Vakapa Madosi Zviimbhwa Zvangu
NICK anogara ku Oregano, Estadhus Unidhus yo Amerika, wakati: “Mu kutanga ko gore ro 2014, ndakatanga kutora zviimbhwa zvangu zviviri, ndofamba nazvo pakati po dhorobha rotaigara. Kazinji Zvapupu zva Jehovha zvainga zviri pakati po dhorobha vecicumaera vecishandisa cikarinya. Ivona vainasa kusimira no kucungamija vese vaifamba ndipona vakadakara.
“Ivona avacaitaja ushoni vandhu basi, asi vaitajavo ushoni zviimbhwa zvangu. Njiku imweni, Eraine, wainga wakaima pa cikarinya co mabhuku, wakapa madosi zviimbhwa zvangu zviviri. Pozvakapera kuitika izvi, nguva jese jataikhwedera phedo no cikarinya co mabhuku, zviimbhwa izvi zvaigogoma kwenda kuno Zvapupu kuti zvipuwe ‘zvimadosi zvo imbhwa.’
“Pakakhirira mweji jakati kuti. Zviimbhwa zvangu zvaidakara ngo madosi, kuveni inini ndaidakara ngo kubhuya no Zvapupu. Asi adicaidepi kubhuya maningi navo. Ndainga no makore anokwana kuita 70, andicaithemba zviro zvaitendwa ngo Zvapupu. Ndainga ndakanyangajwa ngo zviyara zvizinji zvinonanga kuti, Makristu. Ngo kudaro, ndakavona zviri nane kujija Bhaibheri ndiri ndega.
“Pa mukuvo uwu, ndaivona Zvapupu zvimweni zvo mativi akasiyana-siyana o dhorobha, vakaima pamberi pa zvikarinya zvo mabhuku. Ivona nguva jese vaikhombijiravo ushamwari. Nguva jese ivona vaidavira muvhunjo jangu vecishandisa Bhaibheri, izvo zvakaita kuti ndivathembe maningi.
“Njiku imweni, Eraine wakandivhunjisa kudari: ‘Munotenda kuti zvinyama izvipo zvinovha kuna Mwari?’ Ndakadavira kuti: ‘Hina ndinozvitenda.’ Perapo Eraine wakandiverengera Isaia 11:6-9. Kuvhira pondhopo, ndaida kujija Bhaibheri, asi ndainga ndicikadi kuverenga bhuku riri rese ro Zvapupu.
“Mu njiku jakazotevera, ndakadakara maningi ngo mabhuyo ondakaita na Eraine pamwepo no mwamuna wake, Brenti. Ivona vakandikumbira kuti ndiverenge bhuku ra Mateu mbhera Mabasa o Vapostori, kuti ndivone zvinobatanijwa pa kuva Mukristu. Ngo kudaro, ndakaita zvondhozvo. Pacizivi kupera mukuvo wakareba, ndakatendera kujija Bhaibheri na Brenti pamwepo na Eraine. Izvi zvakaitika mu nguva yo cirimo co 2016.
“Sumana jese ndaivetera jijo yangu yo Bhaibheri no kwenda kumusongano ku Nyumba yo Umambo. Ndakadakara maningi ngo kujija zvinonanga Bhaibheri. Makore manganani aperari, ndakava umwe wo Zvapupu zva Jehovha. Wari ndino makore anokwana kuita 79. Ndakadakara maningi ngo kuwana ciyara cokadi. Jehovha wakandikomborera ngo kunditendera kuti ndive umwe wo mbhuri yake inoshamaisa.”
