Felisa: Ndakabarihwa pa mbhuri yainamata. Zvokadi, 13 ro vo paukama pangu vainga vapiri kana vazvipiri vo mu Ciara Katorika. Pikija Papa João II wakakonokeja kuti hama ya mai wangu iceneswe, iyo yainga mupiri wo cikatorika wakajijsa pa cimwe cikora co Katorika. Mbhuri yedu aicaikhupuka. Babangu vainga mupfuri, zve mai wangu vainga murimi. Ndainga dangwe pa vana vasere.

Pandainga no 12 o makore o kubahwa, yakatanga Hondo yo Kumukirana mu nyika yo Shipanya. Noyapera, babangu vakafungihwa. Murangariro javo jo kuda kuva no magariro o kusujunuka jakanyangaja utongi, uwo waishandisa simba pa kutonga. Mai wangu vaijipana no kuda kuhisa mbhuri, ngo kudaro shamwari yavo imweni, yakavapa zano rokuti vatumire vanukuna vangu vatatu​—Araceli, Lauri, na Ramoni​—ku imwe nyumba inoraramira majimameri, ku Bhirbhao, ku Shipanya. Khondhoyo ivona avacaizofa havo ngo njara.

Araceli: Pa nguva yondhoyo, kwatiri tovavatatu, umwe wainga no 14 o makore o kubhwa, umweni 12 zve umweni 10, zve kusiyana no mbhuri cainga cineso cakakura maningi. Ku Bhirbhao taiita basa ro kucenesa. Papera makore maviri majimameri akatumira ku nyumba imweni huru yo majimameri ku Zaragoza, kwaikorondhwa harahwa. Basa redu rainga ro kucenesa mukuzinya zve rainga basa raivanga, zvecivoneka kuti tainga ticiri vadoko.

Felisa: Hambzaji jangu pajakaenda ku Zaragoza, mai wangu pomwe no mupiri wo ku ndharaundha kwedu, uwo wainga cekuru, wakananga kuti ndaidikanavo kwenda kondhoyo. Ivona vairangarira kuti kwenda kwangu kondhoyo kwaizoita kuti ndigare ndhambo no mufana umweni wainga ecindida. Zvecivoneka kuti ndainga musikane waida maningi zvo kunatama, ndakadakara ngo kugara, ko nguva yakatikuti, pa nyumba yo maijimameri. Ndaiyenda ku Missa njiku jese, zve ndakamborangarira kuzova misionaria inga imwe hama yangu yainga frade (mundhu wakazvipira ku ciara) ku Afrika.

Majimameri aazivi kuita ciri cese kuitira kundibesera kuti ndikurise cido cangu co kooshandira Mwari nyikanja, zve upenyu hwo pa nyumba yo majimameri waindiita kuti ndijizwe inga kuti ndakasungihwa. Ngo kudaro, no papera gore, ndakatema civaringo co kuhwirira ku muzi ko korondha cekuru wangu, vainga mupiri. Kusiyapo kuita basa ro pamuzi, ndaiita Terso naivona usiku hwese. Zve ndaidakarira maningi kunasirira-nasira maruva o pa ceci no kusimija cithombi ca mbhandwe zve no “vakaceneswa.”

Araceli: Itusuvo upenyu hwedu ku nyumba yo majimameri wakacinja. Pandakaita mbhiko yangu yokutanga, majimameri akatema civaringo co kutiparajanisa tovatatu. Ramoni wakaramba ari ku Zaragoza, Lauri, wakaenda ku Vharensia, zve inini ndakatumihwa ku Madridhi, iyo kondakazoitira mbhiko yangu yo cipiri. Nyumba yo majimameri yo ku Madridhi yaigahwa ngo vajiji, harahwa, zve vabvakaci, ngo kudaro kwaishandiwa maningi. Ndakashanda mu cipitari co pondhopo.

Kunasa kunanga kamare, ndairangarira kuti upenyu hwa mameri wainga no muviyo muzinji jakanaka. Ndaivetera kuverenga no kuzvisisa Bhaibheri. Asi apana wakabhuya neni ngo pamusoro pa Mwari kana Jesu, zve itusu atizivi kumboshandisa Bhaibheri. Ndakajija basi padoko ciRatin, ndojija ngo pa musoro po upenyu hwo “vakaceneswa,” no kunamata Maria. Zvimweni zvakona kwainga kushanda basa basi.

Ndakatanga kuthimwa-timwa, zve ndobhuya na mameri waivonerera tese. Ndakamubvunja kuti kwandiri azvicainga no musoro kushanda ngo simba kuitira kukhupusa vamweni kuveni ukama hwangu huri kuda kubesehwa ndini. Iyena wakandifungira mumba, ecirangarira kuti izvi ndaizocinja murangariro zve zvondiita kuti nditame kubuda pa nyumba yo majimameri.

Bvaza ndhatu majimameri ecindisujunura kuti avone kuti ndiciri kuda kupinda kana kuti haiwa. Ngo kuvona kuti civaringo cangu cainga co kuda kupinda, ivona vakandibvunja kuti ndiite ngo kutara kamare ndecinanga kudari: “Ndiri kupinda ngo kuti ndinoda hangu kushandira Sathana kusiapo Mwari.” Cikumbiro ici cakandizizimusa, zve pikija ndaitokaya-kaya ngo kuda kubuda pondhopo, andicaizotara masoko akadaro. Pa kupejisira, ndakazobhuya no mupiri waidekecehwa, ndomubvunja zvese zvaitika. Iyena wakaita nasiriro kuti dhioseze indicinje ndiende ku nyumba yo majimameri yo kuZaragoza, kondaingaya pa kutanga. No papera mwaji munganani, ndakatendehwa kubva pa nyumba yo majimameri. Pa nguva shomani, Lauri na Ramoni vakatendehwavo kubuda pa nyumba yo majimameri.

Felisa: Pa kufamba ko nguva, ndakarovohwa ndoenda ku Kantabria. Ndairamba ndecienda ku Missa nguva jese, pa rimwe Dimingu ndakazwa ciziviso cakaizwa ngo mupiri pa tiribhuna. Akanyangajwa, iyena wakakhuwa eciti: “Vonanyi bhuku iri!” ecikhombija rainga no musoro unoti: “A Verdade Que Conduz à Vida Eterna.” Perepo, wakaenderera mberi eciti: “Kudari ari wese akamupekeja bhuku iri, ndiviisirenyi kuno kana kuti risvejenyi!”

Andicainga naro bhuku iri, asi ndainga ndotorida pondhopo kamare. Zvakazoitika ngo zvokuti, no papera njiku nganani, Zvapupu zviviri zvakataka musuvo wangu zvondipekeja bhuku “rakarambijwa.” Pa usiku hwo njiku yondhoyo, ndakariverenga, zve vanakakaji vakandipaya povazoviya, ndakadavira kujija navo Bhaibheri.

Ngo kukasika ndakapsaswa mwoyo ngo cokwadi. Kuvangisira kondaiitaya pakushanda ku ciara, kwakacinja kova rudo hwakajika kuna Jehovha no kuvangisira mukucumaera. Ndakabhabhatijwa mu gore ro 1973. Pikija andicainga no mukana jakawanda jo kucumaerera ukama hwangu, ndaizviita pandaindozvikwanisaya. Inga zvandanangaya pa kutanga, ukama hwangu hwakaramba zvitendwa zvangu, maningi-ningi, hambzaji yangu Araceli.

Araceli: Mugariro wondakava nawo ku nyumba yo majimameri hwakandinyangajisa maningi. Asi, ndaindoenda hangu ku Misa mu maDimingu, zve njiku jese ndaiita Terso. Ndainga ndicino cido cakakura co kuda kuzwisisa Bhaibheri, zve ndakakumbira Mwari kuti andibesere. Asi, yaya wangu Felisa, pavakandibvunja ngo pamusoro po gonda ravo ibza, vakavonesa kukhohwa maningi zvokuti ndakarangarira kuti vaipindirija mudida. Ndakamukira kuramba kamare zvavakanangaro.

Papera makore mashomani, ndakahwirira ku Madridhi kooshanda zve ndakazorovohwa. Pa kufamba ko nguva ndakava mundhu anokana-kana maningi. Ndakavona kuti vaiendaya ku Missa nguva jese, avacaishandisa zvinojijiswa mu maVhangeri. Ngo iyo ndava ndakasiya kwenda ku ceci. Ndainga ndicikathembizve “vakaceneswa,” kudekeca, kana gomba ro muriro. Zve ndakapera kusveja zvithombe zvese zvandainga nazvo. Andicaizviziva kuti zvandaiitaro ngo zvainga zvakarungama kana kuti haiwa. Ndainga ndakavora mwoyo, asi ndairamba ndeciita mukumbiro kuna Mwari ndeciti: “Ndiri kuda kumuziva. Ndibesenyivo!” Ndinoceukuja kuti Zvapupu zva Jehovha zvaiguma pamuzi pangu ruzinji, asi andicaivafunungurira musuvo. Ndainga andicathembi ciara ciri cese haco.

Pa matangiro o makore o 1980, hambzaji jangu Lauri na Ramoni, avo vairarama umwe ku Faransa, umweni ku Shipanya, vakatanga kujija Bhaibheri no Zvapupu. Ndakarangaria kuti vainga vapauswavo, inga ndi Felisa. Pa kufamba ko nguva, ndakazova no cigarisano caidanijwa Angelines, uwo wakazova shamwari yangu yo phedo. Iyena waingavo umwe wo Zvapupu zva Jehovha. Nguva no nguva, Angelines no mwamuna wake, vaindikumbira kuti ndijije Bhaibheri. Ivona vakavona kuti pikija ndaivoneka inga mundhu anokana-kana, ndainga ndino nyota yo kuda zivo yo Bhaibheri. Ndazogumisira ngo kuvabvunja kudari: “Zvakanaka. Ndinotendera kujija nemwi, asi, basi mukanditendera kuti ndishandise Bhaibheri rangu,” ndainga ndecinangira Bhaibheri rangu ro sandujo yo Nácar-Colunga.

Felisa: Pandakabhabhatijwa mu gore ro 1973, ku dhorobha ro Santander, kunotongwa porovhinsia yo Kantabria, ku Shipanya, kwainga no Zvapupu zvinokwana kuita 70. Tainga no ndima yo kucumaera yakakura, ngo iyo ndava taiita hwendo ngo mashibhomba zve pa kufamba ko nguva takazoshandisa karu tecienda ku ndaraundha jakasiyana-siyana jo mu porovhinsiemo. Takaenda vhira ngo vhira mbhera tokwanisa kugumira mazana o mavhira o mundharaundheyo.

Ko makore, ndakava no cidakajiso co kuitisa jijo jo Bhaibheri jakawanda zve, 11 ro vajiji vangu vakaguma pa kubhabhatijwa. Vazinji vavo vainga vakambova vaKatorika. Zvecivoneka kuti ndainga ndakambova mutendi wo Katorika wakavanga maningi, ndaizviziva kuti ndaidikana kuva anosengerera zve anozwisisa. Ndaiziva kuti paidikana kudarika nguva kuti ivona vasiye zvavaitenda kare zve vapsaswe mwoyo ngo Bhaibheri no mujimu mucena wa Jehovha kuitira kuti vakwanise kuziva cokwadi. (Heb. 4:​12) Mwamuna wangu, waidanijwa Bienvenido, uwo wakambova muphorisa, wakabhabhatijwa muna 1979, zve mai wangu vakatangavo kujija Bhaibheri, nguva shomani vacito vatamika.

Araceli: Ndainga mundhu anofiningira maningi pandakatanga kujija Bhaibheri no Zvapupu. Asi, mabviki paainga ecidarika, ndakavona kuti mazwiro angu o kunyangajwa, ainga ecipera. Zvaishamaisa maningi ngo zvokuvona kuti Zvapupu zvaiita zvo zvaicumaera. Gonda rakafakea kukana-kana, zve ndakatanga kuwana mudakaro. Kunyazi zvigarisano zvaitondibvunjavo kudari: “Araceli, batisisai gwanja rowakhetari!”

Ndinoceukija mukumbiro wondakaita wokuti: “Ndinomubonganyi Jehovha, ngo kutama kundisiya zve ngo kundipa mukana jakawanda kuti ndiwane zivo yokadi yo Bhaibheri, yondainga ndecipsaka.” Ndakakumbira kuregehwa kuna yaya wangu Felisa, ngo ndava yo magama anohwaja ondakavabvunja. Masoko edu akafakehwa ngo mabhuyo anodakajisa o mu Bhaibheri. Ndakabhabhatijwa mu gore ro 1989 no 61 o makore o kubahwa.

Felisa: Wari no makore anokwana 91 o kubahwa, ndiri noni zve andicina simba rondainga naro kare. Asi, ndinoverenga Bhaibheri njiku jese, ndinoenda ku musongano uhomi hwangu pahunotenderaya zve ndinotoravo rutivi pa basa ro kucumaera pandinondokwanisaya.

Araceli: Kangaije ngo ndava yo kuti ndakambova mameri, ndinodakarira maningi kupa ucapupu kuno vapiri no majimameri vandinowana mu mushando. Ndakambovakovanisa mabhuku akawanda zve ndakambova no mabhuyo anodakajisa naivona. Ndinoceukija umwe mupiri, wandakabvakacira ruzinji, wakandibvuja kudari: “Araceli, ndinotenderana kamare no zvaunonangaro, asi ndingaendazve kwapi no mupira wanguwu? Vo pa parokia pano pomwe no ukama hwangu vanozoti kudini?” Inini ndakamupingura ndeciti: “Mwari anozoti kudini?” Akasuruvara, iyena wakatambisa musoro ecitendera, asi pa kufamba ko nguva aazivi kuva o cicunge co kuenderera mberi ecipsaka cokwadi.

Ndinoceukija mukuvo umweni wakandijakajisa maningi mu upenyu hwangu. I mukuvo wo kuti mwamuna wangu wakananga kuti waida kwenda na inini ku musongano. Pikija iyena waano 80 o makore o kubahwa, aazivikumboruza musongano kubvira pondhopo. Iyena wakajija Bhaibheri kugumira pa kuva mucumaeri acizivi kubhabhatijwa. Ndiciri kurangarira pataienda tese koocumaera. Iyena wakatambika pacisara mweji muviri kuti igume njiku yaiida kubhabhatijwa.

Felisa: Cimwe co zviro zvinondidakajisa maningi pa upenyu hwangu, cakava co kuvona vanukuna vangu vatatu, avo vairamba zvitendwa zvangu, veciva hambzaji jangu jo kumujimu. Taidakajihwa maningi ngo kuva tiri pamwepo, tecibhuya ngo pamusoro pa Jehovha, Mwari wedu anodiwa, pomwe no Soko rake. Hina, wari inini no hambzaji jangu ndhatu tabatana kumujimu. *