1-2. Kudari amuto manasiririka kuti mubhabhatijwe, ngenyi amudikani kuremba? (Vonanyi foto yo pakapa.)

 KUDARI muri kurangarira kubhabhatijwa, muri kurangarira kuita zviro zvaushoni kamare. Muri kuvona kuti makanasiririka kuti mubhabhatijwe? Kudari mukavona kuti makanasiririka, vakuru vomuaprovhari, mucathya kuzviita mukambhera ngo kuwana mukana. Munozova no upenyu unodakajisa maningi pa kushandira kwenyu Jehovha.

² Waro ngozvapi zvamungaita, kudari mundhu ari wese akamuvhunja kuti munodikana kuita cinjo mucito mabhabhatijwa? Kana kudari imwimwi mukazwisisa mwega kuti munodikana kuita cinjo? Kudari ndiwona mugariro wenyu, mucadoremba. Imwimwi munokwanisa kuita cinjo kuti mubhabhatijwe, azvinenyi dangani muri mujaha kana musharuka.

3. Mukuru-kuru umweni wo Etiyopiya wakavhunjisenyi Firipi, izvi zvinomusa muvhunjo wapi? (Mabasa o Vapostori 8:36, 38)

³ Verenganyi Mabasa o Vapostori 8:36, 38. Mukuru-kuru umweni wo Etiyopiya wakavhunjisa Firipi muvhangeri kudari: “Icinyi cingandiphinga kuti nditame kubhabhatijwa?” Mwanarume uwu wo Etiyopiya waida kubhabhatijwa, asi kureva kuti iyena wainga wakanasirira kuti aite izvi?

4. Mwanarume uwu wo Etiyopiya wakavonesa kudini kuti iyena waida kujija zvakawanda?

⁴ Mwanarume uwu wo Etiyopiya “wainga aenda konamata ku Jerusarema.” (Mabasa o Vapostori 8:27) Izvi zvinovonesa kuti iyena wainga watendera kunamata ko Vajudha. Ngo kujija kwake Matahwa o Cihebheru, wainga wajija zvakawanda maningi ngo pamusoro pa Jehovha. Asi iyena wainga no cido co kujija zvakawanda kupinda izvi. Firipi paakasongana naye, iyena wainga eciverenga zvakatahwa ndi muporofita Isaya. (Mabasa o Vapostori  8:28) Zviporofita izvi zvainga zvokadi zvakajikisisa zvinowanika mu Bhaibheri. Izvi zvinovonesa kuti mukuru-kuru uwu aacaidepi basi kujija zvokadi zvakareruka zvinowanika mu Bhaibheri.

5. Mwanarume wo Etiyopiya wakaitenyi no zvaaijija?

⁵ Mwanarume uwu wainga mukuru-kuru anosisira maningi wo Vahosi Kandasi, vo Etiyopiya. Iyena “waingwarira upfumi” hwavo hwese. (Mabasa o Vapostori 8:27) Ngo kudaro, iyena wainga mwanarume waibatikana maningi, ngokuti wainga no mutoro jakawanda. Pikija zvakadaro, wakapsaka nguva kuti aende konamata Jehovha. Iyena waida kuita zvizinji kusiyapo kujija cokwadi basi, waida kushandisa zvaajijaro. Ngo iyo ndava, wakaita hwendo hwakareba maningi kuvha Etiyopiya kwenda Jerusarema, kuti anamate Jehovha mu themberi. Uwu auzivi kuva hwendo hwakareruka. Zvingaita kuti iyena wakatopeja mare yake, mwanarume uwu waida maningi kunamata Jehovha azvinenyi kuti ngozvapi zvaaizoruza.

6-7. Kuitisa kudini rudo wo mu Etiyopiya uwu kuna Jehovha wakaguma pa kuvanga?

⁶ Firipi wakajijisa mwanarume uwu zvokadi zvinosisira. Cimwe co zvokadi izvi, cainga cokuti Jesu ndi Mesiya. (Mabasa o Vapostori 8:34, 35) Iyena wakadakara maningi ngo kuziva ngo pamusoro po muripo wakaithwa ndi Jesu no zvawaireva kwaari. Waro ngozvapi zvaakaita paakapera kujija zviro izvi? Iyena wainga mundhu waireremejwa maningi ngo Vajudha, waizoenderera mberi wakadaro. Kusiyapo zvondhozvo, rudo hwake kuna Jehovha na Jesu hwakavanga. Wosunga kuita cinjo jakakura maningi mu upenyu hwake, kuti agumire pa kubhabhatijwa inga muteveri wa Jesu Kristu. Firipi paakavona kuti mwanarume uwu wainga wanasiririka kuti abhabhatijwe, iyena wakamubhabhatija.

⁷ Imwimwi munozovavo makanasiririka kuti mubhabhatijwe, kudari mukatevera muezaniso wo mwanarume uwu. Munozova no cokwadi cakava no mwanarume uwu, mojivhunjisa kudari: “Icinyi cingandiphinga kuti nditame kubhabhatijwa?” Ngatende tivone kuti mungaitisa kudini kuti muite zviro zvakafanana no zvakaithwa ngo mwanarume uwu. Pakutanga, ngatende tivone kuti mungaitisa kudini kuti muenderera mberi mecijija, kushandisa zvamuri kujijaro no kwenderera mberi mecivangisa rudo hwenyu kuna Jehovha.

8. Johani 17:3, inonanga kuti tinodikana kuitenyi?

⁸ Verenganyi Johani 17:3. Zvakanangwari ndi Jesu pa vhesi iyi, zvakamuita kuti mude kujija Bhaibheri? Izvi ndizvona zvakatika no vazinji vedu. Kureva kuti magama aya anotivangisa kuti tienderere mberi tecijija? Hina. Narini itusu atizosii ‘kuziva . . . Mwari umwe basi wo cokwadi.’ (Mucumaeri 3:11)  Tinozoenderera mberi tecijija ngo pamusoro pa Jehovha mbhera narini. Tikaenderera mberi tecijija ngo pamusoro pake, tinozova no ushamwari wo phedo naye.—Nduyo 73:28.

9. Ngozvapi zvatinodikana kuita pasure po kujija zviro zvokutanga zvinowanika mu Bhaibheri?

⁹ Ndizvona kuti patinotanga kujija ngo pamusoro pa Jehovha, tinojija zviro zvakareruka zvinowanika mu Bhaibheri. Pakarata yake ku Vahebheru, mupostori Pauro wakananga kuti zviro izvi zvotakajijari zvakadari inga “zviro zvokutanga.” Iyena aacaingepi ecishora “jijiso jo kutanga,” kusiyapo zvondhozvo, wakazviezanisa no mukaka unopuwa mwana mudoko. (Vahebheru 5:12; 6:1) Izvo zvakamuita kuti iyena avhunje Makristu ese kuti atame kujija basi zviro zvokutanga zvinowanika mu Bhaibheri, asi aenderere mberi ecijija zviro zvakajikisisa. Zvokadi kamare, munodakarira kujija zviro zvakareruka zvinowanika mu Bhaibheri. Kureva kuti muno cido co kuda kwenderera mberi mecijija ngo pamusoro pa Jehovha no zvaanoda?

10. Ngenyi vamweni vanovona kuti kujija kunonesa maningi?

¹⁰ Kuno vazinji vedu, kujija asipi ciro cakareruka. Imwimwivo keni? Pamainga kushikora, mainga mundhu waidakarira kujija no kudarira zvamaijijaro? Kana kuti mainesehwa maningi kuzwisisa zvoita kuti mbhera wari muvone kuti kujija kunonesa maningi? Vazinji vanojizwavo kudaro. Asi Jehovha angamubesera. Iyena wakakwana nokutizve ndi Mujijisi waushoni maningi.

11. Jehovha anokhombijisa kudini kuti iyena ndi “Mujijisi” Mukuru?

¹¹ Jehovha pacake anonanga kuti iyena ndi “Mujijisi” Mukuru. (Isaia 30:20, 21) Iyena ndi Mujijisi anosengerera, wakanaka mwoyo no anozwisisa. Cimwenizve, anopsaka zvakanaka zvinoithwa ngo vajiji vake. (Nduyo 130:3) Nee aaveteri kuti itusu tiite zviro zvaticikakwanisi kuita. Ceukijanyi kuti Jehovha ndiyena wakaita uruzvi hwenyu, uwu uri cipo cinoshamaisa. (Nduyo 139:14) Tese takasikwa no cido co kuda kujijira zviro zvipsa. Musiki wedu anoda kuti itusu tienderere mberi tecijija mbhera narini no kudakajihwa ngo kuita zvondhozvo. Ngo kudaro, zvaizova zvaushoni ‘kudisisa’ zvokadi zvo Bhaibheri kuvhira wari. (1 Pedhru 2:2) Sananyi zvamunoda kuita no kuva no urongwa wokuverenga no kujija Bhaibheri njiku jese. (Joxwa 1:8) Ngo besero ra Jehovha imwimwi munozodakarira kuverenga no kujija Bhaibheri no mabhuku akacijikira mu Bhaibheri no kubesereka ngo zvamunonga maverenga.

12. Ngenyi tinodikana kujija ngo pamusoro po upenyu hwa Jesu no mushando wake?

¹² Psakanyi nguva yo kurangarijisisa ngo pamusoro po upenyu hwa Jesu no mushando wake. Kudari tinoda kushandira Jehovha ngo njira yaushoni, tinodikana kutevejera muezaniso wa Jesu, maningi-ningi pa mukuvo wo zvineso. (1 Pedhru 2:21) Jesu wakananga acikasiki-siki kuti vajiji vake vaizosongana no zvineso. (Ruka 14:27, 28) Pikija zvakadaro, wainga no cokwadi cokuti vaizoenderera mberi vakagondeka inga zvaakaita. (Johani 16:33) Nasanyi kujija ngo pamusoro po upenyu hwa Jesu no kumutevejera mu upenyu hwenyu hwo njiku ngo njiku.

13. Ngozvapi zvatinodikana kukumbira kuna Jehovha, ngenyi tinodikana kuita zvondhozvo?

¹³ Ndizvona kuti uzivi unosisira maningi, asi azvikwani basi kuva no uzivi. Uzivi unodikana ngokuti unomubesera kuti mujije zvakawanda ngo pamusoro pa Jehovha, muvangise rudo hwenyu no kuva no rutendo hwakavanga. (1 Vakorinte 8:1-3) Pamunoenderera mberi mecijija ngo pamusoro pa Jehovha, mukumbirenyi kuti amubesere kuva no rutendo hwakavanga. (Ruka 17:5) Iyena mukuvo wese anodavira mukumbiro jenyu. Kudari mukava no rutendo hwakavanga pa zviya zvamunojija munozokwanisa kuzvishandisa mu upenyu hwenyu.—Jakobo 2:26.

14. Mupostori Pedhru wakakhombijisa kudini kuti zvinosisira maningi kushandisa zvatiri kujija? (Vonanyi foto.)

¹⁴ Ecishandisa muezaniso wa Nowa, mupostori Pedhru, wakavonesa kuti zvinosisira maningi kwenderera mberi tecishandisa zvatiri kujija. Jehovha wakavhunja Nowa kuti waizoviisa ndambi kuti aparaje vandhu vaiita zviro zvakashata pa mukuvo wondhowo. Kuziva basi kuti kwaizoviya ndambi azvicaikwana kuti Nowa no mbhuri yake vapone. Vonanyi kuti mupostori Pedhru wakashandisa magama okuti “piketi payaivakwa” ecinangira mukuvo wokuti Ndambi yainga icito yaitika. (1 Pedhru 3:20) Izvi zvinokhombija kuti Nowa no mbhuri yake, vakaita zvovakavhunjwa ndi Jehovha, vovaka arka. (Vahebheru 11:7) Mupostori Pedhru wakaezanisa zvakaithwari ndi Nowa no rubhabhatijo, paakati: “Kumwa iyo, inoshanda inga muezaniso wo rubhabhatijo hunomuponesa nyamasi.” (1 Pedhru 3:21) Ngo kudaro, tingaezanisa kuvangisira kwamuri kuita kuti mubhabhatijwe no kuvangisira kwakaitwa ndi Nowa no mbhuri yake kuti vavake arka. Kuvangisira kwapi kwamunodikana kuita kuti mugumire pa kubhabhatijwa?

15. Mungakhombijisa kudini kuti makhauyadi kamare?

¹⁵ Ciro cokutanga catinodikana kuita ngo co kukhauya ngo mwoyo wese ku zvishaishi zvedu. (Mabasa o Vapostori 2:37, 38) Tinokwanisa kuita cinjo jinodikana kudari tikakhauya ngo mwoyo wese. Imwimwi makwanisa kusiya kuita zviro zvakashata zvicikadakajisi Jehovha, zvakadari inga kuita uhure, kushandisa mutombo jinodhakwisa no kubhuya magama anotuka? (1 Vakorinte 6:9, 10; 2 Vakorinte 7:1; Vaefeso 4:29) Kudari zviri kumunesera kusiya zviro zvakadari inga izvi, mucaremba, endereranyi mberi mecieja. Bhuyanyi no mujijisi wenyu wo Bhaibheri kana kukumbira ndhungamiriro ku vakuru vo ungano. Kudari muri mujaha kana musikane muri kupona no vabari venyu, kumbiranyi besero ku vabari venyu kuti vamubesere kuhwisana no zvineso zvamungava nazvo kuti mugumire pa kubhabhatijwa.

16. Ngozvapi zvinobatanijwa pa kuva mundhu wakavanga ku divi ro umwari?

¹⁶ Ciro cimweni cinosisira maningi ndi kuva mundhu wakavanga ku divi ro umwari. Izvi zvinobatanijavo kwenda ku musongano no kupa mupinguro. (Vahebheru 10:24, 25) Vangisiranyi mu basa ro kucumaera. Pamunovangisira pa  basa iri rinoponesa upenyu, munozoridakarira maningi. (2 Timoti 4:5) Kudari muri mujaha munogara no vabari venyu, jivhunjisenyi kudari: ‘Kureva kuti vabari vangu vanodikana kugara vecindiceukija kuti yakwana nguva yo kwenda kumusongano kana kwenda kocumaera? Kana ndinotozviita ndega ndicikaimiri kuvhunjwa?’ Kudari amuimiri kuvhunjwa, zvinovonesa kuti muno rutendo, rudo no kuda kubongesera Jehovha ngo zvese zvaushoni zvaanomuitira. Inga zvinonanga Bhaibheri imwimwi munonga “meciita mabasa o kujipira kuna Mwari,” kana kuti munonga mecipa Jehovha zvipo. (2 Pedhru 3:11; Vahebheru 13:15) Patinopa Jehovha zviro ngo kuda kwedu, zvinoita kuti iyena adakare maningi. (Ezanisanyi no 2 Vakorinte 9:7.) Zvinodakajisa maningi kuita zvese zvatinokwanisa kuti tidakajise Jehovha.

17-18. Ngowapi mugariro unozomubesera kuti muenderere mberi mbhera pakubhabhatijwa, ngenyi? (Mazwi Akangwara 3:3-6)

¹⁷ Pamunonga mecinasirira kuitira kubhabhatijwa, munozosongana no zvineso zvinganani. Vamweni vangamushora ngo ndava yo rutendo hwenyu kana kutomuseka. (2 Timoti 3:12) Kangaije mungatova no cido co kuita zvakashata zvamainga masiya sure. Kana mungatogara makasuruvara mecirangarira kuti amuzokwanisi kuita zviro zvamunoda. Waro ngozvapi zvinozomubesera kuti mucungirire zvineso izvi? Ndi rudo hwamunahwo na Jehovha.

¹⁸ Kuda kwamunoita Jehovha kunosisira maningi kupinda zvese. (Verenganyi Mazwi Akangwara 3:3-6.) Kuva no rudo wakavanga kuna Jehovha kungamubesera kuti mukwanise kuhwisana no zvineso. Kudari imwimwi munoda Jehovha, amuzosii kumushandira ngokuti muri kusongana no zvineso. Ko vhaza jakawanda Bhaibheri rinobhuya ngo rudo ucikacinji una Jehovha ku vashandiri vake. Izvi zvinoreva kuti Jehovha narini aazosii vashandiri vake kana kutama kuvada. (Nduyo 100:5) Ceukijanyi kuti Jehovha wakamuita ngo muezaniso wake. (Genesi 1:26) Waro mungakhombijisavo kudini rudo ucikacinji?

19. Mungaitisa kudini kuti muenderere mberi mecibongesera ngo zvese zvamunoitihwa ndi Jehovha? (Vagaratiya 2:20)

¹⁹ Ciro cokutanga cinozotibesera kuti tive vandhu vano rudo ucikacinji i kubongesera. (1 Vatesaronika 5:18) Njiku jese jivhunjisenyi kudari: ‘Jehovha ari kukhombijisa kudini kuti anondida?’ Perapo, pamunoita mukumbiro bongeseranyi Jehovha, ngo ciro camavona kuti iyena  wamuitira kamare. Jehovha anomuda maningi, iyena ari kuita zviro zvaushoni kwamuri. Ngo kudaro, ejanyi kuvona zvaari kumuitiraro, inga zvakaithwa ndi mupostori Pauro. (Verenganyi Vagaratiya 2:20.) Jivhunjisenyi kudari: ‘Ndinoda kukhombija Jehovha kuti ndinomuda?’ Kuda kwamunoita Jehovha ndikona kunozomubesera kuti mukwanise kubudirira pa muejo no zvineso zvamunozosongana nazvo. Rudo uwu unozomubeserazve kuti mubatikane pa zviro zvo umwari no kukhombija kuna Jehovha kuti imwimwi munomuda maningi.

20. Ngozvapi zvinobatanijwa pa kupira upenyu hwenyu, kuitisa kudini civaringo ici cinosisira?

²⁰ Ngo ndava, yo rudo hwamunahwo kuna Jehovha, mukuvo paunonga wecikhirira munozova no cido cokuda kuita mukumbiro unosisira maningi kwaari. Pa mukumbiro uwu imwimwi munojipira kuna Jehovha. Inga mushandiri wakajipira kuna Jehovha muno vetero inoshamaisa, yo kumushandira kwenda no kwenda. Pamunojipira kuna Jehovha, munomugondesa kuti munozomushandira azvinenyi dangani pa mukuvo waushoni no pa mukuvo wo zvineso. Kujipira i ciro camunoita kamwe basi mu upenyu hwenyu. Ngo zvokadi kuti ici ndi civaringo cinosisira maningi camungaita mu upenyu hwenyu. Amborangariranyi izvi: Pa zvivaringo zvese zvamunotema mu upenyu hwenyu, civaringo co kupira upenyu hwenyu kuna Jehovha cinosisira maningi pa zvese. (Nduyo 50:14) Sathana anoda kurembesa rudo hwenyu kuna Jehovha, iyena aadi kuti muenderere mberi makagondeka kwaari. Mucatendera kuti iyena aite izvi. (Jobe 27:5) Rudo hwenyu kuna Jehovha paunovanga, munozokwanirisa zvamakagondesa kwaari pamakajipira. Cimwenizve, unozoita kuti mukhwedere phedo kuna Baba wenyu vo kudenga.

21. Ngenyi kubhabhatijwa azvirevi kuti zvakwana asi i matangiro basi?

²¹ Pamunopera kujipira kuna Jehovha, bhuyanyi no vakuru vo ungano yenyu kuti mukwanise kuita mudanyu unotevera. Pamunopera kubhabhatijwa, ceukijanyi kuti aya i matangiro basi. Kutangira pondhopo munova no upenyu hupsa wo kushandira Jehovha kwenda no kwenda. Ngo kudaro, vangisanyi rudo hwenyu kuna Jehovha kutangira wari. Itanyi zviro zvinomubesera kuti rudo hwenyu kuna Jehovha uvange njiku no njiku. Kuita izvi kunozomubesera kuti mugume pa njiku yo kubhabhatijwa, iyo iri njiku inosisira maningi kwamuri. Asi aya imatangiro basi. Tinovetera kuti rudo hwenyu kuna Jehovha no kuno Mwana wake uengejeke mbhera narini.