1-2. Inga zvatinovona pana Maitiro o Vapostori 8:27-31, 35-38, zvicinyi zvakaita kuti mu Etiyopi ade kubhabhatijwa?

MUNODA kubhabhatijwa kuti muve mujiji wa Kristu here? Kuda Jehovha no kumubongesera kwakabesera vamweni kuti vaite cisungo condhoco. Vonanyi muezaniso wo mutungamiriri umweni waishandira mambo wokaji wo Etiyopi.

² Mu Etiyopi uwu, wakabhabhatijwa ngo kukasika, paakapera kujija Matahwa. (Verenganyi Maitiro o Vapostori 8:27-31, 35-38.) Zvicinyi zvakamubesera kuti aite zvondhozvo? Zvokadi kamare, iyena waireremeja maningi Soko ra Mwari. Paainga mu ngoro, wakaverenga vhesi nganani jo bhuku ra Isaia. Zve Firipi paakabhuya naye, mwanarume uwu wakabongesera maningi ngo zvese zvaainga akaitihwa ndi Jesu. Asi ngenyi mu Etiyopi uwu, wakaita hwendo kwenda Jerusarema? Ngokuti waida kuengejera rudo hwake na Jehovha. Tinozvizivisa kudini? Tinozviziva ngokuti iyena kuti anamate Jehovha waidikana kwenda Jerusarema. Mwanarume uwu, wainga wasiya ciara co vabari vake kuti abatane no jinja rakajipira kuna Mwari wo cokwadi. Rudo hwake kuna Jehovha, wakamuita kuti ade kubhabhatijwa kuti ave mujiji wa Kristu.—Mateu 28:19.

3. Cicinyi cingaitisa kuti mundhu atame kubhabhatijwa? (Vonanyi bhokiso rinoti, “ Mwoyo Wenyu Wakadari Inga Mavhu o Mushovonyi?”)

³ Kuda kwenyu Jehovha kungamuita kuti mude kubhabhatijwa. Asi rudo ungamuitazve kuti mutame kubhabhatijwa. Kuitisa kudini? Vonanyi muezaniso munganani jinotevera. Ngatiti munoda maningi ukama hwenyu ucikashandiri Jehovha pamwepo no shamwari jenyu, imwimwi mungathya  kuti kudari mukabhabhatijwa, ivona vanozomunyenya. (Mateu 10:37) Kana kuti, munoda maningi zviro zvomunoziva kuti zvinonyenyiwa ndi Mwari, movona zvecimunesera kuzvisiya. (Nduyo 97:10) Kangaije makakura meciceukija zvirovejeso zvinobatana no ciara co manyepo zve munodakara maningi pamunonghwinira mu zvirovejeso izvonazvo. Inga muviyo, movona zvecinesa kusiya kunghwinira mu zvirovejeso izvi zvicikadakajisi Jehovha. (1 VaKorinto 10:20, 21) Ngokudaro, mungajivhunjisa kudari: “Ndiyani zve zvicinyi zvinosisira maningi kwandiri?”

4. Ngocapi ciro cinosisira maningi cinozomuitisa kuti mubhabhatijwe?

⁴ Imwimwi muno zviro zvizinji zvakanaka zvingamuita kuti mude no kubongesera. Inga muezaniso, mucito majija Bhaibheri no Zvapupu zva Jehovha, kangaije maireremeja maningi Bhaibheri. Kangaije makatanga kusakurira rudo hwenyu na Jesu. Zvecivoneka kuti makwanisa kuziva Zvapupu zva Jehovha, kangaije munodakarira kupeja nguva navo. Asi kuda zvese izvi, azvirevi kuti munodikana kujipira kuna Jehovha, mobhabhatijwa. Ciro cinosisira maningi cinozomuitisa kuti mubhabhatijwe ngo cokuda Jehovha. Pamunoda Jehovha kupinda ciri cese haco, amuzotenderi kuti ciri cese kana mundhu ari wese amuphingaije pa kumushandira. Munozovona kuti rudo hwenyu kuna Jehovha, unozomundundira kuti mubhabhatijwe no kumubesera kuti murambe makagondeka kwaari pamunonga mapera kubhabhatijwa.

5. Muvhunjo wapi watinozodavira?

⁵ Jesu wakananga kuti tinodikana kuda Jehovha ngo mwoyo wedu wese, ngo mwiha wedu wese, ngo hwiru hwedu hwese no simba redu rese. (Marco 12:30) Mungajijisa kudini kuda Jehovha no kumureremeja kudaro? Patinorangarira ngo rudo una Jehovha kwatiri, zvinozotibesera kuti timuhwirijirevo rudo hwondhohwo. (1 Johani 4:19) Ngo api mazwiro amweni no zviito, zvamunozova nazvo pamunopera kusakurira rudo uwo unosisira? *

6. Mukuzwirana na VaRoma 1:20, ngo yapi njira imwe ya mungajijira ngo pamusoro pa Jehovha?

⁶ Jijanyi ngo pamusoro pa Jehovha mecishandisa zviro zvaakasika. (Verenganyi VaRoma 1:20; Apokalipsi 4:11) Rangarijisisanyi ngo pamusoro po uzivi wa Jehovha ku zviro zvaakasika, muti no zvinyama. Jijanyi ngo manera aakasika muviri wenyu unoshamaisa. (Nduyo 139:14) Zve rangariranyi ngo pamusoro po simba rakapa Jehovha zuva redu, irona ndi rimwe ro mabhirioni o ndhondho jiri kudenga. * (Isaia 40:26) Pamunorangarira ngo pamusoro po zvisikwa zva Jehovha, imwimwi munoguma pa kumureremeja maningi kamare. Pikija zvakadaro, kuziva kuti Jehovha ano zivo no simba i njira imwe yo kuvaka ushamwari hwenyu nae. Kuti muvake ushamwari hwakavanga na Jehovha, munodikana kuziva zvizinji ngo pamusoro pake.

7. Kuti rudo hwenyu uve wakavanga kuna Jehovha, munodikana kuva no cokwadi capi?

⁷ Munodikana kuva no cokwadi cokuti Jehovha anomuda kamare. Munovona kuti zvinonesa kutenda kuti Musiki wo mudenga no pasi ano muziva no kumutaja here? Kudari ndizvona, ceujanyi kuti Jehovha “aaripi ndhambo na ariwese wedu.” (Maitiro o Vapostori 17:26-28) Iyena “anoziva mwoyo yese,” zve anomugondesa inga zvakavhunjwa Soromona ndi Dhavhidhi, kuti: “Ukamupsaka, anojiregera  kuti umuwane.” (1 Kronike 28:9) Ngo zvokadi, thangwe rinomuitisa kuti mujije Bhaibheri ngo rokuti, Jehovha ‘wakamukwevera ngo rudo hwo unyasha.’ (Jeremia 31:3, Baiberi Mazwi Akacena aMwari) Pamunonga meciziva zvese zvamakaitihwa ndi Jehovha, rudo hwenyu kwaari unozovanga.

8. Mungakhombijisa kudini kuti munobonga Jehovha ngo rudo hwake?

⁸ Njira imwe yatingakhombija kuti tinobonga ngo rudo wa Jehovha, ngo yo kubhuya naye mu mukumbiro. Rudo hwenyu kuna Mwari unozoengejeka pamunomuvhunja ngo pamusoro po zvineso zvenyu no kumubonga ngo zvese zvaanomuitira. Zve ushamwari hwenyu na Jehovha, unozovanga pamunovona mupinguro jo mukumbiro jenyu. (Nduyo 116:1) Imwimwi munozova no cokwadi cokuti iyena anomuzwisisa. Asi kuti muve shamwari yo cike-ndi-cikevo na Jehovha, munodikana kuzwisisa zvaanoda no zvaacikadi zve ngenyi anoita zvakati kuti. Zve munodikana kuziva kuti ngozvapi zvaanoda kwamuri. Njira imwe basi ya mungawana zivo yondhoyo ngo yo kujija Soko rake, Bhabheri.

9. Mungakhombijisa kudini kuti munoreremeja Bhaibheri?

⁹ Jijiranyi kureremeja Soko ra Mwari, Bhaibheri. Bhaibheri ndirona basi rino cokwadi ngo pamusoro pa Jehovha no cinangwa caanaco kwamuri. Munokhombija kuti munoreremeja Bhaibheri, ngo kuriverenga mazuva ese, ngo kutanga manasirira musati maita jijo yenyu yo Bhaibheri no kushandisa zvamajijaro. (Nduyo 119:97, 99; Johani 17:17) Muno urongwa wo kuverenga Bhaibheri here? Munonasa kuuteveja, kuti muve no cokwadi cokuti muri kuverenga Bhaibheri njiku jese here?

10. Ngocapi cinowanika mu Bhaibheri basi?

¹⁰ Ciro cimwe cinowanika mu Bhaibheri basi ngo co kunanga ngo pamusoro po vandhu vakavona Jesu. Ndi cimwe cokwadi catinowana mu bhuku cinosanangura zvakaita Jesu kwamuri. Kudari mukajija ngo zvaakananga Jesu no kuita, imwimwi munozoda kuva no ushamwari nae.

11. Zvicinyi zvingamubesera kuti mude Jehovha?

¹¹ Kujijira kuda Jesu, kunozoita kuti rudo hwenyu na Jehovha uvange. Kuitisa kudini? Ngokuti Jesu wakanasa kukhombija mugariro  ja Babake. (Johani 14:9) Kudari mukajija zvizinji ngo pamusoro pa Jesu, munozonasa kuzwisisa manera anorangarira Jehovha no kuita. Amborangariranyi unyasha wakakhombija Jesu ku vandhu vaivoniwa ngo vamweni kuva vakaderera ngo ndava yokuti vainga varombo, vaihwaja zve vainga vakarembejeka. Amborangariranyizve ngo mazano aanomupa njiku jese no macinjire anoita upenyu hwenyu ngo kumuzwira.—Mateu 5:1-11; 7:24-27.

12. Kudari mukajija ngo zva Jesu, zvinozoita kuti muitenyi?

¹² Rudo hwenyu kuna Jesu unozova wakavanga kudari mukarangarira ngo pamusoro po muripo waakaita kuti zvishaishi zvedu zviregerehwe. (Mateu 20:28) Pamunozwisisa kuti Jesu waida kumufira, kangaije zvinozomuita kuti mukhauye zve mupsake kuregerehwa ndi Jehovha. (Maitiro o Vapostori 3:19, 20; 1 Johani 1:9) Kudari mukada maningi Jesu na Jehovha, munozodakarira kuva pamwepo no vandhu vanovadavo.

13. Jehovha anozomupenyi?

¹³ Jijiranyi kuda vaya vanoda Jehovha. Ukama hwenyu no shamwari jicikaripi Makristu, vanganesehwa kuzwisisa kuti ngenyi munoda kujipira kuna Jehovha. Kangaije vangatomunyenya. Asi, Jehovha anozomubesera ngo kumupa hama no hambzaji mu ungano. Mukaramba muri phedo navo, munozokhombijihwa rudo no besero ramunoda. (Marco 10:29, 30; Vaheberi 10:24, 25) Pa kufamba ko nguva, ukama hwenyu unozoshandiravo Jehovha zve vorarama mukuzwirana no ndhungamiro jake.—1 Pedru 2:12.

14. Inga zvinonangwa pana 1 Johani 5:3, ngozvapi zvamapfumbhura ngo pamusoro po ndhungamiro ja Jehovha?

¹⁴ Jijiranyi kureremeja no kushandisa ndhungamiro ja Jehovha. Mucito maziva Jehovha, maijitemera mwega kuti izvi zvakashata zve izvi zvakanaka, asi wari makwanisa kuvona kuti ndhungamiro ja Jehovha jakanakisisa kupinda jese. (Nduyo 1:1-3; verenganyi 1 Johani 5:3.) Amborangariranyi basi ngo pamusoro po mbhangiro yo mu Bhaibheri kuitira majimwamuna, vakaji, vabari, pomwe no vana. (VaEfeso 5:22–6:4) Pomakashandisa mbhangiro iji, makavona upenyu hwo mbhuri yenyu uciita nane? Pamunozwira ndhungamiro ja Jehovha ngo pamusoro po kukheta shamwari, mavona kuti maitisa nane mararamire enyu here? Muri mundhu ano mudakaro here? (Mazwi Akangwara 13:20; 1 VaKorinto 15:33) Zvingaita inga kuti pa muvhunjo jese iji madavira kuti hina.

15. Zvicinyi zvamungaita kudari munoda besero pa kushandisa ndhungamiro jo Bhaibheri?

¹⁵ Nguva jimweni, zvingatonesa kuziva mashandisire amungaita ndhungamiro jo Bhaibheri jo makajija. Izvo, ndizvona zvinoitisa kuti Jehovha ashandise sangano rake kuti atipe mabhuku akacijikira mu Bhaibheri kuti atibesere kuziva zvakanaka no zvakashata. (Vaheberi 5:13, 14) Pamunoverenga no kujija mabhuku aya, munozokwanisa kuvona kushanda no kubesa kwaanoita zve munozoda kuva divi ro sangano ra Jehovha.

16. Jehovha wakarongesa kudini vashandiri vake?

¹⁶ Jijiranyi kuda no kubesera sangano ra Jehovha. Jehovha wakaronga vandhu vake ngo ungano; Mwana wake Jesu, ndiyena musoro wo ungano jese. (VaEfeso 1:22; 5:23) Jesu wakagaja cikwata cidoko co vanarume vokuzojwa kuti vatungamirire pa kuronga basa raanoda kuita nyamasi uno. Jesu wakananga kuti vanarume avo vaizodanwa “muranda wakagondeka no wakangwara.” Ivona vano basa ro kumubesera kuti mugare phedo na Jehovha no kumungwarira ku divi ro umwari. (Mateu 24:45-47) Njira imwe inoshandisa muranda wakagondeka kuti amubesere ngo yo kuva no cokwadi co kuti ari kugaja vakuru vanokwanirisa kuti vamubesere. (Isaia 32:1, 2; Vaheberi 13:17;  1 Pedru 5:2, 3) Vakuru vano cido co kuita zvese zvavanokwanisa kuti vamubesere, kumuembezera no kumuita kuti muve phedo na Jehovha. Asi, ciro cikuru cavangamuitira ngo co kumubesera kuti mujijise vamweni ngo zva Jehovha.—VaEfeso 4:11-13.

17. Mukuzwirana no VaRoma 10:10, 13, 14, ngenyi tinobhuya no vamweni ngo zva Jehovha?

¹⁷ Beseranyi vamweni kuti vajijire kuda Jehovha. Jesu wakavhunja vateveri vake kuti vajijise vamweni ngo pamusoro pa Jehovha. (Mateu 28:19, 20) Tinozwira mupango uu ngokuti tinozviziva kuti tinodikana kuuzwira. Asi, rudo hwenyu na Jehovha paaunonga wecikura, munozova no mazwiro akafanana no akava no mupostori Pedhru na Johani, povakati: “Itisu atikwanisi kuregera kutokotesa bzo takavona no kuzwa.” (Maitiro o Vapostori 4:20) Kubesera vamweni kuti vajije ngo zva Jehovha kunoviisa mudakaro mukuru maningi. Rangariranyi basi mudakaro wakava na Firipi, paakabesera mu Etiyopi kuti ajije cokwadi co Bhaibheri, wogumira pa kubhabhatijwa! Pamunotevejera Firipi no kuzwira mupango wa Jesu, munozovonesa kuti munoda kuva umwe wo Zvapupu zva Jehovha. (Verenganyi VaRoma 10:10, 13, 14.) Mukuzwirana na izvi, mungatoitavo muvhunjo wakafanana no wakaitwa ngo mu Etiyopi wiya, paakati: “Bzinyi bzingandirambisa kubapatizwa?”—Maitiro o Vapostori 8:37.

18. Tinozovonenyi pa musoro unotevera?

¹⁸ Pamunosunga kubhabhatijwa munonga meciita ciro cinosisira maningi mu upenyu hwenyu. Zvecivoneka kuti i ciro cinosisira maningi, munodikana kunasa kuvona kuti kunorevenyi. Zvicinyi zvamunodikana kuziva ngo pamusoro po rubhabhatijo? Zvicinyi zvamunodikana kuita mucito mabhabhatijwa zve mukapera kubhabhatijwa? Muvhunjo iji, jinozodavihwa pa musoro unotevera.