti: “Vandhu vamweni vanonanga kuti Bhaibheri i bhuku ra Mwari asi vamweni vanokukana-kana ngo pamusoro pazvo. Ngoapi mavonero enyu?” Kunasa kunanga vanopejisira ngo kuva no mabhuyo aushoni.

13. Ngenyi tingananga kuti basa ro kucumaera rinobudirira pikija vandhu vakatama kupurukira? (Mazwi Akangwara 27:11)

¹³ Kubudirira ko basa redu rokucumaera azvifiri pakudavira kunoita vandhu. Ngenyi? Ngokuti tiri kuita izvi ngokuti Jehovha no Mwana wake Jesu vanoda kuti tizviite. Ivona vanodazve kuti tiite ucapupu hwo panbhene. (Mabasa o Vapostori 10:42) Kudari tikatama kuwana vandhu kuti tibhuye navo kana vakaramba masoko atinocumaera, itusu tinodikana kudakara ngokuti tinoziva kuti tiri kudakajisa Baba wedu vo kudenga.—Verenganyi Mazwi Akangwara 27:11.

14. Ngenyi tinodakara patinovona hama kana hambzaji yawana mundhu wakhombija kudakarira mu basa ro kucumaera?

¹⁴ Itusu tinodakara maningi patinovona kuti hama kana hambzaji yawana mundhu wakhombija kudakarira mu basa rokucumaera. Murindiri umweni wakaezanisira basa redu nokupsaka mwana anonga apsejeka. Vandhu vazinji vanobatanijwa pakupsaka mwanewo mu ndau jakasiyana-siyana. Pakupejisira mwana uwu paanowanika vandhu vese vanodakara maningi. Mukuezana, hama jese jinobesera pa basa rokucumaera mu ndau jakasiyana-siyana. Vese vanodakara maningi mundhu paanotanga kuviya kuzovona musongano.

BATIKANANYI NGO RUDO HWAMUNAHWO NA JEHOVHA NO VANDHU

15. Kuitisa kudini kushandisa bhuku ra Mateu 22:​37-39, zvingatibesera kuti tiengejere cido cedu mu basa ro kucumaera? (Vonanyi foto yo .)

¹⁵ Itusu tingaengejera cido cedu cokucumaera ngokurangarira manera atinoda Jehovha no vandhu. (Verenganyi Mateu 22:​37-39.) Rangariranyi mudakaro unova na Jehovha paanotivona tiri mu basa rokucumaera no manera avanodakara vandhu pavanotanga kujija Bhaibheri. Rangariranyi ruponeso uri kuvetehwa nga vaya vanotendera kuashira masoko akanaka.—Johani 6:40; 1 Timoti 4:16.

16. Tingaitisa kudini kuti tiwane mudakaro mu basa rokucumaera pikija ticikakwanisi kubuda pamuzi? Ipanyi muezaniso.

¹⁶ Muno thangwe riri rese rinomuita kuti mutame  kubuda pamuzi? Kudari uwu ndiwona mugariro wenyu, batikananyi pa zviya zvamunokwanisa kuita kuti mukhombije rudo hwenyu kuna Jehovha no vandhu. Pa mukuvo wo mutungu wo korona, Samweri na Dhaniya avacaidikana kubuda pamuzi. Mukati mo mukuvo uwu wokunesa ivona vaicumaera vacishandisa foni, karata nokuitisa jijo jo Bhaibheri vecishandisa zoom. Samweri wainga eciraphwa ndhendha yake yo kanseri, paaienda ku krinika waishandisa mukana wondhowo kuti ape ucapupu. Iyena wakati: “Patinonga tiri pamukuvo wokunesa tingajizwa takaremba mu murangariro, kunyama no kumujimu. Ndiyo ndava zvinosisira maningi kuwana mudakaro mu basa ra Jehovha.” Pamukuvo uwu Dhaniya wakawa ogara akavata pa kama ko mweji jinokwana kuita mutatu. Iyena wakada besero ro kadera yo marodha ko mweji jinokwana kuita mutandhatu. Iyena wakati: “Ndakaeja kuita zvese zvandaikwanisa pa mugariro wandaingari ndiri. Ndaipa ucapupu kuna medhiko waiviya kuzondimusira. Cimweni, ndaicumaerazve mundhu waiviya kuzosiya zviro pamuzi. Ndakaenderera mberi ndecibhuisana na medhiko waindirapaya ndecishandisa foni.” Ngo ndava yo mugariro javo, Samweri na Dhaniya avacaikwanisa kuita mabasa ovaiitaya kare, pikija zvakadaro, ivona vakaenderera mberi veciita zvavaikwanisa, cimwenizve vakawana mudakaro no muviyo jakona.

17. Mungaitisa kudini kuti mujije zvizinji kuvha ku mafundo anangwari mu cijijo cino?

¹⁷ Ejanyi kushandisa mafundo mashanu anangwa mu cijijo cino. Fundo rimwe nga rimwe rakadari inga tempero. Zviro zvikadihwa tempero yakakwana izvona zvinonaka maningi. Kudari tikashandisa mafundo mashanu aya tinozova takanasa kunasiririka kuti titame kuva no mazwiro aciripi aushoni asi tova takadakara mu basa rokucumaera.