1. Kuitisa kudini upenyu hwedu hunosisira maningi kuna Jehovha?

 NGATITI shamwari yenyu yamupa nyumba. Mapiravira amweni akasvipa-svipa no kumweka padoko. Pikija zvakadaro, nyumba iyi ingatengwa ngo mamiriyoni o madhorari. Pacina kukana-kana, imwimwi munobongesera no kuitaja ushoni. Munjira yakaezana, Jehovha wakatipa ciro cinosisra maningi, cipo co upenyu. Jehovha wakakhombija kuti anoreremeja maningi upenyu hwedu ngo kutipa Mwana wake inga muripo.—Johani 3:16.

2. Inga zvatinovona pana 2 Vakorinte 7:1, Jehovha anoda kuti itusu tiitenyi?

² Jehovha ndiyena cinyuke co upenyu. (Nduyo 36:10) Mupostori Pauro waizvitendavo izvi. Iyena wakati: “Ngo ndava yake, itusu tino upenyu, tinofamba no kurarama.” (Mabasa o Vapostori 17:25, 28) Itusu tinganangavo kuti upenyu hwedu icipo cinovha kuna Mwari. Ngo rudo hwake iyena anotipa zvatinoda kuti tirarame. (Mabasa o Vapostori 14:15-17) Asi Jehovha aaiti mushamaiso kuti itusu tienderere mberi tecipona. Iyena anoda kuti itusu tiite zvese zvatinokwanisa kuti tienderere mberi tino uhomi hwaushoni kuti timushandire. (Verenganyi 2 Vakorinte 7:1.) Ngenyi tinodikana kujivirira uhomi hwedu, tingazviitisa kudini zvondhozvo?

3. Ngorapi thangwe rimwe rinotiita kuti tide kuva no uhomi hwaushoni?

³ Thangwe rimwe rinotiitisa kuti tive no uhomi hwaushoni, ngo rokuti itusu tinoda kushandira Jehovha ngo mwoyo wedu wese. (Marko 12:30) Itusu tinoda ‘kupira muviri wedu no upenyu hwedu kuna Mwari, mupiro iyi inodikana kuva yakacena no ino tendehwa pamberi pa Mwari.’ Ngo kudaro, atizoiti zviro zvatinoziva kuti zvinozoita kuti tihwaje. (Varoma 12:1) Zvokadi, azvinenyi kuti ngozvapi zvatinoita, apana cinovonesa kuti itusu atizohwaji. Asi tinoita zvese zvatinokwanisa ngokuti tinoda kukhombija kuna baba wedu vo kudenga kuti tinoreremeja maningi cipo co upenyu.

4. Mambo Dhavhidhi waida kuitenyi?

⁴ Mambo Dhavhidhi wakananga kuti ngenyi iyena waireremeja maningi cipo co upenyu caakapuwa ndi Mwari paakatara kudari: “Ndikafa, ndikaterera mu iba, munozowanenyi? Bukuta rinomusimba, rinotokotesa bzokadi bzenyu here?” (Nduyo 30:10) Zvingaita kuti Dhavhidhi wakatara magama aya paainga waamusharuka kamare. Iyena waida kuenderera mberi ecipona pamukuvo wo zvaikwanisikaro kuti akuje Jehovha. Pacina kukana-kana, tese tinodavo kuita zvakafanana.

5. Ngozvapi zvatingaita pikija tecihwaja kana taaharahwa?

⁵ Kudari tikahwaja kana kuguma pakuita harahwa, tinozoguma pa kukonehwa kuita zviro zvataikwanisa kuita kare. Inga muviyo tingaguma pa kusuruvara. Asi tinodikana kuita zvese zvatinokwanisa kuti titaje uhomi hwedu. Ngenyi? Ngokuti azvinenyi kuti tiri kuhwaja kana taaharahwa, asi tingakwanisa kuenderera mberi tecikuja Jehovha, inga zvakaizwa ndi Mambo Dhavhidhi. Zvinovangisa maningi kuziva kuti itusu tinosisira kuna Mwari wedu pikija tiri vandhu vacizivi kukwana. (Mateu 10:29-31) Pikija tikafa, iyena anozotimusa. (Jobe 14:14, 15) Patinonga tecipona tinoda kuita zvese zvatinokwanisa, kuti tijivirire upenyu hwedu.

6. Jehovha anoveterenyi kwatiri paya patinosana zvokuha no zvokumwa?

⁶ Pikija Bhaibheri asipi bhuku rinobhuya ngo zvo uhomi, kana rinobhuya kuti ngozvapi zvatinodikana kana zvaticikadikani kuha, irona rakazara ngo zviro zvinovonesa mavonero a Jehovha ngo pamusoro po zviro izvi. Inga muezaniso, Bhaibheri rinonanga kudari “reesaivo matambujiko ku muviri wako” kana kuti zviro zvinokhuvaza muviri wedu. (Mucumaeri 11:10) Bhaibheri rinonanga kuti atidikani kuhisa no kudhakwa, ngokuti zviro izvi zvinodira upenyu hwedu pa ngozi kana kutotiuraya kamare. (Mazwi Akangwara 23:20) Jehovha anovetera kuti tive vandhu vanojibata paya patinosana zviro zvo kuha no mutengo watinodaro kuha kana kumwa.—1 Vakorinte 6:12; 9:25.

7. Kuitisa kudini Mazwi Akangwara 2:11, inotibesera kuti titeme zvivaringo zvaushoni ngo pamuso po uhomi hwedu?

⁷ Tinokhombija kuti tiri kureremeja cipo co upenyu catakapuwa ndi Mwari ngo kunasa kushandisa manera edu okurangarira. (Nduyo 119:99, 100; verenganyi Mazwi Akangwara 2:11.) Inga muezaniso, tingakhombija manera edu okurangarira paya patinokheta zvokuha. Kudari itusu teciziva zviro zvimweni zvatinoha kuti azvitiiti ushoni, tingatema civaringo cokutama kutozvihazve. Tinokhombija kuti tinorangarira ushoni ngo  kuvata zvakakwana, kuita ezerisisiyo mukuvo wese, kucenesa muviri wedu no kucenesa nyumba yedu.

8. Bhaibheri rinonangenyi ngo mavonero a Jehovha okujijivirira kwedu pa ngozi?

⁸ Mutemo wa Jehovha ku jinja ro Iziraeri, waibatanija ndhungamiriro yaizovabesera pa ngozi yaizoitika kubasa kwavaishanda kana mumamuzi mavo. (Exodo 21:28, 29; Deuteronòmio 22:8) Mundhu waiuraya mundhu acikazvidi waiva no muviyo jakatikuti. (Deuteronòmio 19:4, 5) Mutemo wainanga kuti mundhu akauraya mwana aciri mundani waidikana kupanicwa. (Exodo 21:22, 23) Matahwa anonasa kujekesa kamare kuti Jehovha anoda kuti tijijivirire pa ngozi.

9. Ngozvapi zvatingaita kuti tijijivirire pa ngozi jingazoitika? (Vonanyi foto.)

⁹ Itusu tinokhombija kuti tiri kureremeja cipo co upenyu catakapuwa ndi Jehovha ngo kungwarira muzi wedu no paya patinoshandira. Inga muezaniso, tingaita izvi ngo  kusveja zviro zvingatibaya, zviri zvese zvinomwiwa zvingatikhuvaza no mutombo. Tinodikanazve kuzvidira mu ndau jakagwaririka kuti vana vadoko vatame kutamba nazvo. Tinova vandhu vanonasa kungwarira ngo kutama kusiya pambhene muriro, zviri zvese zvinomwiwa zvinopisa no mafiyo omarujhu. Itusu atifambisi karu tapera kumwa mutombo jinobararisa hwiru hwedu, doro kana ticizivi kuvata ushoni. Atitotenderivo kuphingaijwa ngo kushandisa foni patinonga tecifambisa karu.

10. Ngozvapi zvatingaita paya panonga pecida kuitika ngozi no paya painonga yeciitika?

¹⁰ Nguva jimweni itusu atikwanisi kujijivirira pa ngozi jingazoitika. Izvi tinokwanisa kuzvivona panoitika ngozi jinoitika jega, mutungu no hondo. Pazvinoitika tingakwanisa kuzvijivirira ngo kuzwira, paya patinovhunjwa kuti tibude ku ndauyo no kuita zviro zvimweni zvatinonga tecivhunjwa ngo utongi. (Varoma 13:1, 5-7) Zvinokwanisika kunajirira nguva iciripo. Tingaita zvondhozvo ngo kuita zviro zvinganani zvatinovhunjwa zvingazotibesera panozoitika ngozi. Inga muezaniso, tingakwanisa kuviga zviro zvakadari inga zvimabotiri zvokumwa, zvokuha zvicikavori pamwepo no mutombo.

11. Kudari ndhendha inopairihwana iri kundhandhanika ku mutundhu kweduyo ngozvapi zvatingaita?

¹¹ Ngozvapi zvatingaita kudari ndhendha inopairihwana iri kundhandhanika ku mutundhu kwatinogararo? Itusu tingatoita zvese zvatinovhunjwa ngo utongi zvakadari inga izvi, kusamba nyara ngo sabau mukuvo wese, kugara ndhambo na ndhambo no vamweni, kusimira maskara no kugara mu kwaretena. Patinoita izvi tinokhombija kuti tiri kureremeja cipo co upenyu catakapuwa ndi Mwari.

12. Indhungamiriro yapi iri pana Mazwi Akangwara 14:15, ingatibesera kuti tivone ngoapi masoko atinodikana kupurukira panonga papera kuitika ngozi?

¹² Panonga peciitika zviro zvakadari tingatozwa masoko amweni acikaripi okadi anovha kushamwari, mavhizinyu no mu manotisiya. Kusiyapo ‘kutenda zvese zvatinozwa’ itusu tingazwira zvinonanga utongi kubatanijavo no mamedhiko. (Verenganyi Mazwi Akangwara 14:15.) Mukhumbi Unotonga no vo komisau yo firiyari, vanovangisira kuti vaviise masoko okadi vacito vaviisa ndhungamiriro iri yese ngo pamusoro po kuenda kumusongano no kuenda kocumaera. (Vahebheru 13:17) Ngo kuzwira ndhungamiriro iji, tinojijivirira pacedu no kujivirira vamweni. Cimwenizve, tinozobesera vandhu kuti vavone kuti Zvapupu zva Jehovha ndi vandhu vaushoni.—1 Pedhru 2:12.

13. Tingakhombijisa kudini kuti tinoreremeja upenyu patinozwira mutemo wa Jehovha wokutama kudihwa ngazi?

¹³ Vandhu vakawanda vanoziva kuti Zvapupu zva Jehovha zvinoreremeja maningi ngazi. Itusu tinozwira mutemo wa Jehovha ngo kutama kudihwa ngazi pikija tecida kurapiwa ngo kukasika. (Mabasa o Vapostori 15:28, 29) Asi izvi azvirevi kuti itusu tinoda kufa. Mukusiyana zvinokhombija kuti tinoreremeja cipo co upenyu catakapuwa ndi Mwari. Itusu tinopsaka besero ro mamedhiko aushoni kamare anoda kutirapa acikashandisi ngazi.

14. Zvicinyi zvatinodikana kuita kuti titame kuguma pa kurapwa ngo kukasika?

¹⁴ Kudari tikataja uhomi hwedu ngo kuita zviro zvatajijari mu musoro uwu, atizodikani  kuithwa operasau kana kurapwa ngo njira jo kukasika. Kudari tino uhomi hwaushoni paya patinoguma pakuithwa operasau tinozokwanisa kuita nane ngo kukasika. Cimweni, tingakwanisa kutiza ngozi yokurapwa ngo kukasika ngo kuva takangwaririka pa muzi no kubasa no kunasa kufambisa karu.

15. (a) Ngenyi zvinosisira maningi kuti khadhi redu ro Diretivas Antecipadas rivoneke recishanda mbhera wari? (Vonanyi foto.) (b) Inga zviri kukhombijwa pa vhidhiyo, tingaitisa kudini kuti titeme zvivaringo zvaushoni ngo pamusoro po mashandisihwe o ngazi?

¹⁵ Zvecivoneka kuti itusu tinoreremeja upenyu tino peresheri khadhi iri Diretivas Antecipadas no kufamba naro mukuvo wese. b Tecishandisa khadhi iri tinovonesa mazwiro edu ngo pamusoro po ngazi no manera amweni okurapwa. Khadhi renyu ro Diretivas Antecipadas riciri kushanda here? Kudari muri kuda kuperesheri khadhi rimweni, mucadononoka. Kuperesheri khadhi iri kunotibesera kuti tizorapwa ngo kukasika, titame kuzopeja mukuvo wakareba tecindobhuya no mamedhiko. Ngo kudaro, zvinozobesera mamedhiko kuti avone ngoapi marapihwe aticikadi no atinoda. c

16. Ngozvapi zvatingaita kudari atikwanisi kuperesheri khadhi ro Diretivas Antecipadas?

 ¹⁶ Azvinenyi kuti tiri mujaha kana kuti harahwa, tese tingatohwaja. (Mucumaeri 9:11) Zvaizova zvo ungwaru kuti tiperesheri khadhi iri. Kudari mucikakwanisi kuperesheri khadhi iri kumbiranyi besero ku umwe mukuru wo ku ungano yenyu, ivona vanonasa kuziva manera okuperesheri khadhi iri. Asi ivona avazomutemeri civaringo ngo manera amunodikana kurapwa. Uwu i mutoro wenyu. (Vagaratiya 6:4, 5) Ivona vanozomubesera kuti muzwisise no kutara zvamunoda.

17. Tingakhombijisa kudini kuti tiri vandhu vanozwisisa ngo pamusoro po shwiro jo uhomi?

¹⁷ Kazinji zvivaringo zvatinotema ngo pamusoro po uhomi hwedu pa kurapwa, zvinonga zvakacijikira mu Bhaibheri. (Mabasa o Vapostori 24:16; 1 Timoti 3:9) Patinotema zvivaringo no kubhuisana no vamweni ngo pamusoro po civaringo cotatemaro, zvaizova zvo ungwaru kushandisa ndhungamiriro iri pana Vafiripi 4:5 inoti: “Kuzwisisa kwenyu nga kuzivike ngo vandhu vese.” Kudari tikava vandhu vanozwisisa atizogari tecineseka maningi ngo pamusoro po uhomi hwedu. Nee atizoitivo kuti vandhu vamweni vateme zvivaringo zvakatojana no zvedu. Itusu tinoda no kureremeja hama no hambzaji jedu, pikija kuti ivona vanotema zvivaringo zvakasiyana no zvedu.—Varoma 14:10-12.

18. Tingakhombijisa kudini kuti tinobongesera ngo cipo co upenyu?

¹⁸ Itusu tinokhombija kubongesera kwedu Jehovha cinyuke co uhomi ngo kungwarira uhomi hwedu, no kumushandira ngo mwoyo wese. (Apokaripsi 4:11) Asi wari tinodikana kuenderera mberi tecihwisana no ndhendha pomwe no ngozi. Asi uwu asipi upenyu waidiwa ngo musiki wedu kuti tive nawo. Sambiri pano iyena anozotipekeja upenyu ucikaperi, ticikahwaji kana kufa. (Apokaripsi 21:4) Mukuvo uno watiri kuponari, zvaushoni maningi kupona tecishandira Baba wedu vano rudo vokudenga, Jehovha.